3
Leꞌe nácale ca benneꞌ ba belexebán tu zren nen Cristo.
Chee̱ le̱ naꞌ le sa lazreꞌ da zaj zua xabáa,
naga dxeꞌ Cristo chaláꞌa xabe̱la chee̱ Dios.
2 Le gulaba lazreꞌ chee̱ da zaj de̱ xabáa,
quegá chee̱ da zaj de̱ lu xe̱zr la xu.
3 Nácale ca benneꞌ ba zaj nate,
naꞌ xel-la nabán chee̱le nuzúa chaweꞌ Dios naga zua Cristo.
4 Cristo nácaqueze xel-la nabán chee̱dxu,
naꞌ gate xeláꞌ Le̱ꞌ,
cáꞌanqueze leꞌe gunle tu zren Le̱ꞌ lu xel-la szren chee̱ꞌ.
Xel-la nabán gula ne xel-la nabán cube
5 Chee̱ le̱ naꞌ,
le xebéaj ca tu da nate xúgute̱ da zaj zua lu xichaj lázrdaule da zaj naca na chee̱ xe̱zr la xu nigá,
ca naca xel-la dxichaj na xrba chee̱ xel-la nuchaga naꞌ,
ne da sban,
ne xel-la dxezá lazreꞌ da sban ne da cale̱la caꞌ,
ne xel-la dxucudeꞌ,
laweꞌ da naca da dxucude bénneache ca dios chee̱queze̱ꞌ.
6 Xúgute̱ da caní dxelún benneꞌ quebe dxuluzúe̱ꞌ dizraꞌ chee̱ Dios,
naꞌ chee̱ le̱ naꞌ gudé Dios benneꞌ caꞌ lu da ba xaꞌ.
7 Cáꞌanqueze leꞌe be̱nle xúgute̱ da caní gate nate.
8 Naꞌa,
québedxa gunle xúgute̱ da caní:
Xel-la dxezráꞌa,
ne xel-la xichaj zraꞌa,
ne xel-la dxecuide ljwezre.
Québedxa nne̱le dizraꞌ schanniꞌ.
Québedxa gucháchale ljwézrele.
9 Quebe si xe̱ ljwézrele tule xetule,
laweꞌ da ba bzúale chaláꞌala da gúcale nédxute̱,
ne ca naca da be̱nle.
10 Nácale ca benneꞌ cube,
laweꞌ da dxuxucube Dios leꞌe chee̱ gácale ca nácaqueze Dios,
Bénneaꞌ be̱ne̱ꞌ leꞌe,
ca zrindxa gúnbea xánnele Le̱ꞌ.
11 Lau Dios québedxa bi zaca che nácadxu benneꞌ griego,
che benneꞌ judío,
u che nácadxu benneꞌ zaj nadxugu lu be̱l-laꞌ dxen chee̱ꞌ da dxuléꞌe na zaj nababe̱ꞌ chee̱ Dios,
che benneꞌ quebe zaj nape̱ꞌ da naꞌ dxuléꞌe na,
u che nácadxu benneꞌ zituꞌ,
che benneꞌ caꞌ zaj zre̱ꞌe̱ xiꞌa xe̱gu caꞌ,
u che nácadxu benneꞌ zaj nadaꞌu,
che benneꞌ quebe zaj nadaꞌu.
Da zaca na naca na che naca Cristo benneꞌ xíchajdxu,
ne che zue̱ꞌ lu xichaj lázrdaudxu.
12 Dios nazriꞌine̱ꞌ leꞌe,
ne guqué̱ꞌe̱ leꞌe chee̱ gácale bi chee̱ꞌ caꞌ.
Chee̱ le̱ naꞌ le gaca:
Benneꞌ dxexache lazreꞌ,
ne benneꞌ zriꞌi lazreꞌ,
ne benneꞌ dxexruj lazreꞌ,
ne benneꞌ chaweꞌ lazreꞌ,
ne benneꞌ zren lazreꞌ.
