5
Be̱laꞌ dxen chee̱dxu naca na ca tu xuꞌu lizre beꞌ nácaquezdxu.
Be̱laꞌ dxen chee̱dxu naca na ca tu xuꞌu da quebe si bea na,
naꞌ gate gátedxu Dios ba nucueze̱ꞌ chee̱dxu xabáa tu xuꞌu da zea jlí canna,
da nun Diósqueze,
ne quegá bénneache.
2 Da li dxácate̱ naca bandxu lu be̱laꞌ dxen nigá dxebezre we̱ꞌdxu laweꞌ da dxaca lázredxu cheajchúꞌudxu be̱laꞌ dxen cube naꞌ da gunna Dios dxiꞌu xabáa.
3 Quebe xegáꞌana cáꞌaze beꞌ nácaquezdxu xabáa.
Cheajchúꞌu na be̱laꞌ dxen cube naꞌ.
4 Dxácate̱ ne naca bandxu lu xuꞌu nigá da naca na be̱laꞌ dxen chee̱dxu,
dxebezre we̱ꞌdxu,
ne dxededxu xel-la ziꞌ.
Quebe nácaze na laweꞌ da dxaca lázredxu gusandxu be̱laꞌ dxen gula chee̱dxu nigá.
Dxaca lázredxu cheajchúꞌudxu be̱laꞌ dxen cube,
naꞌ caꞌan gaca xenite be̱laꞌ dxen chee̱dxu da dxal-laꞌ gate,
naꞌ laꞌ be̱laꞌ dxen cube chee̱dxu da gaca ban na chadía chacanna.
5 Bénneaꞌ ba nune̱ꞌ dxiꞌu chee̱ gaca chee̱dxu caní naque̱ꞌ Dios,
Bénneaꞌ ba nunne̱ꞌ dxiꞌu Beꞌ Láꞌazxa ca tu da dxunna bea na dxal-laꞌ sidxu tu be̱laꞌ dxen cube xabáa.
6 Caꞌ naca na,
dxuxrén lázretequezdxu Dios.
Ba nezdxu dxácate̱ naca bandxu lu be̱laꞌ dxen nigá zúadxu zítuꞌla naga zua lízredxu,
da naca na,
quebe zúale̱dxu Xránadxu,
7 naꞌ dxedadxu ne̱ chee̱ xel-la dxeajlí lazreꞌ chee̱dxu,
quegá ne̱ chee̱ da dxeléꞌedxu.
8 Dxuxrén lázredxu Dios,
ne dxaca lázredxadxu gusandxu xel-la nabán chee̱dxu lu be̱laꞌ dxen nigá chee̱ chéajdxu cheajsúale̱dxu Xránadxu.
9 Chee̱ le̱ naꞌ dxundxu ba xuzre gúnte̱quezdxu da xezaca ba lazreꞌ Xránadxu,
che nagáꞌanadxu lu be̱laꞌ dxen chee̱dxu nigá,
u che cheajchúꞌudxu be̱laꞌ dxen cube,
da zua na xabáa,
10 laweꞌ da xúgute̱dxu dxun na ba xen xezrindxu lau Cristo chee̱ guchiꞌe̱ ca da nundxu tu tudxu,
chee̱ siꞌ lu nadxu ca da xáladxu,
cáte̱ze naca da xrlátaje,
u da cale̱la da ba be̱ndxu gate ne zúadxu lu be̱laꞌ dxen chee̱dxu nigá.
Dizraꞌ da dxexún dxiꞌu tuze nen Dios
11 Chee̱ le̱ naꞌ,
laweꞌ da núnbeantuꞌ ca dxal-laꞌ zrébedxu Xránadxu,
dxuntuꞌ ba xuzre guntuꞌ xelelá bénneache.
Dios ba nézene̱ꞌ da nácantuꞌ,
naꞌ dxebeza lazraꞌ cáꞌanqueze leꞌe nézele na.
