DA CAꞌ BELÚN BENNEꞌ GUBÁZ CHEE̱ CRISTO
Dios nache̱be lazre̱ꞌ sel-le̱ꞌ Beꞌ Láꞌazxa
1
Lueꞌ,
Teófilo,
bzuajaꞌ chiuꞌ lu xiche nedxu ca naca xúgute̱ da guzú lau Jesús dxune̱ꞌ,
ne dxusé̱dene̱ꞌ nédxudaute̱,
2 cadxa begüéne̱ꞌ xabáa.
Gate za xezé̱ꞌe̱ xexíaje̱ꞌ xabáa guqué̱ꞌe̱ gubáz chee̱ꞌ caꞌ,
naꞌ zúale̱ Beꞌ Láꞌazxa Le̱ꞌ guzre̱ꞌ benneꞌ caꞌ ca da dxal-laꞌ xelune̱ꞌ.
3 Ca gudé gutie̱ꞌ,
Jesús náꞌqueze bleꞌe lawe̱ꞌ benneꞌ caꞌ,
ne laweꞌ chua zra bleꞌe lawe̱ꞌ benneꞌ caꞌ,
naꞌ bléꞌene̱ꞌ da zan da dxelunna bea na naca bane̱ꞌ,
ne bchálajle̱ne̱ꞌ benneꞌ caꞌ ca dxal-laꞌ nna bea Dios.
4 Gate ne zúale̱ Jesús benneꞌ gubáz caꞌ,
gunné̱ xuene̱ꞌ le̱ꞌ quebe xesíꞌaque̱ꞌ xe̱zre Jerusalén.
Naꞌ guzre̱ꞌ benneꞌ caꞌ:
―Le cueza ca da guche̱be lazreꞌ Xraꞌ gunne̱ꞌ chee̱le,
ca gunníquezaꞌ nedaꞌ.
Jesús sube al cielo (Hechos 1.4-11)
5 Da li Juan bchue̱ꞌ bénneache nisa,
san lu zra caní gaca chee̱le ca da zéaje̱ xel-laꞌ dxedxúa nisa,
xida Beꞌ Láꞌazxa xedajsúe̱ꞌ lu xichaj lázrdaule.
Jesús dxegüéne̱ꞌ xabáa
6 Gate naꞌ zaj nazrague̱ꞌ nen Jesús,
naꞌ buluche̱be̱ꞌ Le̱ꞌ:
―Xran,
¿güe Dios lataj nna béaqueze xe̱zre Israel lu zra caní?
7 Naꞌ beche̱be Jesús:
―Quebe naca chee̱le nézele bátala,
u bi zra gun Dios da caꞌ tuze Le̱ꞌ nape̱ꞌ xel-laꞌ waca gune̱ꞌ.
8 Gate xida Beꞌ Láꞌazxa súale̱ne̱ꞌ leꞌe,
sile xel-laꞌ waca,
naꞌ chéajle cheajchálajle da naca chiaꞌ lu xe̱zre Jerusalén,
ne ca naca naga nababa Judea,
ne naga nababa Samaria,
ne ca nácaqueze xe̱zr la xu nigá.
9 Ca gudé gunné̱ꞌ da nigá,
ne dxácate̱ dxelennáꞌ benneꞌ caꞌ Le̱ꞌ,
begüén Jesús xabáa,
naꞌ ca bexuꞌe̱ tu lu beuj benite Jesús lau benneꞌ caꞌ.
10 Ne zaj zraꞌ benneꞌ caꞌ dxelenné̱ꞌe̱ dxácate̱ dxegüén Jesús,
beleláꞌ chupa benneꞌ zaj nácue̱ꞌ ladxeꞌ chiche lau benneꞌ caꞌ,
11 naꞌ gulé̱ꞌe̱ benneꞌ gubáz caꞌ:
―Leꞌe,
benneꞌ Galilea,
¿bizr chee̱ naꞌ ze̱le dxennaꞌle xabáa?
Jesús nigáqueze begüéne̱ꞌ zexíaje̱ꞌ xabáa,
bezé̱ꞌe̱ ládujla leꞌe,
welé̱ꞌe̱ xetú cáqueze bleꞌele Le̱ꞌ zexíaje̱ꞌ.
Dxelequé̱ꞌe̱ Matías chee̱ xedée̱ꞌ waláz chee̱ Judas
12 Nadxa besíꞌaca benneꞌ gubáz caꞌ lu Xiꞌa Xaga Olivo,
ne belexezrine̱ꞌ Jerusalén,
da quebe naca na zituꞌ,
san dxeꞌ cátite̱ze da dxunna da nadxixruj bea na lataj xesíꞌaque̱ꞌ lu zra dxulupáꞌane̱ꞌ.
