2
Dxaca lazraꞌ nézele leꞌe dxúnle̱ꞌa zrin,
dxeꞌa gunne xue le̱n Dios da naca chee̱le leꞌe,
ne da naca chee̱ bi bíchedxu caꞌ caꞌ zaj zre̱ꞌe̱ Laodicea,
ne da naca chee̱ xúgute̱ bi bíchedxu caꞌ quebe ne xeleléꞌene̱ꞌ nedaꞌ caníqueze.
2 Dxaca lazraꞌ xeledipa lazre̱ꞌ,
ne xelaque̱ꞌ tuze lu xel-la zriꞌi lazreꞌ,
ne xelaque̱ꞌ benneꞌ gunníꞌa lu xichaj lázrdawe̱ꞌ,
chee̱ xelúnbeꞌe̱ da nagache chee̱ Xradxu Dios da nácaqueze Cristo.
3 Lu naꞌ Le̱ꞌ zaj de̱ ca naca xel-la gunníꞌa chee̱ xel-la sina,
ne xel-la dxéajniꞌi.
4 Dxapaꞌ leꞌe da nigá chee̱ quebe xelezí xe̱ leꞌe benneꞌ caꞌ zaj neze xrgúe̱ꞌ ca dxuluchálaje̱ꞌ.
5 Lácala quebe zúale̱teaꞌ leꞌe caníqueze,
naca na cáte̱ze zúale̱naꞌ leꞌe lu beꞌ nácaquezaꞌ,
naꞌ dxebéle̱ꞌe̱daꞌ dxendaꞌ dxunle da xlátaje̱,
ne ze̱ cháchale ca dxeajlí lázrele Cristo.
6 Chee̱ le̱ naꞌ,
ca be̱nle,
guzíꞌ lu naꞌle Xránadxu Jesucristo,
cáꞌanqueze dxal-laꞌ gunle súale̱le Le̱ꞌ.
7 Dxal-laꞌ gácale ca tu xaga da dxudé lue na sítujla lu da naca chee̱ Cristo.
Cáꞌanqueze dxal-laꞌ gácale ca tu xuꞌu da dxeꞌ lane lu da naca chee̱ꞌ Le̱ꞌ,
chee̱ se̱ cháchale ca dxeajlí lázrele Le̱ꞌ,
ca bléꞌentuꞌ leꞌe,
naꞌ dxál-laꞌqueze xe̱le Dios:
Xcalenuꞌ.
Xel-la nabán cube da dxunna Cristo dxiꞌu
8 Le guxúe cuínale.
Quebe güele lataj xelezí xe̱ benneꞌ caꞌ leꞌe,
xuluchínene̱ꞌ xel-la sina chee̱ bénneache,
ne dizraꞌ cale̱la,
ca naca da dxulusé̱dequeze bénneache,
ne ca zaj naca da caꞌ dxácaqueze lu xe̱zr la xu nigá,
ne quegá ca naca chee̱ Cristo.
9 Dute̱ ca naca Dios nácaqueze Cristo.
10 Nápale leꞌe xúgute̱ da naca chee̱ꞌ
laweꞌ da nácaquezle be̱l-laꞌ dxen chee̱ Le̱ꞌ.
Le̱ꞌ dxenná beꞌene̱ꞌ xúgute̱ beꞌ da dxelenná bea na,
ne xúgute̱ beꞌ da zaj napa na xel-la waca.
11 Cáꞌanqueze,
laweꞌ da nácale tuze nen Cristo nácale bi chee̱ Dios.
Quebe guca chee̱le ca da naꞌ belúnqueze benneꞌ judío caꞌ,
gulechugue̱ꞌ lateꞌ be̱l-laꞌ dxen chee̱ bi biu chee̱ꞌ caꞌ,
da naꞌ dxuléꞌe na zaj nácabeꞌ chee̱ Dios.
Bedúa dute̱ da naca chee̱ be̱laꞌ dxen chee̱le da naca sban,
da guca na ne̱ chee̱ da be̱n Cristo lu xichaj lázrdaule.
Be̱ne̱ꞌ nácale bi chee̱ Dios.
12 Gate gudxúale nisa guca chee̱le ca guca chee̱ Cristo gate bgache̱ꞌ lu xe̱dxu ba,
naꞌ cáꞌanqueze guca chee̱le ca guca chee̱ Le̱ꞌ gate bebane̱ꞌ ládujla benneꞌ gate.
