Dxuꞌu Jesús xe̱zre Jerusalén
11
Gate belezrine̱ꞌ gáguze naga dxeꞌ xe̱zre Jerusalén,
ne zaj xuꞌe̱ la neza naga zaj dxeꞌ xe̱zre Betfagé,
ne xe̱zre Betania zran xiꞌa chee̱ xaga olivo caꞌ,
naꞌ Jesús gusel-le̱ꞌ chupa benneꞌ caꞌ dxusé̱dene̱ꞌ,
2 naꞌ guzre̱ꞌ le̱ꞌ:
―Le chjaca lu xé̱zredauꞌ da dxeꞌ tu chi naꞌ,
naꞌ gate zrinle naꞌ,
cheajxrácale tu burro daꞌbaꞌ xaga,
bea naꞌ netú benneꞌ quebe ne cuie̱ꞌ le̱baꞌ.
Le se̱zre-baꞌ,
ne le che̱ꞌ-baꞌ nigá.
3 Che nu benneꞌ nabe̱ꞌ leꞌe bizr chee̱ naꞌ dxesé̱zrele-baꞌ,
xé̱gale le̱ꞌ:
“Xránadxu dxechine̱ꞌ-baꞌ”,
naꞌ la xesél-laꞌte̱ꞌ le̱baꞌ.
4 Nadxa xjaque̱ꞌ,
ne xeajlexraque̱ꞌ burro naꞌ daꞌbaꞌ xaga dxuꞌa dxa xuꞌu cuita neza,
naꞌ gulesé̱zre̱ꞌ-baꞌ.
5 Nadxa bal-la benneꞌ zaj zre̱ꞌe̱ naꞌ gulé̱ꞌe̱ le̱ꞌ:
―¿Bizraꞌ dxunle?
¿Bizr chee̱ naꞌ dxesé̱zrele búrruaꞌ?
6 Nadxa le̱ꞌ gulé̱ꞌe̱ benneꞌ caꞌ ca ba gunnáqueze Jesús,
naꞌ belúe̱ꞌ le̱ꞌ lataj.
7 La belexeché̱ꞌe̱te̱ꞌ búrruaꞌ lau Jesús,
naꞌ buluzríe̱ꞌ zra lane̱ꞌ cúzrubaꞌ,
naꞌ guzría Jesús le̱baꞌ.
8 Benneꞌ zante̱ gulechíluje̱ꞌ xicha chee̱ꞌ,
ne xladxe̱ꞌ la neza,
naꞌ benneꞌ xula gulechugue̱ꞌ zinaꞌ da gulíxrue̱ꞌ la neza.
9 Naꞌ benneꞌ caꞌ zaj zrie̱ꞌ laweꞌ,
ne benneꞌ caꞌ zjaque̱ꞌ bze̱be,
gulezú lawe̱ꞌ dxelenné̱ꞌ zizraj:
―¡Gaca ba!
¡Láꞌazxa naca benneꞌ ze̱ꞌe̱,
nasel-la Xránadxu Dios Le̱ꞌ!
10 ¡Láꞌazxa naca xel-la dxenná bea da zaꞌ,
xel-la dxenná bea chee̱ xradxu David!
¡Gaca ba Dios!
11 Caꞌan guca gate naꞌ guxúꞌu Jesús xe̱zre Jerusalén,
naꞌ guxúꞌe̱ lu xudauꞌ.
Ca gudé gunné̱ꞌe̱ xúgute̱ da zaj nnita du cuite̱ꞌ,
naꞌ bezé̱ꞌe̱ zexíaje̱ꞌ xe̱zre Betania nen benneꞌ chazrinnu caꞌ dxusé̱dene̱ꞌ,
laweꞌ da ba zeaj dxezréꞌ.
Jesús dxuguꞌe̱ deꞌ xaga higo
12 Gute xu zra xula gate naꞌ gusáꞌaque̱ꞌ xe̱zre Betania,
gudún Jesús.
13 Naꞌ bléꞌene̱ꞌ zítuꞌla dxeꞌ tu xaga higo zria na lagaꞌ,
naꞌ xeajnné̱ꞌe̱ che zria da zixre lu xaga naꞌ,
san quebe bi zria na.
Lágaze zria na laweꞌ da quebe ne zrin zra cuía na da zixre.
14 Nadxa Jesús guzre̱ꞌ xaga higo naꞌ:
―Cabátadxa nu gagu da zixre chiuꞌ.
Benneꞌ caꞌ dxuse̱de Jesús belénqueze̱ꞌ na.
Jesús dxexún lbe̱ꞌe̱ lu xudauꞌ
15 Ca gudé naꞌ belexezrine̱ꞌ xe̱zre Jerusalén.
Ca guxúꞌu Jesús lu xudauꞌ,
guzú lawe̱ꞌ dxulague̱ꞌ lu xudauꞌ benneꞌ zaj zre̱ꞌe̱ we̱te,
ne benneꞌ zaj zre̱ꞌe̱ wewaꞌu naꞌ.
Naꞌ bdxixre̱ꞌ blaga chee̱ benneꞌ weche̱ꞌe̱ dumí chee̱ benneꞌ zituꞌ,
ne bdxixre̱ꞌ naga dxelebéꞌ benneꞌ we̱te bgúgudu caꞌ.
