Be̱n da dxezaca ba lazreꞌ bi bichuꞌ, ne quegá da dxezaca ba lázrezuꞌ lueꞌ
15
Dxiꞌu ba ze̱ cháchadxu lu xel-la dxeajlí lazreꞌ dxal-laꞌ gácale̱dxu benneꞌ quebe ne se̱ chache̱ꞌ lu xel-la dxeajlí lazreꞌ,
ne quebe gundxu da dxezaca ba lázredxu dxíꞌuze.
2 Tu tudxu dxal-laꞌ gundxu da dxezaca ba lazreꞌ bi bíchedxu lu da gun na chaweꞌ chee̱beꞌ,
ne lu da gusegula na le̱beꞌ lu xel-la dxeajlí lazreꞌ chee̱beꞌ.
3 Crístoqueze quebe be̱ne̱ꞌ da dxezaca ba lazreꞌ le̱ze̱ꞌ,
san guca chee̱ꞌ ca naxúaj na lu dizraꞌ láꞌazxa,
dxenná na:
Benneꞌ caꞌ gulenné̱ꞌ schanniꞌ chiuꞌ Lueꞌ,
Dios,
guca na ca gulenné̱ꞌ schanniꞌ chiaꞌ nedaꞌ.
4 Xúgute̱ da naxúaj nédxudaute̱ lu dizraꞌ láꞌazxa zaj naxúaj na chee̱ guzéajniꞌi na dxiꞌu,
chee̱ gápadxu xel-la dxebeza lazreꞌ ne̱ chee̱ xel-la zren lazreꞌ,
ne xel-la dxexúe zren,
da caꞌ nápadxu ne̱ chee̱ da caꞌ zaj naxúaj na.
5 Dxenabaꞌ lau Dios,
Bénneaꞌ dxunne̱ꞌ dxiꞌu xel-la zren lazreꞌ,
ne dxexúe zrene̱ꞌ dxiꞌu,
chee̱ gácale̱ne̱ꞌ leꞌe chee̱ gácale tuze tule xetule ne̱ chee̱ Jesucristo,
6 chee̱ gunle xúgute̱le tu zren güe láꞌanale Dios,
Xra Xránadxu Jesucristo.
Dxelén benneꞌ quebe zaj naque̱ꞌ judío dizraꞌ chaweꞌ
7 Caꞌan naca,
chee̱ gaca ba Dios,
le siꞌ lu naꞌle ljwézrele tule xetule ca be̱n Cristo,
guzíꞌ lu ne̱ꞌe̱ dxiꞌu.
8 Ca da dxennéaꞌ nedaꞌ,
dxennéaꞌ blaꞌ Cristo,
ne be̱ne̱ꞌ zrin chee̱ benneꞌ judío caꞌ,
chee̱ be̱ne̱ꞌ ca da guche̱be lazreꞌ Dios lau xra xrtáudxu caꞌ,
ne caní bléꞌene̱ꞌ naca Dios li lazreꞌ.
9 Cáꞌanqueze ble̱ꞌe̱ chee̱ xelúe láꞌana Dios benneꞌ caꞌ quebe zaj naque̱ꞌ judío laweꞌ da dxexache lazre̱ꞌ bénneache,
ca da naxúaj na caní chee̱ Cristo lu dizraꞌ láꞌazxa,
dxenné̱ꞌ:
Güe láꞌanaꞌ lueꞌ,
Dios,
lau benneꞌ xe̱zr la xu caꞌ,
ne tu gul-lazquezaꞌ da xelapa ba láꞌana Lueꞌ.
10 Cáꞌanqueze dxenná na:
Le be,
leꞌe,
bénneache dute̱ xe̱zr la xu
nen benneꞌ zaj naque̱ꞌ bi chee̱ Dios.
11 Cáꞌanqueze dxenná na:
Le güe láꞌana Xránadxu,
leꞌe,
bénneache chee̱ xúgute̱ xe̱zr la xu,
ne le guchalaj chee̱ xel-la szren chee̱ꞌ,
leꞌe,
xúgute̱ bénneache.
