Dios dxuchiꞌe̱ chee̱ bénneache cáte̱ze da zaj nune̱ꞌ
2
Chee̱ le̱ naꞌ québedxa bi de̱ da gudéꞌenuꞌ,
lueꞌ dxuchiꞌu da dxun benneꞌ xula,
nútete̱ze nacuꞌ.
Gate dxuchiꞌu da dxun benneꞌ xula,
naꞌ dxuleꞌenuꞌ nabaguꞌ zria,
laweꞌ da dxuchiꞌu da dxun benneꞌ xula,
ne cáꞌanqueze dxunuꞌ lueꞌ.
2 Nézquezdxu dxuchiꞌa Dios cáte̱ze da naca na gate dxenné̱ꞌ zaj nabaga zria benneꞌ caꞌ dxelún da caní.
3 ¿Dxéquenuꞌ lueꞌ wadé gun caꞌaze chiuꞌ gate Dios nne̱ꞌ zaj nabaga zria bénneache,
lueꞌ naꞌ dxennáuꞌ zaj nabaga zria benneꞌ dxelún da caní,
ne cáꞌanqueze dxunuꞌ lueꞌ?
4 ¿Dxuzúꞌ chaláꞌala xel-la zriꞌi lazreꞌ,
ne xel-la zren lazreꞌ zren chee̱ Dios,
ne quebe nézenuꞌ lu xel-la zriꞌi lazreꞌ chee̱ꞌ dxunne̱ꞌ lueꞌ lataj xebiꞌi lazruꞌ?
5 Nacuꞌ lázrdau zideꞌ,
ne quebe dxexebíꞌi lazruꞌ.
Chee̱ le̱ naꞌ dxuzanuꞌ da si sacuꞌ lu zra naꞌ gate Dios nne̱ꞌ zaj nabaga zria benneꞌ caꞌ dxelune̱ꞌ da cale̱la.
Naca xrlátaje gune̱ꞌ da caní.
6 Lu zra naꞌ gunne̱ꞌ ca da dxal-laꞌ siꞌ tu tudxu cáte̱ze naca da be̱ndxu.
7 Xel-la nabán zeajlí canna gunna Le̱ꞌ xúgute̱ benneꞌ dxelaca lazre̱ꞌ xelezíꞌe̱ lu naꞌ Dios da xabáa,
ne xel-la ba láꞌana,
ne da zaj naca na da chadía chacanna ne̱ chee̱ da chaweꞌ da tu dxelúnzqueze̱ꞌ.
8 Lu xel-la dxezráꞌa chee̱ꞌ nne̱ꞌ zaj nabaga zria xúgute̱ benneꞌ zreꞌe lazreꞌ caꞌ,
benneꞌ quebe dxuluzúe̱ꞌ dizraꞌ da li,
san dxuluzúe̱ꞌ dizraꞌ da we̱n lazreꞌ.
9 Gusaca ziꞌe̱,
ne gudée̱ꞌ lu da ba xaꞌ xúgute̱ benneꞌ dxelune̱ꞌ da cale̱la.
Ga su lau gune̱ꞌ caní chee̱ benneꞌ judío caꞌ,
ne cáꞌanqueze gune̱ꞌ chee̱ benneꞌ quebe zaj naque̱ꞌ judío.
10 Da xabáa,
ne da ba láꞌana,
ne xel-la dxebeza zri lazreꞌ gunne̱ꞌ xúgute̱ benneꞌ dxelune̱ꞌ da chaweꞌ.
Ga su lau gune̱ꞌ caní chee̱ benneꞌ judío caꞌ,
ne cáꞌanqueze gune̱ꞌ chee̱ benneꞌ quebe zaj naque̱ꞌ judío.
11 Dios tuze ca dxuchiꞌe̱ da dxelún xúgute̱ bénneache,
12 naꞌ benneꞌ dxelune̱ꞌ dul-la,
ne quebe zaj núnbeꞌe̱ da bdxixruj beꞌe Moisés welebía xiꞌe̱ lácala quebe belúnbeꞌe̱ da nadxixruj bea na,
naꞌ benneꞌ dxelune̱ꞌ dul-la lácala zaj núnbeꞌe̱ da bdxixruj beꞌe Moisés welebía xiꞌe̱ ne̱ chee̱ da nadxixruj bea na naꞌ.
13 Quebe zaj nagáꞌana chaweꞌ lau Dios benneꞌ dxelénzene̱ꞌ da nadxixruj bea na,
san zaj nagáꞌana chaweꞌ lau Dios benneꞌ dxuluzúe̱ꞌ dizraꞌ da nadxixruj bea na.
14 Benneꞌ zituꞌ caꞌ,
benneꞌ quebe zaj núnbeꞌe̱ da bdxixruj beꞌe Moisés,
gate dxelune̱ꞌ ca dxenná da nadxixruj bea na naꞌ,
lácala quebe zaj núnbeꞌe̱ da nadxixruj bea na,
naca chee̱ꞌ cáte̱ze zua da nadxixruj bea na lu xichaj lázrdawe̱ꞌ.
15 Caní naquen laweꞌ da ca dxelune̱ꞌ dxuléꞌe na zua xichaj lázrdawe̱ꞌ ca naca da nadxixruj bea na,
naꞌ naca na ca naca da bdxixruj beꞌe Moisés.