16 Quebe be̱ꞌe̱ lataj nu benneꞌ xudée̱ꞌ xua caꞌ lu xudauꞌ.
17 Nadxa bsé̱dene̱ꞌ bénneache caꞌ,
dxenné̱ꞌ:
―Lu xiche láꞌazxa dxenná Dios:
“Lizraꞌ gaca na tu xuꞌu naga xuluchálajle̱ Dios benneꞌ záꞌaque̱ꞌ xúgute̱ xe̱zre.”
Leꞌe ba nunle lizraꞌ ca tu lizre benneꞌ gubán caꞌ.
18 Naꞌ benneꞌ xíchaje̱ caꞌ chee̱ bxruze caꞌ,
ne benneꞌ dxuluxuzájle̱ꞌe̱ ca da nadxixruj bea Dios belenne̱ꞌ,
naꞌ gulezú lawe̱ꞌ dxelexíluje̱ꞌ ájala gaca xelútete̱ꞌ Jesús laweꞌ da dxelezrebe̱ꞌ Le̱ꞌ.
Caꞌan guca laweꞌ da dxelexebane xúgute̱ bénneache ca naca da dxuse̱de Jesús le̱ꞌ.
19 Ca gula chizrela,
Jesús bezé̱ꞌe̱ lu xe̱zre.
Dxebizre xaga higo
20 Ca gula zra xula che zílala,
naꞌ Jesús,
ne benneꞌ caꞌ dxusé̱dene̱ꞌ belexedée̱ꞌ naꞌ,
naꞌ beleléꞌene̱ꞌ xaga higo naꞌ,
ba nabizre na dute̱ lue na.
21 Nadxa xeajsá lazre Pedro,
naꞌ guzre̱ꞌ Jesús:
―Benneꞌ wese̱de,
gunnáꞌxque xaga higo nigá da gulúꞌu na deꞌ.
Bache gubizre na.
22 Jesús gunné̱ꞌ:
―Le cheajlí lazre Dios.
23 Da li dxapaꞌ leꞌe,
che nútete̱zele nnale,
xe̱le xiꞌa nigá:
“Cuasa lueꞌ nigá,
xeajchúꞌu lu nísadauꞌ”,
ne che quebe dxun chupa lázrele,
naꞌ chéajle̱le waca da ba gunnale,
naꞌ gácaqueze na.
24 Chee̱ le̱ naꞌ dxapaꞌ leꞌe,
xúgute̱ da nábale Dios gate dxuchálajle̱le Le̱ꞌ,
che chéajle̱le ba guzile na,
caꞌan gácaqueze.
25 Gate naꞌ dxuchálajle̱le Dios,
che dxezráꞌale nu benneꞌ,
le gunite lau chee̱ bénneaꞌ chee̱ cáꞌanqueze Xrale zue̱ꞌ xabáa gunite lawe̱ꞌ dul-la da nabágale.
26 Che quebe gunite laule chee̱ bénneaꞌ,
Xrale zue̱ꞌ xabáa quebe gunite lawe̱ꞌ dul-la da nabágale.
Ca naca xel-la dxenná bea da napa Jesús
27 Nadxa belexezrine̱ꞌ xe̱zre Jerusalén,
naꞌ ca dxedá Jesús le̱ꞌaj xudauꞌ,
naꞌ gulebiga lau Le̱ꞌ benneꞌ xíchaje̱ caꞌ chee̱ bxruze caꞌ,
ne benneꞌ dxuluxuzájle̱ꞌe̱ da nadxixruj bea Dios,
ne benneꞌ gula caꞌ.
28 Naꞌ benneꞌ caní gulenábene̱ꞌ Jesús:
―¿Bizra xel-la dxenná bea napuꞌ dxunuꞌ da caní?
¿Nuzra be̱nna lueꞌ xel-la dxenná bea nigá?
29 Naꞌ beche̱be Jesús:
―Cáꞌanqueze nedaꞌ de̱ tu da nábedaꞌ leꞌe.
Che xeché̱bele chiaꞌ,
nadxa xapaꞌ leꞌe ca naca xel-la dxenná bea da napaꞌ dxunaꞌ da caní.
30 ¿Nuzra gusel-la Juan bchue̱ꞌ bénneache nisa?
¿Dios che bénneache?
Le xeche̱be naꞌa.
31 Nadxa gulezú lau benneꞌ caꞌ dxuluchálaje̱ꞌ le̱ze̱ꞌ,
dxelé̱ ljwezre̱ꞌ:
―Che xe̱dxu Le̱ꞌ,
Dios gusel-le̱ꞌ le̱ꞌ,
naꞌ nnáqueze̱ꞌ:
“¿Bizr chee̱ naꞌ quebe guxéajle̱le chee̱ꞌ?”
32 Che nnadxu bénneache gulesel-le̱ꞌ le̱ꞌ,
dxal-laꞌ zrébedxu da xelún benneꞌ xe̱zre caꞌ.
Caní gulenné̱ꞌ laweꞌ da xúgute̱ benneꞌ xe̱zre nigá dxeléajle̱ꞌe̱ guca Juan benneꞌ bchálaje̱ꞌ waláz chee̱ Dios.
33 Caꞌan guca,
gulenná benneꞌ caꞌ,
dxelé̱ꞌe̱ Jesús:
―Quebe nézentuꞌ.
Nadxa gunná Jesús,
dxe̱ꞌe̱ le̱ꞌ:
―Cáꞌanqueze nedaꞌ quebe nniaꞌ ca naca xel-la dxenná bea da napaꞌ dxunaꞌ da caní.