Da naca chee̱dxu laweꞌ da nagáꞌanadxu xrlátaje lau Dios
5
Che nagáꞌanadxu xrlátaje lau Dios laweꞌ da dxeajlí lázredxu Cristo zúadxu xrlátaje nen Dios ne̱ chee̱ Xránadxu Jesucristo.
2 Cáꞌanqueze laweꞌ da dxeajlí lázredxu Cristo,
ne̱ chee̱ Le̱ꞌ dxezidxu da xrlátaje chee̱ Dios da tu dxeajlé̱zquezdxu,
ne dxebéle̱ꞌe̱dxu laweꞌ da dxebeza lázredxu sidxu da xabáa chee̱ Dios.
3 Quegaze da nigá,
san cáꞌanqueze dxebéle̱ꞌe̱dxu gate dxededxu xel-la ziꞌ,
laweꞌ da nézedxu xel-la ziꞌ da dxededxu dxun na dxiꞌu zren lazreꞌ,
4 naꞌ xel-la zren lazreꞌ dxucáꞌana na dxiꞌu xrlátaje lau Dios,
naꞌ gate nagáꞌanadxu xrlátaje dxebeza lázredxu.
5 Quebe naca tu da dácheze da naꞌ dxebeza lázredxu laweꞌ da ba nuzúa Dios lu lázrdaudxu xel-la zriꞌi lazreꞌ chee̱ꞌ ne̱ chee̱ Beꞌ Láꞌazxa,
Bénneaꞌ ba nunna Dios dxiꞌu.
6 Gate naꞌ quebe guzéquedxu guselá cuínadxu,
lu zra bléꞌequeze Dios,
gute Cristo waláz chee̱ benneꞌ we̱n da zrinnaj caꞌ.
7 Sté̱bele̱ꞌe̱ naca che nu benneꞌ gatie̱ꞌ waláz chee̱ tu benneꞌ xrlátaje,
lácala wexázrelja tu benneꞌ gatie̱ꞌ waláz chee̱ tu benneꞌ naque̱ꞌ dute̱ li lazreꞌ.
8 Dios dxuléꞌene̱ꞌ dxiꞌu ca nazríꞌile̱ꞌe̱ne̱ꞌ dxiꞌu laweꞌ da gute Cristo waláz chee̱dxu gate ne nácadxu benneꞌ dul-la.
9 Naꞌa nagáꞌanadxu xrlátaje lau Dios laweꞌ da gute Cristo waláz chee̱dxu,
ne ba nácaqueze chee̱dxu ladxu ne̱ chee̱ Le̱ꞌ lu da ziꞌ da xaꞌ,
da za zaꞌ lu zra niꞌ.
10 Gate naꞌ ne dxecuídedxu Dios,
Le̱ꞌ bexune̱ꞌ dxiꞌu tuze nen Le̱ꞌ laweꞌ da gute Cristo waláz chee̱dxu,
naꞌ naꞌa laweꞌ da nácadxu tuze nen Dios ba nácaqueze chee̱dxu ladxu ne̱ chee̱ xel-la nabán chee̱ Cristo da zúale̱ na dxiꞌu.
11 Quegá tuze da nigá,
san cáꞌanqueze dxebéle̱ꞌe̱dxu lu da naca chee̱ Dios ne̱ chee̱ Xránadxu Jesucristo,
ne ne̱ chee̱ Le̱ꞌ nácadxu tuze nen Dios.
Da nun Adán, naꞌ da nun Cristo
12 Ca guca,
guxúꞌu dul-la lu xe̱zr la xu nigá ne̱ chee̱ da be̱n tuze benneꞌ,
naꞌ blaꞌ xel-la gute ne̱ chee̱ dul-la,
caꞌan guca gulúꞌu bénneache lu naꞌ xel-la gute laweꞌ da zaj nun xúgute̱ꞌ dul-la.
13 Nédxula ca blaꞌ da nadxixruj bea na,
ba zaj nun bénneache dul-la lu xe̱zr la xu nigá,
lácala quebe dxusebaga Dios bénneache dul-la gate quebe ne zrin da nadxixruj bea na.
14 Ca guzú lau lu zra zua Adán ca bzrin zra zua Moisés,
gulúꞌu bénneache lu naꞌ xel-la gute,
benneꞌ caꞌ zaj nune̱ꞌ dul-la,
lácala quebe belune̱ꞌ dul-la ca da be̱n Adán,
bénneaꞌ gudichje̱ꞌ da gunná beꞌe Dios,
naꞌ Adán naꞌ naque̱ꞌ tu da dxuléꞌeze na ca naca Bénneaꞌ dxal-laꞌ xide̱ꞌ,
Le̱ꞌ Cristo.
15 Da zrinnaj da be̱n Adán quebe gaca díl-lale̱be na ca da dxunna Dios dxiꞌu.
Ne̱ chee̱ da zrinnaj da be̱n tuze benneꞌ,
gulate benneꞌ zante̱,
san xel-la weselá da nunna Dios dxiꞌu cáꞌaze ne̱ chee̱ xetuze benneꞌ,
Jesucristo,
naca na da zréndxaqueze,
ne naca na da ba neza chee̱ benneꞌ zante̱.
16 Da zrinnaj naꞌ da be̱n tuze benneꞌ quebe gaca díl-lale̱be na ca da dxunna Dios dxiꞌu laweꞌ da ne̱ chee̱ tuze da zrinnaj,
zaj nabaga zria bénneache,
san da dxunna Dios dxiꞌu naca na chee̱ xelexegáꞌana xrlátaje benneꞌ zante̱ benneꞌ zaj nune̱ꞌ da zrinnaj.
17 Ne̱ chee̱ da zrinnaj da be̱n tuze benneꞌ gulúꞌu bénneache lu naꞌ xel-la gute,
naꞌ benneꞌ caꞌ zaj nazíꞌ lu ne̱ꞌe̱ da dxunna Dios cáꞌaze,
ne zaj nagáꞌane̱ꞌ xrlátaje lau Le̱ꞌ ba zaj nalé̱ꞌ lu naꞌ dul-la,
ne dxelezéquene̱ꞌ xelenná beꞌe cuine̱ꞌ lu xel-la nabán chee̱ꞌ ne̱ chee̱ da nun xetuze benneꞌ,
Jesucristo.
18 Ca guca zaj nabaga zria xúgute̱ bénneache ne̱ chee̱ da zrinnaj da be̱n tuze benneꞌ,
Adán,
cáꞌanqueze ne̱ chee̱ da xrlátaje da be̱n xetuze benneꞌ,
Jesucristo,
belexexaca bénneache xrlátaje chee̱ xelaca bane̱ꞌ.
19 Ca guca belexexaca bénneache zante̱ benneꞌ dul-la laweꞌ da quebe bzua dizraꞌ tuze benneꞌ,
cáꞌanqueze laweꞌ da bzua dizraꞌ xetuze benneꞌ,
xelexegáꞌana benneꞌ zante̱ xrlátaje lau Dios.
20 Bzua Dios da nadxixruj bea na chee̱ gunná béadxa na da naca dul-la,
naꞌ gate dul-la guxánle̱ꞌe̱ na,
caꞌ guzrendxa xel-la zriꞌi lazreꞌ chee̱ Dios.
21 Ca naca zua lu naꞌ dul-la gute na bénneache,
cáꞌanqueze zua lu naꞌ xel-la zriꞌi lazreꞌ chee̱ Dios gucáꞌana na dxiꞌu xrlátaje lau Dios chee̱ gaca bandxu chadía chacanna ne̱ chee̱ Xránadxu Jesucristo.