Le sua chuchu lu xel-la weselá
5
Cristo bselé̱ꞌ dxiꞌu lu naꞌ da nadxixruj bea na chee̱ gácadxu ca benneꞌ quebe zaj nadaꞌu.
Le sua chuchu lu xel-la weselá da ba guzile,
ne québedxa xexúꞌule lu naꞌ da naꞌ dxun na leꞌe benneꞌ zaj nadaꞌu.
2 Le xene da dxapaꞌ leꞌe.
Nedaꞌ,
Pablo,
dxapaꞌ leꞌe,
che güele lataj chugu lu be̱laꞌ chee̱le da naꞌ dxuléꞌe na,
quebe bi da ba neza gaca chee̱le da naca chee̱ Cristo.
3 Dxaca lazraꞌ xapaꞌ leꞌe xecha lasa,
che nu benneꞌ chugu lu be̱laꞌ chee̱ꞌ da naꞌ dxuléꞌe na,
dxun na ba xen gun bénneaꞌ xúgute̱ da bdxixruj beꞌe Moisés.
4 Leꞌe naꞌ dxéquele nagáꞌanale xrlátaje lau Dios laweꞌ da nunle ca nadxixruj bea na,
ba bcáꞌanale da naca chee̱ Cristo,
ne dxexebéaj cuínale lu xel-la zriꞌi lazreꞌ chee̱ Dios.
5 Dxiꞌu,
ne̱ chee̱ Beꞌ Láꞌazxa,
ne laweꞌ da dxeajlí lázredxu Cristo,
dxuxrén lázredxu nagáꞌanadxu xrlátaje lau Dios.
6 Che nácadxu tuze nen Cristo,
quebe bi da ba neza gaca na chee̱dxu che chugu lu be̱laꞌ chee̱dxu da naꞌ dxuléꞌe na,
u che quebe chugu na.
Da ba neza naca na chee̱dxu che dxeajlí lázredxu Cristo,
naꞌ xel-la dxeajlí lazreꞌ chee̱dxu dxuzúa na dxiꞌu lu xel-la zriꞌi lazreꞌ.
7 Da xrlátaje bé̱nquezle.
¿Nuzra gulúꞌu xel-la leꞌe chee̱ québedxa guzúale dizraꞌ da li?
8 Quegá Dios be̱ne̱ꞌ da naꞌ.
Nácaqueze Le̱ꞌ Bénneaꞌ bláwizre̱ꞌ leꞌe.
9 Quebe gal-la lázrele da dxenná na:
Láteze cua zichaj dxuchazra na ca naca cua.
10 Dxuxrén lazraꞌ Xránadxu ca naca chee̱le leꞌe,
quebe guzúale chaláꞌala da nigá dxuchálajaꞌ.
Dios gudée̱ꞌ lu da ba xaꞌ bénneaꞌ dxun zréajene̱ꞌ leꞌe,
nútete̱ze naque̱ꞌ.
11 Da naca chiaꞌ,
bi bichaꞌ,
la xapaꞌ nedaꞌ bénneache dxal-laꞌ chugu lu be̱laꞌ chee̱ꞌ da naꞌ dxuléꞌe na,
quegá weláu ziꞌ xuzre benneꞌ judío nedaꞌ laweꞌ da che dxunaꞌ da caní quebe xelaque̱ꞌ tula che cuꞌa lban chee̱ xaga béguaj chee̱ Cristo.
12 Naꞌa ca naca chee̱ benneꞌ caꞌ,
benneꞌ dxelún zréajene̱ꞌ leꞌe,
ne dxelenné̱ꞌ dxal-laꞌ chugu lu be̱laꞌ chee̱le da naꞌ dxuléꞌe na,
dxaca lazraꞌ chugu ca da zaj naca benneꞌ caꞌ chee̱ québedxa xelún zréajene̱ꞌ leꞌe.
13 Bi bíchaꞌdauꞌ,
Dios bláwizre̱ꞌ leꞌe chee̱ gácale benneꞌ quebe zaj nadaꞌu,
ne québedxa xuꞌule lu naꞌ da bdxixruj beꞌe Moisés.
Quebe guchínele da nácale chee̱ gunle ca da dxezá lázrele.
Le gun cuínale ca benneꞌ zaj nadaꞌu,
chee̱ gunle zrin chee̱ le saꞌ ljwézrele tule xetule lu xel-la zriꞌi lazreꞌ chee̱le.
14 Xúgute̱ da nadxixruj bea na dxun bénneaꞌ dxuzúe̱ꞌ dizraꞌ da naꞌ dxenná na:
Bzriꞌi le saꞌ ljwezruꞌ cáte̱ze nazríꞌi cuinuꞌ.
