Dxaca laní chee̱ wechaga naꞌ lu xe̱zre Caná
2
Zra guxunne zra,
naꞌ guca laní chee̱ wechaga naꞌ lu xe̱zre Caná da nababa Galilea.
Xrna Jesús zue̱ꞌ naꞌ,
2 naꞌ zua nu gunné̱ Jesús,
ne benneꞌ caꞌ dxusé̱dene̱ꞌ lu laní naꞌ.
3 Bebizre xrise uva wal-la,
naꞌ xrna Jesús guzre̱ꞌ Le̱ꞌ:
―Québedxa bi de̱ xrise uva wal-la xeléꞌaje̱ꞌ.
4 Jesús beche̱be̱ꞌ:
―Núꞌuladauꞌ,
¿bizr chee̱ naꞌ dxuꞌu nedaꞌ caní?
Quebe ne zrin zra guléꞌe lau da nacaꞌ.
El milagro en Caná (Juan 2.1-12)
5 Xrne̱ꞌe̱ guzre̱ꞌ benneꞌ we̱n zrin caꞌ:
―Le gun ca naca da xe̱ꞌe̱ leꞌe.
6 Zaj nnita xrupa xesuꞌ xiaj naꞌ,
da dxuluchine judío caꞌ gate dxelibe niꞌa ne̱ꞌe̱ ca naca da zjácale̱ne̱ꞌ.
Tu tu xesuꞌ xiaj caꞌ dxeluzru na chupa u chunna dxeꞌe nisa.
7 Jesús guzre̱ꞌ benneꞌ we̱n zrin caꞌ:
―Le gusezrá nisa xesuꞌ xiaj caní.
―Le caꞌa na,
naꞌa,
ne le gua na lau benneꞌ ze̱ꞌ dxuꞌa ga dxelawe̱ꞌ.
Caꞌan belune̱ꞌ.
9 Bénneaꞌ zue̱ꞌ dxuꞌa ga dxelawe̱ꞌ bxue̱ꞌ nisa naꞌ da bexaca na xrise uva wal-la,
ne quebe nézene̱ꞌ ga za na.
Benneꞌ we̱n zrin caꞌ zaj nézene̱ꞌ ga za na laweꞌ da gulegué̱ꞌe̱ nisa naꞌ.
Nadxa bénneaꞌ zue̱ꞌ dxuꞌa ga dxelawe̱ꞌ gunné̱ꞌ benneꞌ wechaga naꞌ,
10 naꞌ guzre̱ꞌ le̱ꞌ:
―Xúgute̱ benneꞌ dxelebéaje̱ꞌ nedxu xrise uva wal-la nácadxa chaweꞌ,
naꞌ gate ba guléꞌajle̱ꞌe̱ benneꞌ caꞌ zaj zre̱ꞌe̱ laní,
nadxa dxelebéaje̱ꞌ xrise uva wal-la quebe zúateca chaweꞌ.
Lueꞌ bcuézaquezuꞌ xrise uva wal-la chaweꞌ naꞌ,
ne guléajuꞌ na naꞌa.
11 Da nigá da be̱n Jesús lu xe̱zre Caná da nababa Galilea naca na tu xel-laꞌ waca zrente̱ da be̱ne̱ꞌ nedxu,
da bleꞌe na xel-laꞌ szren chee̱ꞌ,
naꞌ benneꞌ caꞌ dxusé̱dene̱ꞌ guléajle̱ꞌe̱ chee̱ꞌ.
12 Gudé naꞌ Jesús bezé̱ꞌe̱ zexíaje̱ꞌ xe̱zre Capernaum,
zéajle̱ xrne̱ꞌe̱ Le̱ꞌ nen benneꞌ biche̱ꞌ caꞌ,
ne benneꞌ caꞌ dxusé̱dene̱ꞌ.
Naꞌ gulezúe̱ꞌ naꞌ zaneꞌ zra.
Jesús dxucáꞌana chawe̱ꞌ chaleꞌaj xudauꞌ
13 Naꞌ Jesús guxíaje̱ꞌ xe̱zre Jerusalén laweꞌ da ba za Laní Pascua gate benneꞌ judío caꞌ dxulusá lazre̱ꞌ ca be̱n Dios,
bebéaje̱ꞌ xra xrtawe̱ꞌ caꞌ lu xe̱zr la xu Egipto.
