Dios guqué̱ꞌe̱ benneꞌ Israel caꞌ
9
Dxenníaꞌ da li ca bi chee̱ Cristo,
ne quebe dxun lazraꞌ,
naꞌ xichaj lázrdawaꞌ ne̱ chee̱ Beꞌ Láꞌazxa dxe̱ na nedaꞌ naca na da li.
2 Dxexíaje lázrele̱ꞌe̱daꞌ,
ne tu zúazqueze xel-la dxudía lu lázrdawaꞌ,
3 naꞌ dxezá lázrteaꞌ cuía xiꞌa nedaꞌ,
ne xecuasaꞌ nen Cristo,
la naca da nigá da gácale̱ na bi bíchaꞌdauꞌ caꞌ,
benneꞌ walázr chiaꞌ,
benneꞌ judío.
4 Benneꞌ caní zaj naque̱ꞌ zriꞌine zre sua Israel,
naꞌ Dios guzíꞌ lu ne̱ꞌe̱ benneꞌ caní ca bi chee̱ꞌ caꞌ.
Dios guzúe̱ꞌ ládujla benneꞌ caꞌ lu da xabáa chee̱ꞌ,
ne be̱ne̱ꞌ tu xel-la wezría nen benneꞌ caꞌ,
ne bnézruje̱ꞌ le̱ꞌ da nadxixruj bea na da bzuaj Moisés,
ne xel-la wil-la chee̱ xudauꞌ,
ne da nache̱be lazre̱ꞌ.
5 Zaj naque̱ꞌ zriꞌine zre zua xra xrtáudxu caꞌ,
naꞌ ládujla benneꞌ walázr chee̱ꞌ caꞌ,
lu be̱laꞌ dxen chee̱ꞌ blaꞌ Cristo,
Bénneaꞌ naque̱ꞌ Dios laweꞌ xúgute̱ da de̱,
ne gaca báqueze̱ꞌ chadía chacanna.
¡Caꞌ gaca na!
6 Quebe nnadxu quebe dxun Dios da dxenná xrtizre̱ꞌ,
san da naca na,
quegá xúgute̱ zriꞌine zre sua Israel zaj nababa benneꞌ Israel caꞌ chee̱ Dios.
7 Quegá xúgute̱ zriꞌine zre sua Abraham zaj naca xánnie̱ꞌ zríꞌinequeze̱ꞌ,
san naca na ca guzre Dios le̱ꞌ,
gunné̱ꞌ:
“Lu zriꞌine zre sua Isaac xelaca zriꞌine zre suꞌ.”
8 Da nigá dxuléꞌe na dxiꞌu quebe nu naca bi chee̱ Dios cáte̱ze nálajbeꞌ,
san zaj naca bi chee̱ꞌ benneꞌ caꞌ zaj nálaje̱ꞌ ca naca da guche̱be lazreꞌ Dios.
9 Ca naca da guche̱be lazreꞌ Dios da gunné̱ꞌ chee̱ Abraham naca na da nigá:
Lu zra da ba gunníaꞌ xidaꞌ,
naꞌ Sara chiuꞌ sane̱ꞌ tu zríꞌinuꞌ.
10 Quegá tuze da nigá,
san cáꞌanqueze gate Rebeca guzráꞌ chupa zríꞌine̱ꞌ naca tuze xrabeꞌ,
Isáac,
xra xrtáudxu,
11-13 ne gate bi caꞌ quebe ne xelálajbeꞌ,
ne quebe ne xelunbeꞌ da xrlátaje u da cale̱la,
Dios guzre̱ꞌ Rebeca:
“Bi waca chiuꞌ gácabeꞌ we̱n zrin chee̱ bi cuideꞌ.”
Da nigá naca na tuze nen da naxúaj lu dizraꞌ láꞌazxa,
da dxenná na:
Bzriꞌidaꞌ Jacob,
ne quegá Esaú.
