6
Leꞌe,
bi cuideꞌ,
laweꞌ da nácale bi chee̱ Xránadxu,
dxal-laꞌ guzúale dizraꞌ xruze xrna chee̱le,
da naca na xlátaje̱.
2 Da nadxixruj bea nedxu da zraga na tu da guche̱be lazreꞌ Dios naca na da dxenná na:
Gudapa ba láꞌana xra xrnaꞌu,
3 chee̱ gaca chaweꞌ chiuꞌ,
ne chee̱ suꞌ schaꞌ lu xe̱zr la xu.
4 Leꞌe,
xruze xrnaꞌ,
quebe gucháꞌale zríꞌinele.
Le gusegula-beꞌ lu xel-la dxenná bea chee̱ Xránadxu,
ne le gusina-beꞌ da naca chee̱ Le̱ꞌ.
5 Leꞌe,
benneꞌ nadaꞌu,
le guzúa dizraꞌ chee̱ benneꞌ zaj naque̱ꞌ xránale lu xe̱zr la xu nigá,
ne le gapa le̱ꞌ ba láꞌana,
ne le zrebe le̱ꞌ,
ne du lázrele le gaca chee̱ꞌ,
cáte̱ze dxuzúale dizraꞌ chee̱ Cristo.
6 Le gun zrin chee̱ xránale caꞌ,
quegaze gate dxelennáꞌte̱ꞌ leꞌe,
ca dxelún benneꞌ caꞌ dxelaca lazre̱ꞌ xelezaca ba lazreꞌ bénneache chee̱ꞌ.
Le gun zrin naꞌ cáte̱ze dxunle zrin chee̱ Cristo,
gunle du lázrele da dxaca lazreꞌ Dios.
7 Le gun zrin chee̱ xránale du lázrele,
cáte̱ze dxunle zrin chee̱ Xránadxu,
ne quegaze chee̱ bénneache.
8 Ba nézquezle tu tu benneꞌ,
benneꞌ nadaꞌu,
ne benneꞌ quebe nadaꞌu,
waziꞌe̱ lu naꞌ Xránadxu ca naca da xrlátaje da nune̱ꞌ.
9 Leꞌe,
xrana benneꞌ caꞌ,
cáꞌanqueze le gun leꞌe nen benneꞌ we̱n zrin chee̱le caꞌ,
ne quebe guzálajle le̱ꞌ laweꞌ da nézele zua Bénneaꞌ xabáa naque̱ꞌ Xrana benneꞌ caꞌ,
ne Xránale leꞌe,
naꞌ Le̱ꞌ quebe dxebéaje̱ꞌ cha chee̱ bénneache.
Zra lana bi chee̱ Cristo da dxácale̱ le̱beꞌ lu wedil-la
10 Naꞌa,
bi bíchaꞌdauꞌ,
le gaca chuchu ne̱ chee̱ Xránadxu nen xel-la wala zren chee̱ꞌ.
11 Le gaca ca benneꞌ zjaque̱ꞌ wedil-la zaj nácue̱ꞌ zra lane̱ꞌ xia da naꞌ dxunna Dios leꞌe,
chee̱ gaca se̱ chúchule lau xúgute̱ da dxuzé̱ da xriwe̱ꞌ laule chee̱ si xe̱ na leꞌe.
12 Quegá dxedíl-lale̱dxu bénneache zaj naque̱ꞌ be̱laꞌ dxen.
Dxedíl-lale̱dxu xel-la dxenná bea chee̱ da xriwe̱ꞌ da dxeledá na lu beꞌ,
ne dxedíl-lale̱dxu beꞌ xriwe̱ꞌ caꞌ,
da dxelenná bea na,
ne beꞌ xriwe̱ꞌ caꞌ dxe̱ na ljwezre caꞌ da xelún na,
ne beꞌ xriwe̱ꞌ caꞌ xuꞌu lu naꞌ na xe̱zr la xu chul-la nigá.
13 Chee̱ le̱ naꞌ,
le gaca ca benneꞌ zjaque̱ꞌ wedil-la zaj nacue̱ꞌ zra lane̱ꞌ xia da dxunna Dios leꞌe,
chee̱ séquele súale wedil-la lu zra che da xriweꞌ,
naꞌ ca te naꞌ xegáꞌana chúchule.
14 Le se̱ chuchu xcaꞌ,
suale̱ leꞌe da li ca tu bazxu da nacáꞌa na le̱ꞌe̱le,
ne suale̱ leꞌe da xlátaje̱ ca tu xia da daꞌ lachuꞌle.
15 Le gaca sina chee̱ guchálajle dizraꞌ chaweꞌ chee̱ xel-la dxebeza zri lazreꞌ,
da gaca na chee̱le ca tu cueꞌ zrélale.
16 Da dxun na ba xen,
le gapa xel-la dxeajlí lazreꞌ,
da gaca na chee̱le ca tu da xegapa na,
da xusula na xúgute̱ da zaj nalá na zaj zua na xiꞌ da dxuzala da xriwe̱ꞌ.
17 Xel-la weselá gaca na chee̱le ca tu lapa xia da gucache xíchajle,
naꞌ xrtizra Dios gaca na chee̱le ca tu xia da gunna Beꞌ Láꞌazxa leꞌe.
18 Gate ne dxunle da caní dxal-laꞌ guchálajle̱le Dios,
gataꞌ xúele,
ne nábale lau Le̱ꞌ ne̱ chee̱ Beꞌ Láꞌazxa.
Chee̱ gaca gunle da caní dxal-laꞌ súale ban lazreꞌ,
ne quebe gate niꞌa naꞌle,
naꞌ nábale Dios chee̱ gácale̱ne̱ꞌ xúgute̱ bi chee̱ꞌ caꞌ.
19 Cáꞌanqueze le naba Le̱ꞌ waláz chiaꞌ nedaꞌ chee̱ gunne̱ꞌ nedaꞌ dizraꞌ da guchálajaꞌ,
chee̱ xazrdaꞌ guzendaꞌ bénneache dizraꞌ chaweꞌ chee̱ꞌ.
20 Dios be̱ne̱ꞌ nedaꞌ gubáz chee̱ dizraꞌ chaweꞌ chee̱ꞌ,
naꞌ chee̱ le̱ naꞌ xuꞌa lizre xia naꞌa.
Le naba Le̱ꞌ gácale̱ne̱ꞌ nedaꞌ chee̱ xazrdaꞌ guchálajaꞌ dizraꞌ chaweꞌ chee̱ꞌ ca dxal-laꞌ gunaꞌ.
Pablo dxugape̱ꞌ diuzre le saꞌ ljwezre̱ꞌ
21 Tíquico,
bi bíchedxu nazriꞌite̱ lazrdxu,
bi li lazreꞌ lu zrin chee̱ Xránadxu,
guzenbeꞌ leꞌe da dxaca chiaꞌ nigá,
ne da dxunaꞌ.
22 Chee̱ le̱ naꞌ dxusel-laꞌ-beꞌ lau leꞌe chee̱ guzenbeꞌ leꞌe ca zúantuꞌ,
ne chee̱ gutípabeꞌ lázrele.