Ca naca chee̱ Pablo, ne benneꞌ gubáz caꞌ quebe nasel-la Cristo le̱ꞌ
11
Le guchaga lau nedaꞌ chee̱ nniaꞌ lateꞌ da ca zeaje na.
Ájate̱ze naca na,
le guchaga lau nedaꞌ,
2 laweꞌ da dxéꞌle̱ꞌa gunne xue chee̱le leꞌe lu da nusebaga Dios nedaꞌ,
ne laweꞌ da ba nache̱be lazraꞌ chee̱le gácale zruꞌula Cristo,
dxaca lazraꞌ gudéaꞌ leꞌe lau Le̱ꞌ ca tu nuꞌula cuídeꞌdauꞌ du lazreꞌ súale̱beꞌ benneꞌ chee̱beꞌ.
3 Ca be̱n be̱laꞌ gula naꞌ guzí xe̱baꞌ Eva nen xel-la neze chee̱baꞌ,
dxezrebaꞌ güele lataj nu si xe̱ leꞌe,
naꞌ cuásale lu xichaj lázrdaule chee̱ québedxa gácale du lázrele chee̱ Cristo.
4 Leꞌe dxuchaga laule benneꞌ caꞌ záꞌaque̱ꞌ dxuluchálaje̱ꞌ chee̱ tu Jesús,
benneꞌ nazráꞌ ca Bénneaꞌ bzénentuꞌ leꞌe chee̱ Le̱ꞌ,
ne du lázrele dxezíꞌ lu naꞌle tu beꞌ da nazráꞌ ca Beꞌ naꞌ da ba guzíꞌ lu naꞌle,
ne dxezíꞌ lu naꞌle tu dizraꞌ da nazráꞌ ca naca dizraꞌ chaweꞌ da ba guzíꞌ lu naꞌle.
5 Dxéquedaꞌ quebe zacaꞌ nedaꞌ látezdxa ca benneꞌ gubáz zren caꞌ,
benneꞌ caꞌ zéajle̱le leꞌe.
6 Láqueze quebe gaca guchálajaꞌ xrtándauꞌ,
dxéajniꞌidaꞌ da naꞌ dxuchálajaꞌ chee̱ na,
naꞌ bléꞌentuꞌ caní naca na lu xúgute̱ da ba be̱ntuꞌ.
7 ¿Be̱naꞌ tu da cale̱la gate bzendaꞌ leꞌe dizraꞌ chaweꞌ chee̱ Cristo,
ne quebe bi bchízrujaꞌ leꞌe,
naꞌ be̱n cuinaꞌ dxexruj lazreꞌ chee̱ xegáꞌana szrenle leꞌe?
8 Guca na ca gudawaꞌ dumí chee̱ xezícadxa cueꞌ bi chee̱ Cristo gate guziꞌa da belunne̱ꞌ nedaꞌ chee̱ be̱naꞌ zrin ga zúale leꞌe.
9 Gate naꞌ guzúale̱naꞌ leꞌe,
ne bxázrjedaꞌ,
quebe bi guzíꞌ lu naꞌa da naca chee̱le,
san bi bíchedxu záꞌaque̱ꞌ xe̱zr la xu Macedonia belunne̱ꞌ nedaꞌ ca da guchínnedaꞌ.
Be̱naꞌ ba xuzre quebe bi gunábedaꞌ leꞌe,
naꞌ cáꞌanqueze gunaꞌ.
10 Laweꞌ da núnbeꞌa da li chee̱ Cristo,
quebe zua nu benneꞌ naga nababa xe̱zr la xu Acaya gaca guzague̱ꞌ nedaꞌ chee̱ québedxa gucáꞌana szren cuinaꞌ chee̱ da nigá dxunaꞌ.
11 ¿Bizr chee̱ naꞌ dxenníaꞌ caní?
¿Naca na laweꞌ da quebe nazríꞌidaꞌ leꞌe?
Nézqueze Dios nazríꞌidaꞌ leꞌe.
