Pablo dxugape̱ꞌ diuzre bi bíchedxu caꞌ
16
Dxeguꞌa lu naꞌle nuꞌula zandxu Febe,
nuꞌula naꞌ ba be̱ne̱ꞌ zrin chee̱ Cristo ládujla bi bíchedxu zaj zre̱ꞌe̱ xe̱zre Cencrea.
2 Le siꞌ lu naꞌle le̱ꞌ cháwedauꞌ lu La Xránadxu,
ca dxal-laꞌ gaca ládujla bi bíchedxu dxeléajle̱ꞌe̱ chee̱ Cristo,
naꞌ le gácale̱ne̱ꞌ bítete̱ze da dxexázrjene̱ꞌ,
laweꞌ da ba gúcale̱ le̱ꞌ benneꞌ zan,
ne nédaꞌquezaꞌ.
3 Le gugapa diuzre Priscila ne Aquilo,
benneꞌ belún zrin chee̱ Jesucristo tu zren nen nedaꞌ.
4 Benneꞌ caní buluzúe̱ꞌ xel-la nabán chee̱ꞌ lu da ste̱be chee̱ gúcale̱ne̱ꞌ nedaꞌ.
Caꞌ naca na,
dxapaꞌ benneꞌ caꞌ xcalenle,
ne quegaze nedaꞌ,
san cáꞌanqueze dxelún xúgute̱ bi bíchedxu quebe zaj naque̱ꞌ judío.
5 Le gugapa diuzre bi bíchedxu caꞌ dxelezrágabeꞌ lizre Priscila,
ne Aquilo.
Le gugapa diuzre Epeneto,
benneꞌ ljwezraꞌ nazriꞌite̱ lazraꞌ.
Le̱ꞌ guque̱ꞌ benneꞌ nedxu naga nababa Acaya guxéajle̱ꞌe̱ chee̱ Cristo.
6 Le gugapa diuzre María,
nuꞌula naꞌ ba be̱nle̱ꞌe̱ zrin ládujla leꞌe.
7 Le gugapa diuzre benneꞌ walázr chiaꞌ,
Andrónico,
ne Junias,
benneꞌ caꞌ gulaque̱ꞌ ljwezraꞌ lizre xia.
Zaj naque̱ꞌ benneꞌ blau ládujla benneꞌ gubáz caꞌ chee̱ Cristo,
naꞌ guléajle̱ꞌe̱ chee̱ Cristo nédxudxa ca nedaꞌ.
8 Le gugapa diuzre Amplias,
benneꞌ ljwezraꞌ nazriꞌite̱ lazraꞌ lu La Xránadxu.
9 Le gugapa diuzre Urbano,
benneꞌ ljwezraꞌ lu zrin chee̱ Jesucristo,
ne le gugapa diuzre Estaquis,
benneꞌ nazriꞌite̱ lazraꞌ.
10 Le gugapa diuzre Apeles,
benneꞌ bléꞌene̱ꞌ da zan lasa ca dxeajlí lazre̱ꞌ Cristo.
Cáꞌanqueze le gugapa diuzre Aristóbulo,
benneꞌ xrtiaꞌ.
11 Le gugapa diuzre Herodión,
benneꞌ walázr chiaꞌ,
ne Narciso,
benneꞌ xrtiaꞌ,
benneꞌ dxeléajle̱ꞌe̱ chee̱ Xránadxu.
12 Le gugapa diuzre Trifena ne Trifosa,
nuꞌula caꞌ dxelune̱ꞌ zrin chee̱ Xránadxu,
ne le gugapa diuzre Pérsida,
bi zandxu nazriꞌite̱ lazrdxu,
nuꞌula naꞌ ba be̱nle̱ꞌe̱ zrin chee̱ Xránadxu.
13 Le gugapa diuzre Rufo,
benneꞌ blau dxéajle̱ꞌe̱ chee̱ Xránadxu,
ne xrne̱ꞌe̱,
nuꞌula naꞌ naque̱ꞌ ca xrnáquezaꞌ.
14 Le gugapa diuzre Asíncrito,
ne Flegonte,
ne Hermas,
ne Patrobas,
ne Hermes,
ne bi bíchedxu caꞌ zrále̱ne̱ꞌ le̱ꞌ.
15 Cáꞌanqueze le gugapa diuzre Filólogo,
ne Julia,
ne Nereo,
ne nuꞌula zane̱ꞌ,
ne Olimpas,
ne xúgute̱ bi bíchedxu dxeleajlí lazre̱ꞌ Cristo,
benneꞌ zrále̱ne̱ꞌ benneꞌ caní.
16 Le gugapa diuzre ljwézrele tule xetule,
gunídate̱ ljwézrele.
