DA BZUAJ SAN PABLO CHEE̱ BI CHEE̱ CRISTO ZAJ ZRABEꞌ XE̱ZRE ROMA
Pablo dxugape̱ꞌ diuzre bi chee̱ Cristo zaj zrabeꞌ Roma
1
Nedaꞌ,
Pablo,
nacaꞌ we̱n zrin chee̱ Jesucristo.
Dios bláwizre̱ꞌ nedaꞌ chee̱ gacaꞌ gubáz chee̱ꞌ,
ne guqué̱ꞌe̱ nedaꞌ chee̱ guzendaꞌ bénneache dizraꞌ chaweꞌ chee̱ꞌ.
2 Dios guche̱be lazre̱ꞌ sel-le̱ꞌ dizraꞌ chaweꞌ nigá gate nate lu dizraꞌ láꞌazxa chee̱ꞌ lu naꞌ benneꞌ caꞌ buluchálaje̱ꞌ waláz chee̱ꞌ.
3 Dizraꞌ chaweꞌ nigá dxuléꞌe na ca naca chee̱ Xránadxu Jesucristo,
Zriꞌine Dios.
Lu be̱laꞌ dxen chee̱ꞌ naque̱ꞌ zriꞌine zre sua wenná bea David.
4 Lu beꞌ nácaqueze̱ꞌ da naca na láꞌazxa,
naque̱ꞌ Zriꞌine Dios.
Dios bléꞌene̱ꞌ naca caní gate bsebane̱ꞌ Le̱ꞌ ládujla benneꞌ gate ne̱ chee̱ xel-la waca chee̱ꞌ.
5 Ne̱ chee̱ Zríꞌine̱ꞌ Dios nunne̱ꞌ netuꞌ lataj nácantuꞌ gubáz chee̱ꞌ chee̱ xelezráꞌ benneꞌ ládujla xúgute̱ cueꞌ xe̱zr la xu,
benneꞌ xeleajlí lazre̱ꞌ Cristo,
ne xuluzúe̱ꞌ dizraꞌ chee̱ꞌ chee̱ gaca ba La Le̱ꞌ.
6 Ládujla benneꞌ caní zrale leꞌe chee̱ gácale bi chee̱ Jesucristo.
7 Dxuzúajaꞌ chee̱ xúgute̱le leꞌe dxéajle̱le chee̱ Cristo,
zrale xe̱zre Roma.
Dios nazríꞌine̱ꞌ leꞌe,
ne bláwizre̱ꞌ leꞌe chee̱ gácale bi cheé̱queze̱ꞌ.
Dxenabaꞌ Xradxu Dios,
ne Xránadxu Jesucristo gune̱ꞌ chaweꞌ chee̱le,
ne gunne̱ꞌ leꞌe xel-la dxebeza zri lazreꞌ.
Pablo dxaca lazre̱ꞌ chéaje̱ꞌ xe̱zre Roma
8 Da naca blaudxa,
ne̱ chee̱ Jesucristo dxapaꞌ Dios chiaꞌ xcalene̱ꞌ ca naca chee̱ xúgute̱le laweꞌ da dxezralaj ca dxeajlí lázrele Cristo du gabíꞌi xe̱zr la xu.
9 Duté̱ lázrdawaꞌ dxunaꞌ zrin chee̱ Dios,
dxuzendaꞌ bénneache dizraꞌ chaweꞌ chee̱ Zríꞌine̱ꞌ.
Le̱ꞌ nézquezne̱ꞌ dxeajsá lázrquezaꞌ leꞌe gate dxuchálajle̱naꞌ Leꞌ.
10 Dxataꞌ xúedaꞌ Dios,
che naca da dxaca lazreꞌ Le̱ꞌ,
chee̱ ájala gunne̱ꞌ nedaꞌ lataj xedajnnáꞌa leꞌe
11 laweꞌ da dxaca lazraꞌ leꞌedaꞌ leꞌe ne gunnaꞌ leꞌe lataj siꞌle da naca chee̱ Beꞌ Láꞌazxa,
chee̱ se̱ cháchadxale.
12 Caní gutipa lázredxu tudxu xetudxu lu xel-la dxeajlí lazreꞌ chee̱dxu.
13 Bi bíchaꞌdauꞌ,
dxaca lazraꞌ nézele zaneꞌ lasa guca lazraꞌ xidaꞌ xedajnnáꞌa leꞌe,
san dxácate̱ caꞌ dxecuasa na.
