Da caꞌ Dios bléꞌene̱ꞌ Pablo
12
Da li quebe dxal-laꞌ gucáꞌana szren cuinaꞌ,
san guchálajaꞌ chee̱ da caꞌ bleꞌe Xránadxu nedaꞌ,
ne da caꞌ bleꞌedaꞌ ca naca chee̱ꞌ.
2 Nedaꞌ,
ca tu benneꞌ dxéajle̱ chee̱ Cristo,
ba zeaj chidáꞌ iza guché̱ Dios nedaꞌ xabáa guxunneꞌ.
Quebe nezdaꞌ che guxáꞌa naꞌ dute̱ be̱laꞌ dxen chiaꞌ,
u che cabí.
Dios nézene̱ꞌ.
3 Nezdaꞌ nédaꞌquezaꞌ,
che zuaꞌ lu be̱laꞌ dxen chiaꞌ,
u che cabí,
quebe nezdaꞌ,
tuze Dios nézene̱ꞌ.
4 Guché̱ Dios nedaꞌ tu xabáa chee̱ꞌ,
naga bendaꞌ dizraꞌ bagache da quebe naca chee̱ bénneache xelenné̱ꞌ ca zaj naca na.
5 Waca gucáꞌana szrenaꞌ tu benneꞌ caní,
san quebe gucáꞌana szren cuínaquezaꞌ,
che quebe naca na chee̱ xel-la nate niꞌa naꞌ chiaꞌ.
6 Láqueze che gaca lazraꞌ gucáꞌana szren cuinaꞌ quebe gaca na tu da xálaze,
laweꞌ da gaca na tu da li.
Quebe gunaꞌ na chee̱ quebe nu guéquene̱ꞌ nácadxaꞌ ca da gaca léꞌene̱ꞌ nacaꞌ,
u ca da gaca xenne̱ꞌ da dxenníaꞌ.
7 Da caní bleꞌe Xránadxu nedaꞌ gulaca na da xebánele̱ꞌe̱dxu,
naꞌ chee̱ quebe gucáꞌana szren cuinaꞌ,
guca chiaꞌ ca tu xecheꞌ naxaze lu be̱laꞌ dxen chiaꞌ da dxuchine Satanás chee̱ guzalaj na nedaꞌ.
8 Chunna lasa gutaꞌ xuedaꞌ Xránadxu gucuase̱ꞌ da dxezacaꞌ.
9 Xránadxu guzre̱ꞌ nedaꞌ:
“Xela zriꞌi lazreꞌ chiaꞌ naca na dute̱ da dxechínenuꞌ laweꞌ da dxuléꞌedxa lau xel-la waca chiaꞌ nen benneꞌ nate niꞌa ne̱ꞌe̱.”
Caꞌ naca,
dxebedaꞌ laweꞌ da nate niꞌa naꞌa chee̱ guléꞌe lau lu be̱laꞌ dxen chiaꞌ xel-la waca chee̱ Cristo.
10 Chee̱ le̱ naꞌ dxebedaꞌ ca naca xel-la nate niꞌa naꞌ chiaꞌ,
ne ca naca dizraꞌ schanniꞌ caꞌ dxelenná bénneache chiaꞌ,
ne ca naca da caꞌ dxexázrjedaꞌ,
ne gate zaj nau ziꞌ xuzreꞌ bénneache nedaꞌ,
ne ca naca da ba xaꞌ caꞌ da dxedéaꞌ ne̱ chee̱ Cristo,
laweꞌ da gate nátedxa niꞌa naꞌa,
dxéquedaꞌ nácadxaꞌ benneꞌ wal-la.
Pablo dxeꞌe̱ gunne xue chee̱ bi chee̱ Cristo zaj zre̱ꞌe̱ Corinto
11 Gucaꞌ ca tu benneꞌ nadá xichaj lázrdaweꞌ gate bcaꞌana szren cuinaꞌ caní,
san leꞌe be̱nle be̱naꞌ na.
Leꞌe naꞌ dxal-laꞌ gucáꞌanale nedaꞌ szren laweꞌ da quebe zacaꞌ látezdxa ca benneꞌ gubáz zren caꞌ,
benneꞌ caꞌ dxéajle̱le,
láqueze quebe bi zacaꞌ nedaꞌ.
