3
¿Bizra da ba neza naca na chee̱ benneꞌ laweꞌ da nadxugu lu be̱laꞌ chee̱ꞌ da naꞌ dxuléꞌe na?
2 Nácale̱ꞌe̱ na,
ne zánete̱ ca naca na.
Da nédxute̱,
Dios bdee̱ꞌ dizraꞌ chee̱ꞌ lu naꞌ benneꞌ judío caꞌ.
3 ¿Bizra xcaꞌ?
Che bal-la benneꞌ judío caꞌ quebe zaj naque̱ꞌ li lazreꞌ,
¿nnadxu chee̱ da naꞌ quebe naca Dios li lazreꞌ?
4 ¡Cabataꞌ!
Dios dxúnqueze̱ꞌ ca naca da li lácala xúgute̱ bénneache zaj naque̱ꞌ we̱n lazreꞌ,
laweꞌ da naxúaj lu dizraꞌ láꞌazxa da dxenná Dios.
Dxenné̱ꞌ:
Nacuꞌ xrlátaje ca da dxennáuꞌ,
naꞌ wegáꞌanaquezuꞌ xrlátaje gate xuluchíꞌe̱ ca da dxunuꞌ.
5 Che da cale̱la da dxundxu dxuléꞌe na naca Dios xrlátaje,
¿Bízraqueze nnadxu?
(Dxuchálajaꞌ ca da dxuluchalaj bénneache.)
¿Naca Dios benneꞌ quebe naca xrlátaje laweꞌ da dxudée̱ꞌ dxiꞌu xel-la ziꞌ?
6 ¡Cabataꞌ!
Chela naca Dios Benneꞌ quebe dxun da xrlátaje,
¿ájazra gune̱ꞌ guchiꞌe̱ ca da dxelún bénneache?
7 Che da we̱n lazreꞌ da dxunaꞌ gun na chee̱ xegáꞌana zrendxa da li da dxun Dios,
¿bizr chee̱ naꞌ dxuchiꞌe̱ chiaꞌ nedaꞌ,
dxenné̱ꞌ nacaꞌ benneꞌ dul-la?
8 Che naca na caní,
¿bizr chee̱ naꞌ quebe gundxu da cale̱la chee̱ guléꞌe laudxa da xrlátaje?
Da nigá naca na da dxelenná bal-la benneꞌ dxundxu,
benneꞌ caꞌ dxelún da cale̱la,
ne dxelenné̱ꞌ schanniꞌ chee̱dxu.
Xrlátaje naca Dios nne̱ꞌ zaj nabaga zria benneꞌ caní.
Xúgute̱dxu nabágadxu dul-la
9 ¿Bizra xcaꞌ?
Dxiꞌu,
benneꞌ judío,
¿nácadxadxu xrlátaje ca xezícadxa benneꞌ caꞌ?
¡Cabataꞌ!
Bache bléꞌentuꞌ zaj nabaga dul-la benneꞌ judío,
ne cáꞌanqueze xezícadxa benneꞌ caꞌ.
10 Naxúaj lu xiche láꞌazxa da dxenná na:
Quebe nu chiláꞌ benneꞌ xrlátaje,
netú gue̱ꞌ.
11 Quebe nu chiláꞌ benneꞌ dxéajniꞌine̱ꞌ.
Quebe nu chiláꞌ benneꞌ dxexílaje̱ꞌ Dios.
12 Xúgute̱ꞌ dxeledé̱ꞌ cale̱la.
Xúgute̱ꞌ zaj nanítie̱ꞌ.
Quebe nu chiláꞌ benneꞌ dxune̱ꞌ da xrlátaje,
netú gue̱ꞌ.
13 Da dxelenné̱queze̱ꞌ naca na ca tu da sgute,
ca tu ba da naxálajze.
Nen luzre̱ꞌ caꞌ dxelezí xe̱ꞌe̱.
Xrtizre̱ꞌ zaj naca na ca nisa snia chee̱ be̱laꞌ da dxe na zran lázxabaꞌ.
14 Tu dxelenné̱zqueze̱ꞌ dizraꞌ schanniꞌ,
ne dizraꞌ ziꞌ.
15 Chadite̱ dxelútie̱ꞌ bénneache.
16 Gátete̱ze dxeledée̱ꞌ dxuluzría xiꞌe̱,
ne dxulusaca ziꞌe̱.
