Ca naca chee̱ benneꞌ dxexelé̱ꞌe̱ nen zruꞌule̱ꞌ
10
Nadxa bedxúaj Jesús xe̱zre Capernaum,
naꞌ guxíaje̱ꞌ naga nababa Judea xechaláꞌa xe̱gu Jordán naga dxalaj gubizra.
Naꞌ belezraga bénneache zan naga zua Jesús,
naꞌ xecha lasa naꞌ bsé̱dene̱ꞌ le̱ꞌ cáqueze dxune̱ꞌ.
2 Nadxa bal-la benneꞌ xudauꞌ fariseo caꞌ belezrine̱ꞌ lau Jesús,
naꞌ buluche̱be̱ꞌ Le̱ꞌ chee̱ da gun nne̱ Le̱ꞌ tu da quebe dxal-laꞌ nne̱ꞌ.
Buluche̱be̱ꞌ Le̱ꞌ:
―¿Waca tu benneꞌ xelé̱ꞌe̱ nen zruꞌule̱ꞌ?
3 Nadxa beche̱be Jesús:
―¿Bizra gunná beꞌe Moisés leꞌe?
4 Naꞌ belexeche̱be benneꞌ caꞌ:
―Be̱nna Moisés lataj gunézrujdxu zrúꞌuladxu tu xiche da dxenná na dxeláꞌadxu,
naꞌ gusandxu le̱ꞌ.
5 Nadxa Jesús guzre̱ꞌ le̱ꞌ:
―Caní gunná beꞌe Moisés laweꞌ da zaj naca zizraj lázrdaule leꞌe.
6 Gate nédxudauꞌ gate be̱n Dios xúgute̱ da dxeléꞌedxu,
naꞌ be̱ne̱ꞌ bénneache benneꞌ biu,
ne nuꞌula,
naꞌ gunné̱ꞌ:
7 “Chee̱ le̱ naꞌ benneꞌ biu naꞌ gusane̱ꞌ xruze xrne̱ꞌe̱ chee̱ gaque̱ꞌ tuze nen zruꞌule̱ꞌ,
8 naꞌ dxupe̱ꞌ xelaque̱ꞌ ca tuze benneꞌ.”
Caꞌ naca na,
québedxa zaj naca chupe̱ꞌ,
san tuze benneꞌ zaj naque̱ꞌ.
9 Chee̱ le̱ naꞌ netú benneꞌ quebe dxal-laꞌ xelé̱ꞌe̱ da nuchaga Dios.
10 Gate zaj zraꞌ lu xuꞌu benneꞌ caꞌ dxuse̱de Jesús buluche̱be̱ꞌ Le̱ꞌ xetú lasa ca naca chee̱ da nigá.
11 Naꞌ Jesús guzre̱ꞌ benneꞌ caꞌ:
―Che tu benneꞌ xelé̱ꞌe̱ nen zruꞌule̱ꞌ,
ne xezúale̱ne̱ꞌ nuꞌula xula,
dxíchuje̱ꞌ xrba chee̱ wechaga naꞌ laweꞌ da dxusebague̱ꞌ zruꞌule̱ꞌ nedxu naꞌ dul-la.
12 Cáꞌanqueze che tu nuꞌula gusane̱ꞌ benneꞌ chee̱ꞌ,
ne xezúale̱ne̱ꞌ benneꞌ xula,
la gázqueze dxíchuje̱ꞌ xrba chee̱ wechaga naꞌ da dxusebague̱ꞌ benneꞌ chee̱ꞌ dul-la.
Jesús dxenabe̱ꞌ Dios gun chawe̱ꞌe̱ bidu caꞌ
13 Nadxa bénneache caꞌ guleché̱ꞌe̱ bidu chee̱ꞌ caꞌ lau Jesús chee̱ xrua ne̱ꞌe̱ le̱beꞌ,
naꞌ benneꞌ caꞌ dxuse̱de Jesús gulezú lawe̱ꞌ dxeledil-le̱ꞌ benneꞌ caꞌ zaj naché̱ꞌe̱ bidu caꞌ.
14 Gate bleꞌe Jesús da dxelune̱ꞌ,
naꞌ bzre̱ꞌe̱,
ne guzre̱ꞌ le̱ꞌ:
―Le güe bidu caꞌ lataj xeleláꞌabeꞌ naga zuaꞌ.
Quebe guzágale-beꞌ laweꞌ da benneꞌ zaj naque̱ꞌ ca bidu caní xeluꞌe̱ naga dxenná bea Dios.
15 Da li dxapaꞌ leꞌe,
che tu benneꞌ quebe gape̱ꞌ ba láꞌana da dxenná bea Dios ca dxelún bidu caní,
cabataꞌ chuꞌu bénneaꞌ naga dxenná bea Le̱ꞌ.