12 Cáꞌanqueze bchalaj Isaías ca naca chee̱ Cristo,
gunné̱ꞌ:
Weláꞌqueze tu zriꞌine zre sua Isaí,
Bénneaꞌ nna béꞌene̱ꞌ xúgute̱ cueꞌ xe̱zr la xu,
naꞌ benneꞌ caꞌ xelebeza lazre̱ꞌ Le̱ꞌ.
13 Dxenabaꞌ Dios,
Bénneaꞌ dxunne̱ꞌ dxiꞌu xel-la dxebeza lazreꞌ,
chee̱ gúnnale̱ꞌe̱ leꞌe xel-la dxebé,
ne xel-la dxebeza zri lazreꞌ laweꞌ da dxeajlí lázrele Le̱ꞌ,
chee̱ gápale̱ꞌe̱quezle xel-la dxebeza lazreꞌ ne̱ chee̱ xel-la waca chee̱ Beꞌ Láꞌazxa.
14 Leꞌe,
bi bíchaꞌdauꞌ,
dxuxrén lazraꞌ nápale̱ꞌe̱le da chaweꞌ,
ne núnbeale xúgute̱ chee̱ gaca guzéajniꞌile ljwézrele tule xetule.
15 Lu xiche nigá bechugu lazraꞌ guzúajaꞌ chee̱ da caní chee̱ quebe gal-la lázrele na.
Dxunaꞌ na ne̱ chee̱ da bsebaga Dios nedaꞌ lu da chaweꞌ chee̱ꞌ.
16 Caní gunaꞌ zrin chee̱ Jesucristo ládujla benneꞌ quebe zaj naque̱ꞌ judío.
Zrin dxunaꞌ naca na chee̱ guzendaꞌ bénneache dizraꞌ chaweꞌ chee̱ Dios chee̱ guzráꞌa benneꞌ quebe zaj naque̱ꞌ judío lau Dios ca tu gunaꞌ da dxezaca ba lazreꞌ Le̱ꞌ.
Xelaque̱ꞌ benneꞌ láꞌazxa ne̱ chee̱ Beꞌ Láꞌazxa.
17 Lu da nacaꞌ chee̱ Jesucristo waca xezaca ba lazraꞌ lu zrin dxunaꞌ chee̱ Dios
18 laweꞌ da quebe dxedxugu lazraꞌ guchálajaꞌ,
san tuze ca naca da nun Cristo ne̱ chiaꞌ nedaꞌ,
chee̱ gunaꞌ xuluzúa benneꞌ quebe zaj naque̱ꞌ judío xrtizra Dios.
Da nigá be̱naꞌ ne̱ chee̱ da bchálajaꞌ,
ne da be̱naꞌ,
19 ne ne̱ chee̱ xel-la waca chee̱ da bleꞌe Dios,
nen xel-la waca chee̱ xabáa,
ne ne̱ chee̱ xel-la waca chee̱ Beꞌ Láꞌazxa.
Caní bchálajaꞌ dizraꞌ chaweꞌ chee̱ Cristo du ca naca xe̱zr la xu.
Guzú lawaꞌ dxunaꞌ na xe̱zre Jerusalén,
bzrinteaꞌ naga nababa Ilírico.
20 Caní naca,
be̱naꞌ ba xuzre bchálajaꞌ dizraꞌ chaweꞌ naga quebe ne xelenne̱ꞌ La Cristo,
chee̱ quebe gunaꞌ zrin naga ba zaj nun zrin xezícadxa benneꞌ,
21 naꞌ,
ca dxenná dizraꞌ láꞌazxa:
Xeleléꞌe benneꞌ caꞌ quebe ne zrin nu benneꞌ guzenne̱ꞌ le̱ꞌ chee̱ Cristo,
naꞌ benneꞌ caꞌ quebe ne xelén chee̱ Le̱ꞌ xeléajniꞌine̱ da naca chee̱ꞌ.
