Pablo dxuzenne̱ꞌ benneꞌ quebe zaj naque̱ꞌ judío dizraꞌ chaweꞌ
3
Chee̱ le̱ naꞌ nedaꞌ,
Pablo,
dxuzú zribaꞌ lau Dios.
Xuꞌa lizre xia laweꞌ da dxunaꞌ zrin chee̱ Jesucristo chee̱ gaca chaweꞌ chee̱le leꞌe,
quebe nácale judío.
2 Ba nézele ca be̱n Dios lu xel-la xrlátaje chee̱ꞌ,
bsebague̱ꞌ nedaꞌ guchálajaꞌ dizraꞌ chaweꞌ chee̱ Cristo ládujla leꞌe.
3 Lu da bleꞌe Dios nedaꞌ bzéajniꞌine̱ꞌ nedaꞌ tu da nagache chee̱ꞌ ca da bzuajaꞌ chee̱le nedxu.
4 Gate gulábale na weque béꞌequezle núnbeꞌa da nagache ca naca chee̱ Cristo.
5 Guca na tu da nagache gate nate.
Dios quebe bzéajniꞌine̱ꞌ na bénneache,
san naꞌa ne̱ chee̱ Beꞌ Láꞌazxa chee̱ꞌ ba bléꞌene̱ꞌ na benneꞌ gubáz láꞌazxa caꞌ,
naꞌ benneꞌ caꞌ dxuluchálaje̱ꞌ waláz chee̱ꞌ.
6 Caní naca da nagache naꞌ:
Ne̱ chee̱ dizraꞌ chaweꞌ chee̱ Cristo benneꞌ quebe zaj naque̱ꞌ judío welezíꞌqueze̱ꞌ da gunezruj Dios le̱ꞌ ca da xelezíꞌ benneꞌ judío caꞌ,
ne zaj naque̱ꞌ tuze be̱l-laꞌ dxen,
ne xelezíꞌqueze̱ꞌ tu zren da nache̱be lazreꞌ Dios ne̱ chee̱ Jesucristo.
7 Dios be̱ne̱ꞌ nedaꞌ we̱n zrin chee̱ dizraꞌ chaweꞌ naꞌ ne̱ chee̱ tu da bé̱nnaze̱ꞌ nedaꞌ,
bchínene̱ꞌ xel-la waca zren chee̱ꞌ.
8 Nedaꞌ nácadxaꞌ benneꞌ baxáche ca xúgute̱ benneꞌ zaj naca bi chee̱ Dios.
Be̱ne̱ꞌ nedaꞌ tu culuén zren chee̱ guzendaꞌ benneꞌ quebe zaj naque̱ꞌ judío dizraꞌ chaweꞌ ca naca xel-la gunníꞌa zrente̱ chee̱ Cristo.
9 Bsebague̱ꞌ nedaꞌ guzéajniꞌidaꞌ xúgute̱ bénneache ca da nun Dios gune̱ꞌ da bgache gate nate,
naꞌ naca Dios Bénneaꞌ be̱ne̱ꞌ xúgute̱ da zaj zua,
10 chee̱ xelúnbea naꞌa benneꞌ dxelenná beꞌe̱,
ne zaj nape̱ꞌ xel-la szren xabáa ca naca xel-la sina zrente̱ chee̱ Dios.
Xelúnbeꞌe̱ na ne̱ chee̱ benneꞌ caꞌ zaj naca bi chee̱ Cristo.
11 Da nigá be̱n Dios ca da nune̱ꞌ gate nate gusexuzre̱ꞌ ne̱ chee̱ Xránadxu Jesucristo.
12 Ne̱ chee̱ Cristo waca bígadxu lau Dios du lázredxu,
ne dute̱ xel-la dxuxrén lazreꞌ chee̱dxu laweꞌ da dxeajlí lázredxu Le̱ꞌ.
13 Chee̱ le̱ naꞌ dxataꞌ xúedaꞌ leꞌe quebe gate niꞌa naꞌle laweꞌ da dxedéaꞌ xel-la ziꞌ ne̱ chee̱le leꞌe.
Xel-la ziꞌ da dxedéaꞌ nedaꞌ gaca na chee̱le tu da ba neza.
Xel-la zriꞌi lazreꞌ chee̱ Cristo
14 Chee̱ le̱ naꞌ dxuzú zribaꞌ lau Xra Xránadxu Jesucristo,
15 Bénneaꞌ dxuzúe̱ꞌ la cha chee̱ benneꞌ zaj zre̱ꞌe̱ xabáa,
ne xe̱zr la xu.
16 Dxenabaꞌ lau Xradxu,
ca naca xel-la gunníꞌa zrente̱ chee̱ꞌ guzé̱ tipe̱ꞌ leꞌe nen xel-la waca chee̱ꞌ lu xichaj lázrdaule ne̱ chee̱ Beꞌ Láꞌazxa chee̱ꞌ,
17 chee̱ sua Cristo lázrdaule ne̱ chee̱ xel-la dxeajlí lazreꞌ chee̱le,
ne se̱ cháchale lu xel-la zriꞌi lazreꞌ,
ca tu xaga da nudé lue na sítujla,
18 chee̱ sequeꞌ chéajniꞌile tu zren nen xúgute̱ bi chee̱ꞌ ca nazriluj,
ne ca natunna,
ne ca nasituj,
ne ca nasibe xel-la zriꞌi lazreꞌ chee̱ Cristo.
19 Dxenabaꞌ lau Dios gúnbeale xel-la zriꞌi lazreꞌ naꞌ,
lácala cabataꞌ séquedxu gúnbeadxu dute̱ ca naca na.
Caní dxenabaꞌ Le̱ꞌ chee̱ suale̱ leꞌe dute̱ da nácaqueze Dios.
20 Naꞌa,
gaca báqueze Dios,
Bénneaꞌ nape̱ꞌ xel-la waca gúnle̱ꞌe̱queze̱ꞌ da zrendxa ca da dxenábadxu,
u ca da dxéquedxu,
ne̱ chee̱ xel-la waca chee̱ꞌ da dxun na zrin lu xichaj lázrdaudxu.
21 Gaca ba Dios ládujla benneꞌ zaj naque̱ꞌ bi chee̱ Cristo ne̱ chee̱ Jesucristo xúgute̱ iza chadía chacanna.
¡Caꞌan gaca na!