Nácadxu tuze ne̱ chee̱ Beꞌ Láꞌazxa
4
Chee̱ le̱ naꞌ dxataꞌ xúedaꞌ leꞌe,
nedaꞌ,
xuꞌa lizre xia laweꞌ da dxunaꞌ zrin chee̱ Xránadxu,
chee̱ gunle da xrlátaje ca dxal-laꞌ xelún bénneache ba gucáꞌa Dios le̱ꞌ,
ca gucáꞌaqueze̱ꞌ leꞌe.
2 Le gaca dxexruj lazreꞌ,
ne zriꞌi lazreꞌ.
Le cueza lazreꞌ,
ne le cueꞌ gunne xue chee̱ tule xetule lu xel-la zriꞌi lazreꞌ chee̱le.
3 Le gun ba xuzre gácaquezle tuze,
guchínele xel-la waca chee̱ Beꞌ Láꞌazxa lu xel-la dxebeza zri lazreꞌ da naꞌ dxun na leꞌe tuze.
4 Tuze naca be̱laꞌ dxen chee̱ Cristo da nácadxu.
Tuze naca Beꞌ Láꞌazxa,
Nu naꞌ zúale̱neꞌ tu tudxu.
Tuze da dxuxrén lázredxu,
da naꞌ sidxu lu naꞌ Dios.
5 Tuze Bénneaꞌ naque̱ꞌ Xránadxu.
Tuze da dxeajlí lázredxu.
Tuze ca dxedxúadxu nisa.
6 Tuze Bénneaꞌ naque̱ꞌ Dios,
ne Xra xúgute̱dxu.
Le̱ꞌ naque̱ꞌ Benneꞌ xíchaje̱ xúgute̱dxu.
Dxuléꞌe cuine̱ꞌ lu da dxundxu xúgute̱dxu.
Zúaqueze̱ꞌ lu xichaj lázrdau xúgute̱dxu.
7 Tu tudxu nasidxu tu xel-la waca cha chee̱dxu
ca da nunna Cristo dxiꞌu.
8 Naca na ca naxúaj na lu dizraꞌ láꞌazxa,
dxenná na:
Begüéne̱ꞌ xabáa,
gate gudé bzétaje̱ꞌ benneꞌ guledábague̱ꞌ Le̱ꞌ.
Naꞌ bnézruje̱ꞌ bénneache xel-la waca caꞌ.
9 ¿Bi zéaje̱ na,
dxenná na:
Begüene̱ꞌ?
Zéaje̱ na nédxula bétaje̱ꞌ lu xe̱zr la xu nigá.
10 Bénneaꞌ bétaje̱ꞌ nácaqueze̱ꞌ Bénneaꞌ begüéne̱ꞌ lu da blaudxa lu xabáa chee̱ gaca bea na xuꞌu lu ne̱ꞌe̱ xúgute̱ da de̱,
11 naꞌ be̱nne̱ꞌ cha chee̱dxu xel-la waca chee̱:
Gaca bál-ladxu benneꞌ gubáz chee̱ꞌ.
Gaca guzendxu xezícadxu bénneache dizraꞌ chaweꞌ chee̱ꞌ.
Gácadxu xezícadxu benneꞌ dxuxúedxu bi chee̱ꞌ caꞌ.
Naꞌ gusé̱dedxu-beꞌ xezícadxu.
12 Caꞌan be̱ne̱ꞌ chee̱ bpaꞌadxe̱ꞌ bi chee̱ꞌ caꞌ chee̱ xelunbeꞌ zrin xulucáꞌanabeꞌ xrlátaje bénneache caꞌ zaj naque̱ꞌ zruza niꞌa naꞌ Cristo:
13 Chee̱ gácadxu tuze ca dxéajle̱dxu,
ne ca núnbeadxu Zriꞌine Dios,
chee̱ gácadxu benneꞌ du lazreꞌ,
chee̱ gácadxu cáte̱ze nácaqueze Cristo.
14 Caní nacan chee̱ québedxa gácadxu ca bidu caꞌ,
bi caꞌ dxelezibeꞌ bítete̱ze dizraꞌ da zaj naca na ca tu beꞌ da zeaj na nila naꞌla,
ne québedxa güedxu lataj xelún zréaje benneꞌ we̱n da zrinnaj caꞌ dxiꞌu,
chee̱ quebe xelezí xe̱ꞌe̱ dxiꞌu chee̱ gundxu da cale̱la.
