DIZRAꞌ GUDXUPEꞌ DA BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ CORINTO
Pablo dxuzúaje̱ꞌ chee̱ bi bíchedxu zaj zre̱ꞌe̱ xe̱zre Corinto
1
Nedaꞌ,
Pablo,
nacaꞌ gubáz chee̱ Jesucristo laweꞌ da naca na da dxaca lazreꞌ Dios.
Tu zren nen bíchedxu Timoteo dxuzúajaꞌ da nigá chee̱le leꞌe,
bi bíchaꞌdauꞌ,
zrágale chee̱ Dios lu xe̱zre Corinto.
Cáꞌanqueze dxuzúajaꞌ da nigá chee̱ xúgute̱ bi chee̱ Dios zaj zre̱ꞌe̱ xe̱zre caꞌ zaj nababa xe̱zr la xu Acaya.
2 Dxenabaꞌ Xradxu Dios,
ne Xránadxu Jesucristo gun chawe̱ꞌe̱ leꞌe,
ne gunne̱ꞌ leꞌe xel-la dxebeza zri lazreꞌ.
Da caꞌ guzí guzacaꞌ Pablo
3 Dxue láꞌanantuꞌ Dios,
Xra Xránadxu Jesucristo,
laweꞌ da naque̱ꞌ Xradxu dxexache lazre̱ꞌ dxiꞌu,
ne Dios dxexúe zrene̱ꞌ dxiꞌu.
4 Dios dxexúe zrénqueze̱ꞌ dxiꞌu ca naca xúgute̱ xel-la ziꞌ da dxededxu,
chee̱ cáꞌanqueze dxiꞌu gaca xexúe zrendxu benneꞌ caꞌ dxeledée̱ꞌ xel-la ziꞌ,
naꞌ xue zrendxu le̱ꞌ cáte̱ze da ba nun Dios chee̱dxu dxiꞌu.
5 Laweꞌ da dxededxu xel-la ziꞌ zren ca da gudé Cristo,
cáꞌanqueze ne̱ chee̱ Cristo zua Nu dxexúe zrénqueze dxiꞌu,
Lé̱queze Dios.
6 Chee̱ le̱ naꞌ,
che dxedentuꞌ netuꞌ xel-la ziꞌ,
naca na chee̱ sua Nu xexúe zren leꞌe,
ne chee̱ lale,
naꞌ caní gaca guchaga laule lu dute̱ xel-la zren lazreꞌ chee̱le xel-la ziꞌ caꞌ da dxededxu dxiꞌu.
7 Dxuxrén lázrele̱ꞌe̱ntuꞌ leꞌe,
laweꞌ da nézentuꞌ ca dxedele xel-la ziꞌ tu zren nen netuꞌ,
cáꞌanqueze sua Nu xexúe zren leꞌe tu zren nen netuꞌ,
Lé̱queze Dios.
8 Bi bichaꞌ,
dxaca lázrentuꞌ nézele ca naca xel-la ziꞌ zren da gudentuꞌ naga nababa Asia.
Guca na tu xel-la ziꞌ zrendxa ca da gaca guchaga launtuꞌ,
naꞌ québedxa guleza lázrentuꞌ lantuꞌ.
9 Gúquentuꞌ ba zua gagu xelute benneꞌ caꞌ netuꞌ.
Guca chee̱ntuꞌ da nigá chee̱ bzéajniꞌi na netuꞌ guxrén lázrentuꞌ Dios,
ne quegá guxrén lazreꞌ cuínantuꞌ.
10 Dios bselé̱ꞌ netuꞌ,
naꞌ ne dxuselé̱ꞌ netuꞌ lu da ste̱be zren nigá chee̱ xel-la gute,
naꞌ dxebeza lázrentuꞌ Le̱ꞌ guseláqueze̱ꞌ netuꞌ
11 che leꞌe gácale̱le netuꞌ,
nábadxu Dios gácale̱ne̱ꞌ netuꞌ.
Che benneꞌ zan xelenabe̱ꞌ Dios gácale̱ne̱ꞌ netuꞌ,
naꞌ benneꞌ zan xelé̱ꞌe̱ Dios:
Xcalenuꞌ,
chee̱ da chaweꞌ caꞌ da gun Dios chee̱ntuꞌ.
