2 Leꞌe,

bi bíchaꞌdauꞌ,

le guchálajle̱queze Dios,

súale ban lazreꞌ,

ne xe̱le Dios:

Xcalenuꞌ.

3 Cáꞌanqueze,

le naba lau Dios waláz chee̱ntuꞌ,

chee̱ gácale̱ Xránadxu netuꞌ chee̱ séquentuꞌ guchálajntuꞌ xrtizre̱ꞌ,

ne guzéajniꞌintuꞌ bénneache ca naca da nagache ca naca chee̱ Cristo.

Laweꞌ da dxunaꞌ da caní ne xuꞌa lizre xia nigá.

4 Le naba lau Dios chee̱ séquedaꞌ guzéajniꞌi xánnedaꞌ bénneache ca dxal-laꞌ gunaꞌ.

5 Le gaca sina ca dxunle chee̱ benneꞌ caꞌ quebe dxeleajlí lazre̱ꞌ Cristo,

guchine xánnele zra caꞌ dxunna Dios leꞌe.

6 Dizraꞌ dxuchálajle dxal-laꞌ gaca na xrlátaje,

ne da xelexezaca ba lazreꞌ bénneache,

naꞌ dxal-laꞌ nézele ca xeché̱bele chee̱ tu tu benneꞌ caꞌ gate bi dxelenábene̱ꞌ leꞌe.

7 Tíquico,

bi bíchedxu nazríꞌi lázredxu guzenbeꞌ leꞌe ca naca da dxaca chiaꞌ.

Nácabeꞌ tu bi li lazreꞌ dxácale̱nbeꞌ nedaꞌ,

ne dxunbeꞌ zrin chee̱ Xránadxu tu zren nen nedaꞌ.

8 Chee̱ le̱ naꞌ,

dxusel-laꞌ-beꞌ naga zúale,

chee̱ guzenbeꞌ leꞌe ca dxaca chee̱ntuꞌ,

ne chee̱ gutípabeꞌ lázrele.

9 Cáꞌanqueze zéajle̱ Onésimo le̱beꞌ,

naque̱ꞌ bíchedxu li lazreꞌ,

benneꞌ nazríꞌi lázredxu,

ne naque̱ꞌ benneꞌ walázr chee̱le.

Benneꞌ caní xuluzenne̱ꞌ leꞌe ca naca da dxaca nigá.

10 Aristarco,

benneꞌ xúꞌule̱ne̱ꞌ nedaꞌ lizre xia,

dxugape̱ꞌ leꞌe diuzre,

ne cáꞌanqueze dxun Marcos,

bi xrtia Bernabé.

Ba bzéajniꞌidaꞌ leꞌe ca dxun Marcos.

Che wazaꞌbeꞌ xedajnnáꞌabeꞌ leꞌe,

le siꞌ lu naꞌle le̱beꞌ cháweꞌdauꞌ.

11 Cáꞌanqueze bénneaꞌ le̱ꞌ Jesús dxugape̱ꞌ leꞌe diuzre,

bénneaꞌ lé̱queze̱ꞌ Justo.

Benneꞌ zan benneꞌ judío dxeleajlí lazre̱ꞌ Cristo,

san benneꞌ canize ládujla benneꞌ judío caꞌ dxelune̱ꞌ zrin tu zren nen nedaꞌ,

naꞌ dxuzénentuꞌ bénneache ca xelezéquene̱ꞌ xeluꞌe̱ naga dxenná bea Dios,

naꞌ dxuluzúe̱ꞌ nedaꞌ tu lu da ba neza zrente̱.

12 Dxugapa Epafras leꞌe diuzre.

Naque̱ꞌ we̱n zrin chee̱ Cristo,

ne benneꞌ walázr chee̱quezle.

Dxenábaqueze̱ꞌ lau Dios chee̱le leꞌe chee̱ se̱ cháchale,

ne guzúa cuínale du lázrele chee̱ gunle da dxaca lazreꞌ Dios.

13 Nedaꞌ dxexeche̱baꞌ chee̱ Epafras,

dxeꞌe̱ gunne xue chee̱le leꞌe,

ne chee̱ bi bíchedxu zaj zre̱ꞌe̱ xe̱zre Laodicea,

ne xe̱zre Hierápolis.

14 Dxugapa leꞌe diuzre Lucas,

bénneaꞌ dxexune̱ꞌ benneꞌ we̱ꞌ caꞌ,

ne naque̱ꞌ benneꞌ nazríꞌi lazraꞌ.

Cáꞌanqueze dxugapa Demas leꞌe diuzre.

15 Le gugapa diuzre bi bíchedxu zaj zre̱ꞌe̱ xe̱zre Laodicea.

Cáꞌanqueze le gugapa diuzre Ninfas,

ne bi bíchedxu caꞌ dxelezrague̱ꞌ lizre̱ꞌ.

16 Ca te gulábale leꞌe xiche nigá,

le sel-la na chee̱ xululaba bi bíchedxu caꞌ zaj zre̱ꞌe̱ Laodicea na.

Cáꞌanqueze le gulaba leꞌe xiche da ze za na Laodicea.

17 Le xe̱ Arquipo da nigá:

Bxue xanneꞌ gunuꞌ cháweꞌdauꞌ ca naca zrin chee̱ Xránadxu da bzue̱ꞌ lu naꞌu.

18 Nedaꞌ Pablo dxuzúajaꞌ da nigá nen náꞌaquezaꞌ.

Dxugapaꞌ leꞌe diuzre.

Le gusá lázrele xuꞌa lizre xia.

Dxenabaꞌ lau Dios gune̱ꞌ chee̱le da chaweꞌ.

¡Caꞌan gaca na!