Caní guca chee̱le laweꞌ da guxeajlí lázrele xel-la waca chee̱ Dios,
Bénneaꞌ bsebane̱ꞌ Cristo ládujla benneꞌ gate caꞌ.
13 Gate nate gúcale leꞌe ca benneꞌ gate lu dul-la da gubágale,
ne lu be̱laꞌ dxen sban chee̱le da quebe ne xedúa na.
Naꞌa Dios ba nunne̱ꞌ leꞌe xel-la nabán tu zren nen Cristo,
ne ba bnite lawe̱ꞌ xúgute̱ dul-la da gubágale.
14 Dios bzria xiꞌe̱ ca naca da nabágadxu chee̱ xúgute̱ da nadxixruj bea na da gula da buluzría xi na dxiꞌu.
Bebéaje̱ꞌ na chaláꞌala,
ne bde̱ꞌe̱ na le̱ꞌe̱ xaga béguaj ca tu da gubagaꞌ Cristo.
15 Gate gute Cristo le̱ꞌe̱ xaga béguaj begüe̱ꞌ ca naca xel-la dxenná bea,
ne xel-la waca chee̱ beꞌ xriwe̱ꞌ caꞌ,
naꞌ bléꞌene̱ꞌ da caꞌ láwela gubáz chee̱ xabáa caꞌ laweꞌ da gunná béꞌene̱ꞌ na.
Le sa lazreꞌ da caꞌ zaj de̱ na xabáa
16 Chee̱ le̱ naꞌ,
quebe nu dxal-laꞌ si tizraꞌ leꞌe ca naca da dxeꞌaj da dxágule,
ne ca zaj naca zra laní,
ne ca naca laní chee̱ beuꞌ dxeꞌene,
ne ca zaj naca zra dxupáꞌanale.
17 Xúgute̱ da caní zaj naca na ca tu zrúl-laze chee̱ da zaj zéaje̱ da caꞌ.
18 Quebe güele lataj nu cua da nucueza Dios chee̱le leꞌe,
ne̱ chee̱ da dxululéꞌe benneꞌ caꞌ,
benneꞌ dxeléquene̱ꞌ zaj naque̱ꞌ dxexruj lazreꞌ laweꞌ da dxulucáꞌana szrene̱ꞌ gubáz chee̱ xabáa caꞌ,
ne dxuluchálaje̱ꞌ chee̱ da quebe ne xeleléꞌene̱ꞌ,
ne dxulucáꞌana szren cuine̱ꞌ ca naca xel-la sina chee̱ bénneacheze da zaj nape̱ꞌ.
19 Quebe zaj de̱ꞌe̱ Cristo,
Bénneaꞌ naque̱ꞌ xichaj be̱l-laꞌ dxen da nácadxu dxiꞌu,
naꞌ Le̱ꞌ dxusegule̱ꞌ dute̱ be̱l-laꞌ dxen naꞌ,
ne dxugawe̱ꞌ na,
ne dxune̱ꞌ na tuze du ca naca na,
chee̱ gaca na ca dxaca lazreꞌ Dios.
20 Naca chee̱le ca naca chee̱ tu benneꞌ ba nate laweꞌ da nácale be̱l-laꞌ dxen chee̱ Cristo,
chee̱ québedxa gunle ca zaj naca da caꞌ dxácaqueze lu xe̱zr la xu nigá.
Naꞌa,
¿bizr chee̱ naꞌ dxedale ca benneꞌ ne zaj nácaqueze̱ꞌ chee̱ xe̱zr la xu nigá,
ne dxunle ca da dxelenná bea bénneache.
21 Dxelenné̱ꞌ:
Quebe guchínenuꞌ da nigá.
Quebe gaguꞌ da caꞌ.
Quebe chajtáuꞌ da naꞌ.
22 Xúgute̱ da nadxixruj bea caní dxuluchalaj na chee̱ da caꞌ dxeledé chee̱ na gate dxuchínedxu na,
ne zaj nácaze na da dxelenná bea bénneache,
ne da dxuluse̱de bénneache.
23 Da li dxeleque bénneache zaj naca na sina da nadxixruj bea caní,
laweꞌ da dxuluse̱de na bénneache xelúe láꞌane̱ꞌ Dios,
ne xelaque̱ꞌ dxexruj lazreꞌ,
ne xelenná beꞌene̱ꞌ be̱l-laꞌ dxen chee̱ꞌ.
Quebe bi culuén zaj napa na chee̱ xelenná beꞌe na xel-la dxezá lazreꞌ sban caꞌ chee̱ bénneache.