Dxaca lázrele̱ꞌa xidaꞌ chee̱ gunaꞌ zrin gusé̱dedaꞌ da naca chee̱ Cristo ládujla leꞌe,
cáte̱ze ba be̱naꞌ ládujla xezícadxa bénneache zaj zre̱ꞌe̱ lu xe̱zr la xu nigá.
14 Nabagaꞌ gunaꞌ zrin caní ládujla xúgute̱ bénneache,
che zaj naque̱ꞌ benneꞌ blau u ca zaj naque̱ꞌ,
u che zaj naque̱ꞌ benneꞌ zaj naxéajniꞌi u ca zaj naque̱ꞌ.
15 Chee̱ le̱ naꞌ,
nedaꞌ ba zúaquezaꞌ guzendaꞌ leꞌe zrale xe̱zre Roma dizraꞌ chaweꞌ chee̱ Cristo.
Xel-la waca chee̱ dizraꞌ chaweꞌ chee̱ Cristo
16 Quebe dxeduéꞌedaꞌ chee̱ dizraꞌ chaweꞌ chee̱ Cristo laweꞌ da napa na xel-la waca chee̱ Dios chee̱ guselá na xúgute̱ benneꞌ dxeleajlí lazre̱ꞌ le̱ na,
nédxula benneꞌ judío caꞌ,
san cáꞌanqueze benneꞌ quebe zaj naque̱ꞌ judío.
17 Dizraꞌ chaweꞌ nigá dxuléꞌe na dxiꞌu nagáꞌanadxu chaweꞌ lau Dios che dxeajlí lázredxu le̱ na,
chee̱ cheajlí lázredxu Le̱ꞌ ca naxúaj na lu dizraꞌ láꞌazxa,
da dxenná na:
Benneꞌ nagáꞌane̱ꞌ chaweꞌ lau Dios gataꞌ chee̱ꞌ xel-la nabán li lazreꞌ che dxeajlí lazre̱ꞌ Le̱ꞌ.
Dul-la da zaj nabaga bénneache
18 Ba bleꞌe Dios lu xabáa chee̱ꞌ ca gune̱ꞌ,
gudée̱ꞌ xel-la ziꞌ xúgute̱ benneꞌ dxuluzúe̱ꞌ chaláꞌala Dios,
ne benneꞌ we̱n da cale̱la,
benneꞌ dxuluzague̱ꞌ da li ne̱ chee̱ da cale̱la da dxelune̱ꞌ.
19 Zaj nézquezne̱ꞌ ca gaca xelúnbea bénneache da naca chee̱ Dios laweꞌ da Lé̱queze Dios naꞌ bache bléꞌene̱ꞌ na zaca ba lau.
20 Da quebe gaca léꞌedxu chee̱ Dios gaca gúnbeadxu na ne̱ chee̱ da caꞌ da be̱n Dios.
Gate be̱nte̱ꞌ xe̱zr la xu dxunna bea na nácaqueze Dios,
ne nápaqueze̱ꞌ xel-la waca.
Chee̱ le̱ naꞌ quebe bi de̱ xuludéꞌene̱ꞌ.
21 Lácala zaj núnbeꞌe̱ ca naca Dios,
quebe ne xelape̱ꞌ Le̱ꞌ ba láꞌana ca Dios,
ne quebe ne xelé̱ꞌe̱ Le̱ꞌ;
Xcalenuꞌ,
san dxuludé lazre̱ꞌ da níteze,
naꞌ gulechul-la xichaj lázrdawe̱ꞌ laweꞌ da zaj naque̱ꞌ benneꞌ zideꞌ.
22 Lácala dxeléquene̱ꞌ zaj naxéajniꞌine̱ꞌ,
da li zaj naque̱ꞌ benneꞌ xala,
23 laweꞌ da buluzúe̱ꞌ chaláꞌala Dios xabáa,
Bénneaꞌ quebe dxedé chee̱ꞌ,
ne dxelúe láꞌane̱ꞌ bedáuꞌ xiaj xaga zaj naca na luꞌa bénneache dxelate,
ne luꞌa bea caꞌ zaj zua xrila,
ne luꞌa be̱ snia,
ne luꞌa be̱ xixreꞌ be̱ zria tapa niꞌa naꞌbaꞌ.
