4
Da dxaca lazraꞌ nniaꞌ naca na da nigá:
Dxácate̱ ne naca bidauꞌ bi naꞌ gaca chee̱beꞌ da naca chee̱ xrabeꞌ,
nácabeꞌ ca bi nadaꞌu xuꞌubeꞌ lu naꞌ xránabeꞌ,
lácala da li gácabeꞌ xrane xúgute̱ da de̱ lizre xrabeꞌ.
2 Xuꞌubeꞌ lu naꞌ benneꞌ dxulusé̱dene̱ꞌ-beꞌ,
ne lu naꞌ benneꞌ caꞌ xuꞌu lu ne̱ꞌe̱ da naca chee̱beꞌ,
cadxa zrin zra guléꞌe xrabeꞌ da li nácabeꞌ zríꞌine̱ꞌ.
3 Cáꞌanqueze dxaca chee̱dxu.
Gate ne nácadxu ca bidauꞌ,
xúꞌudxu lu naꞌ xúgute̱ da dxelenná bea na lu xe̱zr la xu nigá.
4 Gate bzrin zra ba bleꞌe lau Dios,
naꞌ gusel-le̱ꞌ Zríꞌine̱ꞌ,
gúlajbeꞌ ne̱ chee̱ tu nuꞌula,
naꞌ guxúꞌe̱ lu naꞌ da bdxixruj beꞌe Moisés.
5 Ble̱ꞌe̱ bselé̱ꞌ benneꞌ zaj xuꞌe̱ lu naꞌ da nadxixruj bea na,
chee̱ gaca siꞌ lu naꞌ Dios dxiꞌu ca zríꞌinequeze̱ꞌ.
6 Laweꞌ da ba nácale bi chee̱ Dios,
Le̱ꞌ gusel-le̱ꞌ Beꞌ Láꞌazxa chee̱ Zríꞌine̱ꞌ lu xichaj lázrdaule,
naꞌ dxenná Beꞌ naꞌ:
“Abba”,
da zéaje̱ na:
Xrae.
7 Caꞌan naca,
ba nácadxu bi chee̱ Dios,
ne québedxa nácadxu ca benneꞌ zaj nadaꞌu lu naꞌ da bdxixruj beꞌe Moisés.
Naꞌ laweꞌ da nácadxu bi chee̱ꞌ,
Dios gunne̱ꞌ dxiꞌu da de̱ chee̱nꞌ.
Caní naca laweꞌ da nácadxu Cristo tuze.
Pablo dxeꞌe̱ gunne xue chee̱ bi caꞌ chee̱ Cristo
8 Da líqueze,
gate quebe ne gúnbeale Dios,
gúcale benneꞌ zaj nadaꞌu chee̱ dios caꞌ,
daꞌ quebe zaj nácaqueze dios.
9 Naꞌa gate ba núnbeale Dios,
u nnadxu,
Dios naꞌ núnbeꞌe̱ leꞌe,
¿ájazra gunle xexúꞌule xecha lasa lu naꞌ da dxelenná bea na lu xe̱zr la xu nigá,
da caꞌ quebe zaj zaca?
10 Leꞌe ne dxapa ba láꞌanale bal-la zra caꞌ,
ne bal-la beuꞌ caꞌ,
ne tu tu iza caꞌ.
11 Dxezrébele̱ꞌa be̱naꞌ zrin níteze ládujla leꞌe gate bzendaꞌ leꞌe dizraꞌ chaweꞌ chee̱ Cristo.
12 Bi bíchaꞌdauꞌ,
dxataꞌ xúedaꞌ leꞌe gácale ca nacaꞌ nedaꞌ,
québedxa xuꞌa lu naꞌ da nadxixruj bea na,
laweꞌ da gúcaquezaꞌ nedaꞌ ca nácale leꞌe.
Quegá bi da cale̱la be̱nle chiaꞌ nedaꞌ.
13 Ba nézquezle gate nédxudauꞌ bzendaꞌ leꞌe dizraꞌ chaweꞌ chee̱ Cristo.
Guca na gate naꞌ guxuꞌa tu xízrawe̱ꞌ.
14 Xízrawe̱ꞌ naꞌ guca na da gusegute na leꞌe,
san leꞌe quebe begútele nedaꞌ,
ne quebe bzúale nedaꞌ chaláꞌala,
san guzíꞌ lu naꞌle nedaꞌ ca tu gubáz chee̱ xabáa chee̱ Dios,
u ca nácquezaꞌ Jesucristo.
15 ¿Bizra guca chee̱ xel-la dxebé da guzúale?
Waca nniaꞌ tu da xecáꞌana leꞌe chaweꞌ,
la naca da guzéquele gunle,
bebéajte̱le xiaj láuquezle,
chee̱ gúnnale na nedaꞌ.
16 Naꞌa,
¿bexacaꞌ ca tu benneꞌ dxecuídene̱ꞌ leꞌe laweꞌ da guchaꞌ leꞌe da li?
17 Benneꞌ caꞌ dxelaca lazre̱ꞌ chugu lu be̱laꞌ chee̱le da naꞌ dxuléꞌe na,
dxeꞌe̱ gunne xue chee̱le leꞌe,
san quegá chee̱ xegáꞌanale chaweꞌ.