Xúgute̱ cueꞌ bi bíchedxu dxulugape̱ꞌ leꞌe diuzre.
17 Leꞌe,
bi bíchaꞌdauꞌ,
dxataꞌ xúedaꞌ leꞌe,
nnaꞌ xánnele benneꞌ caꞌ dxelune̱ꞌ chupa laꞌa bi bíchedxu caꞌ,
ne dxelune̱ꞌ dxeajlecházie̱ꞌ benneꞌ caꞌ,
naꞌ dxulusé̱dene̱ꞌ da dxedábaga na ca da nusé̱dele.
Le cuasa naga zaj zraꞌ benneꞌ caꞌ
18 laweꞌ da quebe dxelún benneꞌ caꞌ zrin chee̱ Xránadxu Jesucristo.
Dxelune̱ꞌ ca da dxezaca ba lazreꞌ be̱laꞌ dxen chee̱queze̱ꞌ,
ne dxelezí xe̱ꞌe̱ benneáchedu caꞌ quebe ne xeleneze xánnie̱ꞌ ca naca dizraꞌ chaweꞌ.
Benneꞌ wen lazreꞌ caꞌ cadite zaj nupé̱ꞌe̱,
ne zaj nézene̱ꞌ da dxuluchálaje̱ꞌ.
19 Xúgute̱ bénneache zaj nézene̱ꞌ ca ba bzúale xtizraꞌ Dios.
Chee̱ le̱ naꞌ dxebedaꞌ,
ne dxaca lazraꞌ gácale ban lazreꞌ gunle da xrlátaje,
naꞌ quegá gunle da cale̱la.
20 Dios,
Bénneaꞌ dxunne̱ꞌ dxiꞌu xel-la dxebeza zri lazreꞌ ba zúaqueze̱ꞌ gácale̱ne̱ꞌ leꞌe,
chee̱ guchúchujle Satanás da xriwe̱ꞌ.
Dxenabaꞌ lau Xránadxu Jesucristo gune̱ꞌ gaca chaweꞌ chee̱le.
21 Bi bíchedxu Timoteo dxugápabeꞌ leꞌe diuzre.
Nácabeꞌ ljwezraꞌ lu zrin chee̱ Cristo.
Cáꞌanqueze dxulugape̱ꞌ leꞌe diuzre benneꞌ walázr chiaꞌ Lucio,
ne Jasón,
ne Sosípater.
22 Nedaꞌ,
Tercio,
dxuzúajaꞌ xtizraꞌ Pablo caní,
dxugapaꞌ leꞌe diuzre lu La Xránadxu.
23 Gayo dxugape̱ꞌ leꞌe diuzre,
bénneaꞌ zuaꞌ lizre̱ꞌ,
naꞌ dxunne̱ꞌ lizre̱ꞌ naga dxelezraga xúgute̱ benneꞌ bíchedxu caní.
Cáꞌanqueze dxulugape̱ꞌ leꞌe diuzre Erasto,
benneꞌ xuꞌu lu ne̱ꞌe̱ dumí chee̱ xe̱zre,
ne bi bíchedxu Cuarto.
24 Dxenabaꞌ Xránadxu Jesucristo gune̱ꞌ gaca chaweꞌ chee̱ xúgute̱le leꞌe.
¡Caꞌan gaca na!
Pablo dxue láꞌane̱ꞌ Dios
25 Naꞌa,
dxue láꞌanantuꞌ Dios,
Bénneaꞌ séquene̱ꞌ guzé̱ cháchadxe̱ꞌ leꞌe lu dizraꞌ chaweꞌ da dxuzendaꞌ bénneache,
ne lu da dxusé̱dedaꞌ ca naca chee̱ Jesucristo.
Da nigá naca na tuze nen da bleꞌe Dios chee̱ da nagache da gulúꞌu chawe̱ꞌ bagácheze nédxudaute̱,
26 san naꞌa ba bleꞌe laweꞌ na ne̱ chee̱ dizraꞌ láꞌazxa da buluzúaj benneꞌ caꞌ buluchálaje̱ꞌ waláz chee̱ Dios,
ca da bdxixruj beꞌe Dios chadía chacanna.
Ba bleꞌe lau dizraꞌ chaweꞌ nigá naꞌa lau benneꞌ xúgute̱ xe̱zr la xu chee̱ xeléajle̱ꞌe̱ chee̱ na,
ne xuluzúe̱ꞌ dizraꞌ chee̱ na.
27 Dios,
Benneꞌ tu lichaꞌ,
ne Benneꞌ sina,
gaca ba Le̱ꞌ chadía chacanna ne̱ chee̱ Jesucristo.
¡Caꞌan gaca na!