Tu da dxuléꞌe na ca naca chee̱ xel-la wechaga naꞌ
7
Bi bíchaꞌdauꞌ,
leꞌe núnbeale da nadxixruj bea na,
zaj xuꞌu lu naꞌ da nadxixruj bea na bénneache tuze dxácate̱ ne zaj naca bane̱ꞌ.
2 Ca naca da nigá,
tu nuꞌula nuchaga naꞌ xuꞌe̱ lu naꞌ benneꞌ chee̱ꞌ ne̱ chee̱ da nadxixruj bea na dxácate̱ zue̱ꞌ nabane̱ꞌ,
san che gate benneꞌ chee̱ꞌ,
naꞌ xedxúaj zruꞌule̱ꞌ lu naꞌ da nadxixruj bea na naꞌ.
3 Caꞌ naca na,
che nuꞌula naꞌ súale̱ne̱ꞌ benneꞌ xula dxácate̱ ne nabán benneꞌ chee̱ꞌ,
gune̱ꞌ dul-la gáchajne̱ꞌ xrba chee̱ xel-la nuchaga naꞌ,
san che benneꞌ chee̱ꞌ naꞌ gatie̱ꞌ,
xedxúaj zruꞌule̱ꞌ lu naꞌ da nadxixruj bea na naꞌ,
naꞌ waca xuchaga náꞌle̱ne̱ꞌ benneꞌ xula,
ne quebe gune̱ꞌ dul-la da gáchajne̱ꞌ xrba chee̱ xel-la nuchaga naꞌ.
4 Cáꞌanqueze naca chee̱le leꞌe,
bi bíchaꞌdauꞌ,
leꞌe zrágale be̱l-laꞌ dxen chee̱ Cristo,
ba nácale ca benneꞌ gate,
ne québedxa xuꞌule lu naꞌ da bdxixruj beꞌe Moisés,
chee̱ gácale ca zruꞌula benneꞌ xula.
Naꞌa nácale ca zruꞌula Cristo,
Bénneaꞌ bebane̱ꞌ ládujla benneꞌ gate,
chee̱ gácadxu bi guchine Dios.
5 Dxácate̱ naꞌ be̱ndxu da naca chee̱ be̱laꞌ dxen chee̱dxu,
da nadxixruj bea na bleꞌe na dxiꞌu naca dul-la da be̱ndxu ca da dxezá lazreꞌ be̱laꞌ dxen chee̱dxu,
naꞌ da naꞌ guché̱ na dxiꞌu lu xel-la gute.
6 Naꞌa ba nácadxu ca benneꞌ zaj nate,
naꞌ ba bedxúajdxu lu naꞌ da nadxixruj bea na da gunná beꞌe na dxiꞌu,
chee̱ gaca gundxu zrin chee̱ Dios lu xel-la nabán cube da dxunna Beꞌ Láꞌazxa dxiꞌu,
ne quegá gundxu zrin naꞌ lu da nadxixruj bea gula da naxúaj na.
Dul-la da zúale̱ nedaꞌ
7 ¿Bizra nnadxu xcaꞌ?
¿Dxun da nadxixruj bea na nácadxu benneꞌ dul-la?
¡Cabataꞌ!
Quebe gunezdaꞌ da naca na dul-la chela ca bleꞌe da nadxixruj bea na nedaꞌ.
Quebe gunezdaꞌ naca dul-la sa lazraꞌ da naca chee̱ nu benneꞌ chela ca gunná da nadxixruj bea na:
Quebe sa lazruꞌ da naca chee̱ nu benneꞌ.
8 Bleꞌe da nadxixruj bea na nedaꞌ da naca dul-la,
naꞌ guque beꞌedaꞌ zúale̱ꞌe̱ zánete̱ da cale̱la lu xichaj lázrdawaꞌ da guzá lazraꞌ,
laweꞌ da gate quebe ne gúnbeꞌa da nadxixruj bea na,
guca dul-la chiaꞌ tu da nagache lawaꞌ nedaꞌ.
