2
Chee̱ le̱ naꞌ bechugu lazraꞌ quebe xidaꞌ xedajnnáꞌa leꞌe lu da baxacheꞌ.
2 Che nedaꞌ guzúaꞌ leꞌe lu da baxacheꞌ,
¿núzraqueze guzúa nedaꞌ lu xel-la dxebé?
Tuze leꞌe,
benneꞌ caꞌ ba bzuaꞌ lu da baxacheꞌ.
3 Chee̱ le̱ naꞌ bzuajaꞌ chee̱le ca da be̱naꞌ laweꞌ da quebe guca lazraꞌ xidaꞌ chee̱ guzúale nedaꞌ lu da baxacheꞌ,
leꞌe naꞌ dxal-laꞌ guzúale nedaꞌ lu xel-la dxebé.
Bxren lazraꞌ che nedaꞌ zuaꞌ lu xel-la dxebé,
cáꞌanqueze leꞌe súale lu xel-la dxebé.
4 Gate bzuajaꞌ chee̱le da naꞌ guzé̱le̱ꞌe̱daꞌ gunne xue,
ne guzúaꞌ lu da ziꞌ da xaꞌ,
ne cáꞌanqueze gudxézrele̱ꞌe̱quezaꞌ,
san quebe bzuajaꞌ da naꞌ chee̱ guzúaꞌ leꞌe lu da baxacheꞌ,
san chee̱ nézele nazríꞌile̱ꞌe̱daꞌ leꞌe.
Ca dxal-laꞌ xulunite lawe̱ꞌ chee̱ bénneaꞌ be̱ne̱ꞌ da cale̱la
5 Che nu benneꞌ ba bzue̱ꞌ nedaꞌ lu da baxacheꞌ,
quegá chiaꞌ nédaꞌze be̱ne̱ꞌ na,
san cáꞌanqueze waca nnadxu,
bzue̱ꞌ xúgute̱le lu da baxacheꞌ.
Dxenníaꞌ:
Waca nnadxu,
chee̱ quebe gácate̱caꞌ snia.
6 Ca xel-la ziꞌ da bdele bénneaꞌ gate naꞌ bzrágale,
ba nácale̱ꞌe̱queze da naꞌ.
7 Caꞌ naca na,
naꞌa dxal-laꞌ gunite laule chee̱ bénneaꞌ,
ne xue zrenle le̱ꞌ,
chee̱ quebe gunitie̱ꞌ xel-la dxebeza lazreꞌ chee̱ꞌ ne̱ chee̱ da baxacheꞌ zren da dxedée̱ꞌ.
8 Chee̱ le̱ naꞌ dxataꞌ xuedaꞌ leꞌe guléꞌele le̱ꞌ xecha lasa ca nazríꞌile̱ꞌe̱le le̱ꞌ.
9 Bzuajaꞌ nédxula chee̱le ca naca da nigá chee̱ guléꞌe laweꞌ che nácale wezúe dizraꞌ lu xúgute̱ da dxaca.
10 Naꞌa,
nu benneꞌ dxunite laule chee̱ꞌ,
cáꞌanqueze nedaꞌ dxunite lawaꞌ chee̱ꞌ.
Ca da bnite lawaꞌ nedaꞌ,
che naca na tu da dxal-laꞌ gunite lawaꞌ,
ba bnite lawaꞌ na ne̱ chee̱le leꞌe lau Cristo
11 chee̱ quebe sequeꞌ Satanás nna beꞌe na dxiꞌu,
naꞌ ba nézquezdxu ca da dxun na.
Pablo dxezé̱ꞌ gunne xue lu xe̱zre Troas
12 Gate bzrinaꞌ xe̱zre Troas chee̱ guzendaꞌ bénneache dizraꞌ chaweꞌ chee̱ Cristo,
gutáꞌle̱ꞌe̱ lataj chiaꞌ gunaꞌ zrin chee̱ Xránadxu.
13 Guzúale̱ꞌa gunne xue laweꞌ da quebe bezreldaꞌ bi bíchedxu Tito ga naꞌ.
Chee̱ le̱ naꞌ bzeaꞌ dizraꞌ benneꞌ caꞌ zaj zre̱ꞌe̱ naꞌ,
naꞌ guxáꞌa xe̱zr la xu Macedonia.
Dxezruéꞌedxu ne̱ chee̱ Cristo
14 Xcalén Dios,
Bénneaꞌ dxeché̱ꞌtequeze̱ꞌ dxiꞌu lu neza guxúꞌu Jesucristo lu da bzruéꞌene̱ꞌ,
ne dxuléꞌe lawe̱ꞌ ne̱ chee̱dxu dxiꞌu dizraꞌ chee̱ꞌ ca tu da dxelá zixre da dxezriluj gátete̱ze na.
15 Dxiꞌu nácadxu ca da dxelá zixre da dxuzúa Cristo lau Dios,
ne dxezriluj na ládujla benneꞌ caꞌ xelelé̱ꞌ,
ne ládujla benneꞌ caꞌ xelebía xiꞌe̱.
16 Lau benneꞌ caꞌ xelebía xiꞌe̱ da dxelá nigá naca na ca tu da dxute bénneache,
san lau benneꞌ caꞌ xelelé̱ naca na tu da dxunezruj na bénneache xel-la nabán.
¿Nu benneꞌ naca chee̱ꞌ gaque̱ꞌ caní?
17 Netuꞌ quebe dxedantuꞌ dxútentuꞌ dizraꞌ chee̱ Dios,
ne quebe dxuchantuꞌ na ca dxelún benneꞌ zante̱.
Laweꞌ da dxen Dios,
dxuchálajntuꞌ du lázrentuꞌ,
ca benneꞌ nasel-la Dios,
ne ca we̱n zrin chee̱ Cristo.