Nu benneꞌ Israel caꞌ zaj nalé̱ꞌ
11
Naꞌa dxenabaꞌ:
¿Ba bzua Dios chaláꞌala xe̱zre chee̱ꞌ,
benneꞌ Israel caꞌ,
tu chíꞌizqueze?
¡Cabataꞌ!
Nédaꞌquezaꞌ nacaꞌ benneꞌ Israel.
Nedaꞌ nabábale̱naꞌ zriꞌine zre sua Abraham,
ne nabábale̱naꞌ zriꞌine zre sua Benjamín.
2 Gate nate Dios guzíꞌ lu ne̱ꞌe̱ benneꞌ Israel caꞌ,
naꞌ naꞌa quebe nuzúe̱ꞌ benneꞌ caꞌ chaláꞌala.
¿Quebe nézele leꞌe da dxenná dizraꞌ láꞌazxa ca naca chee̱ Elías,
bénneaꞌ bchálaje̱ꞌ waláz chee̱ Dios,
gate naꞌ gudawe̱ꞌ zria benneꞌ Israel caꞌ lau Dios?
Gunné̱ꞌ:
3 “Xran,
ba belútie̱ꞌ benneꞌ buluchálaje̱ꞌ waláz chiuꞌ,
ne buluzría xiꞌe̱ lataj láꞌazxa chiuꞌ caꞌ,
naꞌ tuzaꞌ nedaꞌ nagáꞌanaꞌ,
naꞌ cáꞌanqueze nedaꞌ dxelaca lazre̱ꞌ xelútie̱ꞌ.”
4 Dios beche̱be̱ꞌ,
guzre̱ꞌ Elías:
“Ba gucáꞌa chiaꞌ ga xun chi gaxúa benneꞌ quebe ne xuluzúa zribe̱ꞌ lau bedáuꞌ xiaj xaga le̱ na Baal.”
5 Cáꞌanqueze naꞌa ba begáꞌana tu cueꞌ benneꞌ caꞌ,
benneꞌ ba gucáꞌa Dios chee̱ꞌ lu xel-la zriꞌi lazreꞌ chee̱ꞌ.
6 Naꞌa,
che naca na ne̱ chee̱ xel-la zriꞌi lazreꞌ chee̱ Dios,
quebe naca na ne̱ chee̱ da gaca gun nu benneꞌ,
laweꞌ da la guca na caꞌ,
naꞌ xel-la zriꞌi lazreꞌ chee̱ Dios quebe naca na xel-la zriꞌi lazreꞌ.
7 ¿Bizra xcaꞌ?
Benneꞌ Israel caꞌ quebe belezruéꞌene̱ꞌ da dxelexílaje̱ꞌ,
san benneꞌ caꞌ gucáꞌa Dios le̱ꞌ belezruéꞌene̱ꞌ na,
san xezícadxa benneꞌ caꞌ gulaque̱ꞌ benneꞌ zideꞌ.
8 Naca ca dxenná dizraꞌ láꞌazxa,
dxenná na:
Dios be̱ꞌe̱ lataj gulaca benneꞌ caꞌ lázrdau zideꞌ.
Be̱ꞌe̱ le̱ꞌ lataj gulaque̱ꞌ ca benneꞌ la chul-la,
ne ca benneꞌ cwezruꞌ caꞌ,
naꞌ caní zaj naque̱ꞌ naꞌa.
9 Cáꞌanqueze gunná Davíd,
gunné̱ꞌ:
Ca naca laní chee̱ benneꞌ caꞌ be̱n xelaca na ca tu xralaj,
u ca tu da que̱la na le̱ꞌ
chee̱ cheajlecházie̱ꞌ,
naꞌ gudé Dios le̱ꞌ lu da ba xaꞌ.
10 Xiaj lawe̱ꞌ xelechul-la na chee̱ québedxa xeleléꞌene̱ꞌ,
naꞌ xelelégüe̱ꞌ chadía chacanna zran xua da naca na dul-la chee̱ꞌ.
Ca zaj nalá benneꞌ quebe zaj naque̱ꞌ judío
11 Naꞌa dxenabaꞌ:
¿Tu chiꞌize belenite benneꞌ judío caꞌ gate xeajlecházie̱ꞌ?
¡Cabataꞌ!
Gate benneꞌ judío caꞌ guledábague̱ꞌ xrtizra Dios,
gutaꞌ lataj xelelá benneꞌ quebe zaj naque̱ꞌ judío,
chee̱ xelezúa benneꞌ judío caꞌ lu xel-la dxezá lazreꞌ.
