DIZRAꞌ BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ XE̱ZR LA XU GALACIA
Dizraꞌ da bzuaj Pablo chee̱ bi chee̱ Cristo zaj zre̱ꞌe̱ xe̱zr la xu Galacia
1
Nedaꞌ,
Pablo,
nacaꞌ gubáz chee̱ Cristo.
Quebe gulesel-la bénneache nedaꞌ,
ne quegá buluzúa bénneache nedaꞌ gacaꞌ gubáz.
Caní bé̱nqueze Jesucristo chiaꞌ,
ne Xradxu Dios,
Bénneaꞌ bsebane̱ꞌ Jesús ládujla benneꞌ gate.
2 Xúgute̱ benneꞌ bíchedxu zrále̱ne̱ꞌ nedaꞌ zaj naque̱ꞌ nedaꞌ tuze.
Nedaꞌ dxuzúajaꞌ dizraꞌ nigá chee̱ xúgute̱ cueꞌ benneꞌ bíchedxu zaj zre̱ꞌe̱ xe̱zre caꞌ zaj nnitaꞌ xe̱zr la xu Galacia.
3 Dxenabaꞌ lau Xradxu Dios,
ne lau Xránadxu Jesucristo gun chawe̱ꞌe̱ leꞌe,
ne gunne̱ꞌ leꞌe xel-la dxebeza zri lazreꞌ.
4 Jesucristo bzane cuine̱ꞌ chee̱ gutie̱ꞌ ne̱ chee̱ dul-la da nabágadxu,
chee̱ bselé̱ꞌ dxiꞌu lu da naca chee̱ xe̱zr la xu nigá da naca na da cale̱la.
Be̱ne̱ꞌ da guca lazreꞌ Xradxu Dios.
5 ¡Gaca báqueze Dios chadía chacanna!
¡Caꞌan gaca na!
Quebe de̱ xetú dizraꞌ chaweꞌ chee̱ Dios
6 Dxexebánele̱ꞌe̱daꞌ chee̱le leꞌe laweꞌ da dxebéaj xíchajte̱le Dios,
Bénneaꞌ gunné̱ꞌ leꞌe chee̱ siꞌ lu naꞌle da dxunna Cristo,
naꞌ dxezíꞌ lu naꞌle tu dizraꞌ nazrala ca naca dizraꞌ chaweꞌ chee̱ Cristo.
7 Da li quebe bi de̱ xetú dizraꞌ chaweꞌ,
san zaj zraꞌ bal-la benneꞌ dxelún zréajene̱ꞌ leꞌe,
ne dxelaca lazre̱ꞌ xuluchuque̱ꞌ dizraꞌ chaweꞌ chee̱ Cristo.
8 Che nu benneꞌ dxuzenne̱ꞌ leꞌe xetú dizraꞌ da nazrala ca naca dizraꞌ chaweꞌ da ba bzénentuꞌ leꞌe,
dxenabaꞌ lau Dios cue̱ꞌe̱ bénneaꞌ deꞌ,
lácala naca nedaꞌ,
u naca tu gubáz chee̱ xabáa.
9 Báchequeze bzendaꞌ leꞌe,
ne dxuzendaꞌ leꞌe da xula,
che nu benneꞌ guzenne̱ꞌ leꞌe tu dizraꞌ da nazrala ca naca dizraꞌ chaweꞌ da ba guzíꞌ lu naꞌle,
dxenabaꞌ lau Dios cue̱ꞌe̱ bénneaꞌ deꞌ.
10 Gate dxenniaꞌ da nigá,
¿Dxaca lazraꞌ xegáꞌanaꞌ xrlátaje lau bénneache,
u che lau Dios?
¿Dxaca lazraꞌ gunaꞌ da xelezaca ba lazreꞌ bénneache?
Che caꞌan dxaca lazraꞌ gunaꞌ da dxelezaca ba lazreꞌ bénneache,
quebe nacaꞌ we̱n zrin chee̱ Cristo.
