DIZRAꞌ BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ XE̱ZRE ÉFESO
Pablo dxugape̱ꞌ diuzre bi chee̱ Cristo zaj zre̱ꞌe̱ xe̱zre Efeso
1
Nedaꞌ,
Pablo,
nacaꞌ gubáz chee̱ Jesucristo laweꞌ da guca lazreꞌ Dios gacaꞌ caní.
Dxuzúajaꞌ da nigá chee̱le leꞌe,
nácale bi chee̱ Dios,
ne dxeajlí lázrele Jesucristo,
naꞌ zrale xe̱zre Éfeso.
2 Dxenabaꞌ lau Xradxu Dios,
ne lau Xránadxu Jesucristo gun chawe̱ꞌe̱ leꞌe,
ne gunne̱ꞌ leꞌe xel-la dxebeza zri lazreꞌ.
Ca naca da chaweꞌ da dxezíꞌ lu nnadxu ne̱ chee̱ Cristo
3 Dxue láꞌanadxu Dios,
Xra Xránadxu Jesucristo laweꞌ da ba be̱ne̱ꞌ chee̱dxu ca naca xúgute̱ da chaweꞌ chee̱ Beꞌ Láꞌazxa da záꞌaca xabáa laweꞌ da nácadxu bi chee̱ Cristo.
4 Dios guqué̱ꞌe̱ dxiꞌu chee̱ gácadxu bi chee̱ Cristo gate quebe ne gunte̱ꞌ xe̱zr la xu,
chee̱ gácadxu benneꞌ láꞌazxa,
ne du lazreꞌ lau Le̱ꞌ.
5 Laweꞌ da bzriꞌine̱ꞌ dxiꞌu,
be̱ne̱ꞌ chee̱dxu gate nate siꞌ lu ne̱ꞌe̱ dxiꞌu ca bi cheé̱queze̱ꞌ ne̱ chee̱ Jesucristo,
cáte̱ze da guca lazre̱ꞌ gune̱ꞌ.
6 Chee̱ le̱ naꞌ,
tu dxue láꞌanazquezdxu Dios ne̱ chee̱ xel-la xrlátaje chee̱ꞌ da naca na szrente̱.
Lu xel-la xrlátaje chee̱ꞌ naꞌ gúcale̱ne̱ꞌ dxiꞌu laweꞌ da nácadxu tuze nen Zríꞌine̱ꞌ,
bi nazriꞌite̱ lazre̱ꞌ.
7 Ne̱ chee̱ Zríꞌine̱ꞌ naꞌ naxáꞌawene̱ꞌ dxiꞌu nen dxen cheé̱queze̱ꞌ,
naꞌ lu xel-la zriꞌi lazreꞌ zren chee̱ꞌ bnite lawe̱ꞌ chee̱dxu dxiꞌu ca naca dul-la da nabágadxu.
8 Dios nazríꞌile̱ꞌe̱ne̱ꞌ dxiꞌu,
ne dxunne̱ꞌ dxiꞌu xel-la sina,
ne xel-la dxéajniꞌi,
9 naꞌ bzéajniꞌine̱ꞌ dxiꞌu ca naca da dxaca lazre̱ꞌ da bgache na,
da naꞌ lu xel-la zriꞌi lazreꞌ chee̱ꞌ ba núnqueze̱ꞌ gune̱ꞌ ne̱ chee̱ Cristo.
10 Nuchague̱ꞌ xúgute̱ da zaj zua na xabáa,
ne xe̱zr la xu,
chee̱ xelúꞌu na lu naꞌ Cristo,
da gusexúzre̱ꞌ gune̱ꞌ gate zrin zra chee̱ na.
11 Ne̱ chee̱ Cristo Dios guqué̱ꞌe̱ dxiꞌu chee̱ꞌ gate nate,
chee̱ siꞌ lu nnadxu da xáladxu da gunna Le̱ꞌ,
ca da ba núnqueze Dios,
Bénneaꞌ dxune̱ꞌ xúgute̱ da dxeque Le̱ꞌ xrlátaje.
