Nácadxu ca benneꞌ gate caꞌ chee̱ québedxa gundxu dul-la, naꞌ naca bandxu nen Cristo
6
¿Bízraqueze nnadxu?
¿Gúndxadxu dul-la chee̱ guléꞌe láwedxa xel-la zriꞌi lazreꞌ chee̱ Dios?
2 ¡Cabataꞌ!
Ba nácadxu ca benneꞌ gate chee̱ québedxa gundxu dul-la.
¿Ájazra gúndxadxu dul-la?
3 ¿Quebe nézele leꞌe,
xúgute̱dxu dxiꞌu ba nadxúadxu nisa chee̱ gácadxu tuze nen Jesucristo,
naca na ca ba nátedxu tu zren nen Le̱ꞌ lu da nadxúadxu nisa?
4 Caꞌ naca na,
ne̱ chee̱ da nadxúadxu nisa naca ca bgáchedxu tu zren nen Le̱ꞌ,
ne nátedxu chee̱ xebandxu,
ne súadxu tu lu xel-la nabán cube cáte̱ze guca chee̱ Cristo,
bebane̱ꞌ ládujla benneꞌ gate ne̱ chee̱ xel-la waca xabáa chee̱ Xre̱ꞌ.
5 Che gúcadxu tuze nen Cristo lu xel-la gute,
cáꞌanqueze gácadxu tuze nen Le̱ꞌ lu xel-la dxexebán chee̱ꞌ.
6 Nezdxu da gúcadxu gate nate ba gudá na le̱ꞌe̱ xaga béguaj tu zren nen Le̱ꞌ chee̱ cuía xiꞌ benneꞌ dul-la da gúcadxu chee̱ québedxa gundxu zrin chee̱ dul-la ca benneꞌ zaj nadaꞌu chee̱n.
7 Tu benneꞌ ba nate,
ba bedxúaje̱ꞌ lu naꞌ dul-la.
8 Che ba gútedxu tu zren nen Cristo,
dxuxrén lázredxu gaca bánquezdxu tu zren nen Le̱ꞌ
9 laweꞌ da nezdxu quebe gate Cristo da xula laweꞌ da ba bebane̱ꞌ ládujla benneꞌ gate,
naꞌ québedxa xuꞌe̱ lu naꞌ xel-la gute.
10 Gate gute Cristo,
tu lásaze gutie̱ꞌ ne̱ chee̱ dul-la waláz chee̱ xúgute̱ bénneache,
san naꞌa naca bane̱ꞌ,
naꞌ lu naꞌ Dios naca bane̱ꞌ.
11 Cáꞌanqueze leꞌe,
le gueque nácale benneꞌ gate chee̱ québedxa gunle dul-la,
san naca banle lu naꞌ Dios tu zren nen Xránadxu Jesucristo.
12 Chee̱ le̱ naꞌ québedxa güele lataj nna beꞌe dul-la be̱laꞌ dxen chee̱le da dxal-laꞌ gate,
chee̱ québedxa gun na gunle da dxezá lazreꞌ be̱laꞌ dxen chee̱le.
13 Quebe guzúa cuínale lu naꞌ dul-la chee̱ guchine na leꞌe lu da cale̱la,
san le guzúa cuínale lu naꞌ Dios,
gácale ca benneꞌ belexebán ládujla benneꞌ gate,
chee̱ guchínene̱ꞌ leꞌe lu da xrlátaje.
14 Québedxa gaca dul-la nna beꞌe na leꞌe laweꞌ da québedxa xuꞌule lu naꞌ da nadxixruj bea na,
san xuꞌule lu naꞌ xel-la zriꞌi lazreꞌ chee̱ Dios.
Tu da dxuléꞌe na ca naca chee̱ benneꞌ zaj nadaꞌu
15 ¿Bizra xcaꞌ?
¿Gundxu dul-la laweꞌ da québedxa xúꞌudxu lu naꞌ da nadxixruj bea na,
san xúꞌudxu lu naꞌ xel-la zriꞌi lazreꞌ chee̱ Dios?
¡Cabataꞌ!
16 Ba nézquezle che guzúa cuínale lu naꞌ tu xránale ca benneꞌ zaj nadaꞌu chee̱ guzúale dizraꞌ chee̱ꞌ,
nadxa nácale benneꞌ zaj nadaꞌu chee̱ xránale,
ne dxun na ba xen guzúale dizraꞌ chee̱ꞌ.
Cáꞌanqueze naca chee̱le leꞌe che guzúale dizraꞌ chee̱ dul-la,
da gunna na leꞌe xel-la gute,
u che guzúale dizraꞌ chee̱ Dios,
chee̱ gácale xrlátaje.
17 Xcalén Dios,
lácala gúcale ca benneꞌ zaj nadaꞌu lu naꞌ dul-la,
naꞌa du lázrele dxuzúale dizraꞌ chee̱ dizraꞌ li naꞌ,
lu da naꞌ bzua cuínale.
18 Gate bedxúajle leꞌe lu naꞌ dul-la,
bexácale we̱n zrin chee̱ da xrlátaje.
19 (Dxuchálajle̱naꞌ leꞌe ca dxuluchalaj bénneache laweꞌ da lu be̱laꞌ dxen chee̱le quebe gaca chéajniꞌile ca naca da nigá.)
Cáte̱ze be̱nle gate naꞌ bzua cuínale lu naꞌ da sban,
ne lu naꞌ da zrinnaj chee̱ gunle da zrinnaj,
cáꞌanqueze le gun naꞌa,
le guzúa cuínale lu naꞌ da xrlátaje chee̱ gácaquezle bi chee̱ Dios.
20 Gate ne nácale ca benneꞌ zaj nadaꞌu lu naꞌ dul-la,
quebe be̱n na ba xen gunle da xrlátaje.
21 Naꞌa ¿bizra da ba neza guca chee̱le da caꞌ dxexeduéꞌele chee̱n naꞌa?
Da caꞌ be̱nle nédxute̱ guché̱ na leꞌe lu xel-la gute.
22 Naꞌa nadxúajle lu naꞌ dul-la,
ne ba nácale we̱n zrin chee̱ Dios chee̱ gácaquezle bi chee̱ Dios da naché̱ na leꞌe lu xel-la nabán da zeajlí canna.
23 Benneꞌ dxune̱ꞌ dul-la dzeziꞌe̱ lazruj chee̱ꞌ da naca na xel-la gute,
san da dxúnnaze Dios dxiꞌu naca na xel-la nabán da zeajlí canna tu zren nen Xránadxu Jesucristo.