Benneꞌ gubáz caꞌ dxelezíꞌ lu ne̱ꞌe̱ Pablo
2
Ca gudé chidáꞌ iza guxáꞌa xecha lasa Jerusalén nen Bernabé,
naꞌ be̱n bi Tito nedaꞌ tu zren.
2 Guxáꞌa naꞌ laweꞌ da bleꞌe Dios nedaꞌ dxal-laꞌ chaꞌa naꞌ.
Naꞌ cheé̱zela bchálajle̱naꞌ benneꞌ caꞌ zaj naque̱ꞌ blau ládujla bi chee̱ Cristo,
ne bzendaꞌ le̱ꞌ dizraꞌ chaweꞌ da dxuchálajaꞌ ládujla benneꞌ caꞌ quebe zaj naque̱ꞌ judío.
Be̱naꞌ caní chee̱ nezdaꞌ quebe guca dácheze zrin da ba be̱naꞌ,
ne da dxunaꞌ.
3 Gulezíꞌ lu ne̱ꞌe̱ zrin nunaꞌ,
naꞌ quebe nu gunná beꞌe Tito,
bi zále̱beꞌ nedaꞌ,
chugu lu be̱laꞌ chee̱beꞌ da guléꞌe na nácabeꞌ bi chee̱ Dios,
lácala quebe nácabeꞌ judío.
4 Bal-la benneꞌ quebe zaj naque̱ꞌ du lazreꞌ benneꞌ bíchedxu,
benneꞌ guluꞌe̱ ládujla dxiꞌu lu da we̱n lazreꞌ,
gulaca lazre̱ꞌ chugu da guléꞌe na lu be̱laꞌ chee̱ Tito.
Benneꞌ caní guluꞌe̱ ládujla dxiꞌu chee̱ xelenézene̱ꞌ ájala xelegúe̱ꞌ lataj da nazidxu lu naꞌ Jesucristo,
chee̱ xuluxuzúe̱ꞌ dxiꞌu ca benneꞌ zaj nadaꞌu lu da bdxixruj bea Moisés.
5 Ne chite̱ze quebe be̱ntuꞌ le̱ꞌ lataj xelegúꞌu xel-le̱ꞌ netuꞌ laweꞌ da guca lázrentuꞌ xegáꞌanale̱ leꞌe da li dizraꞌ chaweꞌ chee̱ Cristo.
6 Benneꞌ caꞌ zaj naque̱ꞌ blau quebe bi da cube bulusebague̱ꞌ netuꞌ.
Da zaj naque̱ꞌ quebe bi naca na chiaꞌ laweꞌ da quebe xuchíꞌa Dios ca da naláꞌ láweze chee̱ bénneache.
7 Quebe bi bulusebague̱ꞌ nedaꞌ,
laweꞌ da belexúnbeꞌe̱ Diósqueze bsebague̱ꞌ nedaꞌ guzendaꞌ benneꞌ caꞌ quebe zaj naque̱ꞌ judío dizraꞌ chaweꞌ,
cáte̱ze bsebague̱ꞌ Pedro guzenne̱ꞌ benneꞌ judío caꞌ dizraꞌ chaweꞌ.
8 Lé̱queze Dios naꞌ,
Bénneaꞌ bzue̱ꞌ Pedro gubáz chee̱ꞌ ládujla benneꞌ judío caꞌ,
cáꞌanqueze bzue̱ꞌ nedaꞌ gacaꞌ gubáz chee̱ꞌ ládujla benneꞌ quebe zaj naque̱ꞌ judío.
9 Chee̱ le̱ naꞌ,
Jacobo,
ne Pedro,
ne Juan,
benneꞌ zaj naque̱ꞌ blaudxa,
belexúnbeꞌe̱ be̱n Dios nedaꞌ culuén nigá,
naꞌ gulezíꞌ lu ne̱ꞌe̱ nedaꞌ,
ne Bernabé,
naꞌ belune̱ꞌ tuze dizraꞌ cheajzentuꞌ netuꞌ benneꞌ caꞌ quebe zaj naque̱ꞌ judío dizraꞌ chaweꞌ,
dxácate̱ naꞌ le̱ꞌ xuluzenne̱ꞌ na benneꞌ judío caꞌ.
10 Túte̱ze da gulenábene̱ꞌ netuꞌ xexache lázrentuꞌ benneꞌ xacheꞌ caꞌ,
da naꞌ dxue lazraꞌ dxunaꞌ.
Pablo dxedil-le̱ꞌ Pedro lu xe̱zre Antioquía
11 Gate blaꞌ Pedro xe̱zre Antioquía gudil-laꞌ le̱ꞌ caníqueze laweꞌ da gunegue lazre̱ꞌ.
12 Nédxute̱ gudágule̱ne̱ꞌ benneꞌ caꞌ quebe zaj naque̱ꞌ judío cadxa beleláꞌ bal-la benneꞌ gusel-la Jacobo.
Nadxa bebigue̱ꞌe̱ chaláꞌala,
ne bsane̱ꞌ québedxa gudágule̱ne̱ꞌ benneꞌ caꞌ laweꞌ da bzrebe̱ꞌ judió caꞌ,
benneꞌ caꞌ zaj nadxugu lu be̱laꞌ chee̱ꞌ da dxuléꞌe na.
