4
Caꞌ naca na,
cabataꞌ dxate niꞌa nantuꞌ laweꞌ da lu xel-la dxexache lazreꞌ chee̱ꞌ,
Dios ba nusebague̱ꞌ netuꞌ zrin nigá chee̱ Cristo da dxuntuꞌ.
2 Ba nuzúantuꞌ chaláꞌala da dxelún bénneache bagácheze,
ne da dxeduéꞌentuꞌ ca zaj naca na.
Quebe bi dxuntuꞌ da we̱n lazreꞌ,
ne quebe dxuchantuꞌ dizraꞌ chee̱ Dios,
san dxenne̱ntuꞌ tuze da li,
naꞌ caní dxuzúa cuínantuꞌ lu naꞌ xichaj lázrdau xúgute̱ bénneache lau Dios.
3 Che dizraꞌ chaweꞌ da dxuzénentuꞌ bénneache ne nagache na,
naca na caní tuze lau benneꞌ caꞌ xelebía xiꞌe̱.
4 Laweꞌ da quebe dxeléajle̱ꞌe̱ chee̱ Cristo,
naꞌ da xriwe̱ꞌ,
da naꞌ naca na dios chee̱ xe̱zr la xu nigá ba nun chul-la na xichaj lázrdawe̱ꞌ chee̱ quebe xeleléꞌene̱ꞌ xel-la naxaníꞌ chee̱ dizraꞌ chaweꞌ chee̱ xabáa chee̱ Cristo,
Bénneaꞌ naque̱ꞌ luꞌa lesaca Dios.
5 Quebe dxuzénentuꞌ bénneache ca naca cheé̱zquezentuꞌ,
san ca naca chee̱ Jesucristo.
Dxennantuꞌ naque̱ꞌ Xránadxu,
naꞌ ca naca chee̱ntuꞌ dxennantuꞌ nácantuꞌ we̱n zrin chee̱le laweꞌ da nazríꞌintuꞌ Jesús.
6 Dios náꞌqueze,
Bénneaꞌ gunná beꞌe̱ guxaníꞌ xiꞌ naꞌ lu da chul-la,
naque̱ꞌ Benneꞌ ba be̱ne̱ꞌ guxaníꞌ xiꞌ chee̱ꞌ lu xichaj lázrdaudxu,
chee̱ gaca gúnbeadxu da xabáa chee̱ Dios da dxácatite legala na dxuꞌa lau Jesucristo.
Dxundxu xúgute̱ ne̱ chee̱ xel-la dxeajlí lazreꞌ chee̱dxu
7 Da xabáa nigá nápantuꞌ lu be̱laꞌ dxen chee̱ntuꞌ,
da naca na ca tu xesuꞌ xu,
chee̱ gaca bea za xel-la waca zren nigá lu naꞌ Dios,
ne quegá cheé̱zquezentuꞌ.
8 Chee̱ le̱ naꞌ:
Láqueze zúantuꞌ lu da sté̱bele̱ꞌe̱,
quebe dxeze̱ntuꞌ gunne xue.
Láqueze dxeze̱ntuꞌ gunne xue,
tu dxebeza lázrezquezentuꞌ gácale̱ Dios netuꞌ.
9 Láqueze zaj nau ziꞌ xuzre̱ꞌ netuꞌ,
quebe dxusán Dios netuꞌ.
Láqueze dxeline̱ꞌ netuꞌ xu,
quebe dxebía xintuꞌ.
10 Gátete̱ze dxéajntuꞌ naca tuze be̱laꞌ dxen chee̱ntuꞌ nen xel-la gute chee̱ Jesús chee̱ guléꞌe lau lu be̱laꞌ dxen chee̱ntuꞌ xel-la nabán chee̱ Jesús.
11 Dxácate̱ naca bantuꞌ zúantuꞌ chee̱ gátentuꞌ xúgute̱ zra ne̱ chee̱ Jesús,
chee̱ guléꞌe lau xel-la nabán chee̱ Jesús lu be̱laꞌ dxen chee̱ntuꞌ da gate.
12 Caꞌ naca na,
lácala tu zúazquezentuꞌ lu da ste̱be chee̱ xel-la gute da nigá,
dxun na sua tu xel-la nabán cube chee̱le.
13 Naxúaj lu dizraꞌ láꞌazxa da dxenná na:
Guxéajle̱ꞌa,
naꞌ chee̱ le̱ naꞌ bchálajaꞌ,
naꞌ cáꞌanqueze netuꞌ,
lu xel-la dxeajlí lazreꞌ caníqueze,
dxéajle̱ꞌe̱ntuꞌ,
ne dxuchálajntuꞌ,
14 laweꞌ da nézentuꞌ Dios,
Bénneaꞌ bsebane̱ꞌ Xránadxu Jesús ládujla benneꞌ gate,
cáꞌanqueze gusebane̱ꞌ dxiꞌu tu zren nen Jesús,
naꞌ tu zren nen leꞌe,
xeché̱ꞌe̱ dxiꞌu lau Le̱ꞌ.
15 Xúgute̱ da nigá guzaca zintuꞌ chee̱ gaca tu da ba neza chee̱le,
chee̱ gaca na,
gate xelezíꞌ benneꞌ zante̱ xel-la xrlátaje chee̱ Dios,
cáꞌanqueze benneꞌ zante̱ xelé̱ꞌe̱ Le̱ꞌ:
Xcalenuꞌ,
chee̱ gaca ba chee̱ Dios.
16 Chee̱ le̱ naꞌ,
cabataꞌ dxate niꞌa nadxu.
Láqueze dxe̱xru be̱laꞌ dxen chee̱dxu,
Dios dxuxucube̱ꞌ beꞌ nácaquezdxu tu zra tu zra.
17 Da dxezácadxu lu xe̱zr la xu nigá naca na tu da dauze,
da teze chee̱ na,
naꞌ nusá na chee̱dxu tu xabáa chadía chacanna da szrente̱,
ne da cháwedxa.
18 Quebe nnáꞌadxu ca da dxeléꞌedxu,
san nnáꞌadxu da quebe naláꞌ,
laweꞌ da quebe dxelezí bea da caꞌ dxeléꞌedxu,
san da caꞌ quebe dxeléꞌedxu dxelezí bea na chadía chacanna.