12 Zrin be̱naꞌ ládujla leꞌe lu dute̱ xel-la zren lazreꞌ chiaꞌ bleꞌe na da li nacaꞌ gubáz chee̱ Cristo ne̱ chee̱ da dxelunna bea na,
ne xel-la waca caꞌ chee̱ xabáa,
ne da caꞌ dxexebánedxu.
13 ¿Dxéquele leꞌe nácale látezdxa blau ca xezícadxa cueꞌ bi chee̱ Cristo laweꞌ da guzíꞌ lu naꞌa da belunne̱ꞌ chiaꞌ,
naꞌ quebe guzíꞌ lu naꞌa da zaj naca chee̱le?
Le gunite lau nedaꞌ che naca tu da cale̱la quebe be̱nnaꞌ leꞌe lataj bi gúnnale chiaꞌ.
14 Naꞌa ba zuaꞌ xidaꞌ xedajnnáꞌa leꞌe da guxunneꞌ lasa,
ne quebe siꞌ lu naꞌa da zaj naca na chee̱le.
Quebe dxexílajaꞌ da nápale,
san léꞌequeze,
laweꞌ da dxal-laꞌ xulucude xruze xrnaꞌ dumí da xulunézruje̱ꞌ zríꞌine̱ꞌ,
ne quegá xulucude zríꞌine̱ꞌ da xulunézrujbeꞌ xra xrnabeꞌ.
15 Du lazraꞌ guchínedaꞌ dumí chiaꞌ chee̱ gaca chaweꞌ chee̱ bénneꞌdu xuꞌule,
láqueze dxéquedaꞌ gate nazríꞌidxedaꞌ leꞌe,
látezdxa nazriꞌile leꞌe nedaꞌ.
16 Bal-la benneꞌ,
láqueze zaj nézene̱ꞌ quebe bi guzíꞌ lu naꞌa da zaj naca na chee̱le,
dxelenné̱ꞌ gude̱l-laꞌ leꞌe lu da we̱n lazreꞌ.
17 ¿Guzí xe̱ꞌa leꞌe lu naꞌ tu benneꞌ gusel-laꞌ chee̱le?
18 Gutaꞌ xuedaꞌ Tito xídabeꞌ xedajnnáꞌabeꞌ leꞌe,
ne gusel-laꞌ nen le̱beꞌ xetú bi bíchedxu.
¿Guzí xe̱ Tito leꞌe?
¿Quebe be̱ntuꞌ tuze ca be̱ntuꞌ ládujla leꞌe nedaꞌ,
ne Tito,
naꞌ nen tuze Beꞌ Láꞌazxa?
19 Bi bichaꞌ nazriꞌite̱ lazraꞌ,
¿dxéquele dxucáꞌana cuínantuꞌ xrlátaje laule leꞌe?
Dxuchálajle̱ntuꞌ leꞌe lau Dios,
ne lu La Xránadxu Jesucristo.
Xúgute̱ da caní dxennantuꞌ chee̱ gúlale lu da naca chee̱ Dios.
20 Dxezrebaꞌ gate xidaꞌ xedajnnáꞌa leꞌe,
waléꞌedaꞌ leꞌe quebe nácale cáte̱ze dxaca lazraꞌ gácale,
naꞌ leꞌe waléꞌele nedaꞌ quebe nacaꞌ da dxaca lázrele gacaꞌ.
Dxezrebaꞌ dxedíl-lale̱le ljwézrele,
ne nácale xa lazreꞌ,
ne dxezráꞌale ljwézrele,
ne nácale zide lazreꞌ,
ne nácale wetupa dizraꞌ bizruj,
ne dxezí tízrale ljwézrele,
ne dxucáꞌana szren cuínale,
ne dxunle da cale̱la.
21 Dxezrebaꞌ gate xidaꞌ xedajnnáꞌa leꞌe,
Dios gune̱ꞌ xeduéꞌedaꞌ ne̱ chee̱le leꞌe,
da gucuezre na nedaꞌ ne̱ chee̱ zánele leꞌe,
benneꞌ caꞌ dxelúntequeze̱ꞌ dul-la,
ne quebe dxulusane̱ꞌ dxelune̱ꞌ da sban,
ne da dxulucáꞌana sban ljwezre̱ꞌ,
ne da cale̱la da tu dxelúnzqueze̱ꞌ.