12 Naꞌa,
che da zrinnaj da belún benneꞌ judío caꞌ be̱n na guca tu da ba neza chee̱ xúgute̱ bénneache,
ne che gate belenitie̱ꞌ guca na tu da ba neza chee̱ benneꞌ quebe zaj naque̱ꞌ judío,
gaca na tu da ba neza zrendxa gate xelexúꞌu xúgute̱ benneꞌ judío caꞌ lu naꞌ Dios.
13 De̱ tu da dxal-laꞌ xapaꞌ leꞌe,
núlale quebe nácale benneꞌ judío.
Laweꞌ da gusel-la Dios nedaꞌ chee̱ guzendaꞌ benneꞌ quebe zaj naque̱ꞌ judío xrtizre̱ꞌ,
dxéꞌle̱ꞌa gunne xue chee̱ zrin nabagaꞌ gunaꞌ.
14 Dxaca lazraꞌ gunaꞌ xelezúa lu xel-la dxezá lazreꞌ bal-la benneꞌ walázr chiaꞌ chee̱ xelelé̱ꞌ.
15 Che gate bzua Dios chaláꞌala benneꞌ judío caꞌ,
belexaca tuze nen Dios benneꞌ quebe zaj naque̱ꞌ judío,
¿ájazra gaca gate xelexaca benneꞌ judío caꞌ tuze nen Dios?
Gaca na ca xelexaca bane̱ꞌ ládujla benneꞌ gate.
16 Che guzúadxu lau Dios xeta nedxu chee̱ cua,
naꞌ nácaqueze chee̱ꞌ dute̱ cua naꞌ.
Naꞌ che naca chee̱ Dios lue xaga,
zaj nácaqueze chee̱ꞌ ca naca zruze xaga naꞌ.
17 Benneꞌ judío caꞌ zaj naque̱ꞌ ca zrúzequeze tu xaga olivo,
san bal-la zruze guledxugu na,
naꞌ lueꞌ bedaꞌu waláz chee̱ zruze caꞌ,
ne nacuꞌ ca tu zruze xaga olivo xixreꞌ.
Caꞌan guca,
gucuꞌ tuze nen lue xaga olivo chaweꞌ naꞌ,
ne dxeziꞌu ba neza xel-la nabán chee̱ xaga olivo naꞌ.
18 Quebe gucáꞌana szren cuinuꞌ laweꞌ zrúzequeze xaga olivo naꞌ.
Che dxucáꞌana szren cuinuꞌ,
naca beꞌe quebe dxugaguꞌ lueꞌ lue xaga naꞌ,
san luéqueze naꞌ dxugagu na lueꞌ.
19 Wannáuꞌ:
Aweꞌ,
guledxugu zruze caꞌ chee̱ cheajxedáꞌa nedaꞌ le̱ꞌe̱ xaga olivo naꞌ.
20 Caꞌan naca,
san guledxugu na laweꞌ da quebe guléajle̱ꞌe̱ chee̱ Dios,
naꞌ lueꞌ bedáꞌazuꞌ le̱ꞌe̱ xaga naꞌ laweꞌ da dxéajle̱ꞌu.
Caꞌan naca,
quebe gucáꞌana szren cuinuꞌ,
san bxue xanneꞌ cuinuꞌ.
21 Che Dios quebe bnite lawe̱ꞌ chee̱ benneꞌ caꞌ zaj naque̱ꞌ ca zrúzequeze xaga naꞌ,
naꞌ bebéaje̱ꞌ le̱ꞌ,
cáꞌanqueze quebe gunite lawe̱ꞌ chiuꞌ lueꞌ,
naꞌ xebéaje̱ꞌ lueꞌ.
22 Le nnaꞌxque ca xrlátaje naca Dios,
naꞌ cáꞌanqueze ca snia naque̱ꞌ.
Guque̱ꞌ snia nen benneꞌ caꞌ xeajlecházie̱ꞌ,
naꞌ naque̱ꞌ chaweꞌ nen lueꞌ.
Dxun na ba xen tu gúnzquezuꞌ ca dxal-laꞌ gunuꞌ chee̱ tu síꞌzquezuꞌ da chaweꞌ chee̱ꞌ,
laweꞌ da che quebe gunuꞌ caní,
cáꞌanqueze wegüe̱ꞌ lueꞌ.
