DIZRAꞌ NEDXU DA BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ XE̱ZRE CORINTO
Pablo dxuzúaje̱ꞌ chee̱ bíchedxu zaj zre̱ꞌe̱ xe̱zre Corinto
1
Nedaꞌ,
Pablo,
nacaꞌ benneꞌ bláwizra Dios chee̱ gacaꞌ gubáz chee̱ Jesucristo.
Naca na da guca lazreꞌ Dios gacaꞌ.
Tu zren nen bíchedxu Sóstenes
2 dxuzúajaꞌ da nigá chee̱le leꞌe,
bi bichaꞌ,
zrágale chee̱ Dios lu xe̱zre Corinto.
Nácale bi chee̱ Dios laweꞌ da nácale tuze nen Jesucristo.
Dios ba bláwizre̱ꞌ leꞌe chee̱ gácale bi chee̱queze̱ꞌ tu zren nen xúgute̱ benneꞌ caꞌ zaj zre̱ꞌe̱ du ca naca xe̱zr la xu,
ne dxululáwizre̱ꞌ La Xránadxu Jesucristo,
Bénneaꞌ naque̱ꞌ Xrane benneꞌ caꞌ,
ne Xránadxu dxiꞌu.
3 Dxenabaꞌ Xradxu Dios,
ne Xránadxu Jesucristo gunne̱ꞌ leꞌe xel-la dxebeza zri lazreꞌ,
ne gun chawe̱ꞌe̱ leꞌe.
Da chaweꞌ da nápadxu ne̱ chee̱ Cristo
4 Dxápequezaꞌ Dios:
Xcalenuꞌ,
ca naca chee̱le ne̱ chee̱ da chaweꞌ da be̱nna Dios leꞌe ne̱ chee̱ Jesucristo.
5 Laweꞌ da nácale tuze nen Cristo,
Dios ba be̱nne̱ꞌ leꞌe xel-la gunníꞌa zante̱ da naca chee̱ Beꞌ Láꞌazxa chee̱ꞌ,
lu da dxuchálajle,
ne lu da nézele.
6 Caꞌ naca na,
da dxuchálajdxu ca naca chee̱ Cristo ba guca na li chee̱le leꞌe.
7 Caꞌ naca na,
quebe bi dxexázrjele ca da dxunna Dios dxiꞌu dxácate̱ dxebézadxu zra xeláꞌ Xránadxu Jesucristo.
8 Le̱ꞌ guxru chache̱ꞌ leꞌe ca zrin zra bze̱be,
chee̱ quebe nu benneꞌ gaca gusebágue̱ꞌ leꞌe zría gate xeláꞌ Xránadxu Jesucristo.
9 Dios tu dxúnzqueze̱ꞌ ca da nache̱be lazre̱ꞌ,
naque̱ꞌ Bénneaꞌ bláwizre̱ꞌ leꞌe chee̱ gácale tuze nen Zríꞌine̱ꞌ,
Xránadxu Jesucristo.
Dxaca chupa laꞌa bi chee̱ Cristo
10 Bi bichaꞌ,
dxataꞌ xúedaꞌ leꞌe lu La Xránadxu Jesucristo,
chee̱ gácale tuze,
ne quebe gácale chupa laꞌa.
Le gaca xanneꞌ tuze,
ne tuze da cuꞌu xichaj lázrdaule,
ne da gunle.
11 Da nigá dxapaꞌ leꞌe,
bi bichaꞌ,
laweꞌ da buluzén benneꞌ xrtia Cloé nedaꞌ dxutíl-lale dizraꞌ.
12 Da nigá zéaje̱ na nácale chupa laꞌa,
naꞌ bál-lale dxennale:
Netuꞌ daꞌntuꞌ Pablo.
Xezícaleꞌ dxennale:
Netuꞌ daꞌntuꞌ Apolos.
Xezícale dxennale:
Netuꞌ daꞌntuꞌ Pedro.
Xezícale dxennale:
Netuꞌ daꞌntuꞌ Cristo.
13 ¿Dxéquele naca Cristo chupa laꞌa?
¿Dxéquele gudáꞌa nedaꞌ,
Pablo,
le̱ꞌe̱ xaga béguaj waláz chee̱le?
¿Bedxúale leꞌe nisa lu la Pablo?
14 Xcalén Dios quebe núlale leꞌe bchuaꞌ nisa san tuze Crispo,
ne Gayo
15 laweꞌ da quebe nu gaca nna:
Lu la Pablo gudxúaꞌ nisa.
16 Cáꞌanqueze bchuaꞌ nisa benneꞌ xrtia Estéfanas,
san quebe dxeajsá lazraꞌ che nu xetú bchuaꞌ nisa.
17 Cristo quebe gusel-le̱ꞌ nedaꞌ nu guchúaꞌ nisa,
san chee̱ guzendaꞌ bénneache dizraꞌ chaweꞌ chee̱ꞌ,
quegá nen dizraꞌ sina,
chee̱ quebe gaca dácheze da be̱n Cristo gate gutie̱ꞌ le̱ꞌe̱ xaga béguaj.
