Le gácale̱ le saꞌ ljwézrele tule xetule
6
Bi bíchaꞌdauꞌ,
che nu benneꞌ ládujla leꞌe nune̱ꞌ dul-la,
leꞌe naꞌ dxedále̱le Beꞌ Láꞌazxa dxal-laꞌ gácale̱le bénneaꞌ chee̱ xezé̱ chúchue̱ꞌ.
Dxal-laꞌ gácale dxexruj lazreꞌ gunle da nigá chee̱ quebe güele lataj da xriwe̱ꞌ cuꞌu xel-la na leꞌe.
2 Le gácale̱ le saꞌ ljwézrele tule xetule lu da naca xua chee̱le,
naꞌ caní gunle ca nadxixruj beꞌe Cristo.
3 Che nu benneꞌ dxéquene̱ꞌ naque̱ꞌ benneꞌ blau,
ne quebe nu naque̱ꞌ,
dxezí xé̱zqueze cuine̱ꞌ.
4 Tu tu benneꞌ dxal-laꞌ naꞌ xánnie̱ꞌ da dxúnqueze̱ꞌ,
naꞌ che nagáꞌana xrlátaje da dxune̱ꞌ,
waca xape̱ꞌ ba láꞌana da dxúnqueze̱ꞌ,
ne quegá da be̱n xetú benneꞌ.
5 De̱ tu xua da nabágadxu chee̱ Cristo,
da dxal-laꞌ gua tu tu benneꞌ.
6 Benneꞌ zua nu dxuse̱de le̱ꞌ ca naca xrtizra Dios dxal-laꞌ gunézruje̱ꞌ lateꞌ da naca chee̱ꞌ chee̱ bénneaꞌ.
7 Quebe si xe̱ cuínale:
Netú benneꞌ gaca quítajle̱ne̱ꞌ Dios.
Da dxaza bénneache,
lé̱queze na xelape̱ꞌ.
8 Che dxune̱ꞌ da dxezá lazreꞌ be̱laꞌ dxen chee̱ꞌ,
da xeziꞌe̱ naca na xel-la gute,
naꞌ che dxune̱ꞌ da dxezá lazreꞌ Beꞌ Láꞌazxa,
da xeziꞌe̱ naca na xel-la nabán zeajlí canna.
9 Caꞌ nacan xcaꞌ,
quebe gusandxu gundxu da xrlátaje laweꞌ da che quebe gate lazrdxu,
lu zra naꞌ quizruj Dios dxiꞌu,
naꞌ xezidxu lazruj chee̱dxu.
10 Chee̱ le̱ naꞌ,
gate nazidxu lataj,
dxal-laꞌ gundxu da xrlátaje chee̱ le saꞌ ljwézredxu,
ne da dxundxa na ba xen,
gundxu da xrlátaje chee̱ le saꞌ ljwézredxu dxeleajlí lazre̱ꞌ Cristo.
Da bzuaj Pablo nen náꞌqueze̱ꞌ
11 Le nnaꞌxque cadite da zriꞌa naca da nigá dxuzúajaꞌ chee̱le nen náꞌquezaꞌ.
12 Benneꞌ caꞌ dxelaca lazre̱ꞌ chugu lu be̱laꞌ chee̱le da naꞌ dxuléꞌe na,
dxelune̱ꞌ na chee̱ xelexegáꞌane̱ꞌ chaweꞌ lau bénneache,
ne chee̱ quebe xeláu ziꞌ xuzre̱ꞌ le̱ꞌ laweꞌ da dxuluchálaje̱ꞌ dizraꞌ chee̱ da be̱n Cristo le̱ꞌe̱ xaga béguaj.
13 Benneꞌ caní,
benneꞌ zaj nadxugu lu be̱laꞌ chee̱ꞌ da naꞌ dxuléꞌe na quebe dxelune̱ꞌ xúgute̱ ca da nadxixruj bea na.
Dxelaca lazre̱ꞌ chugu lu be̱laꞌ chee̱le da naꞌ dxuléꞌe na chee̱ gaca xulucáꞌana szren cuine̱ꞌ ca naca da belune̱ꞌ chee̱le.
14 Quebe dxaca lazraꞌ xucáꞌana szren cuinaꞌ chee̱ tu da be̱naꞌ,
san tuze chee̱ da be̱n Xránadxu Jesucristo le̱ꞌe̱ xaga béguaj.
Ne̱ chee̱ Le̱ꞌ naca xe̱zr la xu nigá ca tu da gate chiaꞌ nedaꞌ,
naꞌ nedaꞌ nacaꞌ ca tu benneꞌ gate.
Québedxa dxezá lazraꞌ da naca chee̱ xe̱zr la xu.
15 Che nácadxu tuze nen Cristo,
quebe bi da ba neza gaca na chee̱dxu che nadxugu lu be̱laꞌ chee̱dxu da naꞌ dxuléꞌe na,
u che quebe nadxugu na.
Da ba neza naca na chee̱dxu che nácadxu benneꞌ cube lu xichaj lázrdaudxu.
16 Dxenabaꞌ lau Dios gunézruje̱ꞌ xel-la dxebeza zri lazreꞌ chee̱ xúgute̱ benneꞌ caꞌ zaj naque̱ꞌ benneꞌ cube caní,
ne xexache lazre̱ꞌ benneꞌ caꞌ da li zaj naque̱ꞌ bi chee̱ꞌ.
17 Laweꞌ da zaj zria lu be̱l-laꞌ dxen chiaꞌ xizraꞌ da dxululéꞌe na nacaꞌ we̱n zrin chee̱ Cristo quebe nu benneꞌ dxal-laꞌ gulálene̱ꞌ nedaꞌ naꞌa,
ne lu da za zaꞌ.
18 Leꞌe,
bi bíchaꞌdauꞌ,
dxenabaꞌ lau Xránadxu Jesucristo gune̱ꞌ chaweꞌ chee̱ xúgute̱le.
Caꞌan gaca na.