17 Quebe zaj nézene̱ꞌ ájala xelebeza zri lazre̱ꞌ.
18 Quebe dxelezrebe̱ꞌ Dios.
19 Nezdxu xúgute̱ ca da dxenná da nadxixruj bea gula naꞌ da bzuaj Moisés,
dxe̱ na benneꞌ caꞌ zaj xuꞌe̱ lu naꞌ da nadxixruj bea na naꞌ,
chee̱ xelezúa zri xúgute̱ꞌ,
ne chee̱ xelexúnbea xúgute̱ bénneache zaj nabague̱ꞌ zria lau Dios.
20 Netú benneꞌ quebe xegáꞌane̱ꞌ xrlátaje lau Dios laweꞌ da nune̱ꞌ da dxenná bea da nadxixruj bea na,
laweꞌ da dxuléꞌeze da nadxixruj bea na dxiꞌu nácadxu benneꞌ dul-la.
Xelelá bénneache che xeléajle̱ꞌe̱ chee̱ Cristo
21 Naꞌa,
dxunna bea na ca gaca xegáꞌanadxu xrlátaje lau Dios,
da quebe naca na ne̱ chee̱ da nadxixruj bea na,
lácala lu da nadxixruj bea na,
ne lu da buluzúaj benneꞌ caꞌ gulenné̱ꞌ waláz chee̱ Dios dxuluchalaj na ca naca chee̱ da nigá.
22 Nagáꞌanadxu xrlátaje lau Dios caní che dxeajlí lázredxu Jesucristo,
ne cáꞌanqueze gaca chee̱ xúgute̱ bénneache xeleajlí lazre̱ꞌ Le̱ꞌ.
Tuz ca naca chee̱ bénneache
23 laweꞌ da zaj nun xúgute̱ bénneache dul-la,
ne quebe zaj naca chee̱ꞌ xelexúꞌe̱ lu xabáa chee̱ Dios.
24 Lu da chaweꞌ chee̱ Dios,
cáꞌaze nune̱ꞌ chee̱ xegáꞌanadxu xrlátaje lau Le̱ꞌ laweꞌ da bexaꞌu Jesucristo dxiꞌu lu dul-la da nabágadxu.
25 Dios bzue̱ꞌ Jesucristo gutie̱ꞌ ne̱ chee̱ xtúl-ladxu chee̱ xegáꞌanadxu xrlátaje lau Le̱ꞌ che dxeajlí lázredxu da be̱n Le̱ꞌ.
Da nigá guca na chee̱ bleꞌe Dios naque̱ꞌ xrlátaje lácala lu xel-la zren lazreꞌ chee̱ꞌ bdee̱ꞌ cáꞌaze ca naca dul-la da be̱ndxu nédxute̱.
26 Gúcaqueze da nigá chee̱ guléꞌe laweꞌ naca Dios xrlátaje naꞌa,
ne gácaqueze̱ꞌ xrlátaje gate gucáꞌane̱ꞌ xrlátaje benneꞌ caꞌ dxeleajlí lazre̱ꞌ Jesús.
27 Naꞌa,
¿waca gucáꞌana szren cuínadxu?
¡Cabataꞌ!
¿Bizr chee̱ naꞌ?
Naca na laweꞌ da nagáꞌanadxu xrlátaje,
quegá laweꞌ da be̱ndxu ca nadxixruj bea na,
san laweꞌ da guxeajlí lázredxu Cristo.
28 Caꞌan naca,
dxunna bea na nagáꞌana xrlátaje tu benneꞌ lau Dios laweꞌ da dxeajlí lazre̱ꞌ Cristo,
ne quegá laweꞌ da nune̱ꞌ ca da nadxixruj bea na.
29 ¿Naca Dios chee̱ze benneꞌ judío caꞌ?
¿Quegá nácaqueze̱ꞌ Dios chee̱ benneꞌ caꞌ quebe zaj naque̱ꞌ judío?
Da li nácaqueze̱ꞌ Dios chee̱ benneꞌ caꞌ
30 laweꞌ da zua tuze Dios,
naꞌ Le̱ꞌ gucáꞌane̱ꞌ xrlátaje benneꞌ caꞌ zaj nadxugu lu be̱laꞌ chee̱ꞌ da naꞌ dxunna bea na che dxeleajlí lazre̱ꞌ Cristo,
ne cáꞌanqueze gucáꞌane̱ꞌ xrlátaje benneꞌ caꞌ quebe zaj nadxugu lu be̱laꞌ chee̱ꞌ da naꞌ,
che dxeleajlí lazre̱ꞌ Cristo.
31 Naꞌa che dxucáꞌana Dios xrlátaje benneꞌ dxeleajlí lázreze̱ꞌ,
¿naca da nadxixruj bea na tu da québedxa zaca?
¡Cabataꞌ!
Che dxéajle̱dxu chee̱ Cristo dxúnquezdxu ca dxenná da nadxixruj bea na.