Dxezidxu Beꞌ Láꞌazxa ne̱ chee̱ xel-la dxeajlí lazreꞌ
3
Bi bichaꞌ,
zrale Galacia,
nácale leꞌe benneꞌ xala caꞌ.
¿Zua nu benneꞌ dxezí xe̱ꞌe̱ leꞌe chee̱ québedxa guzúale dizraꞌ chee̱ da li?
Ba bléꞌentuꞌ leꞌe caníqueze Jesucristo,
ca gudé̱ꞌe̱ le̱ꞌe̱ xaga béguaj.
2 Le xe̱xque nedaꞌ:
¿Guzile Beꞌ Láꞌazxa laweꞌ da be̱nle da bdxixruj beꞌe Moisés,
u laweꞌ da guxéajle̱le chee̱ da bénnele?
3 ¿Ájala chee̱ naꞌ nácale benneꞌ xala?
¿Dxéquele gunle gácale dute̱ da naꞌ guzú laule gácale ne̱ chee̱ Beꞌ Láꞌazxa?
4 ¿Dácheze gudele zánete̱ xel-la ziꞌ caꞌ?
Dxaca lazraꞌ quebe guca na níteze.
5 Gate Dios dxunne̱ꞌ leꞌe Beꞌ Láꞌazxa chee̱ꞌ,
ne dxune̱ꞌ xel-la waca caꞌ chee̱ xabáa ládujla leꞌe,
¿dxune̱ꞌ na laweꞌ da dxunle ca nadxixruj bea na,
u laweꞌ da guxéajle̱le chee̱ dizraꞌ chaweꞌ da bénnele?
6 Abraham guxeajlí lazre̱ꞌ Dios,
naꞌ Dios guzíꞌ lu ne̱ꞌe̱ da nigá ca tu da bcaꞌana le̱ꞌ xlátaje̱.
7 Chee̱ le̱ naꞌ dxal-laꞌ nézele,
benneꞌ caꞌ da li zaj naque̱ꞌ zriꞌine zre sua Abraham zaj naque̱ꞌ benneꞌ dxeleajlí lazre̱ꞌ Dios.
8 Naxúaj na lu dizraꞌ láꞌazxa ca naca da nigá.
Laweꞌ da neze Dios nédxute̱ gucáꞌane̱ꞌ xlátaje̱ benneꞌ quebe zaj naque̱ꞌ judío,
benneꞌ xeleajlí lazre̱ꞌ Le̱ꞌ,
naꞌ guzre̱ꞌ Abraham nédxute̱ dizraꞌ chaweꞌ nigá,
gunné̱ꞌ:
“Gaca chaweꞌ chee̱ benneꞌ dute̱ xe̱zr la xu ne̱ chiuꞌ lueꞌ.”
9 Caꞌan naca,
dxaca chaweꞌ chee̱ benneꞌ dxeleajlí lazre̱ꞌ Dios tu zren nen Abraham,
bénneaꞌ guxeajlí lazre̱ꞌ Dios.
10 Benneꞌ caꞌ dxuluxrén lazre̱ꞌ zaj nagáꞌane̱ꞌ xrlátaje lau Dios laweꞌ da zaj nune̱ꞌ ca da nadxixruj beꞌe Moisés zaj xuꞌe̱ deꞌ laweꞌ da naxúaj lu dizraꞌ láꞌazxa da dxenná na:
Zaj xuꞌu deꞌ xúgute̱ benneꞌ quebe dxelúnqueze̱ꞌ xúgute̱ da nadxixruj bea na,
da naꞌ naxúaj na lu xiche láꞌazxa.
11 Dxunna bea na netú benneꞌ quebe xegáꞌane̱ꞌ xrlátaje lau Dios laweꞌ da nune̱ꞌ da nadxixruj bea na laweꞌ da naxúaj lu xiche láꞌazxa da dxenná na:
Bénneaꞌ nagáꞌane̱ꞌ xrlátaje lau Dios gataꞌ chee̱ꞌ xel-la nabán li lazreꞌ che dxeajlí lazre̱ꞌ Dios.
12 Bénneaꞌ dxune̱ꞌ ca bdxixruj beꞌe Moisés quebe dxune̱ꞌ na ne̱ chee̱ xel-la dxeajlí lazreꞌ chee̱ꞌ laweꞌ da naxúaj da dxenná na:
Benneꞌ dxune̱ꞌ xúgute̱ da caní gaca bane̱ꞌ ne̱ chee̱ le̱ na.
13 Cristo bselé̱ꞌ dxiꞌu lu deꞌ da xuꞌu nu quebe dxun da nadxixruj bea na laweꞌ da guxúꞌuqueze̱ꞌ deꞌ waláz chee̱dxu cáte̱ze naxúaj lu dizraꞌ láꞌazxa da dxenná na:
Xuꞌu deꞌ bénneaꞌ de̱ꞌe̱ le̱ꞌe̱ xaga.
14 Da nigá guca na chee̱ gaca gun Dios xrlátaje benneꞌ caꞌ quebe zaj naque̱ꞌ benneꞌ judío,
da naꞌ guche̱be lazre̱ꞌ gune̱ꞌ lau Abraham ne̱ chee̱ Jesucristo,
naꞌ chee̱ siꞌ lu nnadxu xúgute̱dxu Beꞌ Láꞌazxa ne̱ chee̱ xel-la dxeajlí lazreꞌ chee̱dxu ca da guche̱be lazreꞌ Dios.
Da naca chee̱ da nadxixruj bea na, ne da naca chee̱ da guche̱be lazreꞌ Dios
15 Bi bichaꞌ,
dxuléꞌedaꞌ leꞌe ca da dxaca chee̱ bénneache.