23 Che benneꞌ judío caꞌ xelexexéaj lazre̱ꞌ,
naꞌ xelexaque̱ꞌ tuze nen xaga olivo naꞌ,
laweꞌ da napa Dios xel-la waca xune̱ꞌ le̱ꞌ tuze.
24 Lueꞌ quebe nacuꞌ judío,
san guchugue̱ꞌ lueꞌ le̱ꞌe̱ tu xaga olivo xixreꞌ,
naꞌ bexune̱ꞌ lueꞌ tuze nen xaga olivo chaweꞌ naꞌ,
da quebe nu dxun.
Benneꞌ judío caꞌ,
benneꞌ zaj naque̱ꞌ ca zrúzequeze xaga olivo chaweꞌ naꞌ,
gácadxa chaweꞌ xexune̱ꞌ le̱ꞌ tuze nen xaga olivo cheé̱queze̱ꞌ naꞌ.
Ca xelexúꞌu benneꞌ judío lu naꞌ Dios
25 Leꞌe,
bi bíchaꞌdauꞌ,
dxaca lazraꞌ chéajniꞌile chee̱ da nagache nigá,
chee̱ quebe guéquele nácale benneꞌ sina.
Benneꞌ Israel caꞌ zaj naque̱ꞌ benneꞌ lázrdau zideꞌ tu chíꞌidauze,
ca zrin zra xelexúꞌu lu naꞌ Dios xúgute̱ benneꞌ quebe zaj naque̱ꞌ judío.
26 Gate gaca na,
nadxa xelelá xúgute̱ benneꞌ Israel caꞌ laweꞌ da naxúaj lu dizraꞌ láꞌazxa da dxenná na:
Benneꞌ weselá ze̱ꞌe̱ Sión,
naꞌ cue̱ꞌ da cale̱la da zaj nabaga zriꞌine zre sua Jacob.
27 Da nigá gaca xel-la wezría gunaꞌ nen benneꞌ caꞌ,
gate nedaꞌ cuaꞌ dul-la chee̱ꞌ.
28 Ca naca chee̱ dizraꞌ chaweꞌ chee̱ Cristo,
zaj naca benneꞌ judío caꞌ ca benneꞌ dxelecuídene̱ꞌ Dios chee̱ gaca da ba neza chee̱le leꞌe,
san Dios ne nazríꞌine̱ꞌ benneꞌ caꞌ laweꞌ da guqué̱ꞌe̱ xra xrtawe̱ꞌ caꞌ.
29 Ca da dxunna Dios,
quebe xequé̱ꞌe̱ na,
ne quebe dxuzúe̱ꞌ chaláꞌala nu ba bláwizre̱ꞌ.
30 Leꞌe nédxute̱ gudábagale xrtizra Dios,
san naꞌa,
laweꞌ da guledábaga benneꞌ judío caꞌ xrtizre̱ꞌ,
Dios dxexache lazre̱ꞌ leꞌe.
31 Cáꞌanqueze naꞌa,
benneꞌ judío caꞌ dxeledábague̱ꞌ xrtizra Dios,
san naca na chee̱ xexache lazreꞌ Dios le̱ꞌ ca dxexache lazre̱ꞌ leꞌe.
32 Dios be̱ꞌ lataj xúgute̱ꞌ guledábague̱ꞌ xrtizre̱ꞌ chee̱ gaca xexache lazre̱ꞌ xúgute̱ꞌ.
33 Szrente̱ naca xel-la gunníꞌa chee̱ xel-la sina,
ne xel-la dxéajniꞌi chee̱ Dios.
Quebe séquedxu chéajniꞌidxu ca da dxuchiꞌe̱,
ne quebe gaca gúnbea xánnedxu da dxune̱ꞌ.
34 ¿Núzraqueze gaca chéajniꞌi ca da xuꞌu xichaj lázrdau Xránadxu?
¿Núzraqueze gaca guzéajniꞌi Le̱ꞌ?
35 ¿Núzraqueze benneꞌ bi bnézruje̱ꞌ chee̱ Xránadxu,
chee̱ gun na ba xen bi xuzriꞌe̱ chee̱ bénneaꞌ?
36 Xúgute̱ da dxeléꞌedxu záꞌaca na lu naꞌ Dios,
naꞌ Le̱ꞌ be̱ne̱ꞌ da caꞌ,
ne zaj naca na chee̱ Lé̱queze̱ꞌ.
¡Gaca ba Dios chadía chacanna!
¡Caꞌan gaca na!