Dizraꞌ chee̱ xel-la wezría cube
3
Gate dxennantuꞌ da nigá,
¿dxéquele dxezú launtuꞌ xecha lasa dxenne̱ntuꞌ chaweꞌ da naca cheé̱zquezentuꞌ?
¿Dxun na ba xen guléꞌentuꞌ leꞌe tu xiche da dxuléꞌe na nácantuꞌ xrlátaje,
u nábantuꞌ chee̱le tu xiche caní,
ca dxelún bal-la benneꞌ?
2 ¡Cabí!
Laweꞌ da nácaquezle leꞌe ca tu xiche da dxuléꞌe na nácantuꞌ xrlátaje,
da naxúaj na lu xichaj lázrdauntuꞌ,
naꞌ xúgute̱ bénneache gaca xelexúnbeꞌe̱ na,
ne xululabe̱ꞌ na.
3 Leꞌe nácale ca tu xiche da nuzúaj Cristo,
ne da dxuléꞌe launtuꞌ netuꞌ.
Nácale ca tu da naxúaj na da quebe naca na tu lu xiche,
san ne̱ chee̱ Beꞌ Láꞌazxa chee̱ Dios ban,
tu da quebe naxúaj na lu blaga xiaj,
san lu lázrdaudxu.
4 Ne̱ chee̱ Cristo dxuxrén lázrentuꞌ Dios,
5 quegá chee̱ bi gaca guntuꞌ da naca cheé̱zquezentuꞌ,
san,
ca naca da gaca guntuꞌ naca na chee̱ Dios.
6 Le̱ꞌ ba nunne̱ꞌ netuꞌ guntuꞌ zrin chee̱ꞌ ne̱ chee̱ tu xel-la wezría cube da quebe naca na ne̱ chee̱ tu da naxúaj na,
san da naca na ne̱ chee̱ Beꞌ Láꞌazxa chee̱ꞌ.
Da nadxixruj bea na da naxúaj na dxuzría xi na dxiꞌu,
san Beꞌ Láꞌazxa naꞌ dxunna dxiꞌu xel-la nabán.
7 Da bdxixruj beꞌe Moisés naꞌ bxuaj na le̱ꞌe̱ xiaj blagaꞌ,
ne blaꞌ nen tu da bseníꞌle̱ꞌe̱,
naꞌ québedxa belezúe benneꞌ Israel caꞌ xelené̱ꞌe̱ lau Moisés,
laweꞌ da gúcatite legala le̱ꞌe̱ dxuꞌa lawe̱ꞌ,
naꞌ xel-la naxaníꞌ naꞌ bexul-la na chawe lazreꞌ.
Che lu xel-la naxaníꞌ zren blaꞌ da nadxixruj bea na,
da dxuzría xi na dxiꞌu,
8 da zrénle̱ꞌe̱dxa naca xel-la naxaníꞌ chee̱ dizraꞌ chaweꞌ naꞌ da nusá Beꞌ Láꞌazxa chee̱dxu.
9 Che da nadxixruj bea na da dxuzría xi na dxiꞌu guca na tu da xabáa zrente̱,
naꞌ tu da xabáa zrénle̱ꞌe̱dxa naca dizraꞌ chaweꞌ naꞌ da dxucáꞌana na dxiꞌu xrlátaje lau Dios.
10 Lácala che da nadxixruj bea na nédxula guca na tu da xabáa,
naꞌa quebe bi naca xabáa chee̱ na lau dizraꞌ chaweꞌ nigá da naca na tu da xabáa zrénle̱ꞌe̱dxa.
11 Che guca tu da xabáa chee̱ da naꞌ guzí bea na tu chíꞌidauze,
napa na tu da xabáa zrénle̱ꞌe̱dxa da naꞌ si bea na chadía chacanna.
12 Laweꞌ da dxuxrén lázrentuꞌ naca na caní,
du lázrentuꞌ dxuchálajntuꞌ dizraꞌ chaweꞌ naꞌ.
13 Quebe dxuntuꞌ ca be̱n Moisés,
bgacu lawe̱ꞌ tu ladxeꞌ chee̱ quebe xeleléꞌe benneꞌ Israel caꞌ xexul-la xel-la naxaníꞌ naꞌ da quebe guzí bea na.
14 Benneꞌ Israel caꞌ quebe guléajniꞌine̱ꞌ.
Ne naꞌa zra,
gate dxululabe̱ꞌ xel-la wezría gula naꞌ,
ladxeꞌ náꞌqueze quebe dxue na le̱ꞌ lataj xeléajniꞌine̱ꞌ,
laweꞌ da quebe ne xedúa na,
naꞌ gaca xedúa na tuze ne̱ chee̱ Cristo.
15 Naꞌa zra,
gate dxululabe̱ꞌ dizraꞌ chee̱ Moisés,
zua ca tu ladxeꞌ da dxucache na xichaj lázrdawe̱ꞌ.
16 Gate tu benneꞌ xexaque̱ꞌ chee̱ Xránadxu,
xedúa ladxeꞌ naꞌ lu xichaj lázrdawe̱ꞌ,
17 laweꞌ da naca Xránadxu Beꞌ naꞌ,
naꞌ naga zua Beꞌ chee̱ Xránadxu,
naꞌ de̱ xel-la weselá lu naꞌ da nadxixruj bea na chee̱ Moisés naꞌ.
18 Chee̱ le̱ naꞌ xúgute̱dxu dxiꞌu,
laweꞌ da quebe daꞌ laudxu tu ladxeꞌ,
nácadxu ca tu wanaꞌ da dxuléꞌe na da xabáa chee̱ Xránadxu,
naꞌ dxíꞌuqueze,
tu tu lasa gate dxeléꞌedxu da xabáa chee̱ꞌ dxexácadxadxu ca naca Cristo,
laweꞌ da tu tu lasa naꞌ nápadxadxu da xabáa chee̱ꞌ.
Da nigá dxun Beꞌ chee̱ Xránadxu,
na dxuché̱ꞌe̱ dxiꞌu lu xichaj lázrdaudxu.