DIZRAꞌ BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ XE̱ZRE COLOSAS
Pablo dxugape̱ꞌ diuzre bi bíchedxu zaj zre̱ꞌe̱ xe̱zre Colosas
1
Nedaꞌ,
Pablo,
nacaꞌ gubáz chee̱ Jesucristo laweꞌ da naca da dxaca lazre Dios,
naꞌ zúale̱ bi bíchedxu Timoteo nedaꞌ.
2 Dxuzúajaꞌ da nigá chee̱le leꞌe zrale xe̱zre Colosas,
ne nabábale chee̱ Dios,
ne dxeajlí lázrele Cristo.
Dxenabaꞌ Xradxu Dios gune̱ꞌ da chaweꞌ chee̱le leꞌe,
ne gunne̱ꞌ leꞌe xel-la dxebeza zri lazreꞌ.
Da dxenaba Pablo lau Dios chee̱ bi bíchedxu caꞌ
3 Dxé̱quezentuꞌ Dios,
Xra Xránadxu Jesucristo:
Xcalenuꞌ ca naca chee̱le gate dxuchálajle̱ntuꞌ Le̱ꞌ.
4 Ba bénentuꞌ ca dxeajlí lázrele Cristo,
ne ca nazriꞌile xúgute̱ bi caꞌ chee̱ Dios.
5 Caní dxunle laweꞌ da dxebeza lázrele da nucueza Dios chee̱le xabáa,
naꞌ guzú laule dxunle ca naca da nigá gate guzile dizraꞌ chaweꞌ da naca na da li.
6 Dizraꞌ chaweꞌ nigá bla na ládujla leꞌe ca bla na dute̱ xe̱zr la xu nigá,
naꞌ dxezriluj na,
ne dxun na zrin dute̱ xe̱zr la xu ca dxun na ládujla leꞌe,
gate bénte̱le ca nazríꞌi Dios bénneache,
ne gunézele naca na da li.
7 Da nigá bleꞌe Epafras leꞌe.
Naque̱ꞌ bi bíchedxu nazríꞌi lázredxu,
ne ba bé̱nqueze̱ꞌ zrin nen netuꞌ,
ne naque̱ꞌ chee̱le leꞌe tu benneꞌ we̱n zrin li lazreꞌ chee̱ Cristo.
8 Epafras nigá bzenne̱ꞌ netuꞌ ca dxaca chee̱le leꞌe,
ne ca nazríꞌi ljwézrele ne̱ chee̱ Beꞌ Láꞌazxa.
9 Chee̱ le̱ naꞌ,
zra gunézentuꞌ da nigá,
dxuchálajle̱quezentuꞌ Dios chee̱le leꞌe,
ne dxenábantuꞌ Le̱ꞌ guzéajniꞌine̱ꞌ leꞌe ca naca da dxaca lazre̱ꞌ,
ne gunne̱ꞌ leꞌe dute̱ xel-la sina,
ne dute̱ xel-la dxéajniꞌi da dxunna Beꞌ Láꞌazxa dxiꞌu.
10 Caní dxenábantuꞌ Le̱ꞌ chee̱ gaca gunle ca dxal-laꞌ xelún bi caꞌ chee̱ Xránadxu,
ne gunle ca da dxezaca ba lazreꞌ Le̱ꞌ,
gunle xúgute̱ da naca da xrlátaje,
ne gúnbeadxaquezle Dios.
11 Dxenábantuꞌ Le̱ꞌ guzúa chache̱ꞌ leꞌe lu xel-la waca da naca chee̱ xel-la szren chee̱ꞌ chee̱ séquele guchaga laule xúgute̱ da dxaca chee̱le lu dute̱ xel-la zren lazreꞌ chee̱le,
ne dute̱ xel-la dxebé.
12 Dxal-laꞌ xe̱le Dios:
Xcalenuꞌ,
laweꞌ da bzua Dios dxiꞌu chee̱ sidxu da nucueze̱ꞌ chee̱dxu,
chee̱ súadxu lu xel-la naxaníꞌ chee̱ꞌ,
laweꞌ da nácadxu bi chee̱ Le̱ꞌ.
13 Dios bselé̱ꞌ dxiꞌu lu xel-la dxenná bea chee̱ da chul-la,
naꞌ bzue̱ꞌ dxiꞌu naga dxenná bea Zríꞌine̱ꞌ nazriꞌite̱ lazre̱ꞌ.
14 Zríꞌine̱ꞌ nácaqueze̱ꞌ Bénneaꞌ bselé̱ꞌ dxiꞌu gate gutie̱ꞌ waláz chee̱dxu,
chee̱ bnite lau Dios dul-la gubágadxu.
Bexácadxu tuze nen Dios laweꞌ da gute Cristo
15 Ca naca Jesús,
dxuléꞌe na dxiꞌu ca nácaqueze Dios,
Bénneaꞌ quebe gaca léꞌedxu,
ne naque̱ꞌ chee̱ Dios ca tu bi nedxu chee̱ bénneache,
bi nácadxabeꞌ blau ca xúgute̱ da be̱n Dios.
16 Ne̱ chee̱ Le̱ꞌ be̱n Dios xúgute̱ da zaj zua xabáa,
ne da zaj zua xe̱zr la xu nigá,
da caꞌ dxeléꞌedxu,
ne da caꞌ quebe gaca léꞌedxu,
che zaj naca na beꞌ caꞌ zaj naca na blau,
u beꞌ caꞌ dxelenná bea na,
u beꞌ caꞌ zaj napa na xel-la szren,
u beꞌ caꞌ zaj napa na xel-la waca,
xúgute̱ na be̱n Dios ne̱ chee̱ Le̱ꞌ,
naꞌ chee̱ Le̱ꞌ zaj naca na.
