DIZRAꞌ BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ XE̱ZRE FILIPOS
Pablo dxugape̱ꞌ diuzre bi bíchedxu caꞌ zaj zre̱ꞌe̱ xe̱zre Filipos
1
Nedaꞌ Pablo,
ne Timoteo nácantuꞌ we̱n zrin chee̱ Jesucristo.
Dxuzúajaꞌ da nigá chee̱le leꞌe,
bi bíchentuꞌ,
ne chee̱le leꞌe,
dxuxúele bi chee̱ Cristo,
ne leꞌe,
zaj xuꞌu lu naꞌle bi chee̱ Cristo,
ne zrale xe̱zre Filipos.
Nabábale chee̱ Dios,
ne nácale tuze nen Jesucristo.
2 Dxenábantuꞌ lau Xradxu Dios,
ne lau Xránadxu Jesucristo gune̱ꞌ chee̱le da xrlátaje,
ne gunne̱ꞌ leꞌe xel-la dxebeza zri lazreꞌ.
Da dxenaba Pablo gun Dios chee̱ bi caꞌ chee̱ Cristo
3 Tu tu lasa dxajsá lazraꞌ leꞌe dxapaꞌ Dios chiaꞌ:
Xcalenuꞌ.
4 Gate dxuchálajle̱naꞌ Dios,
dute̱ xel-la dxebé dxenábaquezaꞌ bi gun Le̱ꞌ chee̱ xúgute̱le leꞌe.
5 Caní dxunaꞌ laweꞌ da dxundxu zrin tu zren chee̱ dizraꞌ chaweꞌ chee̱ Cristo gate guzú lau núnbe̱ꞌtuꞌ na bzrinte̱ lu zra naꞌa zra.
6 Dxuxrén lazraꞌ Dios,
Bénneaꞌ guzú lawe̱ꞌ dxune̱ꞌ tu zrin chaweꞌ lu xichaj lázrdaule leꞌe,
gúnqueze̱ꞌ na ca zrinte̱ zra xeláꞌ Jesucristo.
7 Naca xrlátaje dxéquedaꞌ nedaꞌ caní chee̱ xúgute̱le leꞌe,
laweꞌ da nazríꞌile̱ꞌe̱daꞌ leꞌe,
ne dxezidxu tu zren da chaweꞌ caꞌ dxunna Dios dxiꞌu.
Dxácate̱ ne xuꞌa lizre xia nigá,
ne gate naꞌ gudíl-lale̱naꞌ bénneache caꞌ dizraꞌ,
benneꞌ caꞌ guledábague̱ꞌ dizraꞌ chaweꞌ chee̱ Cristo,
ba bleꞌedaꞌ benneꞌ caꞌ naca na da li.
8 Dios nézquezene̱ꞌ nazríꞌile̱ꞌe̱daꞌ leꞌe,
lu dute̱ xel-la zriꞌi lazreꞌ da dxunna Jesucristo nedaꞌ.
9 Dxenabaꞌ lau Dios gune̱ꞌ zríꞌidxa ljwézrele,
ne gápale̱ꞌe̱quezle xel-la sina,
ne xel-la dxéajniꞌi lu xúgute̱ da dxunle,
10 chee̱ nézele cuele da cháwedxa,
chee̱ gácale du lazreꞌ,
ne quebe bi gataꞌ da gagu na zria chee̱le lu zra naꞌ xeláꞌ Cristo.
11 Caní gaca,
da caꞌ dxunle xululéꞌe na da xrlátaje da dxun Jesucristo lu xichaj lázrdaule,
chee̱ gaca ba láꞌana Dios,
ne xegáꞌana szrénqueze̱ꞌ.
Dxenná Pablo: Che naca banaꞌ, Cristo dxuchínene̱ꞌ nedaꞌ
12 Leꞌe,
bi bíchaꞌdauꞌ,
dxaca lazraꞌ nézele ca da caꞌ guzracaꞌ gulácale̱ na nedaꞌ chee̱ bchálajaꞌ dizraꞌ chaweꞌ chee̱ Cristo.
13 Caní guca,
xúgute̱ benneꞌ xraꞌaga xuꞌu laweꞌ,
ne xezícadxa benneꞌ caꞌ zaj zre̱ꞌe̱ xuꞌu laweꞌ naꞌ zaj nézene̱ꞌ xuꞌa lizre xia laweꞌ da dxunaꞌ zrin chee̱ Cristo.
14 Laweꞌ da xuꞌa nedaꞌ lizre xia nigá,
chaze xúgute̱ bi bíchedxu caꞌ dxuluxrén lázredxe̱ꞌ Xránadxu,
naꞌ dxuluchálaje̱ꞌ du lazre̱ꞌ dizraꞌ chee̱ Dios,
ne quebe dxelezrebe̱ꞌ.