Cristo naque̱ꞌ xel-la waca, ne xel-la sina chee̱ Dios
18 Dizraꞌ ca gute Cristo le̱ꞌe̱ xaga béguaj naca na ca tu da xálaze lau benneꞌ xelebía xiꞌe̱,
san chee̱dxu dxiꞌu,
nápadxu xel-la weselá,
dizraꞌ nigá napa na xel-la waca chee̱ Dios.
19 Naca na ca naxúaj na lu dizraꞌ láꞌazxa.
Dxenná Dios:
Guzría xiꞌa xel-la sina chee̱ benneꞌ sina caꞌ,
ne guzúaꞌ chaláꞌala xel-la naxéajniꞌi chee̱ benneꞌ dxeléajniꞌine̱ꞌ.
20 ¿Gazra nagáꞌana benneꞌ sina naꞌa?
¿Waca guselá cuine̱ꞌ?
¿Gazra nagáꞌana benneꞌ dxusé̱dene̱ꞌ bénneache?
¿Gazra nagáꞌana benneꞌ dxuchálaje̱ꞌ ca naca da dxaca lu xe̱zr la xu nigá?
Ca naca xel-la sina chee̱ xe̱zr la xu nigá,
Dios ba nune̱ꞌ na tu da xálaze laweꞌ da tuze Le̱ꞌ gaca guselé̱ꞌ bénneache.
21 Dios nézene̱ꞌ xúgute̱.
Quebe be̱ꞌe̱ lataj bénneache xelúnbeꞌe̱ Le̱ꞌ ne̱ chee̱ xel-la sina chee̱ bénneache.
Bezaca ba lazre̱ꞌ Dios ne̱ chee̱ dizraꞌ nigá bselé̱ꞌ benneꞌ caꞌ dxuluxrén lazre̱ꞌ Le̱ꞌ,
lácala zaj zraꞌ benneꞌ dxeléquene̱ꞌ naca dizraꞌ nigá tu da xálaze.
22 Benneꞌ judío caꞌ dxelaca lazre̱ꞌ xeleléꞌene̱ꞌ xel-la waca da za xabáa,
naꞌ benneꞌ griego caꞌ dxelexílaje̱ꞌ xel-la sina,
23 san dxiꞌu dxuzendxu bénneache ca naca chee̱ Cristo,
ca gutie̱ꞌ le̱ꞌe̱ xaga béguaj.
Benneꞌ judío dxelexeduéꞌene̱ꞌ chee̱ dizraꞌ nigá,
naꞌ benneꞌ quebe zaj naque̱ꞌ judío dxeléquene̱ꞌ naca na tu da ca zeaje na.
24 Naꞌa,
benneꞌ caꞌ ba bláwizra Dios,
benneꞌ judío caꞌ,
ne benneꞌ quebe zaj naque̱ꞌ judío,
Cristo nácaqueze̱ꞌ xel-la waca,
ne xel-la sina chee̱ Dios.
25 Da dxeleque bénneache naca tu da xálaze chee̱ Dios nácadxa na sina ca xel-la sina chee̱ bénneache,
naꞌ da dxeleque bénneache naca na tu da naca bea nate niꞌa naꞌ Dios nápadxa na xel-la waca ca xel-la waca chee̱ bénneache.
26 Leꞌe,
bi bichaꞌ,
dxal-laꞌ gueque beꞌele ba bláwizra Dios leꞌe lácala bábaze leꞌe nácale sina lau bénneache chee̱ xe̱zr la xu nigá,
ne bábaze leꞌe nápale xel-la dxenná bea,
u nácale xrtia benneꞌ zaj naque̱ꞌ blau.
27 Dios ba guqué̱ꞌe̱ benneꞌ caꞌ dxeleque bénneache zaj naque̱ꞌ benneꞌ xálaze,
chee̱ xelexeduéꞌe benneꞌ sina caꞌ,
ne ba guqué̱ꞌe̱ benneꞌ caꞌ dxeleque bénneache zaj nate niꞌa ne̱ꞌe̱,
chee̱ xelexeduéꞌe benneꞌ wal-la caꞌ.
28 Dios ba guqué̱ꞌe̱ benneꞌ caꞌ quebe zaj naque̱ꞌ blau,
ne benneꞌ caꞌ zaj nuzúa bénneache chaláꞌala,
benneꞌ caꞌ quebe nu zaj naque̱ꞌ,
chee̱ guzague̱ꞌ naze benneꞌ zaj naque̱ꞌ blau,
29 chee̱ quebe nu sequeꞌ gucáꞌana szren cuina lau Dios.
30 Diósqueze ba nune̱ꞌ leꞌe tuze nen Jesucristo,
ne nune̱ꞌ naca Cristo Benneꞌ dxunna dxiꞌu xel-la sina,
ne Benneꞌ gucáꞌana dxiꞌu xrlátaje,
ne Benneꞌ dxuzúe̱ꞌ dxiꞌu lu naꞌ Dios,
ne benneꞌ dxexáꞌawe̱ꞌ dxiꞌu.
31 Caꞌ naca na ca da naxúaj na lu dizraꞌ láꞌazxa,
da dxenná na:
Che nu benneꞌ dxaca lazre̱ꞌ nu gucáꞌana szrene̱ꞌ,
dxal-laꞌ gucáꞌana szrene̱ꞌ Xránadxu.