Naca bandxu laweꞌ da nazríꞌi Dios dxiꞌu
2
Gate nate gúcale ca benneꞌ gate lu xichaj lázrdaule ne̱ chee̱ da cale̱la caꞌ,
ne dul-la caꞌ
2 da be̱nle gate ne dxunle ca dxelún bénneache zaj zre̱ꞌe xe̱zr la xu nigá,
benneꞌ dxelune̱ꞌ ca dxenná da xriwe̱ꞌ,
beꞌ naꞌ da dxenná bea na lu beꞌ,
ne dxun na zrin lu xichaj lázrdau benneꞌ caꞌ quebe dxuluzúe̱ꞌ dizraꞌ chee̱ Dios.
3 Cáꞌanqueze dxiꞌu,
xúgute̱dxu be̱ndxu caní gate nate,
gate be̱ndxu cáte̱ze da guzá lázredxu,
ne be̱ndxu ca da gunná be̱laꞌ dxen chee̱dxu,
ne ca da gunná xichaj lázrdaudxu.
Chee̱ le̱ naꞌ guca na chee̱dxu sidxu da ziꞌ da xaꞌ chee̱ Dios ca gune̱ꞌ chee̱ xezícadxa benneꞌ caꞌ,
4 san Dios bexache lázrele̱ꞌe̱ dxiꞌu,
ne bzríꞌile̱ꞌe̱ne̱ꞌ dxiꞌu,
5 naꞌ be̱nne̱ꞌ dxiꞌu xel-la nabán tu zren nen Cristo gate ne nátedxu lu xichaj lázrdaudxu ne̱ chee̱ dul-la da nabágadxu.
Naladxu ne̱ chee̱ xel-la xrlátaje chee̱ Dios.
6 Cáꞌanqueze bsebán Dios dxiꞌu tu zren nen Jesucristo,
ne guleche̱ꞌ dxiꞌu tu zren nen Le̱ꞌ xabáa.
7 Be̱ne̱ꞌ caní chee̱ guléꞌene̱ꞌ lu zra da za zaꞌ ca nazríꞌile̱ꞌe̱ne̱ꞌ dxiꞌu,
ne ca naca da cháwele̱ꞌe̱ be̱ne̱ꞌ chee̱dxu ne̱ chee̱ Jesucristo.
8 Lu xel-la xrlátaje chee̱ Dios bselé̱ꞌ leꞌe laweꞌ da guxeajlí lázrele Cristo.
Quebe naca na ne̱ chee̱ bi da be̱nle leꞌe,
san naca na tu da be̱n Dios cáꞌaze ne̱ chee̱le.
9 Quebe nalá nu benneꞌ ne̱ chee̱ bi da dxúnqueze̱ꞌ,
chee̱ quebe nu benneꞌ gucáꞌana szren cuine̱ꞌ.
10 Dios be̱ne̱ꞌ dxiꞌu,
naꞌ bexune̱ꞌ dxiꞌu tuze nen Jesucristo chee̱ gundxu da xrlátaje caꞌ da ba nun Le̱ꞌ gundxu gate nate.
Nácadxu tuze ne̱ chee̱ Cristo
11 Le gusá lázrele ca gúcale leꞌe gate nate.
Quebe nácale benneꞌ judío,
benneꞌ caꞌ dxelechugue̱ꞌ lu be̱l-laꞌ dxen chee̱ꞌ da naꞌ dxuléꞌe na zaj nababe̱ꞌ chee̱ Dios,
ne zaj nazí le̱ꞌ benneꞌ zaj nadxugu,
naꞌ dxelenné̱ꞌ chee̱le nácale benneꞌ quebe zaj nadxugu.
12 Lu zra caꞌ quebe guzúale̱ Cristo leꞌe.
Quebe be̱nle tuze benneꞌ Israel caꞌ,
ne quebe bé̱nbeale ca naca xel-la wezría da be̱n Dios,
ne ca naca da guche̱be lazreꞌ Dios.
Guzúale lu xe̱zr la xu nigá,
ne quebe bi guleza lázrele,
ne quebe bé̱nbeale Dios.
Gate nate guzrale zítuꞌla naga zua Dios.
13 Naꞌa ne̱ chee̱ Cristo Dios ba bzue̱ꞌ leꞌe gágute̱ laweꞌ da gute Cristo waláz chee̱le.
14 Lé̱queze Cristo be̱nne̱ꞌ dxiꞌu xel-la dxebeza zri lazreꞌ,
ne bexune̱ꞌ dxiꞌu tuze,
netuꞌ,
benneꞌ judío caꞌ,
ne leꞌe,
benneꞌ quebe zaj naque̱ꞌ judío,
ne bzria xiꞌe̱ xel-la dxezráꞌa da be̱n na dxiꞌu chupa laꞌa,
da guca na ca tu zeꞌe.
15 Gate gute Jesús waláz chee̱dxu guchugue̱ꞌ da nadxixruj bea na da naca na da gunná Dios gundxu,
ne da caꞌ dxelenná bea na,
naꞌ bexune̱ꞌ dxúpate̱ xe̱zre caꞌ tuze xe̱zre cube da nababa na chee̱ꞌ.
Caní gudíxruje̱ꞌ xel-la dxebeza zri lazreꞌ chee̱dxu.
16 Caní guca ne̱ chee̱ xel-la gute chee̱ Cristo le̱ꞌe̱ xaga béguaj,
guchugue̱ꞌ naze xel-la dxezráꞌa ljwezre chee̱ dxúpate̱ xe̱zr caꞌ,
naꞌ bexune̱ꞌ dxúpate̱ tuze be̱l-laꞌ dxen,
ne bexune̱ꞌ le̱ꞌ tuze nen Dios.
17 Blaꞌ Cristo,
ne bzenne̱ꞌ leꞌe dizraꞌ chaweꞌ chee̱ꞌ,
leꞌe quebe nácale judío,
naꞌ guzrale zituꞌ naga zua Dios,
ne leꞌe nácale judío,
naꞌ guzrale gagu naga zua Dios,
18 naꞌ ne̱ chee̱ Cristo,
xúgute̱dxu,
benneꞌ judío caꞌ,
ne benneꞌ quebe zaj naque̱ꞌ judío,
dxebígadxu lau Xradxu Dios ne̱ chee̱ Beꞌ Láꞌazxa.
19 Chee̱ le̱ naꞌ leꞌe,
benneꞌ quebe nácale judío,
québedxa nácale ca benneꞌ zituꞌ tu lu xe̱zr la xu da quebe naca na chee̱le,
san nácale benneꞌ walazreꞌ ca xúgute̱ benneꞌ caꞌ zaj nababa chee̱ Dios.
Nabábale Zriꞌine Dios.
20 Nácale ca tu xuꞌu zren da zria na laweꞌ lane da gulixruj benneꞌ gubáz caꞌ chee̱ Cristo,
ne benneꞌ caꞌ buluchálaje̱ꞌ waláz chee̱ Dios,
naꞌ Jesucristo nácaqueze̱ꞌ xiaj blau chee̱ lane xuꞌu naꞌ.
21 Laweꞌ lane nigá da naca Cristo,
dute̱ xuꞌu naꞌ dxegula na tu li chee̱ gaca na tu xudauꞌ láꞌazxa chee̱ Xránadxu.
22 Cáꞌanqueze leꞌe,
laweꞌ da nácale Cristo tuze,
xuꞌule lu xuꞌu naꞌ naga zua Dios ne̱ chee̱ Beꞌ Láꞌazxa chee̱ꞌ.