Pablo dxugúꞌu beꞌe̱ chéaje̱ꞌ xe̱zre Roma
22 Chee̱ guzendaꞌ leꞌe da caní,
da zan lasa guca lazraꞌ xedajnnáꞌa leꞌe zrale xe̱zre Roma,
san quebe guca chiaꞌ.
23 Naꞌa,
ba bexuzre be̱naꞌ zrin nigá,
ne laweꞌ da zánete̱ iza ba guca lazraꞌ xidaꞌ súale̱naꞌ leꞌe,
24 dxebeza lazraꞌ teaꞌ xedajnnáꞌa leꞌe gate chaꞌa lu xe̱zr la xu España.
Gate te suaꞌ xel-la dxebé nen leꞌe dxebeza lazraꞌ xusiꞌile nedaꞌ neza,
naꞌ chaꞌa náꞌala.
25 Naꞌa chaꞌa Jerusalén,
guꞌa lateꞌ da gácale̱ na bi bíchedxu zaj zre̱ꞌe̱ naꞌ,
26 laweꞌ da bi bíchedxu zaj zre̱ꞌe̱ xe̱zre caꞌ zaj nababa Macedonia,
ne xe̱zre caꞌ zaj nababa Acaya guléquene̱ꞌ naca xrlátaje bulutube̱ꞌ dumí da xelesel-le̱ꞌ chee̱ bi bíchedxu zaj naque̱ꞌ baxacheꞌ,
zaj zrabeꞌ Jerusalén.
27 Guléquene̱ꞌ naca xrlátaje xelune̱ꞌ da nigá,
naꞌ caní naca na laweꞌ da dxelebague̱ꞌ chee̱ benneꞌ caꞌ,
laweꞌ da benneꞌ judío caꞌ,
benneꞌ dxeléajle̱ꞌe̱ chee̱ Cristo,
bulunézruje̱ꞌ chee̱ benneꞌ quebe zaj naque̱ꞌ judío chee̱ da zaj nape̱ꞌ chee̱ Dios,
naꞌ benneꞌ caní dxal-laꞌ xulunézruje̱ꞌ chee̱ benneꞌ judío caꞌ chee̱ da zaj nape̱ꞌ chee̱ xe̱zr la xu nigá.
28 Caní naca,
gate xexuzre gunaꞌ da nigá,
ne ba bnézrujaꞌ le̱ꞌ dumí nigá,
naꞌ chaꞌa lu xe̱zr la xu España,
naꞌ ca tezaꞌ xedajnnáꞌa leꞌe.
29 Dxuxrén lazraꞌ gate xidaꞌ naga zrale leꞌe,
gúale̱ꞌa da chaweꞌ chee̱ dizraꞌ chaweꞌ chee̱ Cristo.
30 Leꞌe,
bi bíchaꞌdauꞌ,
dxataꞌ xúedaꞌ leꞌe ne̱ chee̱ Xránadxu Jesucristo,
ne ne̱ chee̱ xel-la zriꞌi lazreꞌ da dxunna Beꞌ Láꞌazxa dxiꞌu,
chee̱ gácale tuze nen nedaꞌ guchálajle̱dxu Dios chee̱ gácale̱ne̱ꞌ nedaꞌ.
31 Le naba Dios chee̱ guselé̱ꞌ nedaꞌ lu naꞌ benneꞌ quebe dxeléajle̱ꞌe̱ chee̱ Cristo naga nababa Judea,
ne chee̱ xelezíꞌ du lazreꞌ bi bíchedxu zaj zre̱ꞌe̱ Jerusalén dumí nigá da nuꞌa,
32 naꞌ che naca da dxaca lazreꞌ Dios,
laꞌa lu dute̱ xel-la dxebé xedajnnáꞌa leꞌe,
ne chee̱ xezíꞌ lazraꞌ naga zrale leꞌe.
33 Dxenabaꞌ Dios,
Bénneaꞌ dxunne̱ꞌ dxiꞌu xel-la dxebeza zri lazreꞌ,
súale̱ne̱ꞌ xúgute̱le leꞌe.
¡Caꞌan gaca na!