Bizr chee̱ naꞌ Pablo guzrene̱ꞌ chéaje̱ꞌ Corinto
12 Naca tu da ba neza da nápantuꞌ da zua na laweꞌ da dxe̱ xichaj lázrdauntuꞌ netuꞌ ba gudantuꞌ lu da láꞌazxa,
ne du lázrentuꞌ,
lu xe̱zr la xu nigá,
ne ládujla leꞌe.
Dios lu xel-la zriꞌi lazreꞌ chee̱ꞌ gúcale̱ne̱ꞌ netuꞌ chee̱ be̱ntuꞌ caní,
ne quebe be̱ntuꞌ na lu xel-la sina cheé̱zquezentuꞌ.
13 Lu da dxuzúajntuꞌ chee̱le quebe bi de̱ da quebe gaca gulábale,
ne chéajniꞌile,
naꞌ dxaca lazraꞌ chéajniꞌi xánnele
14 ca ba guxéajniꞌile lateꞌ,
chee̱ lu zra xeláꞌ Xránadxu Jesús,
gácantuꞌ netuꞌ tu da ba neza chee̱le leꞌe,
ca leꞌe gácale tu da ba neza chee̱ntuꞌ.
15 Laweꞌ da dxuxrén lazraꞌ gaca caní,
bechugu lazraꞌ xidaꞌ nédxula xedajnnáꞌa leꞌe chee̱ gaca tu da ba neza chee̱le,
naꞌ xedajnnáꞌa leꞌe chupa lasa,
16 laweꞌ da bechugu lazraꞌ xedajnnáꞌa leꞌe gate teaꞌ chaꞌa xe̱zre caꞌ zaj nababa Macedonia,
naꞌ te naꞌ,
gate zezáꞌa lu xe̱zre caꞌ zaj nababa Macedonia,
xedajnnáꞌa leꞌe xetú.
Caꞌ gaca na,
leꞌe gaca gácale̱le nedaꞌ chaꞌa xe̱zre caꞌ zaj nababa Judea.
17 ¿Quebe nacaꞌ du lazraꞌ gate dxechugu lazraꞌ caní?
¿Dxéquele leꞌe nacaꞌ ca tu benneꞌ chee̱ xe̱zr la xu nigá,
naꞌ dxenníaꞌ:
Aweꞌ,
cabí,
gate dxechugu lazraꞌ da gunaꞌ?
18 Dios nézquezne̱ꞌ nedaꞌ,
ne Silvano,
ne Timoteo,
quebe dxe̱ntuꞌ leꞌe:
Aweꞌ,
cabí.
19 Naca na caní laweꞌ da Jesucristo,
Zriꞌine Dios,
Bénneaꞌ bzénentuꞌ leꞌe ca naca chee̱ꞌ,
cabataꞌ gunné̱ꞌ:
Aweꞌ,
cabí.
Nen Cristo nácaqueze da li xrtizra Dios,
20 laweꞌ da ne̱ chee̱ Le̱ꞌ dxelaca li xúgute̱ da guche̱be lazreꞌ Dios.
Chee̱ le̱ naꞌ,
gate dxue láꞌanantuꞌ Dios,
dxennantuꞌ:
¡Caꞌan naca na!
ne̱ chee̱ Jesucristo.
21 Dios naque̱ꞌ Bénneaꞌ ba nuzé̱ chúchue̱ꞌ netuꞌ,
ne leꞌe lu da naca chee̱ Cristo,
ne ba guqué̱ꞌe̱ dxiꞌu,
22 ne ba nuzúe̱ꞌ chee̱dxu tu da dxuléꞌe na nácadxu bi chee̱ Le̱ꞌ,
laweꞌ da ba nuzúe̱ꞌ Beꞌ Láꞌazxa lu xichaj lázrdaudxu,
da dxunna bea na sidxu da naca chee̱ꞌ.
23 Che quebe ne xidaꞌ Corinto ca bechugu lazraꞌ,
neze Dios naca na chee̱ gacaꞌ zren lazreꞌ nen leꞌe,
ne che quebe naca caní,
dxenabaꞌ Dios xequé̱ꞌe̱ xel-la nabán chiaꞌ.
24 Quebe naca na laweꞌ da dxaca lázrentuꞌ nna béꞌentuꞌ leꞌe da dxal-laꞌ chéajle̱le,
laweꞌ da ba ze̱ cháchale lu da dxéajle̱le.
Dxaca lázrentuꞌ bédxale lu da naca chee̱ Cristo.