Xichaj lázrdawe̱ꞌ dxunna bea na chee̱ da nigá,
naꞌ da dxelegúꞌu lazre̱ꞌ guzría xi na le̱ꞌ,
u xecáꞌa na le̱ꞌ
16 lu zra naꞌ gate Dios guchiꞌe̱ xúgute̱ da nagacheꞌ chee̱ xúgute̱ bénneache lu naꞌ Jesucristo cáte̱ze dxenná dizraꞌ chaweꞌ naꞌ da dxuzendaꞌ bénneache.
Ca naca chee̱ benneꞌ judío caꞌ ne da bdxixruj beꞌe Moisés
17 Dxennáuꞌ nacuꞌ judío,
ne dxenné̱le̱nuꞌ da bdxixruj beꞌe Moisés,
ne dxucáꞌana szren cuinuꞌ laweꞌ da núnbeꞌu Dios chiuꞌ.
18 Nézenuꞌ da dxaca lazreꞌ Dios,
naꞌ da gunná béꞌene̱ꞌ dxuléꞌe na lueꞌ gunuꞌ da nácadxa chaweꞌ.
19 Dxuxrén lazruꞌ cuinuꞌ waca guléꞌenuꞌ ca da xelún benneꞌ zaj naque̱ꞌ ca lo chul-la,
ne guseniꞌu benneꞌ zaj zraꞌ lu da chul-la.
20 Dxéquenuꞌ waca guzéajniꞌinuꞌ benneꞌ quebe zaj naxéajniꞌe̱,
ne gusé̱denuꞌ benneꞌ quebe ne cheajniꞌe̱ laweꞌ da naca da nadxixruj bea na da napuꞌ tu da dxuléꞌe na dxiꞌu chee̱ gúnbeadxu da li.
21 Lueꞌ dxusé̱denuꞌ benneꞌ xula.
¿Bizr chee̱ naꞌ quebe dxuse̱de cuinuꞌ?
Lueꞌ dxuzennuꞌ benneꞌ quebe dxal-laꞌ cuandxu.
¿Bizr chee̱ naꞌ dxebanuꞌ lueꞌ?
22 Lueꞌ dxennáuꞌ quebe dxal-laꞌ súale̱dxu zruꞌula benneꞌ xula.
¿Bizr chee̱ naꞌ dxunuꞌ lueꞌ caꞌ?
Lueꞌ dxecuídenuꞌ bedáuꞌ xiaj xaga.
¿Bizr chee̱ naꞌ dxebanuꞌ lueꞌ da gunníꞌa da de̱ lu xudauꞌ caꞌ chee̱ bedáuꞌ xiaj xaga caꞌ?
23 Dxucáꞌana szren cuinuꞌ laweꞌ da núnbeꞌu da nadxixruj bea na,
san dxucáꞌana ditjuꞌ Dios laweꞌ da quebe dxunuꞌ lueꞌ ca da dxenná bea da nadxixruj bea na.
24 Naxúaj lu dizraꞌ láꞌazxa da dxenná na:
Benneꞌ quebe zaj naque̱ꞌ judío dxelenné̱ꞌ schanniꞌ chee̱ Dios ne̱ chee̱ da cale̱la da dxunle leꞌe.
25 Da li da nadxugu lu be̱laꞌ chiuꞌ da dxuléꞌe na nacuꞌ bi chee̱ Dios,
naca na tu da chaweꞌ che dxunuꞌ ca da dxenná bea da bdxixruj beꞌe Moisés,
san che quebe dxunuꞌ ca dxenná na,
nacuꞌ ca tu benneꞌ quebe nadxugu lu be̱laꞌ chee̱ꞌ da naꞌ dxuléꞌe na.
26 Che benneꞌ quebe nadxugu lu be̱laꞌ chee̱ꞌ dxune̱ꞌ ca nadxixruj bea na,
naque̱ꞌ ca tu benneꞌ nadxúguqueze lu be̱laꞌ chee̱ꞌ da naꞌ,
lácala quebe naca caní chee̱ꞌ.
27 Benneꞌ quebe nadxugu lu be̱laꞌ chee̱ꞌ da naꞌ dxuléꞌe na,
san dxune̱ꞌ da nadxixruj bea na,
da naꞌ dxune̱ꞌ dxuléꞌe na nabaguꞌ zria lueꞌ,
laweꞌ da quebe dxunuꞌ da dxenná bea da nadxixruj bea na,
lácala zua lu naꞌu da nadxixruj bea na,
ne nadxugu lu be̱laꞌ chiuꞌ da naꞌ.
28 Quebe naca xanneꞌ judío bénneaꞌ naque̱ꞌ caní cúzreze,
ne quebe naca xanneꞌ da nadxugu na lu be̱laꞌ chee̱ benneꞌ da naca na cúzreze,
lu bé̱laꞌze.
29 Benneꞌ naca xánnie̱ꞌ judío naque̱ꞌ bénneaꞌ naque̱ꞌ judío lu xichaj lázrdawe̱ꞌ,
ne da naca xanneꞌ da nadxugu lu be̱laꞌ chee̱ benneꞌ naca na da zua na lázrdawe̱ꞌ.
Quebe nácaqueze na nen dízraꞌze san naca na chee̱ beꞌ chee̱ꞌ.
Benneꞌ caní dxeleziꞌe̱ xel-la ba láꞌana,
quegá chee̱ bénneache,
san chee̱ Dios.