13
Xúgute̱dxu dxal-laꞌ guzúadxu dizraꞌ chee̱ benneꞌ xuꞌu laweꞌ,
laweꞌ da quebe nu chiláꞌ benneꞌ xuꞌu laweꞌ che quebe nunna Dios le̱ꞌ xel-la dxenná bea chee̱ꞌ.
Benneꞌ xuꞌu laweꞌ caꞌ zaj naque̱ꞌ benneꞌ nuzúa Dios.
2 Chee̱ le̱ naꞌ nu benneꞌ dxedábague̱ꞌ benneꞌ xuꞌu laweꞌ dxedábague̱ꞌ ca da nun Dios.
Benneꞌ dxeledábague̱ꞌ caní zaj nabague̱ꞌ zria,
naꞌ Dios xuzriꞌe̱ chee̱ꞌ da xexal-le̱ꞌ.
3 Benneꞌ caꞌ dxelenná beꞌe̱ quebe nuzúa Dios le̱ꞌ chee̱ xuluchebe̱ꞌ benneꞌ dxelune̱ꞌ da xrlátaje,
san chee̱ xuluchebe̱ꞌ benneꞌ dxelune̱ꞌ da cale̱la.
¿Dxaca lazruꞌ quebe zrebuꞌ benneꞌ xuꞌu laweꞌ?
Be̱n da xrlátaje,
naꞌ benneꞌ xuꞌu laweꞌ caꞌ xelape̱ꞌ ba láꞌana lueꞌ
4 laweꞌ da zaj naque̱ꞌ we̱n zrin chee̱ Dios chee̱ xelune̱ꞌ chiuꞌ da xrlátaje.
Che dxunuꞌ da cale̱la,
dxal-laꞌ zrebuꞌ laweꞌ da quegá dácheze zaj nape̱ꞌ xel-la dxenná bea xelexebiꞌe̱ chee̱ bénneache laweꞌ da zaj naque̱ꞌ we̱n zrin chee̱ Dios chee̱ xuluzúe̱ꞌ lu da ba xaꞌ benneꞌ caꞌ dxelune̱ꞌ da cale̱la.
5 Chee̱ le̱ naꞌ,
dxun na ba xen guzúadxu dizraꞌ chee̱ benneꞌ xuꞌu laweꞌ,
quegá tuze chee̱ quebe xuluzúe̱ꞌ dxiꞌu lu da ba xaꞌ,
san laweꞌ da nezdxu naca na da nadxixruj bea Dios.
6 Chee̱ le̱ naꞌ dxízrujle da dxebágale chee̱ xuꞌu laweꞌ,
laweꞌ da zaj naca benneꞌ xuꞌu laweꞌ we̱n zrin chee̱ Dios,
ne dxelún xánnie̱ꞌ zrin chee̱ꞌ naꞌ.
7 Le quizruj xúgute̱ bénneache ca da nabágale chee̱ꞌ.
Da nabágale chee̱ benneꞌ wechizruj,
le quizruj da nabágale.
Da nabágale chee̱ xuꞌu laweꞌ,
le quizruj na.
Benneꞌ dxal-laꞌ gápale ba láꞌana,
le gape̱ꞌ ba láꞌana.
Benneꞌ dxal-laꞌ gucáꞌana szrenle,
le gucáꞌane̱ꞌ szren.
8 Quebe dxal-laꞌ cue zria chee̱le nen nu benneꞌ san tuze chee̱ zriꞌile le̱ꞌ ca dxal-laꞌ gunle chee̱ le saꞌ ljwézrele tule xetule.
Che gunle da nigá,
naꞌ gunle da nadxixruj bea na.
9 Naga zaj naxúaj da nadxixruj beꞌe Dios dxenná na:
Quebe súale̱nuꞌ zruꞌula benneꞌ xula.
Quebe gutiuꞌ benneꞌ.
Quebe cuanuꞌ.
Quebe gun lazruꞌ chee̱ benneꞌ.
Quebe sa lazruꞌ da naca chee̱ benneꞌ.
Xúgute̱ da nadxixruj bea caní,
ne xúgute̱ da nadxixruj bea xezícadxa dxun bénneaꞌ dxuzúe̱ꞌ dizraꞌ da nadxixruj bea naꞌ dxenná na:
Bzriꞌi le saꞌ ljwezruꞌ ca nazríꞌi cuinuꞌ.
10 Bénneaꞌ nazríꞌine̱ꞌ le saꞌ ljwezre̱ꞌ quebe dxune̱ꞌ da cale̱la chee̱ le saꞌ ljwezre̱ꞌ naꞌ.
Caꞌan naca,
bénneaꞌ nazríꞌine̱ꞌ le saꞌ ljwezre̱ꞌ dxuzúe̱ꞌ dizraꞌ chee̱ da nadxixruj bea na.
11 Ca naca da caní,
le guxúe xanneꞌ ca naca zra zúadxu naꞌa laweꞌ da ba bzrin zra xebandxu lu bchigala laweꞌ da ba zua gágudxa zra ladxu lu da nácadxu ca guzúa na gate naꞌ guzú lau dxéajle̱dxu.
12 Ba dxedé chee̱ da chul-la,
ne ba za te zra.
Chee̱ le̱ naꞌ dxal-laꞌ gusandxu da dxelún bénneache lu da chul-la,
naꞌ gácadxu ca tu benneꞌ zeje̱ꞌ wedil-la dxacu zra lane̱ꞌ xia,
chee̱ tadxu lu xel-la naxaníꞌ chee̱ Dios.
13 Dxal-laꞌ tadxu li lazreꞌ ca dxal-laꞌ tadxu te zra.
Quebe dxal-laꞌ xíꞌajdxu da dxuzuzre na bénneache,
ne quebe gagu xrátadxu.
Quebe gundxu da sban,
ne da cale̱la.
Quebe tíl-lale̱dxu le saꞌ ljwézredxu,
ne quebe gácadxu xa lazreꞌ.
14 Xránadxu Jesucristo gácaqueze̱ꞌ ca zra lánadxu xia,
naꞌ quebe gundxu da dxezá lazreꞌ be̱laꞌ dxen chee̱dxu.