Ca bexaca Pablo gubáz chee̱ Cristo
11 Dxuzéajniꞌidaꞌ leꞌe,
bi bichaꞌ,
dizraꞌ chaweꞌ da dxuzendaꞌ bénneache,
naꞌ quebe naca na tu da gulaj na lu xichaj lázrdau bénneache.
12 Quebe nu benneꞌ be̱nne̱ꞌ na nedaꞌ,
ne quegá nu benneꞌ bsé̱dene̱ꞌ nedaꞌ le̱ na,
san Lé̱queze Jesucristo bzenne̱ꞌ na nedaꞌ.
13 Ba bénquezle ca be̱naꞌ nedaꞌ nédxula gate naꞌ nazíꞌ lu naꞌa xel-la benneꞌ xudauꞌ chee̱ judío caꞌ,
ca gudáu ziꞌ xuzraꞌ bi chee̱ Dios zaj nácabeꞌ bi chee̱ Cristo,
ne be̱n ziꞌ lazraꞌ guzría xiꞌa-beꞌ.
14 Lu xel-la benneꞌ xudauꞌ chee̱ judío caꞌ,
nedaꞌ ba bzruéꞌedxedaꞌ ca xúgute̱ bi walázr chiaꞌ,
bi ljwezraꞌ caꞌ,
laweꞌ da be̱ lázredxaꞌ gapaꞌ ca da xjácale̱ xra xrtawaꞌ caꞌ.
15 Dios guqué̱ꞌe̱ nedaꞌ nédxula gate za gálajaꞌ,
naꞌ lu xel-la zriꞌi lazreꞌ chee̱ꞌ gunné̱ꞌ nedaꞌ.
Nadxa gate guca lazreꞌ Le̱ꞌ,
16 bléꞌene̱ꞌ nedaꞌ Zríꞌine̱ꞌ,
chee̱ guzendaꞌ benneꞌ caꞌ quebe zaj naque̱ꞌ judío ca naca chee̱ Zríꞌine̱ꞌ.
Gate guca da nigá,
quebe nu benneꞌ gunábedaꞌ,
17 ne quebe guxáꞌa Jerusalén cheajnábedaꞌ benneꞌ zaj naque̱ꞌ gubáz chee̱ Cristo nédxudxa ca nedaꞌ.
Guxáꞌa naga nababa xe̱zr la xu Arabia,
naꞌ gudé naꞌ bezrinaꞌ xe̱zre Damasco.
18 Gudé chun iza guxáꞌa Jerusalén,
chee̱ xeajchálajle̱naꞌ Pedro,
naꞌ begáꞌanale̱naꞌ le̱ꞌ xtaꞌ gubizra.
19 Quebe nu bleꞌedaꞌ xetú benneꞌ gubáz chee̱ Cristo,
san tuze Jacobo,
bi biche Xránadxu.
20 Ne̱ chee̱ La Dios dxapaꞌ leꞌe,
da li naca da nigá dxuzúajaꞌ chee̱le leꞌe.
21 Ca gudé naꞌ guxáꞌa xe̱zre caꞌ zaj nababa xe̱zr la xu Siria,
ne xe̱zre caꞌ zaj nababa xe̱zr la xu Cilicia.
22 Benneꞌ bíchedxu caꞌ,
bi chee̱ Cristo zaj zre̱ꞌe̱ xe̱zr la xu Judea quebe zaj nunbeꞌe̱ nedaꞌ.
23 Belénzene̱ꞌ nu dxenná:
“Bénneaꞌ nédxula gudáu ziꞌ xuzre̱ꞌ dxiꞌu,
naꞌa dxuchálaje̱ꞌ dizraꞌ chaweꞌ chee̱ xel-la dxeajlí lazreꞌ Cristo,
da naꞌ guca lazre̱ꞌ guzría xiꞌe̱ nédxute̱.”
24 Naꞌa dxelúe láꞌane̱ꞌ Dios ca da belenne̱ꞌ ca naca chiaꞌ.