Da dxuléꞌe da guca chee̱ Abraham
4
¿Bízraqueze nnadxu chee̱ da ba neza da guca na chee̱ xra xrtáudxu Abraham?
2 Che Abraham begaꞌane̱ꞌ xrlátaje lau Dios ne̱ chee̱ tu da be̱ne̱ꞌ,
waca gucáꞌana szren cuine̱ꞌ san quegá lau Dios.
3 ¿Bízraqueze naxúaj na lu dizraꞌ láꞌazxa?
Dxenná na:
Abraham guxeajlí lazre̱ꞌ Dios,
naꞌ Dios guzíꞌ lu ne̱ꞌe̱ le̱ꞌ ca tu benneꞌ xrlátaje.
4 Che nu benneꞌ dxune̱ꞌ zrin,
lazruj da siꞌe̱ quebe naca na tu da dxunézrujzedxu,
san naca na tu da nabágaquezdxu chee̱ꞌ.
5 Che nu benneꞌ quebe bi nune̱ꞌ,
san dxeajlí lázreze̱ꞌ Dios,
Bénneaꞌ dxucáꞌane̱ꞌ xrlátaje benneꞌ dul-la,
nacan laweꞌ da dxezíꞌ lu naꞌ Dios xel-la dxeajlí lazreꞌ chee̱ꞌ chee̱ xucaꞌane̱ꞌ le̱ꞌ xrlátaje.
6 Cáꞌanqueze bchalaj David ca naca chee̱ benneꞌ naca da ba neza chee̱ꞌ laweꞌ da dxucáꞌana Dios le̱ꞌ xrlátaje lácala quebe bi nune̱ꞌ chee̱ xegáꞌane̱ꞌ xrlátaje.
7 Gunná David:
Ba neza zrente̱ naca na chee̱ benneꞌ caꞌ
ba bunite lau Dios chee̱ꞌ da zrinnaj da zaj nune̱ꞌ,
ne gudée̱ꞌ cáꞌaze dul-la da belún benneꞌ caꞌ.
8 Ba neza zrente̱ naca na chee̱ benneꞌ caꞌ
quebe dxusebaga Xránadxu le̱ꞌ dul-la da belune̱ꞌ.
9 ¿Naca ba neza nigá chee̱ze benneꞌ caꞌ zaj nadxugu lu be̱laꞌ chee̱ꞌ da naꞌ dxuléꞌe na,
u che nácaqueze na chee̱ benneꞌ caꞌ quebe zaj nadxugu lu be̱laꞌ chee̱ꞌ da naꞌ?
Bache bléꞌentuꞌ bcaꞌana Dios Abraham xrlátaje laweꞌ da guxeajlí lazre̱ꞌ Le̱ꞌ.
10 ¿Bátazra bcaꞌane̱ꞌ le̱ꞌ xrlátaje?
¿Guca na ca gudé gudxugu lu be̱laꞌ chee̱ Abraham da naꞌ dxuléꞌe na,
u che nédxula?
Quebe guca na ca gudé naꞌ,
san nédxula guca na.
11 Gudxugu da naꞌ lu be̱laꞌ chee̱ Abraham ca tu da dxunna bea na chee̱ guléꞌe na nagáꞌane̱ꞌ xrlátaje lau Dios laweꞌ da guxeajlí lazre̱ꞌ Dios gate naꞌ quebe ne chugu da naꞌ lu be̱laꞌ chee̱ꞌ.
Caꞌan guca,
naca Abraham xra xúgute̱ benneꞌ dxeleajlí lazre̱ꞌ Dios,
ne quebe zaj nadxugu da naꞌ lu be̱laꞌ chee̱ꞌ.
Cáꞌanqueze dxucáꞌana Dios le̱ꞌ xrlátaje laweꞌ da dxeleajlí lazre̱ꞌ Le̱ꞌ.
12 Da li naca Abraham xra benneꞌ caꞌ zaj nadxugu da naꞌ lu be̱laꞌ chee̱ꞌ,
naꞌ cáꞌanqueze dxeleajlí lazre̱ꞌ Dios ca be̱n xradxu Abraham gate naꞌ quebe ne chugu lu be̱laꞌ chee̱ꞌ da naꞌ.
Dxezidxu da guche̱be lazreꞌ Dios che dxeajlí lázredxu Cristo
13 Dios guche̱be lazre̱ꞌ chee̱ Abraham,
ne chee̱ zriꞌine zre sue̱ꞌ gaca chee̱ benneꞌ caꞌ xe̱zr la xu nigá.
Quebe guche̱be lazre̱ꞌ na chee̱ꞌ laweꞌ da nune̱ꞌ ca dxenná bea da nadxixruj bea na,
san laweꞌ da begaꞌane̱ꞌ xrlátaje lau Dios gate guxeajlí lazre̱ꞌ Le̱ꞌ.
