Xel-la nabán da dxunna Beꞌ Láꞌazxa chee̱ Dios dxiꞌu
8
Naꞌa,
quebe zaj nabía xiꞌ benneꞌ caꞌ zaj naque̱ꞌ tuze nen Jesucristo,
benneꞌ caꞌ québedxa dxelune̱ꞌ da cale̱la cáte̱ze dxenná bea be̱laꞌ dxen chee̱ꞌ,
san dxelune̱ꞌ da xrlátaje cáte̱ze dxenná bea Beꞌ Láꞌazxa.
2 Da nadxixruj bea na da dxunna Beꞌ Láꞌazxa,
Bénneaꞌ dxunne̱ꞌ dxiꞌu xel-la nabán laweꞌ da nácadxu tuze nen Jesucristo,
ba bselá na nedaꞌ lu naꞌ da bdxixruj beꞌe Moisés da dxuléꞌe na nedaꞌ nacaꞌ benneꞌ dul-la,
ne nabagaꞌ zria,
ne dxal-laꞌ gatiaꞌ.
3 Ba be̱n Dios da quebe guca gun da bdxixruj beꞌe Moisés,
ba gudúe̱ꞌ dul-la da zaj nabaga bénneache.
Da nadxixruj bea na quebe guca gun na gundxu da xrlátaje laweꞌ da nate niꞌa naꞌ be̱laꞌ dxen chee̱dxu.
Chee̱ le̱ naꞌ Dios gusel-le̱ꞌ Zríꞌinequeze̱ꞌ,
naꞌ guque̱ꞌ bénneache ca naca be̱laꞌ dxen chee̱dxu da xuꞌu na lu naꞌ dul-la,
chee̱ gutie̱ꞌ ne̱ chee̱ dul-la chee̱dxu,
laweꞌ da nabágadxu zria gátedxu ne̱ chee̱ dul-la da zúale̱ be̱laꞌ dxen chee̱dxu.
4 Caní be̱ne̱ꞌ chee̱ gaca gundxu da nadxixruj bea na,
dxiꞌu québedxa dxundxu ca dxenná bea be̱laꞌ dxen chee̱dxu,
san dxundxu ca dxenná bea Beꞌ Láꞌazxa.
5 Benneꞌ dxelune̱ꞌ ca dxenná bea be̱laꞌ dxen chee̱ꞌ zaj dxeꞌe̱ gunne xue da naca chee̱ be̱laꞌ dxen chee̱ꞌ,
san benneꞌ dxelune̱ꞌ ca dxenná bea Beꞌ Láꞌazxa zaj dxeꞌe̱ gunne xue da naca chee̱ Beꞌ Láꞌazxa.
6 Benneꞌ zaj dxeꞌe̱ gunne xue da naca chee̱ be̱laꞌ dxen chee̱ꞌ welátequeze̱ꞌ,
san benneꞌ caꞌ zaj dxeꞌe̱ gunne xue da naca chee̱ Beꞌ Láꞌazxa xelaca bane̱ꞌ,
ne xelebeza zri lazre̱ꞌ.
7 Benneꞌ zaj dxeꞌe̱ gunne xue chee̱ be̱laꞌ dxen chee̱ꞌ dxelecuídene̱ꞌ Dios,
laweꞌ da quebe dxelaca lazre̱ꞌ,
ne quebe gaca xuluzúa cuine̱ꞌ lu naꞌ da nadxixruj bea Le̱ꞌ.
8 Chee̱ le̱ naꞌ benneꞌ dxelune̱ꞌ ca da dxezá lazreꞌ be̱laꞌ dxen chee̱ꞌ quebe gaca xelune̱ꞌ da dxezaca ba lazreꞌ Dios.
9 Leꞌe quebe dxunle ca dxenná bea be̱laꞌ dxen chee̱le,
san dxunle ca dxenná bea Beꞌ Láꞌazxa,
laweꞌ da ba zúale̱ Beꞌ Láꞌazxa chee̱ Dios leꞌe.
Benneꞌ quebe zúale̱ Beꞌ Láꞌazxa le̱ꞌ,
Beꞌ da nasel-la Cristo,
quebe naque̱ꞌ bi chee̱ Cristo.
10 Lácala zua Cristo lu xichaj lázrdaule,
lu be̱laꞌ dxen chee̱le dxal-laꞌ gátele,
san lu xichaj lázrdaule ba xuꞌule tu xel-la nabán cube laweꞌ da bcaꞌana Dios leꞌe xrlátaje.
11 Che zúale̱ Beꞌ Láꞌazxa leꞌe,
Beꞌ chee̱ Dios,
Bénneaꞌ bsebane̱ꞌ Jesucristo ládujla benneꞌ gate,
Lé̱queze Dios naꞌ,
Bénneaꞌ bsebane̱ꞌ Le̱ꞌ,
gunne̱ꞌ xel-la nabán cube chee̱ be̱laꞌ dxen chee̱le da gátequeze na.
Da nigá gune̱ꞌ ne̱ chee̱ Beꞌ Láꞌazxa chee̱ Dios,
Bénneaꞌ zue̱ꞌ xichaj lázrdaule.