16 Nadxa gucáꞌa Jesús bidu caꞌ,
ne bnide̱ꞌ-beꞌ.
Guxrúa ne̱ꞌe̱ le̱beꞌ,
naꞌ gunabe̱ꞌ Dios gun chawe̱ꞌe̱-beꞌ.
Benneꞌ cuideꞌ nape̱ꞌ da gunníꞌa dxuchálajle̱neꞌ Jesús
17 Gate bexúꞌu Jesús neza,
naꞌ guzá chegu tu benneꞌ biu,
naꞌ bzu zribe̱ꞌ lau Jesús,
ne bche̱be̱ꞌ Le̱ꞌ:
―Benneꞌ xrlátaje,
bi dxal-laꞌ gunaꞌ chee̱ gapaꞌ xel-la nabán zeajlí canna?
18 Jesús guzre̱ꞌ le̱ꞌ:
―¿Bizr chee̱ naꞌ dxuꞌu nedaꞌ xrlátaje?
Québedxa nu chiláꞌ naca xrlátaje.
Tuze Dios naque̱ꞌ xrlátaje.
19 Núnbeaquezuꞌ ca da bdxixruj bea Dios gate naꞌ gunné̱ꞌ:
Quebe quichjuꞌ xrba chee̱ wechaga naꞌ.
Quebe gutiuꞌ benneꞌ.
Quebe cuanuꞌ chee̱ benneꞌ.
Quebe nneuꞌ chee̱ nu benneꞌ da quebe naca na.
Quebe gagu lanuꞌ.
Gudapa ba láꞌana xra xrnaꞌu.
20 Nadxa bénneaꞌ beche̱be̱ꞌ:
―Benneꞌ wese̱de,
xúgute̱ da caní dxunaꞌ nácateaꞌ bidauꞌ.
21 Naꞌ Jesús gunné̱ꞌe̱ le̱ꞌ xrtandauꞌ,
ne guzre̱ꞌ le̱ꞌ:
―Tu da dxexázrjenuꞌ.
Guxíaj xeaje̱te xúgute̱ da napuꞌ,
naꞌ bnezruj benneꞌ xacheꞌ caꞌ dumí chee̱ na.
Nadxa gapuꞌ da gunníꞌa xabáa.
Naꞌ gudá,
gacuꞌ ca tu benneꞌ zéaje̱ꞌ chee̱ te̱ꞌe̱ xaga béguaj,
ne be̱n nedaꞌ tuze.
22 Gate bene̱ꞌ da nigá,
naꞌ benneꞌ cuideꞌ naꞌ bewiꞌine lázrele̱ꞌe̱,
naꞌ bexíaje̱ꞌ dxewíꞌine̱ꞌ laweꞌ da nácale̱ꞌe̱ benneꞌ gunníꞌa.
23 Nadxa Jesús gunné̱ꞌe̱ ni naze,
naꞌ guzre̱ꞌ benneꞌ caꞌ dxusé̱dene̱ꞌ:
―Sté̱bete̱ naca chuꞌu benneꞌ gunníꞌa naga dxenná bea Dios.
24 Belexebánele̱ꞌe̱ benneꞌ caꞌ dxuse̱de Jesús ca naca dizraꞌ gunná Jesús,
naꞌ Le̱ꞌ guzre̱ꞌ le̱ꞌ xetú lasa:
―Zríꞌinaꞌdauꞌ,
sté̱bete̱ naca xelúꞌu naga dxenná bea Dios benneꞌ dxuluxrén lazre̱ꞌ xel-la gunníꞌa.
25 Chadidxa te tu bea zren lu negue xecheꞌ quézcala chuꞌu tu benneꞌ gunníꞌa naga dxenná bea Dios.
26 Gate belén benneꞌ caꞌ dizraꞌ nigá,
naꞌ belexebánele̱ꞌe̱ne̱ꞌ,
naꞌ buluche̱be ljwezre̱ꞌ:
―¿Núzraqueze la xcaꞌ?
27 Jesús gunné̱ꞌe̱ benneꞌ caꞌ,
ne guzre̱ꞌ le̱ꞌ:
―Quebe sequeꞌ nu bénneꞌ gune̱ꞌ da nigá,
san Dios wazéquene̱ꞌ.
Quebe bi de̱ da quebe gaca gun Dios.
28 Nadxa Pedro guzre̱ꞌ Jesús:
―Xránantuꞌ,
netuꞌ ba bcáꞌanantuꞌ xúgute̱ da nápantuꞌ,
ne zéajle̱ntuꞌ Lueꞌ.