9 Guzúa tu zra gate quebe ne laꞌ da nadxixruj bea,
naꞌ gúquedaꞌ naca banaꞌ nedaꞌ,
san gate bendaꞌ da naꞌ gunná beꞌe na nedaꞌ,
bénbeꞌa da naca dul-la,
naꞌ guque beꞌedaꞌ nabagaꞌ zria,
ne dxal-laꞌ gatiaꞌ.
10 Caꞌan guca,
da nadxixruj bea naꞌ naca na chee̱ gunna na nedaꞌ xel-la nabán,
san guca na chiaꞌ ca tu da be̱te nedaꞌ
11 laweꞌ da bleꞌe da nadxixruj bea naꞌ nedaꞌ da naca na dul-la,
da naꞌ guzí xe̱ na nedaꞌ,
naꞌ ne̱ chee̱ da nadxixruj bea naꞌ guque beꞌedaꞌ nabagaꞌ zria,
ne dxal-laꞌ gatiaꞌ.
12 Caꞌ naca na,
da li naca láꞌazxa da nadxixruj bea na.
Da nadxixruj bea naꞌ naca na láꞌazxa,
ne xrlátaje,
ne chaweꞌ.
13 ¿Ájazra naca da nigá?
¿Be̱te da nadxixruj bea xrlátaje naꞌ nedaꞌ?
¡Cabataꞌ!
Dul-la naꞌ be̱te na nedaꞌ,
naꞌ caní guque beꞌedaꞌ naca na dul-la.
Da nigá guque beꞌedaꞌ ne̱ chee̱ da nadxixruj bea xrlátaje naꞌ,
naꞌ caní bleꞌe da nadxixruj bea naꞌ da sbánle̱ꞌe̱ naca dul-la.
14 Nezdxu da nadxixruj bea na naca na da be̱nna Beꞌ Láꞌazxa chee̱ Dios dxiꞌu,
san lu be̱laꞌ dxen chiaꞌ nacaꞌ ca tu benneꞌ nadaꞌu,
naꞌ da nacaꞌ dxun na gunaꞌ dul-la.
15 Nedaꞌ quebe dxéajniꞌidaꞌ da dxaca chiaꞌ laweꞌ da quebe dxunaꞌ da dxaca lazraꞌ gunaꞌ,
san da dxecuídedaꞌ naca na da dxunaꞌ.
16 Che dxunaꞌ da cale̱la da quebe dxaca lazraꞌ gunaꞌ,
da naꞌ dxenná da nadxixruj bea na naca na dul-la,
naꞌ nezdaꞌ xrlátaje naca da nadxixruj bea na.
17 Caꞌ naca na,
quegá nedaꞌ dxunaꞌ da naꞌ,
san dul-la da zúale̱ nedaꞌ,
le̱ naꞌ dxun na caꞌ.
18 Nezdaꞌ quebe bi zúale̱ be̱laꞌ dxen chiaꞌ da naca xrlátaje,
laweꞌ da dxezá lazraꞌ gunaꞌ da xrlátaje,
san quebe dxezéquedaꞌ gunaꞌ na.
19 Quebe dxunaꞌ da xrlátaje da dxaca lazraꞌ gunaꞌ,
san dxunaꞌ da cale̱la da quebe dxaca lazraꞌ gunaꞌ.
20 Chee̱ le̱ naꞌ,
che dxunaꞌ da quebe dxaca lazraꞌ gunaꞌ,
quebe naca nedaꞌ dxunaꞌ na,
san dul-la da zúale̱ nedaꞌ dxun na caꞌ.
21 Caní naca da dxaca chiaꞌ:
Gate dxaca lazraꞌ gunaꞌ da xrlátaje,
dxuléꞌe lawe zúale̱ da cale̱la nedaꞌ.
22 Lu xichaj lázrdawaꞌ dxedánedaꞌ da nadxixruj bea Dios,
23 san dxeque beꞌedaꞌ lu be̱laꞌ dxen chiaꞌ zua tu da dxedábaga na ca da dxaca lazraꞌ,
da naca da nadxixruj bea dul-la da zúale̱ be̱laꞌ dxen chiaꞌ,
naꞌ dxenná beꞌe na nedaꞌ.