17 Cristo ba zúaqueze̱ꞌ nédxute̱ ca xúgute̱ da zaj zua,
naꞌ ne̱ chee̱ Le̱ꞌ xúgute̱ da caꞌ dxelún na ca zaj naca chee̱ na.
18 Xúgute̱ benneꞌ zaj naque̱ꞌ bi chee̱ Cristo zaj naque̱ꞌ ca tuze be̱l-laꞌ dxen,
naꞌ Crístoqueze naque̱ꞌ xichaj be̱l-laꞌ dxen naꞌ da nácadxu.
Le̱ꞌ bzue̱ꞌ be̱l-laꞌ dxen naꞌ,
ne Le̱ꞌ naque̱ꞌ Benneꞌ bebán nédxute̱ ládujla benneꞌ gate caꞌ chee̱ gaque̱ꞌ Benneꞌ blau lu xúgute̱ da zaj zua.
19 Caní naca na laweꞌ da guca lazreꞌ Dios súale̱ Cristo dute̱ da nácaqueze Dios.
20 Cáꞌanqueze guca lazreꞌ Dios ne̱ chee̱ Cristo xexune̱ꞌ tuze nen Le̱ꞌ xúgute̱ da zaj zua,
ca da zaj zua na lu xe̱zr la xu,
ne da zaj zua na xabáa.
Bexune̱ꞌ dxiꞌu tuze nen Le̱ꞌ ne̱ chee̱ xel-la gute chee̱ Cristo le̱ꞌe̱ xaga béguaj.
21 Nédxute̱ leꞌe gúcale ca benneꞌ zituꞌ lau Dios,
ne bzráꞌale Dios lu xichaj lázrdaule,
ne be̱nle xúgute̱ da cale̱la,
san naꞌa Dios ba bexune̱ꞌ leꞌe tuze nen Le̱ꞌ,
22 ne̱ chee̱ da be̱n Cristo gate gutie̱ꞌ le̱ꞌe̱ xaga béguaj lu be̱laꞌ dxen chee̱ꞌ.
Da nigá be̱n Le̱ꞌ chee̱ gaca guzúe̱ꞌ leꞌe lau Le̱ꞌ,
gácale benneꞌ láꞌazxa,
ne du lazreꞌ,
ne quebe bi nabágale da cale̱la.
23 Chee̱ gaca caní dxal-laꞌ se̱ cháchale,
ne sua típale ca dxeajlí lázrele Cristo,
ne quebe gusanle ca da dxebeza lázrele,
da naꞌ nápale laweꞌ da dxéajle̱le dizraꞌ chaweꞌ chee̱ Cristo.
Dizraꞌ chaweꞌ nigá nene na dute̱ xe̱zr la xu,
naꞌ nuzúa Dios nedaꞌ,
Pablo,
benneꞌ we̱n zrin chee̱ꞌ,
chee̱ guchálajaꞌ dizraꞌ chaweꞌ nigá.
Zrin dxun Pablo chee̱ bi caꞌ chee̱ Cristo
24 Naꞌa dxebedaꞌ lu xel-la ziꞌ da dxedéaꞌ ne̱ chee̱le leꞌe,
laweꞌ da dxuzá lawaꞌ lu be̱l-laꞌ dxen chiaꞌ ca da dxezaca Cristo ne̱ chee̱ bi chee̱ꞌ caꞌ,
benneꞌ caꞌ zaj naque̱ꞌ ca be̱l-laꞌ dxen cheé̱queze̱ꞌ.
25 Bzua Cristo nedaꞌ ca benneꞌ we̱n zrin chee̱ bi chee̱ꞌ caꞌ,
ne̱ chee̱ da bláwizra Dios nedaꞌ gunaꞌ,
gácale̱naꞌ leꞌe,
naꞌ guchálajaꞌ dúte̱queze da naca dizraꞌ chee̱ Dios,
26 ne chee̱ guzéajniꞌidaꞌ bénneache ca da nagache,
da naꞌ nagache nédxute̱,
san naꞌa Dios ba bléꞌene̱ꞌ bi chee̱ꞌ caꞌ ca naca na.
27 Guca lazreꞌ Dios guléꞌene̱ꞌ benneꞌ caꞌ ca naca xel-la gunníꞌa zren chee̱ da naꞌ nagache nédxute̱,
da gunézruje̱ꞌ benneꞌ caꞌ quebe zaj naque̱ꞌ judío.
Da naꞌ nagache nédxute̱ naca na caní:
Cristo zue̱ꞌ xichaj lázrdaule,
naꞌ chee̱ le̱ naꞌ dxebeza lázredxu súadxu xabáa chee̱ꞌ.
28 Netuꞌ dxuchálajntuꞌ ca naca chee̱ Cristo.
Dxuzéajniꞌintuꞌ xúgute̱ bénneache,
ne dxusé̱dentuꞌ xúgute̱ꞌ,
chee̱ xeleajniꞌi xánnene̱ꞌ chee̱ xelaca xúgute̱ bénneache du lazreꞌ lau Dios ne̱ chee̱ Jesucristo.
29 Chee̱ gaca caní dxunaꞌ nedaꞌ zrin,
dxuchínedaꞌ dute̱ xel-la waca chee̱ Cristo,
da dxun na zrin lu xichaj lázrdawaꞌ.