15 Da li bal-la benneꞌ caꞌ dxuluchálaje̱ꞌ ca naca chee̱ Cristo laweꞌ da zaj naque̱ꞌ zreꞌe lazreꞌ,
ne zaj naque̱ꞌ wil-la dizraꞌ.
Xezícadxa benneꞌ caní dxuluchálaje̱ꞌ na dute̱ xel-la li lazreꞌ chee̱ꞌ.
16 Benneꞌ nedxu caꞌ dxuluchálaje̱ꞌ da naca chee̱ Cristo chee̱ xulucáꞌana szren cuine̱ꞌ,
ne quegá du lazre̱ꞌ,
laweꞌ da dxelaca lazre̱ꞌ súadxa da guzúa na nedaꞌ ste̱be dxácate̱ xuꞌa lizre xia nigá.
17 Xezícadxa benneꞌ caꞌ dxelune̱ꞌ na dute̱ xel-la zriꞌi lazreꞌ chee̱ꞌ,
laweꞌ da zaj nézene̱ꞌ nuzúa cuinaꞌ guzéajniꞌidaꞌ benneꞌ caꞌ dxeledábague̱ꞌ dizraꞌ chaweꞌ chee̱ Cristo.
18 ¿Bizra xcaꞌ?
Ájate̱zla dxelune̱ꞌ,
che dxuluchálaje̱ꞌ du lazre̱ꞌ,
u quebe dxuluchálaje̱ꞌ du lazre̱ꞌ,
dxuluchálaje̱ꞌ chee̱ Cristo,
naꞌ dxebedaꞌ,
ne wabéquezdaꞌ
19 laweꞌ da nezdaꞌ lu xúgute̱ da caní wedxúaj na chaweꞌ chiaꞌ nedaꞌ,
laweꞌ da dxenábale leꞌe lau Dios chiaꞌ nedaꞌ,
naꞌ gácale̱ Beꞌ Láꞌazxa nedaꞌ,
Bénneaꞌ gusel-le̱ꞌ Jesucristo chee̱dxu.
20 Dxaca lazraꞌ,
ne dxuxrén lazraꞌ quebe xeduéꞌedaꞌ nedaꞌ,
séquedaꞌ guchálajaꞌ du lazraꞌ chee̱ xeleléꞌe bénneache zúale̱dxa xel-la szren chee̱ Cristo nedaꞌ naꞌa,
ca zúale̱queze na nedaꞌ,
che gaca banaꞌ,
u che gatiaꞌ.
21 Chiaꞌ nedaꞌ,
che naca banaꞌ,
Cristo dxuchínene̱ꞌ nedaꞌ,
ne che gatiaꞌ wazrueꞌedaꞌ da cháwedxa.
22 Che xedxúaj na chaweꞌ chee̱ zrin chee̱ Xránadxu che naca banaꞌ,
quebe nezdaꞌ bila na caꞌa.
23 Naca na ste̱be chiaꞌ nedaꞌ bila da caní caꞌa.
Dxaca lazraꞌ gatiaꞌ chee̱ cheajsúale̱naꞌ Cristo,
da gácadxa chaweꞌ chiaꞌ nedaꞌ,
24 san che naca banaꞌ nácadxa chaweꞌ chee̱le leꞌe.
25 Laweꞌ da nuxrén lazraꞌ naca caní,
nezdaꞌ wazúale̱dxaꞌ leꞌe chee̱ se̱ cháchadxale lu da naca chee̱ Cristo,
ne chee̱ béquezdxale.
26 Chee̱ le̱ naꞌ bédxale lu da naca chee̱ Cristo ne̱ chiaꞌ nedaꞌ gate súale̱naꞌ leꞌe.
27 Dxun na ba xen gunle da dxuzéajniꞌi dizraꞌ chaweꞌ chee̱ Cristo leꞌe,
naꞌ che xedajnnáꞌa leꞌe,
u che suaꞌ zituꞌ,
wendaꞌ ze̱ cháchale,
ne nácale tuze,
dxunle tu zren zrin chee̱ Cristo chee̱ xeleajlí lazreꞌ bénneache dizraꞌ chaweꞌ chee̱ꞌ.
28 Quebe zrébele benneꞌ caꞌ dxeledábague̱ꞌ leꞌe.
Ca dxunle guléꞌe na le̱ꞌ xelebía xiꞌe̱,
naꞌ nalale leꞌe laweꞌ da bselá Dios leꞌe.
29 Tu da zrente̱ naca da dxunna Dios leꞌe gate gunle zrin chee̱ Cristo,
quegaze chéajle̱le chee̱ꞌ,
naꞌ cáꞌanqueze che tele xel-la ziꞌ ne̱ chee̱ Le̱ꞌ.
30 Leꞌe dxunle nedaꞌ tu zren dxedíl-lale̱dxu da zaj naca da cale̱la.
Bléꞌequezle gate nate ca gudíl-lale̱naꞌ na,
naꞌ naꞌa dxenle ca dxedíl-lale̱naꞌ na.