Ca dxal-laꞌ xelaca bi caꞌ chee̱ Dios
5
Laweꞌ da nácale bi cheé̱queze Dios,
bi nazriꞌine̱ꞌ,
le gun ba xuzre gácale cáte̱ze nácaqueze Le̱ꞌ.
2 Le zriꞌi le saꞌ ljwézrele tule xetule cáte̱ze be̱n Cristo,
bzriꞌine̱ꞌ dxiꞌu,
ne bzanne cuine̱ꞌ waláz chee̱dxu ca tu zrílaꞌdauꞌ,
béadu dxelute benneꞌ lau Dios chee̱ xedúa xtul-leꞌ.
Gate gute Cristo le̱ꞌe̱ xaga béguaj,
guca ca tu da dxelá zixre lau Dios da dxelegúꞌu bénneache lau Le̱ꞌ.
3 Laweꞌ da nácale bi chee̱ Dios,
québedxa dxal-laꞌ guchálajle chee̱ da dxucáꞌana ditaj na bénneache,
ne chee̱ da sban caꞌ,
ne chee̱ xel-la wecudeꞌ da de̱.
4 Quebe guchálajle dizraꞌ schanniꞌ,
ne dizraꞌ bize,
ne dizraꞌ cale̱la,
da quebe dxulucáꞌana na chaweꞌ bénneache,
san dxal-laꞌ xé̱quezle Dios:
“Xcalenuꞌ.”
5 Ba nézquezle quebe chuꞌu naga dxenná bea Cristo nen Dios netú benneꞌ dxucáꞌana dítaje̱ꞌ bénneache,
u tu benneꞌ dxune̱ꞌ da sban,
u tu benneꞌ dxucúdie̱ꞌ da de̱,
da naca na ca dxucáꞌana szrene̱ꞌ bedauꞌ xiaj xaga.
6 Quebe güele lataj nu si xe̱ leꞌe nen dizraꞌ xala,
laweꞌ da ne̱ chee̱ da nigá dxesel-la Dios da dxusaca zi na benneꞌ caꞌ quebe dxuluzúe̱ꞌ dizraꞌ chee̱ꞌ.
7 Quebe gunle tu zren benneꞌ dxelune̱ꞌ da caní.
8 Nédxute̱ guzúale lu da chul-la,
naꞌ naꞌa zrágale xel-la naxaníꞌ laweꞌ da nácale bi chee̱ Xránadxu.
Chee̱ le̱ naꞌ,
le gun da naca na chee̱ xel-la naxaníꞌ,
9 da naꞌ naca xel-la dxucáꞌana chaweꞌ ljwézredxu,
ne da xlátaje̱,
ne da li.
10 Le gun ziꞌ lázrele nézele gunle da dxezaca ba lazreꞌ Xránadxu.
11 Quebe gunle tu zren benneꞌ dxelune̱ꞌ da cale̱la,
da caꞌ naca chee̱ da chul-la,
san le til-la da caꞌ
12 laweꞌ da naca na tu da xeduéꞌedxu guchálajzedxu chee̱ da dxelún benneꞌ caꞌ bagácheze.
13 Gate dxeledxúaj da caní lu da chul-la,
ne zaj xuꞌu na lu xel-la naxaníꞌ,
guléꞌe laweꞌ ca zaj naca xúgute̱ da caní,
laweꞌ da dxuléꞌe laweꞌ xel-la naxaníꞌ xúgute̱.
14 Ca naca da caní dxenná na:
Bebán,
lueꞌ dxásiuꞌ.
Bexasa ládujla benneꞌ gate,
naꞌ guseníꞌ Cristo lu xichaj lazrdaꞌu.
15 Chee̱ le̱ naꞌ,
le guxúe xanneꞌ ca da dxunle.
Quebe gunle ca dxelún benneꞌ zaj nachul-la nanítene̱ꞌ,
san le gun ca dxelún benneꞌ zaj naxéajniꞌine̱ꞌ.
16 Le guchine chaweꞌ zra caní laweꞌ da dxácale̱ꞌe̱ da zrinnaj lu zra naꞌa zra.
17 Quebe gácale benneꞌ xala,
san le gun ziꞌ lázrele chéajniꞌile da dxaca lazreꞌ Xránadxu gundxu.
18 Quebe súzrele,
da naꞌ dxuxrinnaj na bénneache,
san du lázrele le siꞌ Beꞌ Láꞌazxa.
19 Le guchálajle̱ le saꞌ ljwézrele tule xetule nen Salmo caꞌ,
ne nen da dxúl-lale,
ne nen da du dxúl-lale da dxunna Beꞌ Láꞌazxa leꞌe.