15 Lu xel-la zriꞌi lazreꞌ dxal-laꞌ guchálajdxu da li chee̱ gácadxu cáte̱ze nácaqueze Cristo,
Bénneaꞌ naque̱ꞌ xichaj be̱l-laꞌ dxen da nácadxu dxiꞌu.
16 Le̱ꞌ dxune̱ꞌ tuze xúgute̱ niꞌa naꞌ zaj zria be̱l-laꞌ dxen chee̱ꞌ chee̱ gaca na tu be̱l-laꞌ dxen nazáꞌate̱ chee̱ na,
ne chee̱ xelún zrin xúgute̱ niꞌa naꞌ caꞌ chee̱ gula be̱l-laꞌ dxen naꞌ,
ne gaca na chaweꞌ lu xel-la zriꞌi lazreꞌ.
Xel-la nabán cube da dxunna Cristo dxiꞌu
17 Da nigá dxapaꞌ leꞌe,
ne dxusebagaꞌ leꞌe waláz chee̱ Xránadxu chee̱ québedxa gunle ca dxelún bénneache quebe zaj núnbeꞌe̱ Dios,
benneꞌ caꞌ dxelune̱ꞌ cáte̱ze dxeléquene̱ꞌ xrlátaje,
18 benneꞌ caꞌ zaj nachul-la xichaj lázrdawe̱ꞌ.
Benneꞌ caní quebe zaj nape̱ꞌ xel-la nabán li lazreꞌ da dxunna Dios bénneache:
Zaj nachul-la nanítene̱ꞌ,
ne zaj naca zideꞌ lázrdawe̱ꞌ.
19 Québedxa dxelexeduéꞌene̱ꞌ.
Belezanne cuine̱ꞌ dxelune̱ꞌ da schanniꞌ.
Du lazre̱ꞌ dxelune̱ꞌ xúgute̱ da sban.
20 Quegá caní nazé̱dele leꞌe chee̱ Cristo,
21 che da li xcaꞌ bénnele da dxuchalaj Le̱ꞌ,
ne nusé̱dene̱ꞌ leꞌe ca naca da li da zúale̱ Jesús.
22 Ca naca da be̱nle nédxula,
le guzúa chaláꞌala da gúcale laweꞌ da guzrínnajle lu da sban da guzá lázrele.
23 Dxal-laꞌ gácale benneꞌ cube lu xichaj lázrdaule.
24 Dxal-laꞌ gunle da naca chee̱ benneꞌ cube naꞌ da be̱n Dios leꞌe
chee̱ gunle da naca na xlátaje̱,
ne da li da naca na láꞌazxa.
25 Chee̱ le̱ naꞌ québedxa gun lázrele.
Le nne̱ da li tule xetule laweꞌ da nácadxu niꞌa naꞌ tuze
be̱l-laꞌ dxen chee̱ Cristo.
26 Che dxezráꞌale,
quebe dxal-laꞌ gunle dul-la,
ne quebe zráꞌale schaꞌ.
27 Quebe güele da xriwe̱ꞌ lataj guchixre chee̱ na leꞌe.
28 Bénneaꞌ guque̱ꞌ gubán québedxa dxal-laꞌ cuane̱ꞌ.
Dxal-laꞌ gune̱ꞌ tu zrin chaweꞌ nen niꞌa náꞌqueze̱ꞌ chee̱ gape̱ꞌ da gunézruje̱ꞌ benneꞌ dxelexázrjene̱ꞌ.
29 Quebe nne̱le dizraꞌ cale̱la.
Le guchalaj da naca na xrlátaje chee̱ xelezé̱ tipa benneꞌ xelenne̱ꞌ,
ne xelezíꞌe̱ na ba neza.
30 Quebe guzúa xáchele Beꞌ Láꞌazxa chee̱ Dios,
laweꞌ da zúale̱ Beꞌ leꞌe chee̱ gaca bea na nácale bi chee̱ Dios ca zrindxa zra xezíꞌ lu ne̱ꞌe̱ dxiꞌu.
31 Le guzúa chaláꞌala:
Xel-la dxecuideꞌ,
ne xel-la dxezráꞌa,
ne xel-la xichaj zraꞌa,
ne xel-la wetil-la dizraꞌ,
ne xel-la wechacha,
ne xúgute̱ da zrinnaj.
32 Dxal-laꞌ gácale du lazreꞌ,
ne xache lázrele tule xetule,
ne gunite laule chee̱ tule xetule ca be̱n Dios,
bnite lawe̱ꞌ chee̱le leꞌe laweꞌ da nácale bi chee̱ Cristo.