Xel-la dxexruj lazreꞌ, ne xel-la szren chee̱ Cristo
2
Cristo dxutipe̱ꞌ lázrele,
naꞌ xel-la zriꞌi lazreꞌ chee̱ꞌ dxuzúa na leꞌe lu da ba neza,
naꞌ Beꞌ Láꞌazxa chee̱ꞌ zúale̱ne̱ꞌ leꞌe,
naꞌ nápale xel-la zriꞌi lazreꞌ,
ne xel-la dxexache lazreꞌ chee̱ꞌ.
2 Chee̱ le̱ naꞌ le gun ga béle̱ꞌe̱daꞌ,
gaca tuze ca da dxéquele,
ne gácale tuze lu xel-la zriꞌi lazreꞌ chee̱le,
ne gunle tuze lu xichaj lázrdaule.
3 Quebe bi gunle chee̱ xulucáꞌana szren bénneache leꞌe,
ne chee̱ gaca gucáꞌana szren cuínale,
san dute̱ xel-la dxexruj lazreꞌ chee̱le dxal-laꞌ guéquele nácadxa blau le saꞌ ljwézrele ca leꞌe.
4 Netule leꞌe quebe dxal-laꞌ gunle ca da gácale̱n leꞌeze.
Le gun da gácale̱n na xezícadxa bénneache.
5 Dxal-laꞌ siꞌ lu naꞌle da gaca na chee̱le ca be̱n Jesucristo.
6 Lácala naque̱ꞌ ca nácaqueze Dios,
quebe gúquene̱ꞌ dxal-laꞌ gune̱ꞌ ba xuzre xegáꞌanaqueze̱ꞌ ca Dios.
7 Bzue̱ꞌ chaláꞌala da nápaqueze̱ꞌ,
ne be̱n cuine̱ꞌ ca tu benneꞌ nadaꞌu,
guque̱ꞌ bénneache.
8 Gate ba naque̱ꞌ bénneache,
guque̱ꞌ dxexruj lazreꞌ,
naꞌ bzue̱ꞌ dizraꞌ chee̱ Dios ca bzrinte̱ gutie̱ꞌ,
lácala gutie̱ꞌ ca tu benneꞌ we̱n da cale̱la le̱ꞌe̱ xaga béguaj.
9 Chee̱ le̱ naꞌ Dios bcaꞌana szrénle̱ꞌe̱ Le̱ꞌ,
ne bzue̱ꞌ tu Le̱ꞌ da naca szrendxa ca xúgute̱ la xezícadxa,
10 chee̱ gate xelenne̱ꞌ La Jesús,
naꞌ xuluzú zribe lau Le̱ꞌ xúgute̱ benneꞌ zaj zre̱ꞌe̱ xabáa,
ne xe̱zr la xu nigá,
ne zran xe̱zr la xu nigá,
11 ne chee̱ xelexeche̱be xúgute̱ꞌ naca Jesucristo Xránadxu,
chee̱ gaca ba láꞌana Xradxu Dios.
Bi chee̱ Cristo zaj nácabeꞌ ca xiꞌ da dxulusení na
12 Chee̱ le̱ naꞌ,
leꞌe,
bi bichaꞌ nazriꞌite̱ lazraꞌ,
ca naꞌ be̱nle leꞌe,
bzúaquezle dizraꞌ chee̱ Dios gate naꞌ zúale̱naꞌ leꞌe,
le guzúadxa dizraꞌ chee̱ Dios naꞌa gate zuaꞌ zituꞌ.
Dute̱ xel-la dxexruj lazreꞌ,
ne dute̱ xel-la dxezrebe le gun zrin chee̱ zruéꞌele dute̱ ca naca xel-la weselá chee̱le,
13 laweꞌ da dxun Dios zrin lu xichaj lázrdaule chee̱ sa lázrele gunle da xrlátaje da dxaca lazreꞌ Le̱ꞌ,
ne chee̱ séquele gunle na.
14 Le gun xúgute̱ da dxunle,
ne quebe gáchajele,
ne quebe gutil-la dizraꞌ ljwézrele
15 chee̱ gácale li lazreꞌ,
ne quebe nu nne̱ chee̱le.
Gácale bi chee̱ Dios du lazreꞌ ládujla bénneache zaj naque̱ꞌ benneꞌ dxelún da cale̱la,
ne gácale ca belaj caꞌ dxulusení na lu xe̱zr la xu naga nachul-la na,
16 ne guchálajle̱le benneꞌ caꞌ dizraꞌ da nua na xel-la nabán.