13 Le gácale̱ ljwézrele tule xetule,
ne le gunite lau chee̱le tule xetule,
che núlale dxezráꞌa ljwézrele.
Ca be̱n Cristo,
bnite lawe̱ꞌ chee̱le,
cáꞌanqueze le gun leꞌe chee̱ ljwézrele.
14 Da dxundxa na ba xen,
le zriꞌi ljwézrele laweꞌ da naca xel-la zriꞌi lazreꞌ da dxun na dxiꞌu tuze,
ne li lazreꞌ.
15 Xel-la dxebeza zri lazreꞌ da dxunna Dios dxiꞌu dxal-laꞌ nna bea na lu xichaj lázrdaudxu,
laweꞌ da bláwizra Dios leꞌe chee̱ súale lu xel-la dxebeza zri lazreꞌ chee̱ꞌ,
ne gácale ca tuze be̱l-laꞌ dxen.
Cáꞌanqueze dxal-laꞌ xe̱le Dios:
Xcalenuꞌ.
16 Dizraꞌ chee̱ Cristo dxal-laꞌ guzúa xánnele lu xichaj lázrdaule chee̱ séquele guzéajniꞌile,
ne gusízre ljwézrele nen dute̱ xel-la sina chee̱ Dios.
Lu dute̱ xel-la dxezaca ba lazreꞌ le gul-la lau Dios salmo caꞌ,
ne da dxue láꞌanale Dios,
ne da caꞌ dxuzúa Beꞌ Láꞌazxa xichaj lázrdaule.
17 Bítete̱ze da gunle,
u da nnale,
le gun xúgute̱ na lu La Xránadxu Jesús,
ne xe̱le Xradxu Dios:
Xcalenuꞌ,
ne̱ chee̱ Le̱ꞌ.
Ca dxal-laꞌ xelún benneꞌ caꞌ zaj naque̱ꞌ bi chee̱ Cristo
18 Leꞌe,
nuꞌula,
le guzúa dizraꞌ chee̱ benneꞌ chee̱ chee̱le,
laweꞌ da naca na da dxal-laꞌ xelún benneꞌ dxeajlí lazre̱ꞌ Xránadxu.
19 Leꞌe,
benneꞌ biu,
le zriꞌi zrúꞌulale,
ne quebe xexitaj lázrele le̱ꞌ.
20 Leꞌe,
bi cuideꞌ,
le guzúa dizraꞌ chee̱ xra xrnale lu xúgute̱ da dxelenné̱ꞌ,
chee̱ gunle da dxezaca ba lazreꞌ Xránadxu.
21 Leꞌe,
xruze xrnaꞌ,
quebe téte̱lale xel-la snia nen zríꞌinele,
chee̱ quebe xelate niꞌa naꞌbeꞌ.
22 Leꞌe,
benneꞌ zaj nadaꞌu,
le guzúa dizraꞌ xúgute̱ da xelenná xránale lu xe̱zr la xu nigá,
quegaze gate dxelennáꞌtee̱ꞌ,
chee̱ xeléquene̱ꞌ leꞌe xrlátaje,
san le gun da caꞌ du lázrele,
ne le zrebe Dios.
23 Bítete̱ze da gunle,
le gun na du lázrele,
ca nu benneꞌ dxune̱ꞌ zrin chee̱ Xránadxu,
ne quegá zrin chee̱ beniácheze.
24 Lácala dxunle zrin nigá chee̱ bénneache,
nézele gunna Xránadxu lazruj chee̱le da dxal-laꞌ sile lu zra naꞌ,
laweꞌ da dxunle zrin chee̱ Cristo,
Bénneaꞌ nácaqueze̱ꞌ Xránale.
25 Nu benneꞌ dxune̱ꞌ da cale̱la,
waziꞌe̱ lazruj chee̱ da cale̱la nune̱ꞌ laweꞌ da quebe dxuchá Dios ca da dxune̱ꞌ chee̱ tu xetú benneꞌ.