24 Chee̱ le̱ naꞌ Dios ba guleaj xíchaje̱ꞌ benneꞌ caꞌ chee̱ xelune̱ꞌ xúgute̱ da sban da dxelezá lazre̱ꞌ,
naꞌ bulucáꞌana ditaj cuine̱ꞌ tue̱ꞌ xetue̱ꞌ,
25 laweꞌ da buluzúe̱ꞌ chaláꞌala xel-la li chee̱ Dios,
naꞌ gulezíꞌ lu ne̱ꞌe̱ da we̱n lazreꞌ,
ne belúe láꞌane̱ꞌ,
ne belecáꞌana szrene̱ꞌ da caꞌ nun Dios,
ne quegá Diosqueze,
Bénneaꞌ dxal-laꞌ güe láꞌanaquezdxu.
¡Caꞌan gaca na!
26 Chee̱ le̱ naꞌ Dios ba guleaj xíchaje̱ꞌ benneꞌ caꞌ chee̱ xelune̱ꞌ da dxelezá lazre̱ꞌ da caꞌ xeduéꞌedxu.
Cáꞌanqueze nuꞌula buluzúe̱ꞌ chaláꞌala xel-la zúale̱ benneꞌ chee̱ꞌ,
ne dxelune̱ꞌ da quebe zaj naca chee̱ꞌ xelune̱ꞌ.
27 Cáꞌanqueze belún benneꞌ biu,
buluzúe̱ꞌ chaláꞌala xel-la zúale̱ zruꞌule̱ꞌ,
ne dxelune̱ꞌ da sban da dxelezá lazre̱ꞌ tue̱ꞌ xetue̱ꞌ,
ne dxelune̱ꞌ da caꞌ xeduéꞌedxu tue̱ꞌ xetue̱ꞌ,
naꞌ dxeledée̱ꞌ xel-la ziꞌ lu be̱l-laꞌ dxen chee̱ꞌ ne̱ chee̱ da sban da dxelune̱ꞌ.
28 Laweꞌ da québedxa gulaca lazre̱ꞌ xelexúnbeꞌe̱ Dios,
Le̱ꞌ guleaj xíchaje̱ꞌ benneꞌ caꞌ chee̱ xuludé lazre̱ꞌ da cale̱la,
ne chee̱ xelune̱ꞌ da quebe dxal-laꞌ xelune̱ꞌ.
29 Dxelune̱ꞌ xúgute̱ da cale̱la.
Dxulucáꞌana ditje̱ꞌ bénneache.
Dxelune̱ꞌ da quebe naca xrlátaje.
Zaj naque̱ꞌ benneꞌ wecudeꞌ.
Dxelune̱ꞌ da zrinnaj.
Zaj naque̱ꞌ benneꞌ xa lazreꞌ.
Dxelutie̱ꞌ benneꞌ.
Dxelílaje̱ꞌ da ba xaꞌ.
Dxelezí xe̱ꞌe̱.
Dxeledanne̱ꞌ da xálaze.
Dxuluchálaje̱ꞌ dizraꞌ bizruj.
30 Dxelenné̱ꞌ schanniꞌ chee̱ ljwezre̱ꞌ.
Dxelecuídene̱ꞌ Dios.
Zaj naque̱ꞌ benneꞌ wenné̱ wal-la.
Dxulucáꞌana szren cuine̱ꞌ.
Zaj naque̱ꞌ benneꞌ wezé cua.
Dxelalaj lazre̱ꞌ bícala da sban.
Quebe dxuluzúe̱ꞌ dizraꞌ chee̱ xra xrne̱ꞌe̱.
31 Zaj naque̱ꞌ benneꞌ lázrdau zideꞌ.
Dxulunitie̱ꞌ xrtizre̱ꞌ.
Quebe zaj naque̱ꞌ zriꞌi lazreꞌ.
Quebe dxulunite lawe̱ꞌ chee̱ ljwezre̱ꞌ.
Quebe dxelexache lazre̱ꞌ chee̱ ljwezre̱ꞌ.
32 Zaj nézene̱ꞌ Dios guzría xiꞌe̱ bénneache,
naꞌ benneꞌ dxelune̱ꞌ da caní dxal-laꞌ xelátie̱ꞌ.
Benneꞌ caní tu dxelúnzqueze̱ꞌ na,
ne dxelexezaca ba lazre̱ꞌ nen benneꞌ dxelune̱ꞌ da caníqueze.