Che gunle caní,
nedaꞌ wezaca ba lazraꞌ chee̱le gate xeláꞌ Cristo,
laweꞌ da wanezdaꞌ quebe be̱n ziꞌ lazraꞌ dácheze,
ne quebe be̱naꞌ zrin níteze.
17 Béle̱ꞌe̱daꞌ lácala gun na ba xen gatiaꞌ chee̱ gaca li lazreꞌ xel-la dxeajlí lazreꞌ chee̱le lau Dios.
Bzua cuínale lu naꞌ Dios ca tu gunaꞌ da gúnnale chee̱ꞌ,
naꞌ chee̱ le̱ naꞌ béle̱ꞌe̱quezdaꞌ tu zren nen xúgute̱le leꞌe.
18 Le béquezle leꞌe,
ne le gun tuze nedaꞌ lu xel-la dxebé chiaꞌ.
Ca naca chee̱ Timoteo, ne Epafrodito
19 Che naca da dxaca lazreꞌ Xránadxu Jesús,
dxebeza lazraꞌ sél-laze̱quezaꞌ Timoteo xedajnnáꞌabeꞌ leꞌe,
chee̱ bedaꞌ gate xelabeꞌ,
ne guzenbeꞌ nedaꞌ chee̱le leꞌe.
20 Quebe nu chiláꞌ xetú benneꞌ guéquene̱ꞌ chee̱le ca da dxéquedaꞌ nedaꞌ.
Tuze Timoteo dxeꞌebeꞌ gunne xue chee̱ gaca chaweꞌ chee̱le leꞌe.
21 Xúgute̱ benneꞌ caꞌ xezícala zaj dxeꞌe̱ gunne xue da zaj naca chee̱ze̱ꞌ,
ne quebe zaj dxeꞌe̱ gunne xue da naca chee̱ Jesucristo.
22 Leꞌe nézquezle ca da xrlátaje dxun Timoteo,
ne ca be̱nbeꞌ zrin tu zren nen nedaꞌ.
Dxuchálajntuꞌ dizraꞌ chaweꞌ chee̱ Cristo,
naꞌ dxunbeꞌ ca dxun tu bi dxácale̱beꞌ xrabeꞌ.
23 Caní naca,
dxebeza lazraꞌ sel-laꞌ-beꞌ gate nezdaꞌ ca gaca chiaꞌ.
24 Dxuxrén lazraꞌ Xránadxu,
nédaꞌquezaꞌ xidaꞌ xedajnnáꞌa leꞌe.
25 Cáꞌanqueze dxéquedaꞌ dxun na ba xen sel-laꞌ Epafrodito,
bi bíchedxu.
Dxunbeꞌ zrin tu zren nen nedaꞌ,
dxedíl-lale̱ntuꞌ da cale̱la.
Léꞌequezle gusél-lale bi nigá chee̱ gácale̱nbeꞌ nedaꞌ,
ne xuꞌa lizre xia nigá.
26 Dxezá lázrele̱ꞌe̱beꞌ xedajnnaꞌabeꞌ leꞌe,
ne zúale̱ꞌe̱beꞌ ste̱be laweꞌ da nézebeꞌ bénele quebe chaweꞌ guzúabeꞌ.
27 Da li quebe chaweꞌ guzúabeꞌ,
ne bache gátebeꞌ,
san Dios bexache lazre̱ꞌ le̱beꞌ,
ne quegá tuze le̱beꞌ,
cáꞌanqueze nedaꞌ chee̱ quebe xewine lázredxaꞌ ca da dxaca chiaꞌ naꞌa.
28 Chee̱ le̱ naꞌ dxezá lázredxaꞌ sel-laꞌ le̱beꞌ chee̱ bele leꞌe gate xeléꞌele le̱beꞌ,
ne chee̱ québedxa xewine lazraꞌ nedaꞌ.
29 Le xezíꞌ lu naꞌle le̱beꞌ dute̱ xel-la dxebé,
ca bi bíchele lu da naca chee̱ Xránadxu,
ne le gápaqueze ba láꞌana benneꞌ caꞌ zaj naque̱ꞌ ca le̱beꞌ,
30 laweꞌ da guzúa gátebeꞌ dxunbeꞌ zrin chee̱ Cristo.
Bzuabeꞌ lu da ste̱be xel-la nabán chee̱beꞌ chee̱ gunbeꞌ zrin chiaꞌ da quebe guzéquele leꞌe gunle.