12 Caꞌ naca na,
bi bíchaꞌdauꞌ,
nabágadxu tu da gundxu,
san quegá chee̱ gundxu ca dxenná bea be̱laꞌ dxen chee̱dxu.
13 Che gundxu ca dxenná bea be̱laꞌ dxen chee̱dxu,
gátequezdxu,
san che ne̱ chee̱ Beꞌ Láꞌazxa guzúadxu chaláꞌala da dxun be̱laꞌ dxen chee̱dxu,
naꞌ gaca bandxu.
14 Xúgute̱ benneꞌ caꞌ dxelún ca dxuléꞌe Beꞌ Láꞌazxa le̱ꞌ,
benneꞌ caní zaj naque̱ꞌ bi chee̱ Dios.
15 Beꞌ Láꞌazxa da guzíꞌ lu naꞌle quebe dxuguꞌe̱ leꞌe lu xel-la dxezrebe ca benneꞌ zaj nadaꞌu,
san dxune̱ꞌ nácale bi chee̱ Dios.
Ne̱ chee̱ Beꞌ Láꞌazxa nigá dxenne̱dxu:
“Xrae”,
gate dxuláwizredxu Dios.
16 Lé̱queze Beꞌ Láꞌazxa nigá dxexeché̱bele̱ne̱ꞌ beꞌ nácadxu,
dxenné̱ꞌ nácadxu bi chee̱ Dios.
17 Che nácadxu bi chee̱ꞌ caꞌ,
gácaqueze chee̱dxu da naca chee̱ Dios.
Gaca chee̱dxu da dxal-laꞌ gaca chee̱ Cristo che gudedxu xel-la ziꞌ tu zren nen Le̱ꞌ,
chee̱ xegáꞌana szrendxu tu zren nen Le̱ꞌ.
18 Dxéquedaꞌ ca xel-la ziꞌ da dxededxu naꞌa quebe gutíl-lele̱be na ca da xabáa da sidxu lu zra da za zaꞌ.
19 Da dxelezá lazreꞌ,
ne da dxelebeza xúgute̱ da nun Dios naca na chee̱ guléꞌe Dios bi zaj naca be̱ꞌ bi chee̱ꞌ caꞌ.
20 Ca naca da nun Dios belexaca na dácheze,
quegá ca gulaca lazreꞌ le̱ na,
san laweꞌ da núnqueze Dios gaca na caꞌ.
Be̱ne̱ꞌ zua da dxelebeza lazre na
21 laweꞌ da xeledxúaj ca da nun Dios lu naꞌ da dxuzría xiꞌ le̱ na,
chee̱ gaca ba neza chee̱ na tu zren nen bi caꞌ zaj naca bi caꞌ chee̱ Dios lu xel-la weselá chee̱beꞌ da naca xabáa.
22 Nézquezdxu,
ca zrin naꞌa zra,
xúgute̱ da nun Dios dxelebezre we̱ꞌ na,
ne dxeledé na xel-la ziꞌ ca tu nuꞌula zue̱ꞌ xel-la dxudía chee̱ sane̱ꞌ bidauꞌ.
23 Quegá tuze da naꞌ nun Dios dxedé na xel-la ziꞌ,
san cáꞌanqueze dxiꞌu dxededxu xel-la ziꞌ,
dxiꞌu naꞌ ba zúale̱ Beꞌ Láꞌazxa dxiꞌu,
da naca chee̱dxu tu da dxunna bea na da dxal-laꞌ sidxu.
Cáꞌanqueze dxiꞌu dxebezre lázredxu dxácate̱ naꞌ dxebézadxu zra guléꞌe Dios nácadxu bi chee̱ꞌ caꞌ,
gate naꞌ gunne̱ꞌ cheedxu tu be̱laꞌ dxen cube.
24 Lu da dxebeza lázredxu guládxu,
san che gaca léꞌedxu da dxebeza lázredxu,
québedxa naca na tu da dxebeza lázredxu.
Tu da ba dxeléꞌedxu,
québedxa dxun na ba xen cueza lázredxu na.
25 Che da dxebeza lázredxu naca na tu da quebe gaca léꞌedxu,
dxun na ba xen cuézadxu na lu dute̱ xel-la zren lazreꞌ chee̱dxu.
26 Cáꞌanqueze Beꞌ Láꞌazxa dxácale̱ne̱ꞌ dxiꞌu lu xel-la nate niꞌa naꞌ chee̱dxu.
Quebe nezdxu guchálajle̱dxu Dios ca dxal-laꞌ gundxu,
san Lé̱queze Beꞌ Láꞌazxa dxue lazre̱ꞌ lau Dios waláz chee̱dxu,
ne dxebezre lazre̱ꞌ ca da quebe dxezequeꞌ nu nne̱.
27 Dios,
Bénneaꞌ dxenné̱ꞌe̱ da zua xichaj lázrdaudxu nézene̱ꞌ da dxaca lazreꞌ nne̱ Beꞌ Láꞌazxa laweꞌ da dxue lazreꞌ Beꞌ Láꞌazxa lau Dios cáte̱ze naca da dxaca lazreꞌ Dios waláz chee̱ bi zaj naca be̱ꞌ chee̱ꞌ.