29 Naꞌ beche̱be Jesús:
―Da li dxapaꞌ leꞌe,
nútete̱ze benneꞌ gusane̱ꞌ lizre̱ꞌ,
u benneꞌ biche̱ꞌ,
u nuꞌula zane̱ꞌ,
u xre̱ꞌ,
u xrne̱ꞌe̱,
u zruꞌule̱ꞌ,
u zríꞌine̱ꞌ,
u xe̱zr la xu chee̱ꞌ ne̱ chiaꞌ nedaꞌ,
u ne̱ chee̱ dizraꞌ chaweꞌ chiaꞌ,
30 benneꞌ nigá siꞌe̱ naꞌa lu xe̱zr la xu nigá tu gaxúa cueꞌ caꞌ da siꞌe̱,
xuꞌu caꞌ,
ne benneꞌ biche̱ꞌ caꞌ,
ne nuꞌula zane̱ꞌ caꞌ,
ne xrne̱ꞌe̱ caꞌ,
ne xe̱zr la xu chee̱ꞌ caꞌ,
naꞌ weláu ziꞌ xúzrequeze bénneache le̱ꞌ.
Lu xe̱zr la xu da za zaꞌ wazíꞌqueze̱ꞌ xel-la nabán zeajlí canna.
31 Zánete̱ benneꞌ zaj naca naꞌa benneꞌ blau xelaque̱ꞌ ca benneꞌ bze̱be,
naꞌ zánete̱ benneꞌ zaj naca naꞌa ca benneꞌ bze̱be xelaque̱ꞌ benneꞌ blau.
Dxuchalaj Jesús xetú lasa ca gaca gate gatie̱ꞌ
32 Gate zaj xuꞌe̱ neza dxelegüene̱ꞌ zjaque̱ꞌ Jerusalén,
naꞌ Jesús zria lawe̱ꞌ lau benneꞌ caꞌ dxusé̱dene̱ꞌ.
Dxelezrebe benneꞌ caꞌ,
ne lu xel-la dxelezrebe zjácale̱ne̱ꞌ Le̱ꞌ.
Naꞌ da xula gucáꞌa Jesús benneꞌ chazrinnu caꞌ dxusé̱dene̱ꞌ,
naꞌ guzú lawe̱ꞌ dxe̱ꞌe̱ le̱ꞌ ca naca da dxal-laꞌ gaca chee̱ꞌ.
33 Naꞌ guzre̱ꞌ le̱ꞌ:
―¡Le naꞌ xque nigá!
Dxegüendxu zéajdxu Jerusalén naga tu benneꞌ gudée̱ꞌ nedaꞌ,
Benneꞌ Gulje̱ꞌ Bénneache,
lu naꞌ benneꞌ xíchaje̱ caꞌ chee̱ bxruze caꞌ,
ne lu naꞌ benneꞌ dxuluxuzájle̱ꞌe̱ da nadxixruj bea Dios,
naꞌ xelechugue̱ꞌ chiaꞌ chee̱ gatiaꞌ,
naꞌ wuludee̱ꞌ nedaꞌ lu naꞌ benneꞌ zituꞌ caꞌ.
34 Nadxa xelún le̱ꞌ chiaꞌ nedaꞌ,
ne xeluꞌe̱ nedaꞌ,
ne xuluzré̱ꞌe̱ nedaꞌ zrene̱ꞌ,
naꞌ xelutie̱ꞌ nedaꞌ.
Gate gaca chunna zra xebanaꞌ ládujla benneꞌ gate.
Jacobo ne Juan dxelenabe̱ꞌ Jesús bi gune̱ꞌ chee̱ꞌ
35 Nadxa Jacobo ne Juan,
zriꞌine Zebedeo,
belezrine̱ꞌ lau Jesús,
naꞌ gulé̱ꞌe̱ Le̱ꞌ:
―Benneꞌ Wese̱de,
dxaca lázrentuꞌ gunuꞌ chee̱ntuꞌ da nábantuꞌ Lueꞌ.
36 Nadxa bche̱be Jesús le̱ꞌ:
―¿Bi dxaca lázrele gunaꞌ?
37 Naꞌ belexeche̱be̱ꞌ Le̱ꞌ:
―Be̱nna netuꞌ lataj cuéꞌentuꞌ,
tuntuꞌ chaláꞌa xabe̱la chiuꞌ,
ne xetuntuꞌ chaláꞌa xéglala chiuꞌ naga nna beꞌu xabáa chiuꞌ.
38 Naꞌ guzre Jesús le̱ꞌ:
―Leꞌe quebe nézele da dxenábale.
¿Waca xíꞌajle leꞌe da naꞌ xiꞌaj nedaꞌ,
da zéaje̱ na ca naca da sácadxu?
¿Waca chuale nisa ca chuaꞌ nedaꞌ nisa lu xel-la gute?
39 Le̱ꞌ belexeche̱be̱ꞌ:
―Wácantuꞌ.
Naꞌ Jesús guzre̱ꞌ le̱ꞌ:
―Da li wéꞌajle ca naca da naꞌ xiꞌaj nedaꞌ,
ne chuale nisa ca chuaꞌ nedaꞌ nisa.