13 Nadxa xezícadxa judío caꞌ zaj naque̱ꞌ bi chee̱ Cristo belune̱ꞌ tu zren Pedro lu da dxune̱ꞌ láweze.
Caní belune̱ꞌ,
naꞌ caꞌ be̱nte̱ Bernabé tu zren benneꞌ caꞌ lu da naꞌ dxelune̱ꞌ láweze.
14 Gate bleꞌedaꞌ nedaꞌ quebe dxelune̱ꞌ cáte̱ze naca chee̱ da li chee̱ dizraꞌ chaweꞌ chee̱ Cristo,
naꞌ guchaꞌ Pedro lau xúgute̱ benneꞌ caꞌ:
Lueꞌ nacuꞌ judío,
naꞌ benuꞌ ca tu benneꞌ quebe naque̱ꞌ judío,
ne quebe be̱nuꞌ ca tu benneꞌ judío.
¿Bizr chee̱ naꞌ dxenná beꞌenuꞌ benneꞌ quebe zaj naque̱ꞌ judío xelune̱ꞌ ca dxelún benneꞌ judío?
Benneꞌ judío xelelé̱ꞌ che dxeajlí lazre̱ꞌ Cristo ca dxaca chee̱ xezícadxa benneꞌ
15 Cáꞌanqueze guchaꞌ-ne̱ꞌ:
Dxiꞌu nácadxu benneꞌ judío laweꞌ da nálajdxu caꞌ,
ne quebe nácadxu benneꞌ dul-la ca benneꞌ zaj nababa xezícadxa xe̱zr la xu caꞌ.
16 Nézedxu netú benneꞌ quebe xegáꞌane̱ꞌ xrlátaje lau Dios laweꞌ da nune̱ꞌ da bdxixruj beꞌe Moisés,
san tuze che dxeajlí lazre̱ꞌ Jesucristo.
Chee̱ le̱ naꞌ cáꞌanqueze dxiꞌu dxeajlí lázredxu Cristo chee̱ xegáꞌanadxu xrlátaje lau Dios ne̱ chee̱ xel-la dxeajlí lazreꞌ chee̱dxu Cristo,
ne quegá laweꞌ da be̱ndxu ca nadxixruj bea na.
Netú benneꞌ quebe xegáꞌane̱ꞌ xrlátaje lau Dios laweꞌ da nune̱ꞌ da nadxixruj bea na.
17 Naꞌa,
che dxiꞌu dxuxrén lázredxu nagáꞌanadxu xrlátaje lau Dios ne̱ chee̱ Cristo,
ne che zua da dxuléꞌe na ne nácadxu benneꞌ dul-la,
¿nnadxu Cristo dxunne̱ꞌ dxiꞌu lataj gundxu dul-la laweꞌ da québedxa dxenná beꞌe da bdxixruj beꞌe Moisés dxiꞌu?
¡Cabataꞌ!
18 Che dxuchínnajaꞌ tu,
naꞌ che te naꞌ xexunaꞌ na,
naꞌ nabagaꞌ zria.
19 Ba nacaꞌ ca tu benneꞌ gate lu da naca chee̱ da nadxixruj bea na.
Da nadxixruj béaqueze bleꞌe na nedaꞌ nacaꞌ ca tu benneꞌ gate,
chee̱ gaca banaꞌ ne̱ chee̱ da nun Dios.
20 Ba nacaꞌ ca tu benneꞌ gate laweꞌ da naca chiaꞌ ca naca chee̱ tu benneꞌ gudáꞌ xaga béguaj tu zren nen Cristo.
Chee̱ le̱ naꞌ,
québedxa naca banaꞌ nedaꞌ.
Cristo naca bane̱ꞌ lu xichaj lázrdawaꞌ.
Xel-la nabán da napaꞌ lu be̱laꞌ dxen chiaꞌ,
napaꞌ na ne̱ chee̱ xel-la dxeajlí lazreꞌ chiaꞌ Zriꞌine Dios,
Bénneaꞌ bzriꞌine̱ꞌ nedaꞌ,
ne bzane cuine̱ꞌ,
gutie̱ꞌ waláz chiaꞌ nedaꞌ.
21 Quebe dxaca lazraꞌ guzúaꞌ chaláꞌala xel-la zriꞌi lazreꞌ chee̱ Dios.
Che nu benneꞌ gaca xegáꞌane̱ꞌ xrlátaje lau Dios laweꞌ da nune̱ꞌ da nadxixruj bea na,
naꞌ dácheze guca da be̱n Cristo gate gutie̱ꞌ.