12 Gúnquezaꞌ ca dxunaꞌ chee̱ quebe gataꞌ lataj chee̱ benneꞌ caꞌ dxelaca lazre̱ꞌ xulucáꞌana szren cuine̱ꞌ laweꞌ da dxeléquene̱ꞌ dxelune̱ꞌ zrin cáte̱ze dxuntuꞌ netuꞌ.
13 Benneꞌ caní zaj naque̱ꞌ gubáz quebe nasel-la Cristo.
Dxelezí xe̱ꞌe̱ bénneache,
ne dxululéꞌe cuine̱ꞌ ca gubáz chee̱ Cristo.
14 Quebe naca da nigá da xebánedxu laweꞌ da Satanásqueze dxuléꞌe cuina na ca tu gubáz chee̱ xabáa zue̱ꞌ lu xel-la naxaníꞌ chee̱ Dios,
15 naꞌ chee̱ le̱ naꞌ dxululéꞌe cuine̱ꞌ ca benneꞌ dxelún da xrlátaje.
Benneꞌ caní xelebía xiꞌe̱ ca ba naca chee̱ benneꞌ dxelún da caní.
Da guzaca Pablo laweꞌ da naque̱ꞌ gubáz chee̱ Cristo
16 Xecha lasa dxapaꞌ leꞌe,
quebe nu benneꞌ dxal-laꞌ guéquene̱ꞌ nadá xichaj lázrdawaꞌ.
Che caꞌan dxéquele leꞌe,
le gunna nedaꞌ lataj guchálajle̱naꞌ leꞌe ca tu benneꞌ nadá xichaj lázrdawe̱ꞌ,
chee̱ gaca gucáꞌana szren cuinaꞌ.
17 Quebe dxapaꞌ leꞌe da nigá lu xel-la dxenná bea chee̱ Xránadxu.
Guchálajaꞌ ca tu benneꞌ nadá xichaj lázrdawe̱ꞌ,
nniaꞌ tu da gucáꞌana szren cuinaꞌ.
18 Laweꞌ da zaj zraꞌ benneꞌ zante̱ dxulucáꞌana szren cuine̱ꞌ lu da zaj naque̱ꞌ chee̱ xe̱zr la xu nigá,
cáꞌanqueze nedaꞌ gucáꞌana szren cuinaꞌ.
19 Laweꞌ da nácale̱ꞌe̱le benneꞌ sina dxuchaga laule du lázrele benneꞌ zaj nadá xichaj lázrdawe̱ꞌ.
20 Dxuchaga laule benneꞌ caꞌ dxelexune̱ꞌ leꞌe ca benneꞌ zaj nadaꞌu,
ne benneꞌ caꞌ dxuluchínene̱ꞌ leꞌe,
ne benneꞌ caꞌ dxelenná béꞌene̱ꞌ leꞌe,
ne benneꞌ caꞌ dxuluzúe̱ꞌ leꞌe chaláꞌala,
ne benneꞌ caꞌ dxelegape̱ꞌ xraga laule.
21 Láqueze dxeduéꞌedaꞌ dxenníaꞌ da nigá,
quebe gucaꞌ benneꞌ dxechugu lazreꞌ chee̱ gunaꞌ ca dxelún xezícadxa benneꞌ.
Naꞌa gacaꞌ lazreꞌ dxugu gunaꞌ caní.
Ba dxelechugu lazreꞌ benneꞌ xezícadxa dxulucáꞌana szren cuine̱ꞌ.
Cáꞌanqueze nedaꞌ xechugu lazraꞌ gunaꞌ na,
láqueze naca
tu da ca zeaje da dxenníaꞌ.
22 ¿Zaj naque̱ꞌ benneꞌ hebreo?
Cáꞌanqueze nedaꞌ nacaꞌ benneꞌ hebreo.
¿Zaj naque̱ꞌ benneꞌ Israel?
Cáꞌanqueze nedaꞌ.
¿Zaj naque̱ꞌ zriꞌine zre sua Abraham?
Cáꞌanqueze nacaꞌ nedaꞌ.
23 ¿Zaj naque̱ꞌ we̱n zrin chee̱ Cristo?