14 Che xe̱zr la xu nigá gaca na tuze chee̱ benneꞌ caꞌ dxelune̱ꞌ ca da dxenná bea da nadxixruj bea na,
dácheze nagáꞌana xel-la dxeajlí lazreꞌ,
ne québedxa zaca da guche̱be lazreꞌ Dios.
15 Lu da nadxixruj bea na xelebía xiꞌ bénneache,
san naga quebe ne zrin da nadxixruj bea na,
quebe bi zaj nabaga bénneache chee̱ da nadxixruj bea na naꞌ.
16 Caꞌ naca na,
dxezíꞌ lu nnadxu da guche̱be lazreꞌ Dios ne̱ chee̱ xel-la dxeajlí lazreꞌ chee̱dxu Le̱ꞌ,
chee̱ gaca na tu da sidxu cáꞌaze,
ne chee̱ gaca na tu da súatequeze chee̱ xúgute̱ zriꞌine zre sua Abraham.
Caꞌ naca na,
quegá naca na chee̱ze benneꞌ caꞌ dxelune̱ꞌ ca da nadxixruj bea na,
san cáꞌanqueze naca na chee̱ benneꞌ caꞌ dxeleajlí lazre̱ꞌ Dios ca be̱n Abraham.
Caꞌ naca na,
le̱ꞌ naque̱ꞌ xra xúgute̱dxu
17 lau Dios,
Bénneaꞌ guxeajlí lazreꞌ Abraham Le̱ꞌ.
Naca na ca da naxúaj na lu dizraꞌ láꞌazxa,
dxenná na:
Nunaꞌ lueꞌ xra bénneache zánete̱ cueꞌ xe̱zr la xu.
Dios naꞌ dxuꞌe̱ xel-la nabán chee̱ benneꞌ caꞌ zaj nate,
ne dxuchálaje̱ꞌ chee̱ da quebe ne sua ca dxuchálaje̱ꞌ chee̱ da ba zua.
18 Abraham guxeajlí lazre̱ꞌ Dios,
ne guleza lazre̱ꞌ siꞌe̱ da guche̱be lazreꞌ Dios,
lácala ba gudé chee̱ siꞌe̱ da dxebeza lazre̱ꞌ.
Caꞌan guca,
guque̱ꞌ xra bénneache zánete̱ cueꞌ xe̱zr la xu cáte̱ze ba guzre Dios le̱ꞌ,
gunné̱ꞌ:
“Canite̱ chan zriꞌine zre suꞌ.”
19 Abraham ba zue̱ꞌ ca tu gaxúa iza,
san quebe gute niꞌa ne̱ꞌe̱ lu xel-la dxeajlí lazreꞌ chee̱ꞌ gate xeajsá lazre̱ꞌ zaj naque̱ꞌ ca benneꞌ ba zaj nate,
le̱ꞌ ne zruꞌule̱ꞌ Sara,
ne naca Sara nuꞌula wizre.
20 Quebe be̱n chupa lazre̱ꞌ,
san bxren lazre̱ꞌ da guche̱be lazreꞌ Dios chee̱ꞌ,
naꞌ gudápadxe̱ꞌ xel-la dxeajlí lazreꞌ,
ne bxren lázredxe̱ꞌ.
Bcaꞌana szrene̱ꞌ Dios,
21 ne bé̱ntequeze̱ꞌ neza napa Dios xel-la waca gune̱ꞌ xúgute̱ ca da guche̱be lazre̱ꞌ.
22 Chee̱ le̱ naꞌ Dios guzíꞌ lu ne̱ꞌe̱ xel-la dxeajlí lazreꞌ chee̱ꞌ chee̱ bcaꞌane̱ꞌ le̱ꞌ xrlátaje.
23 Gate dxenná na:
“Dios guzíꞌ lu ne̱ꞌe̱ xel-la dxeajlí lazreꞌ chee̱ꞌ”,
quebe guxuaj na chee̱ tuze Abraham
24 san cáꞌanqueze chee̱dxu dxiꞌu laweꞌ da siꞌ lu naꞌ Dios xel-la dxeajlí lazreꞌ chee̱dxu che dxeajlí lázredxu Bénneaꞌ bsebane̱ꞌ Xránadxu Jesucristo ládujla benneꞌ gate,
25 naꞌ naca Jesús Bénneaꞌ bde Dios Le̱ꞌ chee̱ gutie̱ꞌ ne̱ chee̱ dul-la da nabágadxu dxiꞌu,
ne bsebane̱ꞌ Le̱ꞌ chee̱ xegáꞌanadxu xrlátaje lau Dios.