Da dxelaca lazre̱ꞌ naca na xulucuase̱ꞌ leꞌe nen netuꞌ chee̱ cuele gunne xue chee̱ le̱ꞌ.
18 Naca chaweꞌ cuedxu gunne xue chee̱ benneꞌ xula chee̱ xegáꞌane̱ꞌ chaweꞌ,
ne quegaze gate zúale̱naꞌ leꞌe.
19 Zríꞌinaꞌdauꞌ,
naca chiaꞌ ca zuaꞌ lu xel-la dxudía ne̱ chee̱le ca dxaca chee̱ tu nuꞌula ba zua sane̱ꞌ bidauꞌ,
ne wabédxequezaꞌ gunne xue chee̱le cadxa guléꞌe lau da li dxenná bea Cristo lu xichaj lázrdaule.
20 Dxezé̱ lazraꞌ súale̱naꞌ leꞌe náꞌaqueze chee̱ gaca guchálajle̱naꞌ leꞌe xezícadxa dizraꞌ laweꞌ da dxezíꞌale̱ꞌa gunne xue.
Da dxusede dxiꞌu ca guca chee̱ Sara, ne chee̱ Agar
21 Leꞌe naꞌ,
dxaca lázrele chuꞌule lu naꞌ da bdxixruj beꞌe Moisés,
le xeché̱bexque da nigá:
¿Quebe ne xénnele ca dxenná da nadxixruj bea na?
22 Dxenná na gulezráꞌ chupa zriꞌine Abraham.
Tubeꞌ gúcabeꞌ zriꞌine zrúꞌulaqueze̱ꞌ,
nuꞌula quebe nadaꞌu.
23 Zriꞌine nuꞌula nadaꞌu gúlajbeꞌ cáte̱ze dxelalaj xúgute̱ bidauꞌ,
naꞌ zriꞌine nuꞌula quebe nadaꞌu gúlajbeꞌ chee̱ guca li ca da guche̱be lazreꞌ Dios.
24 Da nigá naca na ca tu da dxuléꞌe na.
Dxúpate̱ nuꞌula caní dxululéꞌene̱ꞌ ca zaj naca chupa xel-la wezría.
Tu xel-la wezría nigá naca na da bnezruj Dios Moisés lu xiꞌa Sinaí,
da naꞌ dxuléꞌe Agar.
Benneꞌ caꞌ zaj xuꞌe̱ lu naꞌ xel-la wezría nigá dxelálaje̱ꞌ ca benneꞌ zaj nadaꞌu.
25 Cáꞌanqueze dxuléꞌe Agar da naca chee̱ xiꞌa Sinaí da zua na ga nababa Arabia,
Cáꞌanqueze xiꞌa nigá dxuléꞌe na ca naca Jerusalén lu zra naꞌa zra laweꞌ da zaj naca benneꞌ chee̱ xe̱zre nigá ca benneꞌ zaj nadaꞌu tu zren nen zríꞌine̱ꞌ caꞌ.
26 Benneꞌ zaj nababe̱ꞌ Jerusalén chee̱ xabáa quebe zaj naque̱ꞌ benneꞌ zaj nadaꞌu,
naꞌ dxiꞌu nácadxu ca zriꞌine benneꞌ caꞌ.
27 Lu dizraꞌ láꞌazxa,
naxúaj na ca naca chee̱ benneꞌ zaj nababa Jerusalén chee̱ xabáa naꞌ,
da dxenná na:
Gubé lueꞌ,
nuꞌula wizre,
lueꞌ quebe nu chiláꞌ zriꞌinuꞌ.
Gudxezre xaꞌa lu xel-la dxebé,
lueꞌ quebe núnbeꞌu xel-la dxudía
chee̱ xel-la dxezán bidauꞌ.
Nuꞌula quebe guzán bidauꞌ gate guque̱ꞌ cuideꞌ waxandxa zríꞌine̱ꞌ
quézcala zriꞌine nuꞌula zúale̱ne̱ꞌ benneꞌ chee̱ꞌ.
28 Leꞌe,
bi bíchaꞌdauꞌ,
nácadxu ca Isaac.
Nácadxu zriꞌine Abraham,
bi caꞌ guche̱be lazreꞌ Dios gunézruje̱ꞌ le̱ꞌ.
29 Naꞌa ca guca lu zra naꞌ,
Ismael,
zriꞌine Abraham naꞌ,
bi gúlajbeꞌ ca dxelalaj xúgute̱ bidauꞌ,
gudáu ziꞌ xúzrebeꞌ Isaac,
zriꞌine Abraham naꞌ,
bi gúlajbeꞌ ne̱ chee̱ Beꞌ chee̱ Dios,
cáꞌanqueze dxaca na naꞌa.
30 Naꞌa ¿bizra dxenná dizraꞌ láꞌazxa?
Dxenná na:
Bebéaj chaláꞌala nuꞌula nadaꞌu tu zren nen zríꞌine̱ꞌ laweꞌ da quebe gaca chee̱ zriꞌine nuꞌula nadaꞌu sibeꞌ da dxal-laꞌ siꞌ zriꞌine nuꞌula quebe nadaꞌu.
31 Caꞌ naca na,
bi bichaꞌ,
quebe nácadxu ca Ismael,
zriꞌine nuꞌula nadaꞌu,
san nácadxu ca Isaac,
zriꞌine zruꞌula Abraham,
nuꞌula quebe nadaꞌu.