Nácadxaꞌ nedaꞌ we̱n zrin chee̱ꞌ ca benneꞌ caꞌ,
lácala dxuchálajaꞌ ca tu benneꞌ nadá xichaj lázrdawe̱ꞌ gate
dxenníaꞌ da nigá.
Ba be̱ndxaꞌ zrin ca benneꞌ caꞌ.
Ba buluzálajdxa bénneache nedaꞌ ca nu bzálaj benneꞌ caꞌ.
Ba guleguꞌudxa bénneache nedaꞌ lizre xia ca belune̱ꞌ chee̱ benneꞌ caꞌ,
naꞌ zaneꞌ lásate̱ ba guzúaꞌ lu da ste̱be chee̱ xel-la gute.
24 Gazxuꞌ lasa ba belúe benneꞌ judío caꞌ nedaꞌ xide che̱nnu dxua weaj.
25 Chunna lasa beline̱ꞌ nedaꞌ xaga.
Tu lasa belúꞌe̱ nedaꞌ xiaj.
Chunna lasa guxaze da dxedá laweꞌ nísadauꞌ da xuꞌa lu nisa.
Tu lasa,
tu zra tu xe̱la guxuꞌa lu nísadauꞌ.
26 Zaneꞌ lásate̱ guxuꞌa neza,
ne guzúaꞌ lu da ste̱be:
Chee̱ xe̱gu caꞌ,
ne chee̱ gubán caꞌ.
Chee̱ benneꞌ walázr chiaꞌ caꞌ,
ne chee̱ benneꞌ zituꞌ caꞌ.
Guzúaꞌ lu da ste̱be lu xe̱zre,
ne le̱ꞌe̱ xixreꞌ,
ne lu nísadauꞌ,
ne ládujla benneꞌ we̱n lazreꞌ dxelenné̱ꞌ zaj naque̱ꞌ bi bíchedxu.
27 Be̱nle̱ꞌa zrin,
ne guzúaꞌ lu da ziꞌ da xaꞌ.
Zaneꞌ lásate̱ quebe gusiaꞌ dxe̱la.
Gudúnle̱ꞌa,
ne gubílele̱ꞌe̱daꞌ,
naꞌ zaneꞌ lásate̱ be̱naꞌ gubasa.
Catite̱ bexagaꞌ,
ne bexázrjedaꞌ zra lanaꞌ gacuaꞌ.
28 Da zrendxa ca da caní,
ne xezícadxa da guzracaꞌ.
Xúgute̱ zra dxéquedaꞌ ziꞌ laweꞌ da zuaꞌ gunne xue chee̱
xúgute̱ cueꞌ bi chee̱ Cristo.
29 Che nu benneꞌ nate niꞌa ne̱ꞌe̱ lu xel-la dxeajlí lazreꞌ chee̱ꞌ,
cáꞌanqueze nedaꞌ dxéquedaꞌ nate niꞌa náꞌaquezaꞌ.
Che nu benneꞌ dxelune̱ꞌ dxeajchaze̱ꞌ,
nédaꞌqueze dxacaꞌ tul-la.
30 Che dxun na ba xen gucáꞌana szren cuinaꞌ,
gucáꞌana szren cuinaꞌ chee̱ da caꞌ dxululéꞌe na nate niꞌa naꞌa.
31 Dios,
Xra Xránadxu Jesucristo,
Bénneaꞌ naca chee̱ꞌ güe láꞌanatequezdxu Le̱ꞌ,
nézene̱ꞌ dxenníaꞌ da li.
32 Gate guzúaꞌ xe̱zre Damasco,
benneꞌ wnná bea naꞌ dxuneꞌ zrin chee̱ wenná bea Aretas bzre̱ꞌe̱ benneꞌ dxuluxúe̱ꞌ dxa xuꞌu chee̱ xe̱zre naꞌ,
chee̱ xele̱l-le̱ꞌ nedaꞌ.
33 Naꞌ bi bíchedxu caꞌ bululetje̱ꞌ nedaꞌ tu lu xcuite xia ga dxuꞌu leníꞌ chee̱ xuꞌu lu zeꞌe da naxechaj na xe̱zre naꞌ.
Caꞌ guca na,
guláꞌ lu naꞌ benneꞌ caꞌ.