Quebe si tizruꞌ biche ljwezruꞌ
14
Che tu bi bíchedxu quebe ne se̱ cháchabeꞌ lu xel-la dxeajlí lazreꞌ,
le siꞌ lu naꞌle le̱beꞌ,
san quegá chee̱ gutíl-lale̱le le̱beꞌ dizraꞌ ca naca da quebe dxun na ba xen.
2 Ca naca na,
zaj zraꞌ benneꞌ dxeleajlí lazre̱ꞌ naca chee̱ꞌ xelawe̱ꞌ bal-la bi de̱,
san zaj zraꞌ benneꞌ xezícadxa quebe ne xelezé̱ chache̱ꞌ lu xel-la dxeajlí lazreꞌ,
naꞌ dxeléquene̱ꞌ waca xelawe̱ꞌ tuze xixreꞌ cuan.
3 Benneꞌ dxawe̱ꞌ xúgute̱ da caꞌ quebe dxal-laꞌ guzúe̱ꞌ chaláꞌala bénneaꞌ nadxúaj nadxeze da dxawe̱ꞌ,
naꞌ benneꞌ nadxúaj nadxeze da dxawe̱ꞌ quebe dxal-laꞌ si tizre̱ꞌ bénneaꞌ dxawe̱ꞌ bal-la bi de̱,
laweꞌ da nazíꞌ lu naꞌ Dios bénneaꞌ.
4 ¿Nuzra nacuꞌ lueꞌ dxezí tizruꞌ we̱n zrin chee̱ Xránadxu?
Che xegáꞌane̱ꞌ xrlátaje,
u che quegá,
naca na da nabaga Xránadxu.
Xegáꞌane̱ꞌ xrlátaje laweꞌ da napa Xránadxu xel-la waca chee̱ gucáꞌane̱ꞌ le̱ꞌ xrlátaje.
5 Caní naca xetú.
Zaj zraꞌ benneꞌ dxulupáꞌanadxe̱ꞌ tu zra ca xetú zra,
naꞌ zaj zraꞌ benneꞌ dxeléquene̱ꞌ tuz ca zaj naca xúgute̱ zra.
Tu tudxu dxal-laꞌ se̱ cháchadxu lu xichaj lázrdaudxu ca naca da caní.
6 Benneꞌ dxupáꞌane̱ꞌ tu zra dxune̱ꞌ na chee̱ gape̱ꞌ ba láꞌana Xránadxu,
naꞌ bénneaꞌ quebe dxupáꞌane̱ꞌ zra naꞌ dxune̱ꞌ caꞌ chee̱ gape̱ꞌ ba láꞌana Xránadxu.
Benneꞌ dxawe̱ꞌ bal-la bi de̱ dxune̱ꞌ na chee̱ gape̱ꞌ ba láꞌana Xránadxu laweꞌ da dxe̱ꞌe̱ Dios:
Xcalenuꞌ,
naꞌ bénneaꞌ nadxúaj nadxeze da dxawe̱ꞌ dxune̱ꞌ na chee̱ gape̱ꞌ ba láꞌana Xránadxu,
naꞌ cáꞌanqueze dxe̱ꞌe̱ Dios:
Xcalenuꞌ.
7 Netudxu dxiꞌu naca bandxu chee̱ gundxu da naca cheé̱zedxu,
ne quegá gátedxu lu da naca cheé̱zedxu.
8 Che naca bandxu,
naca na chee̱ gaca ba Xránadxu.
Caꞌ naca na,
che gaca bandxu,
u che gátedxu nácadxu bi chee̱ Xránadxu.
9 Cristo gutie̱ꞌ,
ne bebane̱ꞌ chee̱ gaque̱ꞌ Xrana benneꞌ gate caꞌ,
ne Xrana benneꞌ ban caꞌ.
10 Naꞌa lueꞌ,
¿bizr chee̱ naꞌ quebe dxeléꞌenuꞌ chaweꞌ ca da dxun le saꞌ ljwezruꞌ,
bi bíchedxu?
¿Bizr chee̱ naꞌ dxuzúꞌ le̱ꞌ chaláꞌala?
Xúgute̱dxu dxal-laꞌ zrindxu lau Cristo chee̱ guchiꞌe̱ ca da nundxu tu tudxu.