Jesús en el patio del templo (Juan 2.13-25)
14 Lu xe̱zre Jerusalén bléꞌene̱ꞌ lu chaleꞌaj xudauꞌ naꞌ zaj zraꞌ benneꞌ dxelexutie̱ꞌ be̱zre caꞌ,
ne zrilaꞌ caꞌ,
ne bgúgudu caꞌ,
béadu caꞌ dxelutie̱ꞌ lau Dios.
Cáꞌanqueze bléꞌene̱ꞌ naꞌ benneꞌ dxuluxuché̱ꞌe̱ dumí chee̱ xe̱zr zituꞌ caꞌ.
15 Gate bleꞌe Jesús da caní,
naꞌ bguꞌe̱ du caꞌ da güe̱ꞌe̱ benneꞌ caꞌ,
naꞌ bebéaje̱ꞌ ca naca benneꞌ caꞌ tu zrente̱ nen be̱zre chee̱ꞌ caꞌ,
ne zrilaꞌ chee̱ꞌ caꞌ.
Naꞌ gudxúꞌune̱ꞌ lu xula dumí chee̱ benneꞌ caꞌ dxuluxuché̱ꞌe̱ dumí,
ne bdxixre̱ꞌ blagaꞌ caꞌ chee̱ benneꞌ caꞌ.
16 Naꞌ guzre̱ꞌ benneꞌ caꞌ dxelexutie̱ꞌ bgúgudu caꞌ:
―¡Le xebéaj da caní!
Quebe gunle lizre Xraꞌ ca tu laweꞌ xiꞌa.
17 Nadxa benneꞌ caꞌ dxuse̱de Jesús xeajlesá lazre̱ꞌ da naxúaj na lu xiche chee̱ Dios,
da dxenná na:
Dxácate̱ ziꞌ lázrdawaꞌ laweꞌ da dxéꞌle̱ꞌa gunne xue chee̱ lizruꞌ.
18 Nadxa judío blau caꞌ buluche̱be̱ꞌ Jesús:
―¿Bi xel-laꞌ waca da za xabáa guléꞌenuꞌ netuꞌ da guléꞌe na napuꞌ xel-laꞌ dxenná bea dxunuꞌ da caní?
19 Beche̱be Jesús:
―Le guzría xiꞌ xudauꞌ nigá,
naꞌ nedaꞌ,
te chunna zra xechisaꞌ na.
20 Nadxa judío caꞌ gulé̱ꞌe̱ Le̱ꞌ:
―Xrupe xun iza ba zeaj dxelune̱ꞌ xudauꞌ nigá,
naꞌ Lueꞌ,
¿xechisuꞌ na chunna zraze?
21 Bchalaj Jesús chee̱ xudauꞌ naꞌ da naca na be̱l-laꞌ dxen chee̱ꞌ.
22 Chee̱ le̱ naꞌ,
gate bebán Jesús ládujla benneꞌ gate,
naꞌ benneꞌ caꞌ bsé̱dene̱ꞌ xeajlesá lazre̱ꞌ ca da gunné̱ꞌ,
naꞌ guléajle̱ꞌe̱ chee̱ da naxúaj na lu xiche chee̱ Dios ca naca chee̱ Jesús,
ne chee̱ da guzre Jesús le̱ꞌ.
Jesús núnbeꞌe̱ xúgute̱ bénneache
23 Gate zua Jesús xe̱zre Jerusalén lu Laní Pascua chee̱ judío caꞌ,
naꞌ benneꞌ zan guléajle̱ꞌe̱ chee̱ꞌ gate beleléꞌene̱ꞌ ca naca xel-laꞌ waca zren caꞌ da dxune̱ꞌ.
24 Jesús quebe bde cuine̱ꞌ lu naꞌ benneꞌ caꞌ laweꞌ da nézquezne̱ꞌ quegá xúgute̱ benneꞌ caꞌ dxeléajle̱ꞌe̱ chee̱ꞌ.
25 Quebe guchínene̱ꞌ nu benneꞌ xe̱ꞌe̱ Le̱ꞌ ca zaj naca bénneache laweꞌ da nézquezne̱ꞌ ca da zaj xuꞌu xichaj lázxdau bénneache.