Nácadxadxu wal-la ca tu benneꞌ dxezruéꞌene̱ꞌ
28 Nezdxu dxuchine Dios xúgute̱ da dxaca chee̱dxu chee̱ gucáꞌana na dxiꞌu chaweꞌ,
dxiꞌu naꞌ nazriꞌidxu Le̱ꞌ,
naꞌ Le̱ꞌ bláwizre̱ꞌ dxiꞌu ca naca da nune̱ꞌ gune̱ꞌ.
29 Benneꞌ caꞌ bénbea Dios nédxudaute̱,
be̱n Le̱ꞌ nédxudaute̱ xelaque̱ꞌ ca naca Zríꞌinequeze̱ꞌ,
chee̱ gaca Zríꞌine̱ꞌ naꞌ Benneꞌ blau ládujla zánete̱ bi biche̱ꞌ.
30 Benneꞌ caꞌ be̱n Dios nédxudaute̱ ca xelaque̱ꞌ,
cáꞌanqueze bláwizre̱ꞌ le̱ꞌ,
naꞌ benneꞌ caꞌ bláwizre̱ꞌ,
cáꞌanqueze bcaꞌane̱ꞌ le̱ꞌ xrlátaje,
naꞌ benneꞌ caꞌ bcaꞌane̱ꞌ xrlátaje,
cáꞌanqueze bcaꞌana szrénqueze̱ꞌ le̱ꞌ.
31 ¿Bizra nnadxu chee̱ da caní?
Che caní dxácale̱ Dios dxiꞌu,
¿nuzra benneꞌ sequeꞌ tábague̱ꞌ dxiꞌu?
32 Dios quebe bezúene̱ꞌ ziꞌ gunne̱ꞌ dxiꞌu Zríꞌinequeze̱ꞌ,
san bdee̱ꞌ Le̱ꞌ chee̱ gútie̱ꞌ waláz chee̱dxu.
¿Quebe gunne̱ꞌ chee̱dxu xúgute̱ da caꞌ tu zren nen Zríꞌine̱ꞌ?
33 ¿Nuzra sequeꞌ bi nne̱ chee̱ benneꞌ caꞌ ba gucáꞌa Dios le̱ꞌ?
Lé̱queze Dios naꞌ bcaꞌane̱ꞌ benneꞌ caꞌ xrlátaje.
34 ¿Nuzra benneꞌ sequeꞌ nne̱ꞌ zaj nabaga zria benneꞌ caꞌ?
Lé̱queze Cristo gutie̱ꞌ waláz chee̱dxu,
ne da naca na blaudxa,
naque̱ꞌ Bénneaꞌ bebán ládujla benneꞌ gate,
naꞌ zue̱ꞌ chaláꞌa xabe̱la chee̱ Dios,
ga dxue lazre̱ꞌ lau Le̱ꞌ waláz chee̱dxu.
35 ¿Nuzra sequeꞌ xecáꞌa dxiꞌu lu naꞌ Cristo,
Bénneaꞌ nazríꞌine̱ꞌ dxiꞌu?
¿Wazequeꞌ xel-la ziꞌ,
u xel-la xacheꞌ,
u da nau ziꞌ xuzre na dxiꞌu,
u xel-la dxedún,
u da dxugúa zra lánadxu,
u da ste̱be,
u xel-la gute?
36 Naca na ca da naxúaj na lu dizraꞌ láꞌazxa,
dxenná na:
Laweꞌ da nácantuꞌ bi chiuꞌ zúaquezentuꞌ gátentuꞌ xúgute̱ zra.
Dxelune̱ꞌ netuꞌ ca zrílaꞌdauꞌ ba zaj zúabaꞌ chee̱ xelútie̱ꞌ-baꞌ.
37 Lu xúgute̱ da caní nácadxadxu szren ca benneꞌ dxelezruéꞌene̱ꞌ,
ne̱ chee̱ Bénneaꞌ bzriꞌine̱ꞌ dxiꞌu.
38 Chee̱ le̱ naꞌ dxuxrén lazraꞌ quebe bi de̱ da sequeꞌ gucuasa na dxiꞌu lu naꞌ Dios,
Bénneaꞌ nazríꞌine̱ꞌ dxiꞌu.
Ne xel-la gute,
ne xel-la nabán,
ne gubáz chee̱ xabáa caꞌ,
ne beꞌ xriwe̱ꞌ dxelenná bea,
ne xel-la waca chee̱ beꞌ xriwe̱ꞌ caꞌ,
ne da dxaca naꞌa,
ne da za zaꞌ,
39 ne da zua xabáa,
ne da zua lu xe̱zr la xu,
ne xetú da nun Dios,
quebe sequeꞌ xecáꞌa na dxiꞌu lu xel-la zriꞌi lazreꞌ chee̱ Dios,
da bléꞌene̱ꞌ dxiꞌu gate bdee̱ꞌ Xránadxu Jesucristo waláz chee̱dxu.