Dizraꞌ bze̱be
13
Da nigá naca na da guxunneꞌ lasa xidaꞌ xedajnnáꞌa leꞌe.
Xúgute̱ dxuléꞌe lawe na naca na da li ne̱ chee̱ dizraꞌ chee̱ chupa u chunna benneꞌ xelexeche̱be̱ꞌ.
2 Benneꞌ caꞌ belune̱ꞌ dul-la nédxula,
ne xúgute̱le leꞌe,
dxácate̱ ne zuaꞌ zituꞌ naga zrale,
dxuzendaꞌ leꞌe da xula ca da guchaꞌ leꞌe gate bedajnnáꞌa leꞌe da gudxupeꞌ lasa,
che xidaꞌ xedajnnáꞌa leꞌe da xula quebe gudéaꞌ cáꞌaze ca da ba nunle.
3 Nadxa léꞌele da guléꞌe na dxenné̱ Cristo lu dxuꞌa nedaꞌ,
naꞌ Le̱ꞌ quebe nate niꞌa ne̱ꞌe̱ lu da gune̱ꞌ chee̱le,
san naque̱ꞌ benneꞌ wal-la ládujla leꞌe.
4 Da li gudé̱ꞌe̱ xaga béguaj ca tu benneꞌ nate niꞌa ne̱ꞌe̱,
san naca bane̱ꞌ ne̱ chee̱ xel-la waca chee̱ Dios.
Cáꞌanqueze netuꞌ nate niꞌa nantuꞌ ca da guca chee̱ꞌ,
san laweꞌ da nácantuꞌ tuze nen Le̱ꞌ gaca bantuꞌ ne̱ chee̱ xel-la waca chee̱ Dios chee̱ guntuꞌ zrin chee̱le leꞌe.
5 Le guxúe xanneꞌ cuínale chee̱ gueque beꞌele che da li dxeajlí lázrele Cristo.
Le guxúequeze cuínale.
¿Quebe dxeque beꞌele zua Jesucristo xichaj lázrdaule,
che da li dxeajlí lázrele Le̱ꞌ?
6 Dxebeza lazraꞌ gueque beꞌele quebe nacaꞌ nedaꞌ benneꞌ we̱n lazreꞌ lu da nacaꞌ chee̱ Cristo.
7 Dxenábantuꞌ lau Dios chee̱ quebe bi da cale̱la gunle,
quegá chee̱ guléꞌentuꞌ dxennantuꞌ da li,
san chee̱ gunle leꞌe da xrlátaje,
láqueze dxéquele leꞌe quebe dxennantuꞌ da li.
8 Quebe bi gaca guntuꞌ da dxedábaga na da li,
san tuze da dxácale̱ na da li.
9 Chee̱ le̱ naꞌ dxebentuꞌ gate nate niꞌa nantuꞌ,
che leꞌe nácale benneꞌ wal-la,
naꞌ nábaquezentuꞌ Dios chee̱ gácale dute̱ da dxal-laꞌ xelaca bi chee̱ Dios.
10 Dxuzúajaꞌ chee̱le da nigá nédxula ca xidaꞌ xedajnnáꞌa leꞌe,
chee̱ quebe gun na ba xen gate xidaꞌ,
gácale̱ꞌa benneꞌ snia ca guchínedaꞌ xel-la dxenná bea chiaꞌ,
da be̱nna Xránadxu nedaꞌ chee̱ séquedaꞌ gusegulaꞌ leꞌe lu da naca chee̱ Dios,
ne quegá chee̱ guzría xiꞌa leꞌe.
11 Naꞌa,
bi bichaꞌ,
le sua xel-la dxebé.
Le gaca dute̱ da dxal-laꞌ xelaca bi chee̱ Dios.
Le xue zren ljwézrele.
Le gaca tuze tule xetule,
ne le sua xel-la dxebeza zri lazreꞌ,
naꞌ Dios,
Bénneaꞌ dxunne̱ꞌ dxiꞌu xel-la dxebeza zri lazreꞌ,
ne nazríꞌine̱ꞌ dxiꞌu súale̱ne̱ꞌ leꞌe.
12 Le gugapa diuzre ljwézrele tule xetule,
ne le gunida ljwézrele.
13 Xúgute̱ bi bíchedxu,
bi chee̱ Cristo dxulugape̱ꞌ leꞌe diuzre.
14 Dxaca lazraꞌ gucáꞌana Xránadxu Jesucristo leꞌe chaweꞌ,
ne zriꞌi Dios leꞌe,
ne sua tuze Beꞌ Láꞌazxa nen leꞌe.
¡Caꞌan gaca na!