Caꞌ guca na,
begáꞌana chaweꞌ da xuꞌu lu naꞌ Dios chee̱ gudxée̱ꞌ ca naca da núnqueze̱ꞌ,
benneꞌ caꞌ dxaca lazre̱ꞌ guláwizre̱ꞌ,
ne quebe dxuché̱ꞌe̱ ca da zaj nune̱ꞌ.
14 ¿Bízraqueze nnadxu?
¿Naca Dios Benneꞌ quebe dxun da xrlátaje?
¡Cabataꞌ!
15 Guzre̱ꞌ Moisés:
“Wezrí lazraꞌ benneꞌ dxaca lazraꞌ,
ne wexache lazraꞌ benneꞌ dxaca lazraꞌ.”
16 Caꞌ naca na,
quebe naca laweꞌ da dxaca lázredxu,
ne quegá laweꞌ da dxun ziꞌ lázredxu,
san naca na laweꞌ da dxexache lazreꞌ Dios dxiꞌu.
17 Lu dizraꞌ láꞌazxa Dios dxe̱ꞌe̱ wenná bea chee̱ xe̱zr la xu Egipto:
“Be̱naꞌ lueꞌ wenná bea chee̱ guléꞌedaꞌ ne̱ chiuꞌ lueꞌ xel-la waca chiaꞌ,
ne chee̱ xelúnbea bénneache La nedaꞌ du gabíꞌi xe̱zr la xu.”
18 Caꞌ naca na,
Dios dxexache lazre̱ꞌ benneꞌ dxaca lazre̱ꞌ,
ne cáꞌanqueze dxuꞌe̱ lataj gaque̱ꞌ zizraj lazreꞌ benneꞌ dxaca lazre̱ꞌ guꞌe̱ lataj gaque̱ꞌ zizraj lazreꞌ.
19 Naꞌa xiꞌu nedaꞌ:
Che caní naca na,
¿bizr chee̱ naꞌ dxugapa Dios bénneache dul-la?
¿Núzraqueze sequeꞌ tábaga ca da dxaca lazreꞌ Le̱ꞌ?
20 Lueꞌ,
benneꞌ,
¿nuzra nacuꞌ lueꞌ chee̱ gutil-luꞌ Dios dizraꞌ?
¿Waca tu xesuꞌ xe̱ na benneꞌ be̱ne̱ꞌ le̱ na:
¿Bizr chée̱ naꞌ be̱nuꞌ nedaꞌ caní?
21 Benneꞌ we̱n xesuꞌ zruaga naꞌ wazéquene̱ꞌ gune̱ꞌ chee̱ gunaꞌ naꞌ ca dxaca lazre̱ꞌ.
Wazéquene̱ꞌ gune̱ꞌ chee̱ gunaꞌ náꞌqueze tu xesuꞌ da zácadxa,
ne tu xesuꞌ da xálaze.
22 ¿Bizra nnáquezdxu che Dios guca lazre̱ꞌ guléꞌene̱ꞌ dxiꞌu ca dxuzría xiꞌe bénneache,
ne ca naca xel-la waca chee̱ꞌ,
naꞌ lu xel-la zren lazreꞌ chee̱ꞌ bchaga lawe̱ꞌ chee̱ benneꞌ caꞌ lácala dxal-laꞌ xeledée̱ꞌ le̱ꞌ xel-la ziꞌ,
naꞌ xelebía xíꞌte̱queze̱ꞌ?
23 Be̱ne̱ꞌ na chee̱ bléꞌene̱ꞌ ca naca xel-la szren chee̱ da xabáa chee̱ꞌ lu da naca chee̱dxu dxiꞌu,
nácadxu benneꞌ dxexache lazre̱ꞌ Le̱ꞌ,
ne bequé̱ꞌe̱ dxiꞌu nédxute̱ chee̱ gaca chee̱dxu xabáa naꞌ da nucueza Le̱ꞌ.