12 Quegá dxenne̱ntuꞌ xrlátaje cheé̱zquezentuꞌ,
san dxúnnantuꞌ leꞌe lataj gápale netuꞌ ba láꞌana,
chee̱ gaca xeché̱bele chee̱ benneꞌ caꞌ dxulucáꞌana szren cuine̱ꞌ ca naca da zaj naque̱ꞌ cúzreze,
ne quegá ca naca da zaj naque̱ꞌ lu xichaj lázrdawe̱ꞌ.
13 Che dxeleque bénneache nadá xichaj lázrdauntuꞌ naca na chee̱ guntuꞌ zrin chee̱ Dios,
naꞌ che quebe nadá xichaj lázrdauntuꞌ naca na chee̱ gaca tu da ba neza chee̱le leꞌe.
14 Xel-la zriꞌi lazreꞌ chee̱ Cristo dxusebaga na netuꞌ laweꞌ da nézentuꞌ che tu benneꞌ gutie̱ꞌ waláz chee̱ xúgute̱ bénneache,
naꞌ ba gulate xúgute̱ꞌ.
15 Cristo gutie̱ꞌ waláz chee̱ xúgute̱ bénneache,
chee̱ benneꞌ caꞌ zaj naca bane̱ꞌ québedxa xelaca bane̱ꞌ cheé̱zqueze̱ꞌ,
san chee̱ Le̱ꞌ,
Bénneaꞌ gutie̱ꞌ,
ne bebane̱ꞌ waláz chee̱ benneꞌ caꞌ.
16 Chee̱ le̱ naꞌ,
québedxa nnaꞌntuꞌ ca naca da nácaqueze tu benneꞌ lu xe̱zr la xu nigá,
naꞌ láqueze nédxula gunnaꞌntuꞌ Cristo cáte̱ze gúcaqueze̱ꞌ lu xe̱zr la xu nigá,
naꞌa québedxa nnaꞌntuꞌ Le̱ꞌ caní.
17 Caꞌ naca,
che tu benneꞌ naque̱ꞌ tuze nen Cristo,
naque̱ꞌ tu benneꞌ cube.
Da gula caꞌ chee̱ benneꞌ nigá ba guledé chee̱ na,
naꞌ xúgute̱ na zaj naca na cube.
18 Xúgute̱ da caní dxun Dios,
Bénneaꞌ bexune̱ꞌ dxiꞌu tuze nen Lé̱queze̱ꞌ ne̱ chee̱ Cristo,
naꞌ bsebague̱ꞌ dxiꞌu guzendxu bénneache ca gaca xelexaque̱ꞌ tuze nen Dios.
19 Gate gute Cristo,
Dios guzúale̱queze̱ꞌ Le̱ꞌ,
ne bexune̱ꞌ bénneache chee̱ xe̱zr la xu nigá tuze nen Le̱ꞌ,
ne quebe gunné̱ꞌe̱ ca zaj naca dul-la zaj nabaga bénneache caꞌ,
naꞌ bsebague̱ꞌ dxiꞌu guzendxu bénneache dizraꞌ da dxexún dxiꞌu tuze nen Dios.
20 Caꞌ naca na,
nácantuꞌ gubáz chee̱ Dios ne̱ chee̱ Cristo,
naꞌ naca na cáte̱ze Diósqueze dxataꞌ xuene̱ꞌ leꞌe lu dxúaꞌantuꞌ,
naꞌ dxataꞌ xuentuꞌ leꞌe lu La Cristo,
le xexaca tuze nen Dios.
21 Cristo netú dul-la ca be̱ne̱ꞌ,
san ne̱ chee̱dxu dxiꞌu,
Dios bdee̱ꞌ Le̱ꞌ chee̱ gutie̱ꞌ le̱ꞌe̱ xaga béguaj ca tu benneꞌ dul-la,
chee̱ xexácadxu benneꞌ xrlátaje lau Dios ne̱ chee̱ da be̱n Cristo.