Dxal-laꞌ béquezdxu lu da naca chee̱ Xránadxu
4
Chee̱ le̱ naꞌ leꞌe,
bi nazriꞌite̱ lazraꞌ,
le se̱ chacha lu da naca chee̱ Xránadxu.
Leꞌe,
bi bíchaꞌdauꞌ nazríꞌite lazraꞌ,
dxezá lázrele̱ꞌa leꞌedaꞌ leꞌe,
laweꞌ da dxebedaꞌ ca nácale leꞌe,
naꞌ laweꞌ da be̱naꞌ nedaꞌ nácale bi chee̱ Cristo dxal-laꞌ siꞌa tu da gunna Dios nedaꞌ.
2 Dxataꞌ xuedaꞌ Evodia,
ne Síntique xelaque̱ꞌ tuze,
laweꞌ da zaj naque̱ꞌ bila ne̱ chee̱ Xránadxu.
3 Naꞌa lueꞌ,
bi ljwezraꞌ li lazreꞌ,
dxataꞌ xuedaꞌ lueꞌ gácale̱nuꞌ nuꞌula zandxu caní,
nuꞌula belúnle̱ne̱ꞌ nedaꞌ zrin chee̱ dizraꞌ chaweꞌ chee̱ Cristo.
Belune̱ꞌ zrin naꞌ tu zren nen Clemente,
ne xezícadxa benneꞌ caꞌ belúnle̱ne̱ꞌ nedaꞌ zrin.
La benneꞌ caní zaj naxúaj na lu xiche chee̱ xel-la nabán zeajlí canna.
4 Le béqueze lu da naca chee̱ Xránadxu.
Xecha lasa dxenníaꞌ:
Le be.
5 Dxaca lazraꞌ xeleque beꞌe xúgute̱ bénneache nácale zren lazreꞌ.
Ba zua bagu zra xeláꞌ Xránadxu.
6 Quebe bi cuele gunne xue,
san le guchálajle̱queze Dios ca naca chee̱ da caꞌ.
Le naba na lau Dios,
naꞌ le xe̱ꞌe̱:
Xcalenuꞌ.
7 Nadxa gunna Dios leꞌe xel-la dxebeza zri lazreꞌ,
da naca na szrendxa ca da sequeꞌ gúnbea bénneache,
naꞌ guzúa chuchu na xichaj lázrdaule ne̱ chee̱ Jesucristo.
Le gulaba lazreꞌ ca naca da xrlátaje
8 Naꞌa,
bi bichaꞌ,
le gulaba lazreꞌ ca naca
xúgute̱ da zaj naca li, ne
xúgute̱ da zaj napa na ba láꞌana, ne
xúgute̱ da zaj naca na li lazreꞌ, ne
xúgute̱ da zaj naca na du lazreꞌ, ne
xúgute̱ da dxezaca ba lazreꞌ Dios, ne
xúgute̱ da dxulucáꞌana na bénneache xrlátaje.
Che zua tu da naca xrlátaje,
u da dxal-laꞌ gucáꞌana szrendxu,
le gulaba lazreꞌ da caní.
9 Le gun ca naca da bsé̱dedaꞌ leꞌe,
ne da bzéajniꞌidaꞌ leꞌe,
ne da bzendaꞌ leꞌe,
ne da bleꞌedaꞌ leꞌe,
naꞌ súale̱ Dios leꞌe,
Bénneaꞌ dxunne̱ꞌ dxiꞌu xel-la dxebeza zri lazreꞌ.
Da gulesel-la benneꞌ Filipos caꞌ chee̱ Pablo
10 Dxebéle̱ꞌe̱daꞌ ne̱ chee̱ Xránadxu,
laweꞌ da dxajsá lázrele nedaꞌ.
Quebe dxenníaꞌ ba gul-la lázrele nedaꞌ,
san quebe gutaꞌ lataj gácale̱le nedaꞌ.
11 Quebe dxenníaꞌ da nigá laweꞌ da bi dxexázrjedaꞌ,
laweꞌ da ba bse̱de Xránadxu nedaꞌ suaꞌ xel-la dxebé ájate̱ze dxaca chiaꞌ.
12 Ba gudéaꞌ xel-la xacheꞌ,
ne cáꞌanqueze xel-la gunníꞌa.
Nazé̱diaꞌ dxuchaga lawaꞌ xúgute̱ da dxaca chiaꞌ,
che néljadaꞌ,
u che dxedunaꞌ,
che nápale̱ꞌa,
u che quebe bi napaꞌ.
13 Xúgute̱ wazéquedaꞌ guchaga lawaꞌ laweꞌ da dxuzé̱ tipa Cristo nedaꞌ.
14 Be̱nle da xrlátaje,
gúcale̱le nedaꞌ ne̱ chee̱ da gusél-lale chiaꞌ.
15 Ba nézquezle leꞌe,
benneꞌ Filipos,
ca guca gate guzú lawaꞌ dxuchálajaꞌ dizraꞌ chaweꞌ chee̱ Cristo nigá.
Gate bezáꞌa xe̱zre caꞌ zaj nababa xe̱zr la xu Macedonia,
leꞌeze gusél-lale chiaꞌ dumí chee̱ da guzíꞌ lu naꞌle.
16 Gate guzúaꞌ xe̱zre Tesalónica,
chupa chunna lasa gusél-lale dumí chiaꞌ chee̱ quebe bi xázrjedaꞌ.
17 Quebe dxenníaꞌ da nigá laweꞌ da dxaca lazraꞌ bi gúnnale chiaꞌ,
san dxaca lazraꞌ gácadxa da ba neza chee̱le leꞌe lau Dios.
18 Ba guziꞌa xúgute̱ da gusél-lale,
naꞌ de̱le̱ꞌe̱ chiaꞌ.
Ca naca da gusélal-le chiaꞌ lu naꞌ Epafrodito,
da zrendxa guca na ca da bexázrjedaꞌ.
Da naꞌ gusél-lale naca na ca tu gunaꞌ da dxelá zixre na lau Dios,
u tu da bzúale lau Dios da dxezaca ba lazre̱ꞌ.
19 Dios chiaꞌ gunne̱ꞌ leꞌe xúgute̱ da dxexázrjele,
chee̱ xel-la gunníꞌa chee̱ xabáa chee̱ꞌ ne̱ chee̱ Jesucristo.
20 Gaca ba Xradxu Dios chadía chacanna.
¡Caꞌan gaca na!
Pablo dxuzé̱ dizraꞌ benneꞌ Filipos caꞌ
21 Waláz chiaꞌ nedaꞌ le gugapa diuzre lu La Jesucristo xúgute̱ benneꞌ zaj nababe̱ꞌ chee̱ Dios.
Bi bíchedxu caꞌ zaj zúale̱ nedaꞌ dxulugape̱ꞌ leꞌe diuzre.
22 Xúgute̱ bi bíchedxu zaj zreꞌe nigá,
benneꞌ zaj nababe̱ꞌ chee̱ Dios,
ne bi bíchedxu zaj zre̱ꞌe̱ lizre bénneaꞌ dxenná béꞌene̱ꞌ xe̱zr la xu Roma,
dxulugape̱ꞌ leꞌe diuzre.
23 Dxenabaꞌ lau Xránadxu Jesucristo gune̱ꞌ da chaweꞌ chee̱ xúgute̱le leꞌe.
Caꞌan gaca na.