Da naca chaweꞌ da naca na du lazreꞌ
3
Naꞌa,
bi bichaꞌ,
le be lu da naca chee̱ Xránadxu.
Quebe naca na ze̱de chiaꞌ nedaꞌ guzúajaꞌ chee̱le xecha lasa ca da ba bzúajquezaꞌ,
laweꞌ da dxun na ba xen gunaꞌ da nigá chee̱le.
2 Le guxúe cuínale chee̱ benneꞌ caꞌ dxelune̱ꞌ da cale̱la,
ne zaj naque̱ꞌ ca becuꞌ,
benneꞌ caꞌ dxelechugue̱ꞌ lu be̱l-laꞌ dxen da naꞌ naca bea na benneꞌ zaj naque̱ꞌ chee̱ Dios.
3 Dxiꞌu nácadxu benneꞌ nápaquezdxu da dxunna bea na nácadxu chee̱ Dios,
ne dxue láꞌanadxu Dios ne̱ chee̱ Beꞌ Láꞌazxa,
ne dxebedxu laweꞌ da nácadxu bi chee̱ Jesucristo.
Quebe dxuxrén lázredxu da dxundxu,
4 lácala nedaꞌ wazéquedaꞌ guxrén lazraꞌ da caꞌ nunaꞌ.
Che nu benneꞌ dxéquene̱ꞌ waca guxrén lazre̱ꞌ ca da ba nune̱ꞌ,
wazéquedxedaꞌ nedaꞌ.
5 Gate gúquedaꞌ xrunuꞌ zra gulechugue̱ꞌ lu be̱l-laꞌ dxen chiaꞌ da naꞌ dxuléꞌe na nacaꞌ chee̱ Dios laweꞌ da nacaꞌ benneꞌ Israel,
ne xrtia Benjamín.
Nacaꞌ da li benneꞌ hebreo.
Gucaꞌ benneꞌ fariseo ca buzájlaꞌa da bdxixruj beꞌe Moisés.
6 Gudxéle̱ꞌa gunne xue da naca chee̱ Dios ca bzrinte̱ gudáu ziꞌ xuzraꞌ benneꞌ caꞌ zaj nácabe̱ꞌ bi chee̱ Jesús.
Ca naca da xlátaje̱ da napa tu benneꞌ dxune̱ꞌ ca dxenná da nadxixruj bea na,
quebe nu benneꞌ guzéquene̱ꞌ bi nnie̱ꞌ chiaꞌ.
7 Xúgute̱ da caꞌ gúquedaꞌ gate nate zaj zácale̱ꞌe̱ na,
naꞌa dxéquedaꞌ da caꞌ quebe bi zaj zaca na,
laweꞌ da nazríꞌidxedaꞌ Cristo.
8 Da li dxéquedaꞌ xúgute̱ da caꞌ ca tu da nite laweꞌ da zácadxa Xranaꞌ Jesucristo.
Laweꞌ da nazríꞌidaꞌ Le̱ꞌ ba bzuaꞌ chaláꞌala xúgute̱ da gudapaꞌ,
ne dxéquedaꞌ da caꞌ ca tu da níteze chee̱ siꞌa da ba neza da dxunna Cristo,
9 chee̱ gacaꞌ tuze nen Le̱ꞌ,
quegá laweꞌ da gucaꞌ xlátaje̱ ne̱ chee̱ da nadxixruj bea na naꞌ,
san laweꞌ da bleꞌe Dios nedaꞌ xlátaje̱ laweꞌ da dxeajlí lazraꞌ Cristo,
naꞌ Dios dxeléꞌene̱ꞌ xlátaje̱ xúgute̱ benneꞌ dxeleajlí lazre̱ꞌ Cristo.
10 Da dxaca lazraꞌ naca na gúnbeadxaꞌ Cristo,
ne súale̱ xel-la waca nedaꞌ da bsebán na Le̱ꞌ,
ne teaꞌ xel-la ziꞌ ca da gudée̱ꞌ Le̱ꞌ,
ne gudé cuinaꞌ lu naꞌ Dios lácala dxal-laꞌ gatiaꞌ ca gute Cristo,
11 naꞌ dxebeza lazraꞌ xebanaꞌ ládujla benneꞌ gate caꞌ.
Pablo dxun ziꞌ lazre̱ꞌ gusexuzre̱ꞌ guneꞌ zrin chee̱ Cristo
12 Quebe dxenníaꞌ ba bzruéꞌedaꞌ xúgute̱ da caní,
u ba nacaꞌ dute̱ xlátaje̱,
san dxun ziꞌ lazraꞌ chee̱ zruéꞌedaꞌ da naꞌ bláwizra Jesucristo nedaꞌ chee̱ zruéꞌedaꞌ.
13 Leꞌe,
bi bichaꞌ,
quebe dxenníaꞌ ba bzruéꞌedaꞌ da nigá,
san tuze da dxunaꞌ,
dxuzúaꞌ chaláꞌala da ba gudé,
ne dxun ziꞌ lazraꞌ chee̱ zruéꞌedaꞌ da za zaꞌ,
14 chee̱ gusexuzraꞌ gunaꞌ zrin da dxunaꞌ,
chee̱ zruéꞌedaꞌ da naꞌ bláwizra Dios dxiꞌu sidxu lu xabáa chee̱ꞌ laweꞌ da nácadxu bi chee̱ Jesucristo.
15 Caní dxal-laꞌ guéquedxu dxiꞌu,
ze̱ cháchadxu ca naca da dxeajlí lázredxu.
Che quebe dxéquele caní chee̱ bítete̱ze da caní,
Dios guzéajniꞌine̱ꞌ leꞌe ca naca chee̱ na.
16 Tuze ca dxal-laꞌ guéquedxu,
ne tuze ca dxal-laꞌ gundxu lu da caꞌ ba bzruéꞌedxu.
17 Leꞌe,
bi bíchaꞌdauꞌ,
le gun ca dxunaꞌ nedaꞌ,
ne le nnaꞌ ca dxelún benneꞌ caꞌ,
dxelune̱ꞌ ca da bléꞌentuꞌ leꞌe.
18 Zaneꞌ lasa ba guchaꞌ leꞌe,
ne naꞌa dxebézrteaꞌ dxapaꞌ leꞌe,
zrále̱ꞌe̱ bi bíchedxu dxelune̱ꞌ ca dxelún benneꞌ dxuluzúe̱ꞌ chaláꞌala da be̱n Cristo le̱ꞌe̱ xaga béguaj.
19 Ca gaca chee̱ benneꞌ caꞌ lu zra bze̱be,
xelebía xiꞌe̱.
Zaj nune̱ꞌ dios chee̱ da dxeléꞌaj dxelawe̱ꞌ,
ne dxulucáꞌana szren cuine̱ꞌ chee̱ da naꞌ dxal-laꞌ xelapa stuꞌe̱.
Zaj dxeꞌe̱ gunne xue da naca chee̱ xe̱zr la xu nigaze.
20 Dxiꞌu nácadxu benneꞌ zaj nababe̱ꞌ xabáa,
ne dxebézadxu zra xeláꞌ benneꞌ weselá chee̱dxu,
Xránadxu Jesucristo,
ze̱ꞌe̱ xabáa.
21 Le̱ꞌ xegüe̱ꞌ be̱l-laꞌ dxen chee̱dxu da dxeledé chee̱ na,
ne gune̱ꞌ na ca naca be̱l-laꞌ dxen xabáa chee̱ꞌ,
guchínene̱ꞌ xel-la waca chee̱ꞌ da nape̱ꞌ chee̱ nna béꞌene̱ꞌ xúgute̱ da zaj zua.