Du lázrele le gul-la,
ne le güe láꞌana Xránadxu.
20 Le xé̱queze Xradxu Dios:
“Xcalenuꞌ”,
chee̱ xúgute̱ lu La Xránadxu Jesucristo.
Ca dxal-laꞌ xelún bi chee̱ Cristo nen lwézrebeꞌ
21 Le gaca dxexruj lazreꞌ tule xetule,
ne le gapa ba láꞌana Dios.
22 Nuꞌula dxal-laꞌ gaque̱ꞌ dxexruj lazreꞌ lau benneꞌ chee̱ꞌ,
cáte̱ze dxal-laꞌ gaque̱ꞌ lau Xránadxu,
23 laweꞌ da naca benneꞌ biu xíchaje̱ chee̱ zruꞌule̱ꞌ,
cáte̱ze naca Cristo xíchaje̱ chee̱ bi chee̱ꞌ caꞌ.
Cristo naque̱ꞌ Benneꞌ weselá chee̱ bi chee̱ꞌ caꞌ,
bi zaj naca be̱ꞌ ca be̱l-laꞌ dxen cheé̱queze̱ꞌ.
24 Cáte̱ze zaj naca dxexruj lazreꞌ bi chee̱ꞌ caꞌ lau Cristo,
cáꞌanqueze nuꞌula dxal-laꞌ gaque̱ꞌ dxexruj lazreꞌ lau benneꞌ chee̱ꞌ lu xúgute̱.
25 Benneꞌ biu dxal-laꞌ zríꞌine̱ꞌ zruꞌule̱ꞌ cáte̱ze be̱n Cristo,
bzriꞌine̱ꞌ bi chee̱ꞌ caꞌ,
ne bzánene̱ꞌ xel-la nabán chee̱ꞌ ne̱ chee̱beꞌ.
26 Caní be̱ne̱ꞌ chee̱ bebéaje̱ꞌ-beꞌ cheé̱queze̱ꞌ,
ne be̱n chiꞌe̱-beꞌ ne̱ chee̱ dizraꞌ chee̱ꞌ,
da guca na ca dxun benneꞌ dxexibe̱ꞌ bi chee̱ꞌ nen nisa,
27 chee̱ guzúe̱ꞌ-beꞌ lau Le̱ꞌ,
xelácabeꞌ bi xabáa,
ne quebe bi da sban zaj nápabeꞌ,
ne netú da zrinnaj,
ne netú da naca na ca da caꞌ,
san xelácabeꞌ láꞌazxa,
ne du lazreꞌ.
28 Cáꞌanqueze benneꞌ biu dxal-laꞌ zríꞌine̱ꞌ zruꞌule̱ꞌ cáte̱ze nazriꞌine̱ꞌ be̱l-laꞌ dxen cheé̱queze̱ꞌ.
Benneꞌ nazriꞌine̱ꞌ zruꞌule̱ꞌ nazríꞌi cuine̱ꞌ.
29 Netú benneꞌ quebe dxecuídene̱ꞌ be̱l-laꞌ dxen cheé̱queze̱ꞌ,
san dxugawe̱ꞌ na,
ne dxuxúe̱ꞌ na,
ca dxúnqueze Cristo chee̱ bi chee̱ꞌ caꞌ
30 laweꞌ da zaj nácabeꞌ ca be̱l-laꞌ dxen cheé̱queze̱ꞌ,
naꞌ dxiꞌu nácadxu ca niꞌa naꞌ be̱l-laꞌ dxen chee̱ꞌ,
ne nácadxu ca be̱laꞌ dxen chee̱ꞌ,
ne zrita chee̱ꞌ.
31 Chee̱ le̱ naꞌ tu benneꞌ biu dxal-laꞌ gusane̱ꞌ xra xrne̱ꞌe̱ chee̱ gaque̱ꞌ tuze nen zruꞌule̱ꞌ,
naꞌ dxúpate̱ꞌ xelaque̱ꞌ ca tuze benneꞌ.
32 Da nigá naca na tu da zren da nagache,
naꞌ dxenníaꞌ da caní ca naca chee̱ Cristo nen bi chee̱ꞌ caꞌ.
33 Cáꞌanqueze tu tule leꞌe dxal-laꞌ zriꞌile zrúꞌulale cáte̱ze nazríꞌi cuínale,
naꞌ nuꞌula dxal-laꞌ gape̱ꞌ ba láꞌana benneꞌ chee̱ꞌ.