Da dxal-laꞌ gun benneꞌ naque̱ꞌ bi chee̱ Dios
12
Caꞌan naca,
bi bíchaꞌdauꞌ,
lu xel-la dxexache lazreꞌ chee̱ Dios,
dxataꞌ xúedaꞌ leꞌe guzúa cuínale lu naꞌ Dios ca tu gunaꞌ ban,
da naca na láꞌazxa,
ne da xezaca ba lazreꞌ Dios.
Da nigá naca na tu da gucáꞌana szrene Dios da dxal-laꞌ gunle.
2 Québedxa gunle ca dxelún bénneache chee̱ xe̱zr la xu nigá,
san le guchá cuínale chee̱ caní zra dute̱ ca naca lu xichaj lázrdaule.
Caꞌan gaca,
gúnbeale da dxaca lazreꞌ Dios gunle,
da naꞌ naca xrlátaje,
ne da dxezaca ba lazreꞌ Dios,
ne da naca na li lazreꞌ.
3 Ne̱ chee̱ da nusebaga Dios nedaꞌ lu da chaweꞌ chee̱ꞌ dxapaꞌ xúgute̱le leꞌe quebe nu benneꞌ dxal-laꞌ gucáꞌana cuine̱ꞌ szrendxa ca dxal-laꞌ gune̱ꞌ,
san dxal-laꞌ guxúe̱ꞌ ca da naque̱ꞌ lu xel-la dxexruj lazreꞌ,
cáte̱ze naca xel-la dxeajlí lazreꞌ da nunezruj Dios le̱ꞌ.
4 Ca naca chee̱ be̱l-laꞌ dxen chee̱dxu,
zánete̱ da napa na,
naꞌ xúgute̱ da caꞌ quebe dxelún na tuze zrin,
5 cáꞌanqueze dxiꞌu,
láqueze naxandxu,
nácadxu ca tuze be̱l-laꞌ dxen chee̱ Cristo,
ne nácadxu tuze tudxu xetudxu ca zaj naca da caꞌ napa tu be̱l-laꞌ dxen chee̱ nu benneꞌ.
6 Dios nunne̱ꞌ dxiꞌu cha chee̱dxu ca da gaca gundxu ca da dxaca lazre̱ꞌ gunne̱ꞌ tu tudxu.
Dxal-laꞌ guchine xánnedxu ca da nunne̱ꞌ dxiꞌu.
Che nunne̱ꞌ dxiꞌu chee̱ guchálajdxu waláz chee̱ꞌ,
dxal-laꞌ gundxu na dute̱ xel-la dxeajlí lazreꞌ da nápadxu.
7 Che nunne̱ꞌ dxiꞌu chee̱ gundxu zrin chee̱ ljwézredxu,
dxal-laꞌ gundxu na cháweꞌdauꞌ.
Che nunne̱ꞌ dxiꞌu chee̱ gusé̱dedxu bénneache,
dxal-laꞌ guse̱de xánnedxu le̱ꞌ.
8 Che nunne̱ꞌ dxiꞌu chee̱ gutípadxu lazreꞌ bénneache,
dxal-laꞌ gutipa xánnedxu lazreꞌ le̱ꞌ.
Che nunne̱ꞌ dxiꞌu chee̱ bi gunézrujdxu,
dxal-laꞌ gundxu na du lázredxu.
Che nunne̱ꞌ dxiꞌu chee̱ nne̱ xuedxu,
dxal-laꞌ guxúe xánnedxu ca dxundxu na.
Che nunne̱ꞌ dxiꞌu gácale̱dxu benneꞌ xacheꞌ caꞌ,
dxal-laꞌ gundxu na dute̱ xel-la dxebé chee̱dxu.
9 Le zriꞌi ljwézrele du lázrele tule xetule.
Le guzúa chaláꞌala da cale̱la,
ne le gun da xrlátaje.
10 Dxal-laꞌ zriꞌi ljwézrele tule xetule ca nazriꞌile bi bíchequezle.
Le gapa ba láꞌana ljwézrele,
ne le güe lataj tule xetule.
11 Le gun ziꞌ lázrele,
ne quebe gácale zrawe̱de,
naꞌ le gun zrin chee̱ Xránadxu dute̱ lázrdaule.
12 Le sua xel-la dxebé lu da dxebeza lázrele.
Le gaca dxexruj lazreꞌ gate dxedele xel-la ziꞌ.
Le guchálajle̱teze Xránadxu.
13 Le gunezruj da dxelexazrje benneꞌ caꞌ zaj naque̱ꞌ bi chee̱ Dios.
Le siꞌ lu naꞌle du lázrele benneꞌ caꞌ záꞌaque̱ꞌ dxelenabe̱ꞌ leꞌe.
14 Le naba da chaweꞌ chee̱ benneꞌ caꞌ zaj nau ziꞌ xuzre̱ꞌ leꞌe.
Le naba da xrlátaje chee̱ꞌ,
ne quebe nábale da cale̱la chee̱ benneꞌ caꞌ.
15 Le be nen benneꞌ dxelebé,
ne le xexache lazreꞌ benneꞌ caꞌ dxelebezre xache̱ꞌ.
16 Le gaca tuze nen ljwézrele tule xetule.
Quebe gucáꞌana szren cuínale,
san le gaca tuze nen benneꞌ dxexruj lazreꞌ caꞌ.
Quebe guéquele ba nápale dute̱ xel-la sina.
17 Quebe xebiꞌile da cale̱la chee̱ benneꞌ nune̱ꞌ chee̱le da cale̱la.
Le gun ba xuzre gunle da xrlátaje lau xúgute̱ bénneache.
18 Che naca chee̱le,
le gun naga ze̱ lau séquele cueza zri lázrele nen xúgute̱ bénneache.
19 Bi bíchaꞌdauꞌ nazriꞌite̱ lazraꞌ,
quebe xebéaj lázrele,
san le güe lataj Dios xebéaj lazre̱ꞌ,
laweꞌ da naxúaj lu dizraꞌ láꞌazxa da dxenná na:
Chiaꞌ nedaꞌ naca xebéaj lazraꞌ.
“Nedaꞌ xebiꞌa chee̱ bénneache,”
dxenná Xránadxu.
20 Cáꞌanqueze dxenná na:
Che dxedún benneꞌ dxecuídene̱ꞌ lueꞌ,
bnezruj da gawe̱ꞌ,
naꞌ che dxebílene̱ꞌ,
bnezruj da xíꞌaje̱ꞌ,
laweꞌ da gate dxunle caní,
xeduéꞌe bénneaꞌ.
21 Quebe guꞌu lataj da cale̱la nna beꞌe na lueꞌ,
san gunná beꞌe da cale̱la ne̱ chee̱ da xrlátaje da dxunuꞌ.