15 Che dxunle ca dxelún be̱ xixreꞌ caꞌ,
ne dxun ziꞌ ljwézrele,
ne dxasa ljwézrele tule xetule,
le guxúe ga guzría xiꞌ cuínale.
Da dxundxu cáte̱ze dxezá lazreꞌ be̱laꞌ dxen chee̱dxu, ne da dxundxu cáte̱ze dxezá lazreꞌ Beꞌ Láꞌazxa
16 Da nigá dxapaꞌ leꞌe:
Le gun cáte̱ze dxuléꞌe Beꞌ Láꞌazxa leꞌe,
naꞌ quebe gunle cáte̱ze dxezá lazreꞌ be̱laꞌ dxen chee̱le.
17 Da dxezá lazreꞌ be̱laꞌ dxen chee̱dxu dxedíl-lale̱ na da dxezá lazreꞌ Beꞌ Láꞌazxa,
naꞌ da dxezá lazreꞌ Beꞌ Láꞌazxa dxedíl-lale̱ na da dxezá lazreꞌ be̱laꞌ dxen chee̱dxu.
Dxúpate̱ da caní dxeledíl-lale̱ ljwezre na,
naꞌ chee̱ le̱ naꞌ quebe gaca gunle da dxaca lázrele gunle.
18 Che dxunle ca da dxuléꞌe Beꞌ Láꞌazxa leꞌe,
québedxa xuꞌule lu naꞌ da nadxixruj bea na.
19 Zaj nuléꞌe láuqueze da dxelún benneꞌ caꞌ dxelune̱ꞌ cáte̱ze da dxezá lazreꞌ be̱laꞌ dxen chee̱ꞌ:
Deledále̱ne̱ꞌ nuꞌula xula.
Dulucáꞌana dítaje̱ꞌ le saꞌ ljwezre̱ꞌ
Dxelune̱ꞌ da sban,
ne da schanniꞌ.
20 Dxelúe szrene̱ꞌ bedauꞌ xiaj xaga,
ne dxelune̱ꞌ xel-la wazráꞌ.
Dxelecuídene̱ꞌ le saꞌ ljwezre̱ꞌ,
ne dxelezré̱ꞌe̱.
Dxelaque̱ꞌ wideꞌ,
ne dxelezráꞌa xíchaje̱ꞌ.
Dxelenné̱ꞌ chee̱ ljwezre̱ꞌ.
Dxelebéaj xichaj ljwezre̱ꞌ tue̱ꞌ xetue̱ꞌ,
ne dxelaque̱ꞌ chupa laꞌa.
21 Dxelaque̱ꞌ xa lazreꞌ,
ne dxelutie̱ꞌ benneꞌ.
Dxelezúzrene̱ꞌ,
ne dxeledanne̱ꞌ da cale̱la da dxelune̱ꞌ lu laní caꞌ.
Zánete̱ da dxelundxe̱ꞌ bi chee̱ da caní.
Che le̱ naꞌ dxapaꞌ leꞌe ca bé̱nquezaꞌ nédxute̱,
benneꞌ dxelune̱ꞌ da caní quebe xelexúꞌe̱ naga dxenná bea Dios.
22 Da dxelún benneꞌ caꞌ dxelune̱ꞌ cáte̱ze da dxuléꞌe Beꞌ Láꞌazxa le̱ꞌ zaj naca na caní:
Zaj nazriꞌine̱ꞌ le saꞌ ljwezre̱ꞌ,
ne zaj nape̱ꞌ xel-la dxebé.
Dxelebeza zri lazre̱ꞌ,
ne zaj naque̱ꞌ zren lazreꞌ.
Zaj naque̱ꞌ zriꞌi lazreꞌ,
ne dxelune̱ꞌ da zriꞌa chaweꞌ.
Zaj naque̱ꞌ li lazreꞌ.
23 Zaj naque̱ꞌ dxexruj lazreꞌ,
ne dxelenná beꞌe cuine̱ꞌ.
Quebe de̱ da nadxixruj bea na da dxe̱ na dxiꞌu quebe gundxu da caní.
24 Benneꞌ caꞌ zaj naque̱ꞌ bi chee̱ Cristo ba buludé̱ꞌe̱ le̱ꞌe̱ xaga béguaj be̱laꞌ dxen chee̱ꞌ nen xúgute̱ da dxezá lazre na.
25 Che naca bandxu ne̱ chee̱ Beꞌ Láꞌazxa,
dxal-laꞌ gundxu ca da dxuléꞌe Beꞌ Láꞌazxa dxiꞌu.
26 Quebe dxal-laꞌ gucáꞌana szren cuínadxu,
ne quebe gácadxu wideꞌ tudxu xetudxu,
ne quebe sua da xa lazreꞌ ládujla dxiꞌu.