11 Naxúaj lu xiche láꞌazxa da dxenná na:
Dxenná Xránadxu:
“Dxuzetaj cuinaꞌ dxenníaꞌ:
Xúgute̱ bénneache xuluzú zribe̱ꞌ lawaꞌ.
Xúgute̱ꞌ xelexeche̱be̱ꞌ laweꞌ lau nacaꞌ Dios.”
12 Caꞌan naca,
tu tudxu dxiꞌu dxun na ba xen guléꞌedxu ca da nundxu lau Dios.
13 Chee̱ le̱ naꞌ québedxa dxal-laꞌ si tízradxu tudxu xetudxu.
Le gun ba xuzre quebe bi gunle da gun na ga chegu bi bíchele,
u da gun na cheajcházie̱ꞌ lu dul-la.
14 Dxuxrén lazraꞌ Xránadxu Jesús,
ne nezdaꞌ quebe bi da dxágudxu nácaqueze sban,
san che tu bi bíchedxu dxéquebeꞌ de̱ tu da dxágudxu da naca na sban,
chee̱ le̱beꞌ naca na da sban.
15 Che ne̱ chee̱ da dxaguꞌ lueꞌ,
dxunuꞌ dxeajchaze bi bichuꞌ,
quebe dxunuꞌ da naca chee̱ xel-la zriꞌi lazreꞌ.
Quebe gunuꞌ cuía xiꞌ tu benneꞌ,
bénneaꞌ gute Cristo waláz chee̱ꞌ,
laweꞌ da dxaca lazruꞌ lueꞌ gaguꞌ bi xel-la wagu.
16 Quebe bi gunle da güe lataj nu nne̱ schanníꞌ chee̱ da dxéquele naca na da xrlátaje.
17 Chee̱ súadxu naga dxenná beꞌe Dios dxiꞌu quebe naca na chee̱ da dxágudxu,
u chee̱ da dxíꞌajdxu,
san naca na chee̱ xegáꞌanadxu xrlátaje lau Dios,
ne chee̱ gápadxu xel-la dxebeza zri lazreꞌ,
ne chee̱ súadxu xel-la dxebé,
da caꞌ nápadxu ne̱ chee̱ Beꞌ Láꞌazxa.
18 Nu benneꞌ dxune̱ꞌ zrin chee̱ Cristo caní dxune̱ꞌ da dxezaca ba lazreꞌ Dios,
naꞌ dxelapa bénneache le̱ꞌ ba láꞌana.
19 Caꞌ naca na,
dxal-laꞌ gundxu da dxulusá na xel-la dxebeza zri lazreꞌ,
ne da dxuluzúa chacha na dxiꞌu.
20 Quebe guzría xiꞌu da nun Dios lu xichaj lázrdau le saꞌ ljwezruꞌ ne̱ chee̱ da dxaguꞌ.
Da li xúgute̱ da dxágudxu zaj naca na xrlátaje,
san quebe naca xrlátaje bi gágudxu da gun na cheajchaze benneꞌ xula lu dul-la.
21 Xrlátaje naca quebe gágudxu be̱laꞌ,
ne quebe xíꞌajdxu xrise uva wal-la,
ne quebe bi gundxu da gun na cheajchaze bi bíchedxu lu dul-la,
u da guzría xi na xel-la dxeajlí lazreꞌ chee̱ꞌ.
22 Che napuꞌ xel-la dxeajlí lazreꞌ bi gaca gunuꞌ,
dxal-laꞌ gunuꞌ na luéꞌqueze lau Dios.
Ba neza naca na chee̱ benneꞌ quebe guzría xiꞌ cuine̱ꞌ ne̱ chee̱ da dxéquene̱ꞌ naca na da xrlátaje gune̱ꞌ.
23 Bénneaꞌ dxawe̱ꞌ da dxéquene̱ꞌ quebe dxal-laꞌ gawe̱ꞌ,
nabague̱ꞌ zria gate dxawe̱ꞌ na laweꞌ da dxawe̱ꞌ da quebe dxeajlí lazre̱ꞌ naca chee̱ꞌ gaweꞌ.
Xúgute̱ da dxundxu zaj naca dul-la che quebe dxuxrén lázredxu zaj naca na xrlátaje.