40 Chee̱ cuéꞌele chaláꞌa xabe̱la chiaꞌ u chaláꞌa xéglala chiaꞌ,
quegá nedaꞌ gunnaꞌ na.
Gaca chee̱ benneꞌ caꞌ ba nucueza Dios chee̱ꞌ.
41 Gate xechí benneꞌ caꞌ dxuse̱de Jesús belenne̱ꞌ na,
naꞌ belezré̱ꞌe̱ nen Jacobo ne Juan.
42 Jesús gunné̱ꞌ benneꞌ caꞌ,
naꞌ guzre̱ꞌ le̱ꞌ:
―Ba nézquezle ca dxelún benneꞌ dxelenná beꞌe benneꞌ xe̱zr la xu caꞌ.
Dxelún cuine̱ꞌ xrane benneꞌ xe̱zr la xu caꞌ.
Benneꞌ blau ládujla le̱ꞌ dxeziꞌe̱ ba neza xel-la dxenná bea chee̱ꞌ.
43 Quebe gaca caní ládujla leꞌe.
Che nu benneꞌ dxaca lazre̱ꞌ gaque̱ꞌ benneꞌ blau ládujla leꞌe,
benneꞌ nigá dxal-laꞌ gune̱ꞌ zrin chee̱ ljwezre̱ꞌ,
44 naꞌ che nu benneꞌ ládujla leꞌe dxaca lazre̱ꞌ gaque̱ꞌ benneꞌ xíchaje̱,
benneꞌ nigá dxal-laꞌ gaque̱ꞌ ca tu benneꞌ nadaꞌu chee̱ gune̱ꞌ zrin chee̱ xúgute̱ ljwezre̱ꞌ.
45 Caní gaca na laweꞌ da cáꞌanqueze nedaꞌ,
Benneꞌ Gulje̱ꞌ Bénneache,
blaꞌa,
quegá chee̱ xelún bénneache zrin chiaꞌ nedaꞌ.
Blaꞌa chee̱ gunaꞌ zrin chee̱ bénneache,
ne chee̱ guzúaꞌ xel-la nabán chiaꞌ chee̱ guseláꞌ benneꞌ zan.
Dxexún Jesús tu benneꞌ la chul-la le̱ꞌ Bartimeo
46 Nadxa belezrine̱ꞌ xe̱zre Jericó.
Gate naꞌ bedxúaj Jesús xe̱zre nigá nen benneꞌ caꞌ dxusé̱dene̱ꞌ,
ne nen benneꞌ zante̱,
naꞌ zua tu benneꞌ la chul-la le̱ꞌ Bartimeo,
zriꞌine Timeo,
dxeꞌe̱ dxuꞌa neza dxenabe̱ꞌ gunaꞌ.
47 Naꞌ ca bénne̱ꞌ dxedé Jesús,
benneꞌ Nazaret,
ga naꞌ,
naꞌ benneꞌ la chul-la nigá guzú lawe̱ꞌ dxenné̱ꞌ zizraj:
―¡Jesús,
Zriꞌine David,
bexache lazreꞌ nedaꞌ!
48 Benneꞌ zan caꞌ guledil-le̱ꞌ le̱ꞌ chee̱ sue̱ꞌ zrize,
naꞌ le̱ꞌ zízrajdxa gunné̱ꞌ:
―¡Zriꞌine David,
bexache lazreꞌ nedaꞌ!
49 Nadxa gugá Jesús,
naꞌ gunné̱ꞌ:
―Le nne̱ le̱ꞌ.
Naꞌ gulenné̱ꞌ benneꞌ la chul-la naꞌ,
gulé̱ꞌe̱ le̱ꞌ:
―Bdipa lazruꞌ.
Guxasa laweꞌ da dxenné̱ꞌ lueꞌ.
50 Nadxa bzale̱ꞌ lazxeꞌ naxrúa cuzre̱ꞌ chaláꞌala,
naꞌ guxritie̱ꞌ chee̱ zrine̱ꞌ lau Jesús.
51 Nadxa Jesús gunábene̱ꞌ le̱ꞌ:
―¿Bizra dxaca lazruꞌ gunaꞌ chiuꞌ?
Naꞌ gunná benneꞌ la chul-la:
―Benneꞌ Wese̱de,
dxaca lazraꞌ xexunuꞌ xiaj lawaꞌ.
52 Naꞌ Jesús guzre̱ꞌ le̱ꞌ:
―Waca xexíajuꞌ.
Bache bexacuꞌ laweꞌ da guxéajle̱ꞌu chiaꞌ.
La bleꞌete̱ benneꞌ la chul-la naꞌ,
naꞌ guxíajle̱ne̱ꞌ Jesús la neza.