13 Gate belexezrine̱ꞌ lu xe̱zre naꞌ,
belexegüéne̱ꞌ xuꞌu sibe naga zaj zue̱ꞌ.
Benneꞌ caní zaj naque̱ꞌ Pedro,
ne Jacobo,
ne Juan,
ne Andrés,
ne Felipe,
ne Tomás,
ne Bartolomé,
ne Mateo,
ne Jacobo zriꞌine Alfeo,
ne Simón,
bénneaꞌ dxedábague̱ꞌ benneꞌ Roma caꞌ,
ne Judas,
zriꞌine Jacobo.
14 Xúgute̱ benneꞌ caní tu dxelezrágazqueze̱ꞌ nen benneꞌ biche Jesús,
ne María xrna Jesús,
ne xebal-la nuꞌula caꞌ,
chee̱ xuluchálajle̱ne̱ꞌ Dios.
15 Lu zra caꞌ Pedro guzé̱ꞌ laduj bi bíchedxu caꞌ,
zaj naque̱ꞌ ca tu gaxúa galaj bénneache,
naꞌ guzre̱ꞌ le̱ꞌ:
16 ―Leꞌe,
bi bíchaꞌdauꞌ,
be̱n na ba xen guca li ca da gunná Beꞌ Láꞌazxa lu xiche chee̱ Dios,
da naꞌ gunná David waláz chee̱ Dios ca naca da dxal-laꞌ gaca chee̱ Judas,
bénneaꞌ guché̱ꞌe̱ benneꞌ caꞌ gule̱l-le̱ꞌ Jesús.
17 Judas nigá guzúale̱ne̱ꞌ dxiꞌu tu zren,
ne guque̱ꞌ dxiꞌu tuze lu zrin nigá.
18 Bxaꞌu tu cueꞌ xe̱zr la xu ca naca lazruj chee̱ Judas,
da guzíꞌ lu ne̱ꞌe̱ chee̱ da cale̱la da be̱ne̱ꞌ.
Naꞌ benneꞌ nigá xeajcházie̱ꞌ suxíchajla,
ne gutín le̱ꞌe̱,
naꞌ bdxuaj ca naca zrájlue̱ꞌ.
19 Xúgute̱ benneꞌ zaj zre̱ꞌe̱ Jerusalén belenne̱ꞌ da nigá,
naꞌ buluzúe̱ꞌ la xe̱zr la xu naꞌ Acéldama,
da zéaje̱ na:
Xe̱zr La Xu Chee̱ Dxen.
20 Guca li ca da dxal-laꞌ gaca chee̱ꞌ laweꞌ da naxúaj lu xiche láꞌazxa naga zaj naxúaj salmo caꞌ,
da dxenná na:
Xegáꞌana cáꞌaze lizre̱ꞌ,
ne quebe nu chiláꞌ sua naꞌ.
Cáꞌanqueze dxenná na:
Xetú benneꞌ tée̱ꞌ waláz chee̱ꞌ.
21 ’Zaj zraꞌ nigá benneꞌ caꞌ gusáꞌacale̱ne̱ꞌ dxiꞌu ca naca dxácate̱ guzúale̱ Jesús dxiꞌu.
22 Guzú lau na gate bchua Juan Jesús nisa,
cadxa bzrin zra begüéne̱ꞌ xabáa.
Dxun na ba xen tu benneꞌ caní gaque̱ꞌ dxiꞌu tuze chee̱ xeche̱be̱ꞌ ca guca gate bebán Jesús lu xel-laꞌ gute.
23 Nadxa gulebéaje̱ꞌ chupa benneꞌ caꞌ,
José ne Matías.
José naꞌ lé̱queze̱ꞌ Barsabás ne lé̱queze̱ꞌ Justo.
24 Buluchálajle̱ne̱ꞌ Dios,
gulenné̱ꞌ:
―Xran,
Lueꞌ nézqueznuꞌ ca naca da xuꞌu lu xichaj lázxdau xúgute̱ bénneache.
Bleꞌe netuꞌ nula benneꞌ chupa caní ba nabéajuꞌ Lueꞌ,
25 chee̱ gaque̱ꞌ gubáz chiuꞌ,
ne xedée̱ꞌ waláz chee̱ Judas,
bénneaꞌ bnitie̱ꞌ da naca chee̱ꞌ laweꞌ da be̱ne̱ꞌ dul-la,
naꞌ bexíaje̱ꞌ lataj naga naca chee̱ꞌ.
26 Nadxa gulebéaje̱ꞌ da gaca bea na,
naꞌ bexala Matías,
naꞌ gúcate̱ꞌ tuze benneꞌ chinéaj gubáz caꞌ.