24 Dios bláwizre̱ꞌ dxiꞌu ládujla benneꞌ judío,
ne ládujla benneꞌ quebe zaj naque̱ꞌ judío.
25 Naca na ca naxúaj na lu dizraꞌ láꞌazxa ca gunná Oseas,
gunné̱ꞌ:
Benneꞌ caꞌ quebe zaj naque̱ꞌ bi chiaꞌ,
xapaꞌ le̱ꞌ bi chiaꞌ,
naꞌ benneꞌ quebe bzriꞌidaꞌ,
xapaꞌ le̱ꞌ bi nazriꞌite̱ lazraꞌ.
26 Lu lataj naga guchaꞌ-beꞌ:
Quebe nácale bi chiaꞌ,
náꞌqueze xapaꞌ le̱ꞌ bi chee̱ Dios ban.
27 Ca naca chee̱ benneꞌ Israel caꞌ,
Isaías dxenné̱ꞌ:
“Lácala zaj naxán zriꞌine zre sua Israel ca naxán xuzreꞌ dxeꞌ dxuꞌa tu xe̱gu zren,
bábaze benneꞌ caꞌ xelexegáꞌane̱ꞌ chee̱ xelelé̱ꞌ”,
28 laweꞌ da gun Xránadxu ca dxenná xrtizre̱ꞌ,
guzría xiꞌe̱ ze̱zr la xu nigá lu da naca xrlátaje,
ne chadite.
29 Naca na ca gunná lé̱queze Isaías naꞌ gate nate,
gunné̱ꞌ:
Chela Xránadxu,
Xrana zánete̱ gubáz chee̱ xabáa,
quebe bcaꞌane̱ꞌ zriꞌine zre súadxu caꞌ,
naꞌ xenítedxu ca guca chee̱ xe̱zre Sodoma,
ne chee̱ xe̱zre Gomorra.
Benneꞌ judío caꞌ, ne dizraꞌ chaweꞌ
30 ¿Bízraqueze nnadxu?
Benneꞌ quebe zaj naque̱ꞌ judío,
ne quebe belexexílaj lazre̱ꞌ xelexegáꞌane̱ꞌ xrlátaje lau Dios,
zaj naque̱ꞌ benneꞌ belexegáꞌane̱ꞌ xrlátaje lau Dios,
da zéaje̱ na,
belexegáꞌane̱ꞌ xrlátaje laweꞌ da guleajlí lazre̱ꞌ Cristo.
31 Benneꞌ Israel caꞌ,
benneꞌ belune̱ꞌ ca dxenná da nadxixruj bea na da dxal-laꞌ xucáꞌana na le̱ꞌ xrlátaje lau Dios,
quebe gulezéquene̱ꞌ xelexegáꞌane̱ꞌ xrlátaje lawe̱ꞌ Le̱ꞌ.
32 ¿Bizr chee̱ naꞌ?
Naca na laweꞌ da quebe belune̱ꞌ ba xuzre xelexegáꞌane̱ꞌ xrlátaje ne̱ chee̱ xel-la dxeajlí lazreꞌ chee̱ꞌ,
san gulaca lazre̱ꞌ xelexegáꞌane̱ꞌ xrlátaje ne̱ chee̱ da belúnqueze̱ꞌ le̱ꞌ.
Chee̱ le̱ naꞌ xeajlecházie̱ꞌ laweꞌ xiaj da dxelechegu bénneache,
da naꞌ naca Cristo
33 ca da dxenná Dios lu dizraꞌ láꞌazxa chee̱ꞌ,
dxenné̱ꞌ:
Nedaꞌ dxuzúaꞌ lu xe̱zre Sión tu benneꞌ naque̱ꞌ xiaj da dxelechegu bénneache.
Nu benneꞌ cheajlí lazre̱ꞌ Le̱ꞌ quebe xeduéꞌequezne̱ꞌ.