10
Leꞌe,
bi bíchaꞌdauꞌ,
da dxezá lazraꞌ,
ne da dxenabaꞌ Dios gune̱ꞌ chee̱ benneꞌ Israel caꞌ naca na chee̱ xelelé̱ꞌ.
2 Ca naca chee̱ benneꞌ caꞌ,
da li dxelebile lazre̱ꞌ da naca chee̱ Dios,
san quebe naca na chee̱ xel-la sina li.
3 Quebe zaj nézene̱ꞌ ca xrlátaje dxucáꞌana Dios bénneache,
san dxelaca lazre̱ꞌ xulucáꞌana xrlátaje cuine̱ꞌ,
ne quebe dxelezíꞌ lu ne̱ꞌe̱ ca xrlátaje dxucáꞌana Dios bénneache.
4 Cristo dxune̱ꞌ da dxaca lazreꞌ Dios gun da nadxixruj bea na,
laweꞌ da dxucáꞌana Cristo xrlátaje xúgute̱ bénneache dxeleajlí lazre̱ꞌ Le̱ꞌ.
5 Ca naca chee̱ da dxucáꞌana xrlátaje bénneache lau Dios da naca na ne̱ chee̱ da nadxixruj bea na,
bzuaj Moisés caní:
Benneꞌ dxune̱ꞌ ca naca da dxenná da nadxixruj bea na gaca bane̱ꞌ ne̱ chee̱ le̱ na.
6 Ca naca chee̱ da dxucáꞌana xrlátaje bénneache lau Dios da naca na ne̱ chee̱ xel-la dxeajlí lazreꞌ dxenná na caní:
Quebe nnauꞌ lu lazrdaꞌu:
“¿Núzraqueze benneꞌ cuéne̱ꞌ xabáa?”
(da naca na chee̱ gulétaje̱ꞌ Cristo),
7 ne quebe nnauꞌ:
“¿Núzraqueze benneꞌ xétaje̱ꞌ lataj chul-la chee̱ benneꞌ gate caꞌ?”
(da naca na chee̱ xebéaje̱ꞌ Cristo ládujla benneꞌ gate.)
8 ¿Bizra da naꞌ dxenná na:
Dizraꞌ naꞌ zua na gágute̱ naga zuꞌ,
lu dxuꞌu ne lu lazrdaꞌu?
Dizraꞌ nigá naca na dizraꞌ chaweꞌ da dxuzénentuꞌ bénneache chee̱ xeléajle̱ꞌe̱ chee̱ Cristo.
9 Che nen dxuꞌu dxennáuꞌ naca Cristo Xranuꞌ,
ne che lu lazrdaꞌu dxeajlí lazruꞌ Dios bsebane̱ꞌ Le̱ꞌ ládujla benneꞌ gate,
nadxa lauꞌ.
10 Lu lázrdaudxu dxeajlí lázredxu chee̱ xegáꞌanadxu xrlátaje lau Dios,
ne nen dxúꞌadxu dxexeché̱bedxu nácadxu chee̱ Cristo chee̱ ladxu.
11 Lu dizraꞌ láꞌazxa dxenná na:
Nu benneꞌ dxeajlí lazre̱ꞌ Le̱ꞌ quebe xeduéꞌene̱ꞌ.
12 Dios quebe dxebée̱ꞌ benneꞌ judío caꞌ,
u benneꞌ quebe zaj naque̱ꞌ judío laweꞌ da Lé̱queze Xránadxu naꞌ naque̱ꞌ Xrana xúgute̱ bénneache,
naꞌ dxunézrujle̱ꞌe̱ xúgute̱ benneꞌ caꞌ dxululáwizre̱ꞌ Le̱ꞌ.
13 Naca na ca da dxenná na:
Xúgute̱ benneꞌ dxululáwizre̱ꞌ La Xránadxu xelelé̱ꞌ.
14 Naꞌa ¿ájazra xululáwizre̱ꞌ Le̱ꞌ che quebe ne xeléajle̱ꞌe̱ chee̱ꞌ?
¿Ájazra xeléajle̱ꞌe̱ chee̱ꞌ che quebe ne xelenne̱ꞌ nu dxuchalaj chee̱ꞌ?
¿Ájazra xelenne̱ꞌ che quebe nu chiláꞌ benneꞌ guzenne̱ꞌ le̱ꞌ?
15 ¿Ájazra xuluzenne̱ꞌ bénneache che quebe nu nasel-la le̱ꞌ?
Naca na ca dxenná dizraꞌ láꞌazxa,
dxenná na:
Xrtante̱ naca lau Dios da dxelún benneꞌ dxeledé̱ꞌ dxuluzenne̱ꞌ bénneache dizraꞌ chee̱ xel-la dxebeza zri lazreꞌ,
ne dizraꞌ chaweꞌ.
16 Quegá xúgute̱ bénneache dxelezíꞌ lu ne̱ꞌe̱ dizraꞌ chaweꞌ nigá.
Naca na ca gunná Isaías,
gunné̱ꞌ:
“Xran,
¿zua nu benneꞌ ba guxéajle̱ꞌe̱ ca da dxuchálajntuꞌ?”
17 Caꞌ naca na,
dxéajle̱dxu chee̱ꞌ gate dxénedxu,
naꞌ da dxal-laꞌ xénedxu naca na da gunná Cristo.
18 Naꞌa dxenabaꞌ:
¿Quebe ne xelenne̱ꞌ?
Da li ba belenne̱ꞌ.
Lu dizraꞌ láꞌazxa dxenná na:
Da dxuluzén benneꞌ caní bache belén bénneache du ca naca
xe̱zr la xu nigá.
Dizraꞌ chee̱ benneꞌ caní bache belén bénneache du gabíꞌi xe̱zr la xu.
19 Xecha lasa dxenabaꞌ:
¿Quebe ne xeleque beꞌe benneꞌ Israel ca da gunná Dios?
Zaꞌa Moisés bzuaje̱ꞌ ca gunná Dios,
gunné̱ꞌ:
Nedaꞌ gunaꞌ gácale benneꞌ se̱ lazreꞌ chee̱ tu xe̱zre benneꞌ
quebe ne xelaque̱ꞌ tu xe̱zre.
Gunaꞌ zráꞌale tu xe̱zre benneꞌ quebe ne xeléajniꞌine̱ꞌ.
20 Gudé naꞌ bzuaj Isaías ca gunná Dios,
gunné̱ꞌ:
Benneꞌ quebe belexílaje̱ꞌ nedaꞌ belexezrélene̱ꞌ nedaꞌ.
Bleꞌe lawaꞌ benneꞌ caꞌ quebe bululáwizre̱ꞌ nedaꞌ.
21 Ca naca chee̱ benneꞌ Israel,
gunná Dios:
“Tu dxuláwizrazquezaꞌ benneꞌ quebe dxuluzúe̱ꞌ dizraꞌ,
ne dxeledábague̱ꞌ xrtizraꞌ.”