12 Caní be̱ne̱ꞌ chee̱ gácadxu tu da gucáꞌana szren na xel-la szren chee̱ꞌ,
nácadxu dxiꞌu benneꞌ nedxu dxebeza lázredxu Cristo.
13 Cáꞌanqueze leꞌe,
gate benle dizraꞌ li,
da naca na dizraꞌ chaweꞌ chee̱ da be̱n Cristo,
bselé̱ꞌ leꞌe.
Guxeajlí lázrele Le̱ꞌ,
naꞌ Dios bzue̱ꞌ Beꞌ Láꞌazxa lu xichaj lázrdaule ca tu da dxunna bea na nácale bi chee̱ꞌ,
ca guche̱be lazre̱ꞌ gune̱ꞌ.
14 Beꞌ Láꞌazxa naꞌ naque̱ꞌ da dxunna bea na sidxu da xáladxu da gunna Dios dxiꞌu,
gate zrin zra da ba nune̱ꞌ guselé̱ꞌ bi chee̱ꞌ caꞌ,
chee̱ güe láꞌanaquezdxu Le̱ꞌ ca naca xel-la szren chee̱ꞌ.
Dxenaba Pablo gunezruj Dios xel-la sina chee̱ bi caꞌ chee̱ Cristo
15 Chee̱ le̱ naꞌ gate bendaꞌ ca dxeajlí lázrele Cristo,
ne ca nazriꞌile xúgute̱ bi caꞌ chee̱ Dios,
16 dxápaquezaꞌ Dios;
Xcalenuꞌ,
ca naca chee̱le leꞌe gate dxuchálajle̱naꞌ Dios,
ne dxeajsá lázrquezaꞌ leꞌe.
17 Dxenabaꞌ Dios chee̱ Xránadxu Jesucristo,
naque̱ꞌ Xradxu zue̱ꞌ xabáa,
gunne̱ꞌ leꞌe xel-la sina lu beꞌ nácaquezle da guléꞌe na leꞌe gúnbea xánnele Le̱ꞌ.
18 Dxenabaꞌ lau Dios guzéajniꞌine̱ xichaj lázrdaule leꞌe chee̱ nézele ca naca da dxebeza lázredxu da bláwizre̱ꞌ dxiꞌu sidxu,
ne ca naca xel-la gunníꞌa chee̱ xel-la szren da gunezruj Dios bi chee̱ caꞌ,
19 ne ca naca xel-la waca zrente̱ chee̱ꞌ da dxun na zrin lu xichaj lázrdaudxu dxiꞌu dxeajlí lázredxu Le̱ꞌ.
Xel-la waca nigá bchine Dios lu dute̱ xel-la dxenná bea zren chee̱ꞌ
20 gate bsebane̱ꞌ Cristo ládujla benneꞌ gate caꞌ,
ne guleche̱ꞌ Le̱ꞌ chaláꞌa xabe̱la chee̱ꞌ xabáa,
21 ne bzue̱ꞌ Le̱ꞌ chee̱ nna béꞌene̱ꞌ xúgute̱ benneꞌ blau xabáa,
ne xúgute̱ benneꞌ dxelenná bea xabáa,
ne xúgute̱ benneꞌ zaj napa xel-la waca,
ne xúgute̱ benneꞌ zaj naca xrane,
ne xúgute̱ da dxelenná bea na lu zra naꞌa zra,
ne lu da za zaꞌ.
22 Bzue̱ꞌ xúgute̱ da zaj zua lu naꞌ Cristo,
ne bzue̱ꞌ Le̱ꞌ gaque̱ꞌ benneꞌ xíchaje̱ chee̱ bi chee̱ caꞌ ca naca xúgute̱ da dxelune̱ꞌ.
23 Benneꞌ caní zaj naque̱ꞌ ca be̱laꞌ dxen chee̱ Cristo,
da dxuléꞌe na dute̱ ca nácaqueze Le̱ꞌ,
Bénneaꞌ dxusexuzre̱ꞌ dxucáꞌana chawe̱ꞌ ca naca xúgute̱ da zaj zua.