Gate tu benneꞌ dxune̱ꞌ tu xel-la wezría,
ne ba bzuajte̱ꞌ láqueze̱ꞌ lawe na,
netú benneꞌ quebe gaca guchínnaje̱ꞌ na,
ne quebe bi gaca gudé̱ꞌe̱ chee̱ na.
16 Dios guche̱be lazre̱ꞌ da gune̱ꞌ chee̱ Abraham,
ne chee̱ zriꞌine zre sue̱ꞌ.
Quebe dxenná na:
Chee̱ zriꞌine zre sue̱ꞌ caꞌ,
da naca na chee̱ benneꞌ zan,
san dxenná na:
Chee̱ zriꞌine zre suꞌ,
da naca na chee̱ tuze benneꞌ,
bénneaꞌ naque̱ꞌ Cristo.
17 Da dxenniaꞌ naca na da nigá:
Dios be̱ne̱ꞌ tu xel-la wezría nen Abraham,
ne bcaꞌana chawe̱ꞌ na.
Chee̱ le̱ naꞌ,
da bdxixruj beꞌe Moisés da blaꞌ na ca gudé tapa gaxúa chi dxua iza quebe gaca guchinnaj na xel-la wezría naꞌ,
u xucáꞌana na dácheze da guche̱be lazreꞌ Dios.
18 Che dxezidxu da dxunna Dios che dxundxu ca da bdxixruj beꞌe Moisés,
quebe naca na tu da nache̱be lazreꞌ Dios,
san da li Dios guche̱be lazre̱ꞌ gunézruje̱ꞌ na cáꞌaze chee̱ Abraham.
19 Naꞌa xcaꞌ,
¿bizra dxun da bdxixruj beꞌe Moisés?
Dios bnézruje̱ꞌ da naꞌ gudé naꞌ chee̱ guléꞌe na ca naca xtul-la bénneache cadxa xeláꞌ zriꞌine zre sua Abraham naꞌ,
Bénneaꞌ guche̱be lazreꞌ Dios gune̱ꞌ da xrlátaje chee̱ꞌ.
Dios gusel-le̱ꞌ da gunná béꞌene̱ꞌ lu naꞌ gubáz chee̱ xabáa chee̱ꞌ,
naꞌ Moisés guque̱ꞌ benneꞌ dxudé dizraꞌ chee̱n.
20 Quebe dxun na ba xen nu benneꞌ gudé dizraꞌ gate naca na chee̱ tuze benneꞌ,
naꞌ Dios naque̱ꞌ tuze,
Bénneaꞌ guche̱be lazre̱ꞌ chee̱ Abraham ca da gune̱ꞌ.
Da dxun da bdxixruj beꞌe Moisés
21 ¿Nnadxu dxedábaga da bdxixruj beꞌe Moisés da naꞌ guche̱be lazreꞌ Dios?
¡Cabataꞌ!
Che da nadxixruj bea na da bnezruj Dios gaca gunna na xel-la nabán chee̱ bénneache,
naꞌ gaca xegáꞌana xrlátaje lau Dios tu benneꞌ che gune̱ꞌ ca da nadxixruj bea na naꞌ.
22 Dxenná na lu dizraꞌ láꞌazxa,
xúgute̱ bénneache zaj nabague̱ꞌ dul-la chee̱ gaca xelezíꞌ lu ne̱ꞌe̱ da guche̱be lazreꞌ Dios gunne̱ꞌ benneꞌ caꞌ xeleajlí lazre̱ꞌ Jesucristo.
23 Nédxudxa ca bzrin zra gaca nu cheajlí lazre̱ꞌ Cristo,
ne̱ chee̱ da nadxixruj bea na,
xúgute̱dxu,
benneꞌ judío,
gúcadxu ca benneꞌ zaj xuꞌe̱ lizre xia,
laweꞌ da xadíaze be̱ndxu ca dxenná da nadxixruj bea na,
naꞌ gulézadxu ca bzrin zra guca cheajlí lázredxu Cristo.
24 Da nadxixruj bea na gunná beꞌe na dxiꞌu,
ca dxun tu benneꞌ dxusegule̱ꞌ bidauꞌ chee̱ benneꞌ xula cadxa bzrin zra blaꞌ Cristo,
chee̱ xegáꞌanadxu xrlátaje lau Dios gate guxeajlí lázredxu Cristo.
25 Naꞌa laweꞌ da ba bzrin zra gaca cheajlí lázredxu Cristo,
québedxa xúꞌudxu lu naꞌ da nadxixruj bea na da naca na chee̱dxu ca tu benneꞌ dxusegule̱ꞌ bidauꞌ.
26 Xúgute̱le naꞌ dxeajlí lázrele Jesucristo nácale tuze nen Le̱ꞌ.
Chee̱ le̱ naꞌ nácale bi chee̱ Dios.
27 Xúgute̱le leꞌe naꞌ gudxúale nisa chee̱ gácale tuze nen Cristo,
Le̱ꞌ naque̱ꞌ chee̱le ca tu ladxeꞌ nácule.
28 Québedxa dxeléꞌe Dios leꞌe ca benneꞌ judío,
u benneꞌ quebe naque̱ꞌ judío,
u ca benneꞌ nadaꞌu,
u benneꞌ quebe nadaꞌu,
u ca benneꞌ biu,
u nuꞌula.
Dxeléꞌene̱ꞌ leꞌe,
naca xúgute̱le ca tuze be̱l-laꞌ dxen laweꞌ da nácale tuze nen Jesucristo.
29 Che nácale bi chee̱ Cristo,
da li nácale zre sua Abraham,
naꞌ gaca chee̱le da guche̱be lazreꞌ Dios gune̱ꞌ.