Xel-la dxenná bea napa Pablo laweꞌ da naque̱ꞌ gubáz chee̱ Cristo
10
Nedaꞌ,
Pablo,
dxuzendaꞌ leꞌe da nigá ne̱ chee̱ xel-la dxexruj lazreꞌ,
ne xel-la zriꞌi lazreꞌ chee̱ Cristo.
Dxelenné̱ꞌ nacaꞌ benneꞌ zren lazreꞌ gate zúale̱naꞌ leꞌe,
naꞌ gate zuaꞌ zituꞌ nácale̱ꞌa benneꞌ snia.
2 Dxataꞌ xuedaꞌ leꞌe quebe gunle,
gate xidaꞌ xedajnnáꞌa leꞌe,
gacaꞌ benneꞌ snia nen bal-la benneꞌ ládujla leꞌe,
benneꞌ caꞌ dxelenné̱ꞌ dxuntuꞌ zrin chee̱ Cristo lu be̱laꞌ dxenze chee̱ntuꞌ,
naꞌ zúaquezaꞌ tíl-laquezaꞌ benneꞌ caꞌ.
3 Láqueze nácantuꞌ be̱laꞌ dxen quebe dxedíl-lantuꞌ lu be̱laꞌ dxenze chee̱ntuꞌ,
4 laweꞌ da quebe zaj naca chee̱ be̱laꞌ dxenze da dxuchínentuꞌ lu wedil-la chee̱ntuꞌ,
san zaj napa na xel-la waca chee̱ Dios chee̱ séquentuꞌ guzría xintuꞌ da wal-la caꞌ chee̱ nu naꞌ dxedábagaꞌ netuꞌ.
5 Caꞌan naca,
dxuzría xintuꞌ da dxusebaga bénneaꞌ dxiꞌu,
ne da dxuzúe̱ꞌ lu xel-la dxucáꞌana szren cuina chee̱ quebe xelúnbea bénneache Dios.
Xúgute̱ da zaj xuꞌu lu xichaj bénneache dxuzúantuꞌ lu naꞌ Cristo chee̱ xuluzúe̱ꞌ dizraꞌ chee̱ꞌ.
6 Zuáte̱quezentuꞌ gudentuꞌ xel-la ziꞌ xúgute̱ benneꞌ caꞌ quebe dxuluzúe̱ꞌ dizraꞌ chee̱ꞌ gate naꞌ ba dxuzúale dizraꞌ chee̱ꞌ du lázrele.
7 Leꞌe dxennaꞌle benneꞌ caꞌ cáte̱ze da zaj naque̱ꞌ cúzreze.
Che nu benneꞌ dxéquene̱ꞌ da li naque̱ꞌ bi chee̱ Cristo,
dxal-laꞌ gueque béꞌene̱ꞌ cáte̱ze naꞌ naca le̱ꞌ bi chee̱ Cristo,
cáꞌanqueze nácantuꞌ netuꞌ bi chee̱ Cristo.
8 Láqueze dxuchínedxedaꞌ ca dxal-laꞌ gunaꞌ xel-la dxenná bea chee̱ntuꞌ,
quebe dxeduéꞌedaꞌ laweꞌ da nunna Cristo netuꞌ xel-la dxenná bea naꞌ chee̱ séquentuꞌ gusegúlantuꞌ leꞌe lu da naca chee̱ Dios,
ne quegá chee̱ guzría xintuꞌ leꞌe.
9 Quebe dxaca lazraꞌ guéquele leꞌe dxaca lazraꞌ guchebaꞌ leꞌe ne̱ chee̱ da dxuzúajaꞌ chee̱le.
10 Dxelenné̱ꞌ xiche caꞌ da dxusél-laꞌ zaj naca na snia,
ne wal-la,
san nédaꞌquezaꞌ nacaꞌ benneꞌ nate niꞌa naꞌ,
ne ca dxuchálajaꞌ quebe zácateca.
11 Bénneaꞌ dxenné̱ꞌ da nigá dxal-laꞌ gueque béꞌene̱ꞌ cáte̱ze nacaꞌ lu dizraꞌ dxuzúajaꞌ gate ne zuaꞌ zituꞌ,
cáꞌanqueze gacaꞌ lu da gunaꞌ gate naꞌ súale̱naꞌ leꞌe.
12 Quebe dxexázrentuꞌ gutil-le lé̱bentuꞌ,
u guléꞌe cuínantuꞌ ca zaj naca bal-la benneꞌ caꞌ dxulucáꞌana szren cuine̱ꞌ.
Dxelune̱ꞌ tu da xálaze gate dxelenné̱ꞌe̱ ca da zaj nácaqueze̱ꞌ,
ne dxulutil-le le̱be ljwezre̱ꞌ.
13 Quebe gucáꞌana szren cuínantuꞌ lu da quebe naca chee̱ntuꞌ.
Dios naque̱ꞌ Bénneaꞌ guléꞌene̱ꞌ netuꞌ naga ze lau guntuꞌ zrin,
naꞌ Le̱ꞌ be̱nne̱ꞌ netuꞌ lataj blantuꞌ naga zrale leꞌe lu xe̱zre Corinto.
14 Chee̱ le̱ naꞌ quebe dxedxúajntuꞌ naga ze lau chee̱ntuꞌ,
cáte̱ze gaca na che quebe ne zrintuꞌ naga zrale leꞌe nédxute̱.
Netuꞌ nácantuꞌ benneꞌ nedxu blantuꞌ naga zrale leꞌe núantuꞌ dizraꞌ chaweꞌ chee̱ Cristo.
15 Quebe dxucáꞌana szren cuínantuꞌ lu zrin da zaj nun benneꞌ xula,
san dxebeza lázrentuꞌ cáte̱ze gula xel-la dxeajlí lazreꞌ chee̱le,
waca gúndxantuꞌ zrin ládujla leꞌe gusegúlantuꞌ xel-la dxeajlí lazreꞌ chee̱le,
san guntuꞌ na luꞌule da naca chee̱ntuꞌ.
16 Te naꞌ dxebeza lázrentuꞌ tédxantuꞌ ca naga zrale chee̱ guzénentuꞌ bénneache zaj zre̱ꞌe̱ ga naꞌ dizraꞌ chaweꞌ chee̱ Cristo,
ne quebe chúꞌuntuꞌ naga ba zaj nun zrin xezícadxa benneꞌ caꞌ,
chee̱ quebe gucáꞌana szren cuínantuꞌ lu da ba zaj nune̱ꞌ.